ភ្ជាប់​ទៅ​គេហទំព័រ​ទាក់ទង

យុត្តិធម៌​នៅ​ឆ្ងាយ​ពីអ្នកកាសែត​រងគ្រោះ​នៅឡើយ


អ្នកកាសែត​ចំនួន​១០​នាក់​ដែល​ត្រូវ​បាន​គេបាញ់​សម្លាប់​ដោយ​មិនមាន​ហេតុផល​ច្បាស់លាស់​ក្នុង​រយៈពេល​១៦ ឆ្នាំ​ចុងក្រោយ​នេះ​នៅតែ​ស្ថិត​ក្រោម​ស្រមោល​នៃ​យុត្តិធម៌​នៅ​ឡើយ។

ភ្នំពេញ៖ នៅ​ពេល​ដែល​រដ្ឋាភិបាល​កំពុង​តែ​បោះជំហាន​សន្សឹមៗ​ឆ្ពោះ​ទៅ​គ្រប់គ្រង​អំពើ​ពុករ​លួយដ៏​ធ្ងន់ធ្ងរ​នោះ ​អ្នកកាសែត​ចំនួន១០​នាក់ ​ដែល​ត្រូវ​បាន​គេបាញ់​សម្លាប់​ដោយ​មិនមាន​ហេតុផល​ច្បាស់លាស់​ក្នុង​រយៈពេល​ ១៦ឆ្នាំ​ចុងក្រោយ​នេះ​ នៅតែ​ស្ថិតក្រោម​ស្រមោល​នៃ​យុត្តិធម៌​នៅ​ឡើយ។

មជ្ឈមណ្ឌល​សិទ្ធិមនុស្ស​កម្ពុជា​ទើបតែ​បាន​បង្ហាញ​អត្ដសញ្ញាណ​ជនរងគ្រោះ​ទាំងនោះ​លើ​គេហទំព័រ​របស់​ខ្លួន​កាលពី​សប្ដាហ៍មុន​ដោយ​រំពឹងថា​ នឹង​មាន​ការយកចិត្ត​ទុកដាក់​ឡើងវិញ​ចំពោះ​ភាពស្ងៀម​ស្ងាត់នេះ។

លោក​ អ៊ូ វិរៈ នាយក​មជ្ឈមណ្ឌល​សិទ្ធិមនុស្ស​កម្ពុជា​មាន​ប្រសាសន៍​នៅ​ថ្ងៃ​ច័ន្ទ​នេះ​ថា ​មជ្ឈមណ្ឌល​របស់​លោក​ចង់​ឲ្យ​មាន​ការប្រឹងប្រែងផ្តល់​យុត្តិធម៌​ទៅលើ​ឃាតកម្ម​ខាងលើ​ដោយសារ​តែ​រហូត​មកទល់​ពេល​នេះ​ ពុំទាន់​មាន​ជនទទួល​ខុសត្រូវ​ណាម្នាក់​ត្រូវ​ចាប់ខ្លួន ​ហើយ​ក៏នៅ​មិនមាន​ការផ្ដល់​យុត្តិធម៌​ដល់​ជនរង​គ្រោះ​ណាម្នាក់​នៅ​ឡើយទេ។

«គឺជា​អ្វីមួយ​ដែល​យើង​ចង់​កន្ដ្រាក់​អារម្មណ៍​សាធារណជន​ និង​កន្រ្ដាក់​អារម្មណ៍​ក្រសួង​ពាក់ព័ន្ធ​ក្នុង​ការធ្វើការស៊ើប​អង្កេត​ សូម​មេត្ដា​កុំភ្លេច។ ហើយ​បើសិន​ជាក្នុង​ដប់​ករណី​យើង​អត់បាន​រកឃើញ​មួយ​សោះ​ វាឆ្លុះ​បញ្ចាំង​ថា ​រដ្ឋាភិបាល​គ្មាន​ឆន្ទៈ ​ឬ​រដ្ឋាភិបាលគ្មាន​សមត្ថភាព»។

