ភ្ជាប់​ទៅ​គេហទំព័រ​ទាក់ទង

រដ្ឋាភិបាល​កម្ពុជា​ព្រមាន​ពី​ផលប៉ះ​ពាល់​អាក្រក់​នៃ​ផលិត​ផល​ក្លែង​ក្លាយ


ឱសថស្ថាន​មួយ​នៅ​ក្នុង​ប្រទេស​កម្ពុជា

មន្ដ្រី​ក្រសួង​សុខាភិបាល ​និង​ក្រសួង​មហាផ្ទៃ​ បាន​ជំរុញ​ឲ្យ​ប្រជា​ពលរដ្ឋ​កម្ពុជា ​ឈប់ប្រើ​ប្រាស់​ផលិត​ផល​ក្លែង​ក្លាយ​ ដែល​អាច​បណ្ដាល​ឲ្យ​គ្រោះ​ថ្នាក់​ដល់​សុខភាព​យ៉ាង​ធ្ងន់ធ្ងរ។ ការ​ជំរុញ​នេះ​ធ្វើ​ឡើង​បន្ទាប់​ពី អាជ្ញាធរ​ក្រុង​ភ្នំពេញ​ចាប់​បាន​ធាតុ​ផ្សំ​ និង​ផលិត​ផល​គ្រឿង​សំអាង​ក្លែង​ក្លាយ​សរុប​ចំនួន ​ប្រាំ​ពីរ​តោនកាល​ពី​ដើម​ខែ​នេះ។

ក្រសួង​មហា​ផ្ទៃ ​និងក្រសួង​សុខា​ភិបាល​បានអំពាវកាលពីថ្ងៃសុក្រ​ឲ្យ​ប្រជា​ពល​រដ្ឋ​កម្ពុជា និង​ក្រុម​អាជី​វករ​លក់​ផលិត​ផល​ឱសថ ​និង​គ្រឿង​សំអាង​ក្លែង​ក្លាយ​ឲ្យ​ប្រុង​ប្រយ័ត្ន និង​ឈប់​បន្ដ​អាជីវកម្ម​ខុស​ច្បាប់​នេះ​ត​ទៅ​ទៀត​ ដោយ​ធ្វើការព្រ​មាន​ថា ​ការប្រើ​ប្រាស់​ផលិត​ផល​ក្លែង​ក្លាយ​នឹង​បង្ក​ឲ្យ​មាន​ភាព​ក្រីក្រ​កាន់​តែ​ខ្លាំង ​ហើយ​ការជួញដូរ​នូវផលិត​ផលក្លែង​ក្លាយ​នឹង​ប្រឈម​មុខ​នឹង​ការផ្ដន្ទា​ទោស​យ៉ាង​ធ្ងន់ធ្ងរ។

លោក​ឧត្តម​សេនីយ​ឯក ​សូរ ផន ​អគ្គស្នងការ​រង​នគបាល​ជាតិ ​និង​ជា​ប្រធាន​គម្រោ​ង​គាំទ្រ​ការ ប្រយុទ្ធ​ប្រឆាំង​ផលិត​ផល​ក្លែង​ក្លាយ ​មាន​ប្រសាសន៍​ថា​ ប្រជា​ពលរដ្ឋ​ក្រីក្រ ​គួរ​តែ​ត្រូវ​ចៀស​វាង​ប្រើ​ប្រាស់​នូវ​ផលិត​ផល​ក្លែង​ក្លាយ​គ្រប់​ប្រភេទ​សម្រាប់​ជីវ​ភាព​ប្រចាំ​ថ្ងៃ​ ត្បិត​ផលិត​ផល​ ទាំងនោះ​នឹង​បណ្ដាល​ឲ្យ​មាន​គ្រោះ​មហន្ដរាយ​ដល់​អ្នក​ប្រើ​ប្រាស់។

“បងប្អូន​ប្រជា​ពលរដ្ឋ​ក្រីក្រ​ទាំង​អស់​សូម​ប្រយ័ត្ន ​ហើយ​ពិសេស​អាជីវករ​ដែល​កំពុង​តែ​រកទទួល​ទាន​បាន​ចំណេញ​ដោយ​សារ​វត្ថុ​ក្លែង​ក្លាយ ​សូម​អំពាវ​នាវ​សូម​ឈប់។ សូម​បង​ប្អូន​មេត្តា​យោគ​យល់​ដល់​បង​ប្អូន​យើង​កាន់​ក្រ​ឡើង​ កាន់​តែ​រងគ្រោះ​កាន់​តែ​ធ្ងន់​ឡើង"។

លោក ​សូ ​ផន​ មាន​ប្រសាសន៍​ដូច្នេះ ​ក្រោយ​ពី​បើក​កិច្ច​ប្រជុំ​ជា​លើក​ដំបូង​របស់​គណៈ​កម្មា​ធិ​ការ​ដឹក​នាំ​គម្រោង​ពិភាក្សា​ស្តី​ពី​សកម្មភាព​ការងារ​ការប្រយុទ្ធ​ប្រឆាំង​ផលិត​ផល​ក្លែង​ក្លាយ​ក្នុង​ទីក្រុង​ភ្នំពេញ។​ គម្រោង​នេះ​ដែល​ត្រូវ​បាន​បង្កើត​នៅ​ក្នុង​ឆ្នាំ ​២០១០​នេះ ​ក្រោម​ការឧបត្ថម្ភ​ដោយ​ប្រទេស​បារាំង។

