ភ្ជាប់​ទៅ​គេហទំព័រ​ទាក់ទង

មូលហេតុនៃ​ការរត់​ជាន់​គ្នាដែល​បណ្តាល​ឱ្យ​មនុស្ស​ស្លាប់​នៅមិន​ច្បាស់​លាស់


ជន​រង​គ្រោះ​នៃ​ការ​ផ្អើល​រត់​ជាន់​គ្នា​ត្រូវ​បាន​គេ​លើក​ដាក់​ក្នុង​រថយន្ត​សង្គ្រោះ​មួយ​នៅ​​ទី​ក្រុង​ភ្នំពេញ​ ក្នុង​ឧបទ្ទវហេតុ​មួយ​ដែល​នាយករដ្ឋមន្ត្រី​ខ្មែរ​ហៅ​ថា​ជា​ សោកនាដកម្ម​អាក្រក់​បំផុត​តាំង​ពី​សម័យ​ខ្មែរ​ក្រហម​មក។

មាន​ចំនួន​មនុស្ស​ជា​ច្រើន​រយ​នាក់​ បាន​ស្លាប់​បាត់​បង់​ជីវិត​និង​យ៉ាង​តិច​៤១០​នាក់​បាន​រងរបួសក្នុង​ឧបទ្ទវហេតុ​ផ្អើល​រត់​ជាន់​គ្នា​ក្នុង​ តំបន់​ រម្មណីយ​ដ្ឋាន​កោះ​ពេជ្រ​ ក្នុង​ទី​ក្រុង​ភ្នំពេញ​ នៅវេលា​យប់​ថ្ងៃ​បញ្ចប់​នៃ​ព្រះរាជ​ ពិធី​បុណ្យ​អុំ​ទូក​ ដែល​មាន​មនុស្ស​ម្នា​ជា​ច្រើន​លាន​នាក់​មក​ពី​តាម​បណ្តាខេត្ត​ ក្រុង​ចូល​រួម។​ លោក​ ហេង​ រស្មី​នៃ VOA ​ផ្នែក​ខេមរៈ​ភាសា​បាន​ចុះ​ទៅ​ កាន់​ទី​ កន្លែង​ កើត​ហេតុ​ ដោយ​ផ្ទាល់​ កាល​ពី​ម៉ោង​ ជិត​១១​យប់​ ភ្លាមៗ​ក្រោយ​ ពីហេតុការណ៍​ បាន​ កើត​ឡើង​ ហើយ​លោក​បាន​សម្ភាស​សាក្សី​ ឃើញ​ហេតុ​ ការណ៍​ផ្ទាល់​ភ្នែក​ និង​សម្ភាស​ជា​មួយ​មន្ត្រី​ប៉ូលីស​ មន្តី្រ​មូល​ដ្នាន​ និង​គ្រួសារ​ ជន​រង​គ្រោះ។

“រហូត​មក​ដល់​ម៉ោង​វីអូអេ​កំពុង​ផ្សាយ​នេះ ​(ម៉ោង៥​ព្រឹក​ថ្ងៃ​អង្គារ៍) ​មាន​ចំនួន ​អ្នក​ ស្លាប់​បាន​កើន​ ឡើង​ដល់​៣៤៥​នាក់​ហើយៗ​ និង​អ្នក​របួស​ ហ្នឹង​មាន​ចំនួន​ ៤១០​នាក់​បាទ”។​ ​នេះ​បើ​តាម​ការ​បញ្ជាក់​របស់​លោក​ ហេង​ រស្មី​អ្នក​យក​ព័ត៍មាន​ VOA​ ដែល​បាន​ដក​ស្រង់​សំដី​លោក​ ខៀវ ​កញ្ញា​រិទ្ធអ្នក​នាំ​ពាក្យ​ របស់​រដ្ឋាភិបាល​ ភ្លាមៗ​មុន​ការ​ផ្សាយ​។​ លោក​ ហេង ​រស្មី​ថ្លែង​យ៉ាង​ដូច្នេះ​ក្នុង​កិច្ច​សន្ទនា​ តាម​ ទូរស័ព្ទ​ដោយ​ផ្ទាល់​ជាមួយ​លោក​ ខេមរា​ក្នុង​កម្មវិធី​ផ្សាយ​របស់​ VOA នៅ​ព្រឹក​ ថ្ងៃ​អង្គារ៍។