នៅ​ក្នុង​ចំណោម​អ្នកកាសែត​ទាំងនោះ​ មាន​អ្នកកាសែត​ ដែល​មាន​និន្នាការ​ទៅរក​គណបក្ស​ជំទាស់​សម រង្ស៊ី ​ច្រើន​ជាង​គេ​ ដូចជា​លោក​ធន ប៊ុនលី ​អតីត​ចាងហ្វាង​កាសែត​ឧត្តមគតិ​ខ្មែរ​ លោក​ជេត ដួងតារាវុធ ​អ្នក​យកព័ត៌​មាន​សម្រាប់​កាសែត​អ្នកប្រយុទ្ធ​ និង​លោក​ឃឹម សំបូរ​ អ្នក​យកព័ត៌មាន​ឲ្យកាសែត​មនសិកា​រ​ខ្មែរ​ជាដើម។ បន្ទាប់​មក​គឺ​អ្នកកាសែត​គាំទ្រ​គណបក្ស​រាជានិយម​ហ្វ៊ុនស៊ីនប៉ិច​ និង​អ្នក​យកព័ត៌​មាន​ឲ្យ​កាសែត​គាំទ្រ​រដ្ឋាភិបាល​កោះសន្តិភាព ​គឺ​លោក ​សៅ ច័ន្ទតារា។

ពួក​គេ​ត្រូវ​បាន​បាញ់​សម្លាប់​ និង​វាយ​ប្រហារ​ដោយ​គ្មានញញើត​និង​ដោយ​ប្រកៀក​ចាប់​តាំងពី​ឆ្នាំ១៩៩៤ ​ដល់​ខែកក្កដា ​ឆ្នាំ២០០៨។

លោក​ឧត្តម​សេនីយ៍​ ខៀវ សុភ័គ​ អ្នកនាំពាក្យ​ក្រសួង​មហាផ្ទៃ​មាន​ប្រសាសន៍​ថា ​ការស៊ើប​អង្កេត​លើ​ករណី​ទាំងដប់​នោះ​មិនទាន់​ត្រូវ​បិទ​បញ្ចប់​នោះ​ទេ។

«ក្រសួង​មហាផ្ទៃ​មិនទាន់​បាន​បិទ​បញ្ជី​ក្នុង​ករណី​ឃាតកម្ម​ខាង​លើ​នោះ ​ដរាបណា​ជន​ល្មើសមិ​នទាន់​ត្រូវបាន​សមត្ថកិច្ច​ស្វែងរក​ឃើញ ​និង​ចាប់ខ្លួន​បញ្ជូន​ទៅ​តុលាការ។ ហើយ​ទន្ទឹម​នឹង​នេះ​ខ្ញុំ​សូម​អំពាវ​នាវជាថ្មី​ម្ដង​ទៀត​ដល់​គ្រួសារ​ជនរងគ្រោះ​ក៏​ដូច​ជា​សាក្សីឃើញ​ផ្ទាល់​ភ្នែក​មេត្តា​បន្ដ​ផ្ដល់​នូវ​ព័ត៌មាន​ និង​ភស្ដុតាងផ្សេងៗ​ ប្រសិន​បើ​គាត់​ឃើញ​ជាក់ស្ដែង​ ដើម្បី​ជា​ជំនួយ​បន្ថែមទៀត​ដល់​ការស៊ើបអង្កេត​របស់​សមត្ថកិច្ចរបស់​យើង»។

លោក​ ខៀវ សុភ័គ ​បញ្ជាក់​ថា​ នៅ​ក្នុង​ខណៈនេះ ​ក្រសួងមហាផ្ទៃ​ទើបតែ​បាន​ទទួល​របាយ​ការណ៍​បឋម​ដែល​ប្រមូល​បាន​ពី​កន្លែង​កើតហេតុ​តែប៉ុណ្ណោះ។ នៅក្នុង​នោះ​មាន​ការកំណត់​អំពី​ប្រភេទ​អាវុធ​ និងទំនាក់​ទំនង​របស់​ជនល្មើស។ លោក​មាន​ប្រសាសន៍​ថា​ ក្រុម​សមត្ថកិច្ច​ត្រូវ​ការ​ពេលវេលា​បន្ថែម​ទៀត ហើយ​លោក​នៅតែ​សង្ឃឹម​ថា ​ជនល្មើស​នឹង​ត្រូវ​ចាប់ខ្លួន។