កាល​ពី​ថ្ងៃ​ទី​៤​ខែ​តុលា​ឆ្នាំ២០១០​នគរបាល​ប្រឆាំង​បទ​ល្មើស​សេដ្ឋកិច្ច​នៃ​ក្រសួង​មហា​ផ្ទៃ​សហការ​ជាមួយ​មន្រ្តី​កាំកុង​ត្រូល​និង​មន្រ្តី​ពាក់​ព័ន្ធ​បាន​ទៅ​បង្រ្កាប​ទីតាំង​ផលិត​និង​ចែកចាយ​ផលិតផល​គ្រឿង​សំអាង​ក្លែង​ក្លាយ​គ្រប់​ប្រភេទ​ដ៏​ធំ​មួយ​នៅ​សង្កាត់​ច្រាំង​ចំរេះ​ទី២​ខណ្ឌ​ឬស្សីកែវ​ ជាយទី​ក្រុង​ភ្នំពេញ។ ផលិត​ផល​ក្លែង​ក្លាយ​ដែល​ធ្វើនៅទីនោះ ​ត្រូវ​លក់​ចែក​ចាយ​នៅ​ទូទាំង​ប្រទេស​កម្ពុជា។

ក្រុម​សមត្ថកិច្ច​បាន​រក​ឃើញ​សារធាតុ​គ្រឿង​ផ្សំ​នានា ​និង​ផលិត​ផល​ក្លែង​ក្លាយ​មួយ​ចំនួន​ដូចជា​ម្សៅកែ​សម្ភស្ស​ សាប៊ូ ​ប្រេងកូឡា ​ប្រេង​ខ្យល់ ​ឡេ​លាប​ខ្លួន​ជា​ដើម​ សរុប​ប្រមាណ​ជា​៧​តោន។

មនុស្ស​ដែល​ជាប់​សង្ស័យ​ចំនួន​បួន​នាក់​ត្រូវ​បាន​ចាប់​ខ្លួន​ ប៉ុន្ដែ​ម្ចាស់​អាជីវកម្ម​ចំនួន​ពីរនាក់​បាន​រត់​គេច​ខ្លួន​ដោយ​សុវត្ថិភាព។

លោក​ឧត្តមសេនីយ សូ ផន​ បញ្ជាក់​ថា ​ប៉ូលីស​កំពុង​រៀប​ចំ​សំណុំ​ឯកសារ​ជន​សង្ស័យ​ទាំង​បួន​នាក់​ដើម្បី​បញ្ជូន​ទៅ​តុលាការ។

លោក​បាន​បន្ត​ថា​នៅ​ក្នុង​អំឡុង​ពេល​នេះ​ការចរាចរណ៍ផលិត​ផល​ក្លែង​ក្លាយ​នៅ​លើ​ទីផ្សារ​មាន​ការ​កើន​ឡើង​ជា​ពិសេស​នៅ​តាម​បណ្តា​ខេត្ត​ស្រប​ពេល​ដែល​ក្រុម​សមត្ថកិច្ច​មិន​ទាន់​មាន​សមត្ថភាព​គ្រប់​គ្រាន់​ក្នុង​ការពង្រឹង​ការបង្រ្កាប​បទល្មើស​នេះ។

ដោយឡែក ​លោកវេជ្ជបណ្ឌិត ​ហេង ប៊ុនគៀត​ ប្រធាននាយកដ្ឋាន​ឱសថ ​ចំណី​អាហារ ​បរិក្ខារ​ពេទ្យ និង​គ្រឿង​សំអាង​នៃ​ក្រសួង​សុខាភិបាល​ ឲ្យ​ដឹង​ថា ​មាន​តែ​គ្រឿង​សំអាង​នៅ​លើ​ទីផ្សារ​ប្រមាណ​ជា​៣០​ភាគ​រយ​តែ​ប៉ុណ្ណោះ​ក្នុង​ប្រទេស​កម្ពុជា​បាន​ចុះ​បញ្ជី​ជាផ្លូវការ។ លោក វេជ្ជបណ្ឌិត​បាន​បន្ថែម​ថា គ្រឿង​សំអាង​ក្លែង​ក្លាយ​ភាគ​ច្រើន​កំពុង​ធ្វើឱ្យ​ប៉ះ​ពាល់​ដល់​សុខភាព​ប្រជាពល​រដ្ឋ​ជា​ខ្លាំង​ដូច​ជា​ធ្វើ​ឱ្យ​របកស្បែក​ ស្បែក​ឡើងរឹង ​ហើម​មុខ ​ហើយ​អាច​បង្ក​គ្រោះ​ថ្នាក់​ដល់​ស្លាប់​ទៀត​ផង។