មាន​ការ​អះអាង​ចម្រុះ​គ្នា​អំពី​ឧបទ្ទវ​ហេតុ​នេះ​។ លោកហេង​ រស្មី​បាន​អះអាង​ថា៖

“បើ​តាម​សាក្សី​មួយ​ចំនួន​បាន​និយាយ​ថា​ការ​ស្លាប់​ដែល​បណ្តាល​មក​ពី​ការ​ផ្អើល​ជាន់​គ្នា​នេះ​គឺ​ដោយ​សារ​ការ​ឆក់​ភ្លើង​អគ្គីសនី​ទៅ​លើ​មនុស្ស​ដែល​បានដើរ​ឆ្លងកាត់​នៅ​លើ​ស្ពាន​កោះ​ពេជ្រ​នេះ​ ក៏ប៉ុន្តែ​មាន​សាក្សី​ជា​ច្រើន​ផ្សេង​ ទៀត​បាន​អះអាង​ ថា​ ដោយ​សារ​មាន​មនុស្ស​ច្រើន​ពេក​ ក៏​មាន​ប្រជា​ពលរដ្ឋ​ខ្លះ​បាន​បង្អើល​ថាស្ពាន​នេះ​និងបាក់​បន្តិច​ទៀត​នេះ​ ហើយ​បាន​ធ្វើ​ឱ្យពួក​គាត់​ហ្នឹង​បាន​ស្លន់​ស្លោ​រហូត​ដល់​បង្កឱ្យមាន​ការ​រត់​ជាន់​គ្នា​ស្លាប់​យ៉ាង​អាណោច​អាធម​យ៉ាង​ដូច្នេះ​ ហើយ​ក៏​មាន​ការ​លើក​ឡើង​ផង​ដែរ​ពី​សាក្សី​មួយ​ចំនួន​ផ្សេង​ទៀត។ គាត់​និយាយ​ថា​ នៅ​លើ​កណ្តាល​ស្ពាន​ហ្នឹង​មាន​ក្មេង​ស្ទាវ​មួយ​ក្រុម​បាន​ឈ្លោះ​គ្នា​រួច​ហើយ​បាន​បង្ក​ឱ្យមាន​ការ​វាយ​ប្រតប់​គ្នា​ធ្វើឱ្យ​មាន​ក្មេង​ភាគី​ម្ខាង​ទៀត​ហ្នឹង​បាន​រត់​ រត់​ហើយ​បាន​ជា​បង្កឱ្យមាន​ការ​ផ្អើល​ ហើយ​ធ្វើឱ្យមាន​ការស្លាប់​និង​ របួស​កើន​ ឡើង​ដូច​ខ្ញុំ​បាន​ជំរាប”។

លោក ​ហេង​ ​រស្មី​បា​ន​អះអាង​ថាពុំ​ទាន់​មាន​ការ​បញ្ជាក់​ផ្លូវការ​ថា​មូល​ហេតុ​អ្វី​ បាន​ ជា​បញ្ហា​នេះ​កើត​ឡើង​ ឥឡូវ​នេះ​រដ្ឋាភិបាល​កំពុង​បង្កើត​គណៈ​កម្មាការ​នានា​ ដោះ​ស្រាយ​សោក​នាដ​កម្ម​នេះ​ ហើយ​លោក​នាយក​រដ្ឋ​មន្ត្រី​ហ៊ុន​ សែន​បាន​ ប្រកាស​អំពី​ការ​ចូល​រួម​មរណៈ​ទុក្ខដល់​ពលរដ្ឋ​ដែល​ស្លាប់​ និង​ក្រុម​គ្រួសារ។

