លោកនាយករដ្ឋមន្ត្រី ហ៊ុន សែន នៃប្រទេសកម្ពុជា កំពុងចូលរួមវេទិកាវិនិយោគពិភពលោកជាមួយមេដឹកនាំមកពីបណ្តាប្រទេសចំនួន ១៦០ និងអ្នកវិនិយោគ ឬ ដៃគូសំខាន់ៗជាច្រើន ដើម្បីពិភាក្សាអំពីការលើកកម្ពស់វិស័យវិនិយោគដែលមានការធ្លាក់ចុះខ្លាំងរហូតដល់ទឹកប្រាក់រាប់លានលានដុល្លារ ក្នុងពិភពលោក។
វេទិកាដែលរៀបចំដោយ អ.ស.ប នេះ ត្រូវបានគេដឹងថា មានអ្នកចូលរួមជាង ៥.០០០នាក់ ជាប្រមុខដឹកនាំរដ្ឋាភិបាល វិស័យឯកជន ដៃគូជាអង្គការនានា ដើម្បីជជែកគ្នាពីរឿងក្តីបារម្ភនានាទាក់ទងនឹងការធ្លាក់ចុះវិនិយោគ និងផលប៉ះពាល់ទាំងឡាយ ដែលពិបាកឲ្យពិភពលោកសម្រេចបានគោលដៅអភិវឌ្ឍប្រកបដោយចិរភាពឆ្នាំ ២០៣០។
លោក Mukhisa Kituyi អគ្គលេខាធិការអ.ស.ប ប្រចាំវេទិកាវិនិយោគពិភពលោកអ.ស.បបានស្វាគមន៍ក្រុមអ្នកចូលរួមក្នុងសុន្ទរកថាបើកកិច្ចប្រជុំ វេទិកាវិនិយោគពិភពលោកអ.ស.បឆ្នាំ២០១៨នេះ។
«ការចេញមកចូលរួមជាប្រវត្តិសាស្ត្រនៅក្នុងវេទិកាពិភពលោកឆ្នាំនេះ គឺជាសក្ខីកម្ម ចំពោះតម្រូវការចាំបាច់សម្រាប់វេទិកាពិភពលោកនេះដើម្បីដោះស្រាយវិនិយោគតាមការអភិវឌ្ឍន៍ប្រកបដោយចិរភាព»។
លោកបានបង្ហាញថា ការធ្វើទំនាកទំនងរវាងវិស័យឯកជននិងរដ្ឋ គឺជារឿងសំខាន់បំផុត។ នៅក្នុងប្រទេសមួយចំនួនក្នុងតំបន់អាស៊ី និងអាហ្រ្វិក ត្រូវគេប្រកាសឲ្យដឹងក្នុងវេទិកានេះពីការដែលបានទទួលរង្វាន់ចំពោះការបង្កើនបច្ចេកវិជ្ជាផ្នែកអប់រំ បង្កើនថាមពលអាចប្រើឡើងវិញ ការងារធ្វើ និងការបំឡែងកាកសំណល់ទៅជាអាហាររូបឋមជាដើម។
វេទិកានេះ ក៏បានបង្ហាញឲ្យឃើញពីសារៈសំខាន់នៃដៃគូរវាងរដ្ឋនិងវិស័យឯកជនដើម្បីប្រែក្លាយការវិនិយោគទៅជាការវិនិយោគប្រកបដោយការទទួលខុសត្រូវ ហើយថែមទាំងមានការគោរពសិទ្ធិមនុស្សច្បាប់បរិស្ថាននិងក្រម សារពើពន្ធជាដើម។
លោកនាយករដ្ឋមន្ត្រី ហ៊ុន សែន នៃប្រទេសកម្ពុជា ក៏គ្រោងថ្លែងសុន្ទរកថា មួយនៅថ្ងៃនេះ ទៅកាន់វេទិការបស់អ.សប.ដែរ៕