លោក​ ហម ស៊ុនរិទ្ធ​ នាយករង​អង្គការ​ការពារសិទ្ធិមនុស្ស លីកាដូ ​មាន​ប្រសាសន៍​ថា ​លោក​មិនទាន់​បាន​ឃើញ​ការជឿន​លឿន​ទៅមុខ​ក្នុង​ការស៊ើបអង្កេត​ករណី​ខាងលើ​នៅ​ឡើយ​ទេ ​បើ​ទោះបី​ជា​មាន​ការអះអាង​ថា​ការ​ស៊ើប​អង្កេត​នៅតែ​បន្ដ​នោះ។

លោក ​យឹម សុវណ្ណ ​តំណាងរាស្រ្ត​និង​ជា​អ្នកនាំពាក្យ​គណបក្ស​សម រង្ស៊ី​ បាន​ស្តីបន្ទោស​ចំពោះ​ការមិន​អើពើ​របស់​រដ្ឋាភិបាល​ទៅដល់​ឃាតកម្ម​ទាំងនោះ។

«អ្នកដឹកនាំ​គេ​មិនខ្វល់​ទេ។​ គេមិន​ចង់​រក​យុត្តិធម៌​ជូន​ប្រជា​ពលរដ្ឋ​ទេ​ ពីព្រោះ​គេដឹង​ថា ​វា​មាន​អ្នកមានអំណាច​នៅ​ពីក្រោយ​ខ្នង​ អ្នកសម្លាប់​អ្នកកាសែត អ្នក​សម្លាប់​អ្នកប្រឆាំង។ ​យើង​មាន​ការសោកស្តាយ​ដោយ​យើង​មានការ​យល់​ឃើញ​ថា ​បើសិន​ជាយើង​នៅ​បន្ត​វប្បធម៌​គ្មាន​ទោសពៃរ៍​បែប​នេះ ​យើង​មិនអាច​បន្ត​កសាង​សង្គម​ប្រជាធិបតេយ្យ​មួយ​បានទេ»។

ផ្ទុយ​ទៅ​វិញ ​លោកខៀវ កាញារីទ្ធ ​រដ្ឋមន្រ្តី​ក្រសួង​ព័ត៌មាន​និង​ជាអ្នក​នាំពាក្យ​រដ្ឋាភិបាល​បាន​ឆ្លើយតប​ទៅ​វិញ​ថា​ តុលាការ​នៅតែ​បន្ត​ចាត់ការ​ទៅលើ​សំណុំ​រឿង​ទាំងនោះ។

«គឺយើង​កំពុង​រក ​បាន​ន័យថា ​មកដល់​ឥឡូវនេះ​ តុលាការ​អត់​បាន​បិទ​សំណុំរឿង​មួយ​ណាទេ។ ​បើតាម​ខ្ញុំ ចាំៗ​តែ​ចាងហ្វាង​កាសែតអន្តរាគមន៍​ដែល​បិទ​ពីព្រោះ​រឿង​បញ្ហា​ចរាចរណ៍​ហ្នឹង​ ប៉ុន្តែ​គេចង់​លើក​ជា​បញ្ហា​នយោបាយ។ ​ក្រៅ​ពីហ្នឹង​ទៀត​គឺ​យើង​បើក​ចំហរ ​ប៉ុន្តែ​បញ្ហា​គឺ​ភាគ​ច្រើន​គ្រួសារ​គេ​អត់​សហការ​ទេ​ អ្នក​ខ្លះ​ទៀត​គ្រួសារ​បាន​ចេញ​ទៅ​ក្រៅ​ប្រទេស​បាត់​អស់​ហើយ​ហ្នឹង»។

លោក​ខៀវ កាញារីទ្ធ​ ក៏បាន​ស្វែងរក​ការជួយ​សហការ​ពី​ក្រុមគ្រួសារ​ជនរងគ្រោះ​ និង​សាក្សី​ផងដែរ។

