ភ្ជាប់​ទៅ​គេហទំព័រ​ទាក់ទង

តុលាការ​ក្រុងភ្នំពេញ​បាន​បញ្ចប់​ការសាកសួរ​ជនជាតិ​ថៃ​ប្រាំពីរ​នាក់​​


តំណាង​រាស្ត្រ​ថៃ​ ​Panich Vikitsreth ​និង ​Veera​ Somkwamkid ​មេ​ដឹកនាំ​ក្រុម​អាវលឿង​ត្រូវ​តុលាការ​ភ្នំពេញ​ហៅ​សាកសួរ។

ភ្នំពេញ៖ តុលាការ​ក្រុងភ្នំពេញ​បាន​បញ្ចប់​ការសាកសួរ​ជនជាតិ​ថៃ​ប្រាំពីរ​នាក់​ដែល​ត្រូវបាន​ចោទ​ប្រកាន់​អំពី​ការ​ឆ្លងដែន​ចូល​ក្នុង​ទឹកដី​ខ្មែរ​ដោយ​ខុសច្បាប់​និង​ចូល​ទីលាន​យោធា​ដោយ​បំណង​ទុច្ចរិត។ ​ប៉ុន្តែ​សមាជិក​សភា​ថៃ​ដែល​ជាប់ចោទ​បាន​និយាយ​ថា​ ​ការឆ្លងចូល​ក្នុង​ទឹកដី​កម្ពុជា​នេះ​គ្មាន​ចេតនា​ទេ។​ បើ​តុលាការ​រកឃើញ​ទោស​កំហុស​ដូចការ​ចោទប្រកាន់​មែន​នោះ​ ​ជនជាតិ​ថៃ​ទាំងប្រាំពីរ​នាក់នេះ​នឹង​ត្រូវ​ជាប់​ពន្ធនា​គារ​ចំនួន​១៨ខែ។

លោក ​Panich Vikitsreth​ សមាជិក​សភា​គណបក្ស​ប្រជាធិប​តេយ្យ​ថៃ ​បាន​និយាយ​នៅ​ថ្ងៃ​ព្រហស្បតិ៍នេះ​ថា​ លោក​និង​ជនជាតិ​ថៃ​ប្រាំមួយ​នាក់​ទៀត​បា​នឆ្លង​ចូល​ក្នុង​ទឹកដី​កម្ពុជា​ដោយ​ឧប្បត្តិហេតុ​ ឬ​ដោយ​អចេតនា​ ​ដោយសារ​តែ​គ្មាន​ឆ្មាំ​ការពារ​ព្រំដែន។

តុលាការ​ក្រុងភ្នំពេញ​បាន​បើក​សាកសួរ​លោក Panich Vikitsreth ​ ​សមាជិក​សភា​គណបក្ស​ប្រជាធិប​ តេយ្យ​ និង​ជនជាតិ​ថៃ​ប្រាំមួយ​នាក់​ដែល​ត្រូវបាន​ចាប់ខ្លួន​ពី​បទ​ចោទប្រកាន់​រឿង​ឆ្លងចូល​ទឹកដី​កម្ពុជា​ ដោយ​ខុសច្បាប់​និង​ចូល​ទីលាន​យោធា​ដោយ​បំណង​ទុច្ចរិតនៅ​ក្នុង​ខេត្ត​បន្ទាយ​មានជ័យ​របស់​ប្រទេស កម្ពុជា​នៅ​ថ្ងៃទី​២៩ ​ខែធ្នូ។

សាច់ញាត្តិ​ជន​ជាប់ចោទ​ថៃ​ ​ក្រុម​អ្នក​រាយ​ការណ៍​ព័ត៌មាន​ និង​មន្ត្រី​ស្ថានទូត​ថៃ​មិន​ត្រូវ​បាន​អនុញ្ញាត​ឱ្យ ចូល​ទៅក្នុង​បន្ទប់​តុលាការ​ទេ។

ជនជាតិ​ថៃ​ប្រាំពីរ​នាក់​ត្រូវបាន​ចោទប្រកាន់​អំពី​ការឆ្លងចូល​ទឹកដី​កម្ពុជា​ដោយ​ខុសច្បាប់​ និង​ចូល​ទី លាន​យោធា​ដោយ​បំណង​ទុច្ចរិត​នៅក្នុង​ខេត្ត​បន្ទាយមានជ័យ​របស់​ប្រទេស​កម្ពុជា​ជាប់​ព្រំដែន​ជាមួយ​ ខេត្ត​ស្រះកែវ​របស់​ប្រទេស​ថៃ។

