រដ្ឋាភិបាលកម្ពុជា បានថ្កោលទោសទៅលើករណីក្រុមហ៊ុនផលិតទំនិញមួយចំនួនដែលបានប្រើប្រាស់រូបភាពបេតិកភណ្ ឌនិងទង់ជាតិកម្ពុជា ទៅលើផលិតផលដែលបង្កភាពអាម៉ាស់ ដូចជា គម្របបង្គន់ កម្រាលបន្ទប់ទឹក កំរាលជើងជាដើមនិងបានទាមទារឲ្យមានការបញ្ឈប់ជាបន្ទាន់។ ផលិតផលទាំងនេះ ត្រូវបានផ្សព្វផ្សាយលក់នៅលើគេហទំព័រក្រុមហ៊ុន Amazon ដែលជាក្រុមហ៊ុនលក់ទំនិញតាមប្រព័ន្ធអ៊ីនធឺណិត មានមូលដ្ឋាននៅសហរដ្ឋអាមេរិក កាលពីពេលកន្លងទៅនេះ។
លោក ថៃ នរៈសត្យា អ្នកនាំពាក្យក្រសួងវប្បធម៌និងវិចិត្រសិល្បៈបាននិយាយថា ក្រសួងវប្បធម៌និងវិចិត្រសិល្បៈ បានសរសេរសំបុត្រ ដោយឡែកមួយទៅកាន់ក្រុមហ៊ុន Amazon ឲ្យបញ្ឈប់ជាបន្ទាន់នូវសកម្មភាព ដែលធ្វើឲ្យប៉ះពាល់ដល់កិត្តិយសសម្បត្តិវប្បធម៌ជាតិកម្ពុជា។
ជុំវិញការឆ្លើយតបរបស់ក្រុមហ៊ុន Amazon អ្នកនាំពាក្យក្រសួងវប្បធម៌ និងវិចិត្រសិល្បៈរូបនេះបានលើកឡើងថា៖
«យើងមិនមានឃើញការឆ្លើយតបជាលាយល័ក្ខអក្សរអីត្រឡប់មកវិញទេ។ ប៉ុន្តែតាមការស្រាវជ្រាវទៅក្នុងទំព័រអេឡិចត្រូនិចហ្នឹងយើងឃើញថា ក្រុមហ៊ុន Amazon ហ្នឹងបានលុបរូបទាំងអស់ហ្នឹងចេញវិញហើយ ហើយកែសម្រួលរូបទាំងអស់ហ្នឹងទៅជារូបភាពផ្សេងៗវិញ»។
លោក នរៈសត្យា ក៏បានលើកឡើងថា ក្រសួងវប្បធម៌និងវិចិត្រសិល្បៈបានធ្វើការស្នើទៅក្រសួងប្រៃសណីយ៍និងទូរគមនាគមន៍ ឲ្យចាត់វិធានការទប់ស្កាត់តាមប្រព័ន្ធអ៊ីនធឺណិតនៃគេហទំព័រ ដែលបានដាក់លក់ផលិតផលដ៏ចម្រូងចម្រាសនោះ ជៀសវាងការសាយភាយខ្លាំងជាងនេះទៀតនៅក្នុងសង្គម។
អ្នកនាំពាក្យក្រសួងវប្បធម៌និងវិចិត្រសិល្បៈរូបនេះបានបន្តថា នេះជាកាតព្វកិច្ចរបស់ក្រសួងវប្បធម៌ និងវិចិត្រសិល្បៈនៅក្នុងការទប់ស្កាត់ការម៉ាក់ងាយពីបរទេសទៅលើសម្បតិ្តវប្បធម៌របស់កម្ពុជា។
លោកបាននិយាយថា៖
«នេះជាទូទៅក្នុងតួនាទីជាអ្នកការពារ ក្នុងតួនាទីជាសេនាធិការរបស់រដ្ឋាភិបាល ក៏ដូចជាអ្នកបម្រើប្រជាជនលើវិស័យវប្បធម៌ យើងមានភារកិច្ចការពារ យើងមានភារកិច្ចធ្វើម៉េចទប់ស្កាត់ការមើលងាយមើលថោក ពីសំណាក់ដទៃទៀតណាក៏ដោយ មិនមែនថា តែ Amazon ទេ ដែលធ្វើឲ្យប៉ះពាល់ទៅដល់អធិបតេយ្យជាតិ លើវិស័យវប្បធម៌ ក៏ដូចជា សម្បត្តិវប្បធម៌បេតិកភណ្ឌរបស់ជាតិនិងរបស់ពិភពលោកនេះ»។
ស្ថានទូតនៃប្រទេសកម្ពុជាប្រចាំសហរដ្ឋអាមេរិកក៏បានបង្ហាញពីការតក់ស្លុតនិងស្រងាកចិត្តផង ដែរចំពោះករណីកើតមានការផ្សព្វផ្សាយផលិតផល ដែលរដ្ឋាភិបាលចាត់ទុកថា ប៉ះពាល់ដល់កិត្តិយសជាតិ។
ស្ថានទូតក៏បានធ្វើការតវ៉ានិងទាមទារឲ្យការបញ្ឈប់ជាបន្ទាន់ផងដែរ ដោយស្ថានទូតបានទាក់ទងនឹងសេវាកម្មអតិថិជនរបស់ក្រុមហ៊ុន Amazon ហើយឯកអគ្គរដ្ឋទូតកម្ពុជាប្រចាំសហរដ្ឋអាមេរិកលោក ជុំ សុន្ទរី ក៏បានផ្ញើលិខិតជូនប្រធាននិងអគ្គនាយកក្រុមហ៊ុន Amazon ដើម្បីធ្វើការតវ៉ាដូចគ្នានេះ។ នេះបើយោងទៅតាមសេចក្តីប្រកាសព័ត៌មានរបស់ស្ថានទូតកម្ពុជាប្រចាំសហរដ្ឋអាមេរិក ដែលចែកចាយឱ្យអ្នកសារព័ត៌មាន។
ក្នុងសេចក្តីប្រកាសព័ត៌មានដូចគ្នានេះដែរ អាជ្ញាជាតិអប្សរា ដែលផ្តោតទៅលើការថែរក្សាបេតិកភណ្ឌ និងសម្បត្តិវប្បធម៌កម្ពុជា ក៏បានផ្ញើលិខិតតវ៉ានិងបានលើកឡើងក្នុងន័យដើមថា «វាមិនមែនជាការចាំបាច់ទេក្នុងការទទួចលើចរិតលក្ខណៈថោកទាបនៃការប្រើប្រាស់នេះ ហើយការផ្សព្វផ្សាយដែលបង្កភាពអាម៉ាស់ទាំងនេះត្រូវតែបញ្ឈប់ជាបន្ទាន់»។
VOA មិនអាចទំនាក់ទំនងក្រុមហ៊ុន Amazon ដើម្បីសុំការអធិប្បាយបានទេមកដល់ល្ងាចថ្ងៃសុក្រនេះ៕
