ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព្រះ​មហា​ក្សត្រ​ខ្មែរ​យាង​ទៅ​បំពេញ​ព្រះ​រាជ​ទស្សន​កិច្ច​នៅ​ជប៉ុន


ព្រះ​មហា​ក្សត្រ​ខ្មែរ​បាន​យាង​ទៅ​បំពេញ​ព្រះ​រាជ​ទស្សន​កិច្ច​នៅ​ប្រទេស​ជប៉ុន​នៅ​ថ្ងៃ​អាទិត្យ​នេះ​ ដោយ​ក្រុម​មន្ដ្រី​កម្ពុជារំពឹង​ថា ​គឺ​ជា​ដំណើរ​ទស្សន​កិច្ច​ដែល​នឹង​ជួយ​ពង្រឹង​ស្ថាប័ន​រាជា​និយម​នៃព្រះ​រាជា​ណាចក្រ​ទាំង​ពីរ។

លោក​ គង់ ​សុឋាន​រិទ្ធ​ រាយ​ការណ៍​ជូន​ពី​ទី​ក្រុងភ្នំពេញដូច​ត​ទៅ៖

ព្រះ​មហា​ក្សត្រ​ខ្មែរ​ ព្រះ​បាទ​ព្រះ​បរមនាថ ​នរោត្តម ​សីហមុនី ​បាន​យាង​ចាក​ចេញ​ទៅ​បំពេញ​ ព្រះ​រាជ​ទស្សន​កិច្ច​ជា​ផ្លូវ​រដ្ឋ​សម្រាប់​រយៈ​ពេល​៥​ថ្ងៃ​ នៅ​ព្រះ​រាជាណា​ចក្រ​ជប៉ុន ​នៅ​ថ្ងៃ​អាទិត្យ​នេះ​ ដែល​មន្ដ្រី​ផ្លូវ​ការ​របស់​ប្រទេស​កម្ពុជារំពឹង​ថា ​ព្រះ​រាជ​ទស្សន​កិច្ច​នឹង​ជួយ​ពង្រឹង​បន្ថែម​នូវ​ទំនាក់​ទំនងនៃ​ប្រទេស​ទាំង​ពីរ។

ព្រះ​រាជ​ទស្សន​កិច្ច​នេះ​ធ្វើ​ឡើង​តាម​ការ​អញ្ជើញ​របស់​ព្រះ​ចៅ​អធិរាជ​របស់​ប្រទេស​ជប៉ុន ​អាគីហ៊ីតូ។

ប្រមុខ​រដ្ឋា​ភិបាល លោក​ ហ៊ុន សែន​ ប្រធាន​រដ្ឋ​សភា​ លោក ​ហេង សំរិន ​និង​លោក​ ជា ស៊ីម​ ប្រធាន​ ព្រឹទ្ធ​សភា ​និង​មន្ដ្រី​នៃ​ស្ថា​ប័ន​ទាំង​បី ​បាន​ជូន​ព្រះ​រាជ​ដំណើរ​របស់​ព្រះ​មហា​ក្សត្រ​នេះ​ នៅ​ឯ​ព្រលាន​ យន្ដ​ហោះ​អន្ដរ​ជាតិ​ក្រុង​ភ្នំពេញ។

នេះ​គឺ​ជា​ព្រះ​រាជ​ទស្សន​កិច្ច​ជា​លើក​ដំបូង​បំផុត​របស់​ព្រះ​មហា​ក្សត្រ​ នរោត្តម​សីហមុនី ​ទៅ​កាន់​ ប្រទេសជ​ប៉ុន ​បន្ទាប់​ពី​អង្គ​ឡើង​ស្នង​រាជ​ជំនួស​ព្រះ​បិតា​របស់​ព្រះ​អង្គ​នៅ​ឆ្នាំ​២០០៤​មក។