លោក​រស់ អូន​ មេធាវី​ការពារក្តី​សម្រាប់​លោក ​Panich ​និង​ជនជាតិ​ថៃ​ពីរ​នា​ក់ទៀត ​បាន​ថ្លែង​ប្រាប់ ​VOA​ ថា​ ​លោក​ Panich Vikitsreth​ បាន​ថ្លែង​ប្រាប់​ចៅក្រម​ស៊ើបសួរ​ថា​ លោក​គ្មាន​បំណង​ឆ្លងចូល​ក្នុង​ទឹកដី​ កម្ពុជា​ទេ។ ​ប៉ុន្តែ​ប្រជាពលរដ្ឋ​ថៃ​បាន​អះអាង​ថា​ ​តំបន់​ដែល​លោក​ និង​ជនជាតិ​ថៃ​ប្រាំមួយ​នាក់​ទៀត​បាន​ឆ្លងចូល​មក​នោះ ​គឺជា​ទឹកដី​របស់​ប្រទេស​ថៃ។

«តាម​ចម្លើយ​របស់​គាត់​ (លោក Panich) ​ ​គាត់​គ្មាន​ចេតនា​ចូល​ទឹកដី​ខ្មែរ​ទេ។ ​គាត់​មក​នេះ​តាម​សំណូម ពរ​របស់​ប្រជា​ពលរដ្ឋ​ក្នុងនាម​ ជា​តំណាងរាស្ត្រ​ (ដើម្បី​ពិនិត្យ​មើល​តំបន់​ជម្លោះ​ព្រំដែន)។ ​គាត់​បាន​ដើរ ចូល​មក​ក្នុង​ទឹកដី​ខ្មែរ​ដោយ​អះអាង​ថា​ ​គ្មាន​អ្នកយាម។ ​គាត់ដើរ​ចូលមក​ ​ចេះតែ​លុងៗទៅ​ ​ចូល​ដល់​ទឹកដី​ខ្មែរ»។

បន្ទាប់ពី​ការសាកសួរ​រួច​ ​លោក​ Panich Vikitsreth​ សមាជិក​សភា​គ​ណបក្ស​ប្រជាធិប​តេយ្យ​របស់​លោក​ នាយក​រដ្ឋមន្ត្រី​ Abhisit Vejjajiva ​និង​ជនជាតិ​ថៃ​ប្រាំមួយ​នាក់​ទៀត​ ត្រូវបាន​ដឹក​ទៅកាន់​ពន្ធនាគារ​ ព្រៃស​នៅល្ងាច​នេះ។ ​ លោក​មេធាវី​រស់ អូន​បាន​បញ្ជាក់​ថា​ ​លោកនឹង​មិនទាន់​រៀបចំ​សំណើ​សុំ​នៅ​ក្រៅឃុំ​សម្រាប់​កូនក្តី​របស់​លោក​បញ្ចូន​ទៅ​តុលាការ​នៅ​ឡើយ​ទេ​ ​ពីព្រោះ​លោក​មិនទាន់​មាន​ពេល​សរសេរ​សំណើ​នេះ​ទេ។

«ទោស​របស់​កូនក្តី​របស់​ខ្ញុំ​ជា​បទ​ល្មើស​មជ្ឈឹម។ ​អញ្ចឹង​ ​ខ្ញុំ​មាន​សិទ្ធិ​ពេញ​ទី​ក្នុង​នាម​ខ្ញុំជា​មេធាវី​ការពារ​ សិទ្ធិ​ដើម្បី​ស្នើសុំ​នៅ​ក្រៅឃុំ​គ្រប់​ពេល​វេលា»។

បើ​តុលាការ​រកឃើញ​ទោស​កំហុស​របស់​ពួកគេ​ដូចការ​ចោទប្រកាន់​អំពី​ការឆ្លង​ចូល​ទឹកដី​កម្ពុជា​ដោយ ខុស​ច្បាប់ ​និង​ចូល​ទីលាន​យោធា​ដោយ​បំណង​ទុច្ចរិត​មែននោះ​ ​នោះ​ជនជាតិ​ថៃ​ទាំង​ប្រាំពីរ​នាក់​ដែល​រួមមានសមាជិក​សភា​គណបក្ស​ប្រជាធិប​តេយ្យ​ Panich និង​លោក ​Veera Somkwamkid ​មេដឹកនាំ​ ចលនា​នយោបាយ​អាវលឿង​ត្រូវ​ប្រឈម​នឹង​ការជាប់​ពន្ធនាគារ​ចំនួន​១៨ខែ៕

XS
SM
MD
LG