«សូម​អំពាវ​នាវ​ដល់​ប្រជាជន​បង​ប្អូន​យើង​កុំ​ចេះ​តែ​ប្រើ​ផ្តេស​ផ្តាស​ចំពោះ​ផលិតផល​ដែល​មិន​មាន​ប្រភព​ច្បាស់​លាស់​ចេះ​តែ​ប្រើ​ធ្វើឱ្យ​ប៉ះ​ពាល់​ដល់​សុខភាព​បង​ប្អូន​អត់គួរ​ប្រថុយ​ប្រថាន​ទេ»។

ប្រទេស​បារាំង​និង​ប្រទេស​កម្ពុជា ​នៅ​ក្នុង​ឆ្នាំ ២០១០​នេះ​បាន​សហការ​គ្នា​បង្កើត​គម្រោង​គាំទ្រ​ការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ​ដែល​បង្ក​គ្រោះ​ថ្នាក់​ខ្លាំង​ដល់​សុខភាព ​និង​សុវត្ថិភាព​ក្នុង​តំបន់​ទន្លេ​មេគង្គ។

គម្រោង​នេះ​មាន​ទិស​ដៅ​លើក​កម្ពស់​វិជ្ជា​ជីវៈ​អ្នកចូលរួម​ក្នុង​ការប្រយុទ្ធ​ប្រឆាំង​នឹង​ការជួញដូរ​ផលិត​ផល​ក្លែង​ក្លាយ​ដែល​បង្ក​គ្រោះ​ថ្នាក់​ខ្លាំង​ដល់​សុខភាព​និង​សុវត្ថិភាព។ គម្រោង​នេះ​ក៏​បាន​ផ្តោត​លើ​ការបញ្ជ្រៀប​អ្នក​នយោបាយ​និង​ប្រជាជន​ក៏​ដូច​ជា​ការបណ្តុះ​បណ្តាល​ថ្នាក់​អន្តរ​ក្រសួង​និង​ថ្នាក់​តំបន់​ដល់​មន្រ្តី​ក្របខ័ណ្ឌ​និង​មន្រ្តី​ចូលរួម​ក្នុង​ការប្រយុទ្ធ​ប្រឆាំង​ផ្ទាល់​ផង​ដែរ។

អនុសេនីយ៍ឯក ​ស៊ីលវ៉ាំង​ គូអេ ( Silvain Coué ) ទីប្រឹក្សា​ប្រចាំ​អគ្គស្នងការ​ដ្ឋាន​នគរបាល​ជាតិ​កម្ពុជា​សម្រាប់​គម្រោង​គាំទ្រ​ការប្រយុទ្ធ​ប្រឆាំង​ផលិតផល​ក្លែង​ក្លាយ ​មាន​ប្រសាសន៍​ថា ​ផលិត​ផល​ក្លែង​ក្លាយទាំង​អស់ ​ទាំង​ផលិត​ផល​ថ្នាំ​ពេទ្យ​ ទាំង​ផលិត​ផល​គ្រឿង​សំអាង ​ឬផលិត​ផល​កសិកម្ម សុទ្ធ​តែ​មាន​មុខងារ​បំផ្លាញ​សុខភាព​ទាំង​អស់។

“អ្វី​ដែល​ប្រាកដ​នោះ​គឺ​ថា​ ផលិត​ផល​ក្លែង​ក្លាយ​មាន​មុខងារ​បំផ្លាញ​សុខភាព​ ឬ​មួយ​ដោយ​សារ​តែ​ផលិត​ផល​ទាំង​នោះ​ពុំ​មាន​ធាតុ​សកម្ម ​ឬ​ក៏​វា​មាន​ធាតុសកម្ម​ដែល​មិន​មែន​ជា​ធាតុ​សកម្ម ​ដែល​ត្រូវ​ប្រើ​នោះ​ ក្នុង​ករណី​ដូច​នេះ ​ផលិត​ផល​នោះ​បំផ្លាញ​សុខភាព​ដោយ​ផ្ទាល់​តែ​ម្ដង"។

ជាមួយ​គ្នា​នេះដែរ​ លោក​វេជ្ជ​បណ្ឌិត​ ហេង ​ប៊ុន​គៀត ​បាន​ផ្តល់​ដំបូន្មាន​ថា​ដើម្បី​រក​ទិញ​ផលិត​ផល​ដែល​ត្រឹម​ត្រូវ​និង ​មាន​ប្រយោជន៍​ដល់​សុខភាព​ប្រជា​ពលរដ្ឋ​ត្រូវ​ចេះ​ជ្រើសរើស​រក​ផលិតផល​ណា​ដែល​បាន​ចុះ​បញ្ជីការ​នៅ​ក្រសួង​ដោយ​ត្រូវ​រក​ផ្លាក​សញ្ញា​របស់​ក្រសួង​មាន​សមត្ថកិច្ច​ដែល​បិត​នៅ​លើ​ផលិត​ផល​ទាំង​នោះ៕

XS
SM
MD
LG