លោក​ ហេង ​រស្មី​បាន​ដក​ស្រង់​អត្ថា​ធិប្បាយ​មក​បញ្ជាក់​ថា៖​ “លោក​នាយក​រដ្ឋមន្ត្រី​ហ៊ុន​ សែន​បាន​ចាត់​ទុក​ថាការ​ស្លាប់​របស់​ប្រជា​ពលរដ្ឋ​ខ្មែរ​ នេះ​គឺ​ជា​សោកនាដកម្ម​លើក​ទីពីរ​បន្ទាប់​ពី​របប​ខ្មែរ​ក្រហម”។​ លោក ​ហ៊ុនសែន​បាន​បន្ថែម​ដែរ​ថា​៖​ “ការ​ស្លាប់​របស់​ប្រជា​ពលរដ្ឋ​នេះមិន​មែន​មក​ពី​ការ វាយ​ប្រហារ​ភេរវកម្ម​នោះ​ទេ”។ នេះ​បើ​តាម​ការ​អះអាង​របស់​លោក​ ហេង រស្មី​ដែល​បាន​ដក​ស្រង់ សម្តី​របស់​លោកហ៊ុន សែន​ ផ្សាយ​តាម​ទូរទស្សន៍។

លោក ​ហេង ​រស្មី​បាន​បន្ថែម​ថាក្រុម​គ្រួសារ​សាច់​ញាតិ​ដែល​ចង់​រក​បង​ប្អូន​ កូន​ចៅ​អាច​ទៅ​រក​នៅ​សាលា​ក្រុង​ភ្នំពេញ​ ស្វែង​រក​លេខ​តាម​ទូរស័ព្ទ​តាម​រយៈ​ ទូរ​ទស្សន៍​ដើម្បី​សាក​សួរ​ព័ត៍មាន។

ឥឡូវ​វិល​មក​បញ្ហា​នៅ​កោះ​ពេជ្រ​វិញ​គឺ​ថា​ពលរដ្ឋ​បាន​មក​កាន់​នៅ​កោះពេជ្រ​ដើម្បី​សាក​សួរ​រក​ក្រុម​គ្រួសារ​តែ​អាជ្ញាធរ​បាន​ចង្អុល​ទៅ​សាលា​ក្រុង​និង​មន្ទីរ​ពេទ្យ​កាល់​ម៉ែត​ មន្ទីរ​ពេទ្យ​លោកសង្ឃ​ មន្ទីរ​ពេទ្យ​រុស្សី។

លោក​ ហេង​ រស្មី​បាន​បញ្ជាក់​ផង​ដែរ​ថា៖​ “ព័ត៍មាន​ចុង​ក្រោយ​ដែល​ យើង​ទើប​ ទទួល ​បាន​គឺ​ថា​អាជ្ញាធរ​ទើប​តែ​បាន​រក​ឃើញ​កុមារ​ពីរ​នាក់​មាន​អាយុ​៣ទៅ​៤​ឆ្នាំ​ ដែល​ នៅ​រស់​រាន​មាន​ជីវិត​ នៅ​ក្បែរ​ស្ពាន​កោះ​ពេជ្រ​នេះ”។

លោក​ ហេង​ រស្មី​បាន​អះអាង​តាម​ដែល​លោក​បាន​ឃើញ​ផ្ទាល់​ភ្នែក​គឺ​ថាអ្នក​ស្លាប់​និង​អ្នក​រង​របួស​ភាគ​ច្រើន​មាន​អាយុ​ចាប់​ពី​១៧ដល់២៥​ឆ្នាំ។

លោក​បញ្ជាក់​ទៀត​ថា​ក្រោយ​កើត​ហេតុ​ប៉ុន្មាន​ម៉ោង​តំបន់​កោះពេជ្រ​ត្រូវ​អាជ្ញាធរ​ដាក់​បំរាម​មិន​ឱ្យ​មាន​ការ​ឆ្លង​កាត់​ ដើម្បី​ទុក​តំបន់​នោះ​ស៊ើប​អង្កេត។

XS
SM
MD
LG