លោក ​កុយ ​គួង ​អនុរដ្ឋ​លេខាធិ​ការ​ និង​ជា​អ្នក​នាំ​ពាក្យ​ក្រសួង​ការ​បរទេស ​មាន​ប្រសាសន៍​ថា ​ឆ្លងតាម​រយៈ​ព្រះ​រាជ​ទស្សន​កិច្ច​របស់​ព្រះ​មហា​ក្សត្រ​ នរោត្តម ​សីហមុនី ​នេះ ​នឹង​ធ្វើ​ឲ្យ​មិត្ត​ភាព​នៃ​ព្រះរាជាណា​ចក្រ​ទាំង​ពីរ​កាន់​តែ​រឹង​មាំ។

“មាន​ន័យ​ថា ​ធ្វើ​ឲ្យ​ទំនាក់​ទំនង​មិត្ត​ភាព​ និង​កិច្ច​សហ​ប្រតិ​បត្តិ​ការ​រវាង​ព្រះ​រាជាណា​ចក្រ​កម្ពុជានិង​ប្រទេស​ជប៉ុន ​ឲ្យកាន់​តែ​មាន​ភាព​រឹង​មាំ ​និង​ទូលំ​ទូលាយ​ថែម​ទៀត"។

នៅ​ក្នុង​ព្រះ​រាជ​ទស្សន​កិច្ច​ដែល​នឹង​ប្រព្រឹត្ត​ទៅ​ចាប់​ពី​ថ្ងៃ​ទី​១៦​រហូត​ដល់​ថ្ងៃ​ទី​ ២០ ​ខែ​ឧសភា​ ព្រះ​មហា​ក្សត្រ ​នរោត្តម ​សីហមុនី ​នឹង​ត្រូវ​ទទួល​ព្រះ​រាជ​សវនា​ការ​ជា​មួយ​ព្រះ​ករុណា ​អាគីហ៊ីតូ ​ព្រះ​ចៅ​ អធិរាជ​នៃ​ប្រទេស​ជប៉ុន ​និង​ព្រះ​មហា​ក្សត្រី​ អធិ​រាជនី។

ព្រះ​មហា​ក្សត្រ​ខ្មែរ​ក៏​នឹង​យាង​ចូល​រួម​ក្នុង​ពិធី​លាង​សាយ​ភោជន៍​ផ្លូវ​រដ្ឋ​ដែល​រៀបចំ​ដោយ​ព្រះ​ចៅ​អធិ​រាជ​ជប៉ុន​ ហើយ​ព្រះ​អង្គ​ក៏​នឹង​យាង​ចូល​រួម​ពិធី​លាង​សាយ​ភោជ​ថ្ងៃ​ត្រង់​ដែល​រៀបចំ​ដោយ​នាយក​រដ្ឋមន្ដ្រី​ជប៉ុន ​លោក​ យូគីយោ ​ហាតូយ៉ាម៉ា។

ប្រទេស​ជប៉ុន​ គឺ​ជា​ប្រទេស​ដែល​ផ្ដល់​ជំនួយ​ច្រើន​ជាង​គេ​បំផុត​សម្រាប់​ប្រទេស​កម្ពុជា។ ​ជំនួយ​ជប៉ុនដើម្បី​កិច្ច​អភិវឌ្ឈន៍​ និង​កសាង​ប្រទេស​កម្ពុជា​ក្នុង​មួយ​ឆ្នាំៗ​ ក្នុង​រង្វង់​១០០​លាន​ដុល្លារ​អាមេរិក។​ ក្រៅ​ពី​នោះ​ ​ជប៉ុន​គឺ​ជា​ប្រទេស​ដែល​ផ្ដល់​ជំនួយ​ថវិកា​ប្រហាក់​ប្រហែល​នឹង​ពាក់​កណ្ដាល​នៃ​ តម្រូវ​ការ​ថវិកា​សម្រាប់​ដំណើរ​ការ​កាត់​ទោស​ពួក​អតីត​មេ​ដឹក​នាំ​ខ្មែរ​ក្រហម​ផង​ដែរ។

XS
SM
MD
LG