រដ្ឋាភិបាល​កម្ពុជា​នៅក្នុង​រយៈពេល​ចុង​ក្រោយ​នេះ​បាន​បង្ហាញ​នូវ​ដំណើរ​ឆ្ពោះ​ទៅ​រក​ការប្រយុទ្ធ​ទប់ទល់​ទៅ​នឹង​អំពើ​ពុករលួយ​ ដែល​ត្រូវ​បាន​គេរិះគន់​ថា ​បាន​ចាក់​ឫស​យ៉ាង​រឹងមាំ​នៅក្នុង​ប្រទេស​បន្ទាប់​ពី​មាន​ការទទូច​ពី​សហគម​ន៍អន្តរជាតិ ​និង​ម្ចាស់​ជំនួយ​ជាច្រើន​ឆ្នាំ​កន្លង​មក។

ព្រះរាជអាជ្ញា​សាលាដំបូង​នៅ​ខេត្ត​ពោធិ៍សាត់​ ត្រូវបាន​ចាប់ខ្លួន​ និង​ចោទប្រកាន់​ រីឯ​មន្រ្តី​ទទួល​ខុស​ត្រូវ​ផ្នែក​ប្រមូល​ពន្ធ​ចំនួន​៣០នាក់​កំពុង​តែ​ប្រឈម​មុខទៅ​ នឹង​ចំណាត់ការ​តាម​ផ្លូវ​ច្បាប់។

ដោយ​ឡែក​នៅក្នុង​របាយការណ៍​ឆ្នាំ ២០១០របស់​អង្គការ​ការពារសិទ្ធិ​មនុស្ស​ LICADHO ​បាន​លើកឡើង​ថា​ អ្នកកាសែត​យ៉ាងតិច​ចំនួន​១៦នាក់​ត្រូវ​ចោទប្រកាន់​ពីបទ​ជំរិត​ទារ​ប្រាក់​ ក្លែងបន្លំ​ និង​ការបរិហាកេរ្តិ៍ ​បន្ទាប់​ពី​ពួកគេ​បាន​ធ្វើការ​ស៊ើបអង្កេត​ទៅលើ​បទល្មើស​ពុករលួយ​ព្រៃឈើ​នៅតាម​មូលដ្ឋាន។

យ៉ាងណា​ក៏ដោយ ​ក្រុម​មន្រ្តី​អង្គការ​សង្គម​ស៊ីវិល​លើក​ឡើងថា ​អ្នកកាសែត​ចំនួន​១០នាក់​ ដែល​ទទួល​រង​អំពើ​ហិង្សា​យ៉ាង​ឃោរឃៅ​ គួរតែ​ទទួល​បាន​នូវយុត្តិធម៌។

លោក​ អ៊ូ វិរៈ​ ​មាន​ប្រសាសន៍ថា ​អំពើ​និទណ្ឌភាព​ចំពោះ​ឃាតក​ម្ម​មក​លើ​អ្នកកាសែត​ បណ្តាល​ឲ្យ​អ្នក​យក​ព័ត៌មាន​អាជីព​មាន​ការរួញរា​នៅក្នុង​ការបំពេញ​វិជ្ជា​ជីវៈ​របស់​ខ្លួន ​ធ្វើ​ឲ្យ​ប៉ះពាល់​ទៅដល់​សិទ្ធិ​ផ្តល់​ព័ត៌មាន​ និង​សិទ្ធិ​ទទួល​ព័ត៌មាន​របស់​ពលរដ្ឋ​ខ្មែរ។

ម្យ៉ាង​វិញទៀត​ លោក​ អ៊ូ វិរៈ ​បញ្ជាក់ថា ​និទណ្ឌភាព​ចំពោះ​អំពើ​ឃោរឃៅ​ប្រឆាំង​នឹង​អ្នកកាសែត​និង​ធ្វើ​ឲ្យ​ប៉ះពាល់​ទៅដល់​ការគាំទ្រ​ដល់​យន្តការ​នៃ​ដំណើរការ​ប្រជាធិបតេយ្យ​នៅក្នុង​ប្រទេស​កម្ពុជា៕

XS
SM
MD
LG