ភ្ជាប់​ទៅ​គេហទំព័រ​ទាក់ទង

នៅ​តាម​ព្រំដែន​ ​ពលរដ្ឋ​កម្ពុជា​ពឹង​ពាក់​លើ​ប្រទេស​ថៃ


ទាហាន​ថៃ​ដើរ​នៅ​តំបន់​ប្រាសាទ​ព្រះវិហារ។

ភ្នំពេញ៖ អាជ្ញាធរ​ថៃ​បាន​បិទ​ច្រក​ឆ្លង​កាត់​ព្រំដែន​អូរ​បី​ជាន់​មិន​ឱ្យ​ប្រជា​ពលរដ្ឋ​ខ្មែរ​ឆ្លងចូល​ទៅក្នុង​ប្រទេស​ថៃ​ធ្វើ​ការងារ​និង​ប្រកប​របរ​ចិញ្ចឹម​ជីវិត​បន្ទាប់​ពី​កងទ័ព​កម្ពុជា​បាន​ចាប់​ជនជាតិ​ថៃ​ប្រាំពីរ​នាក់​ដែល​រួម​មាន​ សមាជិក​សភា​គណបក្ស​ប្រជាធិបតេយ្យ​របស់​លោ​កនាយក​រដ្ឋមន្ត្រី​អាប់ភីស៊ីត វីចាជីវ៉ា ​និង​សកម្មជន​ចលនា​នយោបាយ​អាវលឿង​ថៃ​ដោយសារ​ការឆ្លង​ចូល​ទឹកដី​កម្ពុជា​ដោយ​ខុសច្បាប់​នៅ​ក្នុង​ស្រុក​អូរជ្រៅ​នៃ​ខេត្ត​បន្ទាយ​មានជ័យ។

ក្រុម​មន្ត្រី​កម្ពុជា​បាន​និយាយ​ថា​ការបិទច្រក​ព្រំដែន​នេះ​បានធ្វើ​ឱ្យ​ប៉ះពាល់​ដល់​ប្រជាពលរដ្ឋ​ខ្មែរ​ដែល​ពឹង​អាស្រ័យ​ទៅ​លើ​ការងារ​និង​ការធ្វើ​ជំនួញ​នៅក្នុង​ប្រទេស​ថៃ​។ ប៉ុន្តែ​អាជ្ញាធរ​កម្ពុជា​ត្រូវ ការពារ​សុវត្ថិភាព​ប្រជាពលរដ្ឋ​ខ្មែរ​កុំឱ្យ​ឆ្លងដែល​ចូល​ទៅក្នុង​ប្រទេសថៃ ​ដោយ​ខ្លាចក្រែង​មាន​ការសងសឹក​ពី​ភាគី​ថៃ។

ក្រុម​មន្ត្រី​កម្ពុជា​បាន​និយាយ​នៅថ្ងៃ​សុក្រ​នេះ​ថា​ការណ៍​ដែល​អាជ្ញាធរ​ថៃបិទ​ច្រក​ឆ្លងកាត់​ព្រំដែន​អូរបី​ជាន់​មិន​ឱ្យ​ប្រជា​ពលរដ្ឋ​ខ្មែរ​ឆ្លង​ចូល​ទៅក្នុង​ទឹកដី​ថៃ​គឺ​ជា​ការសង​សឹក​នឹង​ការចាប់​ជនជាតិ​ថៃ​ប្រាំពីរ​នាក់​ដែល​បាន​ឆ្លង​ចូល​ទឹកដី​កម្ពុជា​ដោយ​ខុសច្បាប់​កាលពី​ថ្ងៃ​ពុធ។

ច្រក​ឆ្លង​កាត់​ព្រំដែន​អូរបី​ជាន់​នៅ​ក្នុង​ស្រុក​អូរជ្រៅ​នៃ​ខេត្តបន្ទាយ​មានជ័យ​មាន​សារៈសំខាន់​ណាស់ សម្រាប់​ប្រជា​ពលរដ្ឋ​ខ្មែរ​ច្រើន​រាប់រយ​នាក់​ឆ្លងចូល​ទៅក្នុង​ប្រទេស​ថៃ​ជា​ប្រចាំ​ដើម្បី​ស៊ី​ឈ្នួល​ស្ទូង​ស្រូវ​ ច្រូត​ស្រូវ ​ដក​ដំឡូង ​កាប់​ដើម​អំពៅ​ និង​ការទិញ​ទំនិញ​បន្លែ​ផ្លែឈើ ​ត្រី ​និង​មាន់ទា​យក​មក​លក់​នៅ​ក្នុង​ទឹកដី​កម្ពុជា​។ នេះ​បើ​តាម​ការ​បញ្ជាក់​របស់​អ្នកភូមិ​និង​មន្ត្រី​ប្រចាំ​ច្រក​អូរបី​ជាន់។

លោក​ហ៊ាង រិន​ ជំនួយការ​កងពល​អភិវឌ្ឍន៍​ប្រចាំ​ច្រក​អូរបីជាន់ ​បាន​ថ្លែង​ប្រាប់វីអូអេ​សំឡេង​សហរដ្ឋ​អាមេរិក​ថា​ប្រជាពលរដ្ឋ​ខ្មែរ​ដែល​ចូល​ទៅធ្វើ​ការស្ទូងស្រូវ​ ច្រូតស្រូវ​ ដកដំឡូង ​និង​កាប់​អំពៅ​នៅ​ក្នុង​ប្រទេស​ថៃ​បាន​ទទួល​ប្រាក់​ឈ្នួល​១៥០​បាត​ក្នុង​មួយ​ថ្ងៃ​សម្រាប់​ចិញ្ចឹម​ជីវិត។

លោក បាន​បញ្ជាក់​បន្ថែម​ថា៖

«ភាគី​ថៃ​បា​នប្រកាស​បិទ​ច្រក​ព្រំដែន​នេះ​ ហើយ​ភាគី​កម្ពុជា​មិន​អនុញ្ញាត​ឱ្យ​ប្រជា​ពលរដ្ឋខ្មែរ​ឆ្លង​កាត់​ ទេ​ពីព្រោះ​ភាគី​កម្ពុជា​ខ្លាច​មាន​ការសងសឹក​ពី​ភាគី​ថៃ»។

លោ​កងឿន ជា​ អាយុ​៣១ឆ្នាំ​នៅ​ភូមិ​អូរ​បី​ជាន់​បាន​និយាយ​ថា​លោក​បាន​ទិញ​មាន់​ទា​និង​របស់​របរ​ប្រើប្រាស់​ផ្សេងៗ​ពី​ប្រទេស​ថៃ​មក​លក់​ក្នុង​ប្រទេស​កម្ពុជា​ដោយ​បាន​ទទួល​ប្រាក់​ចំណេញ​១០០.០០០ រៀល​ ($២៥)​ក្នុង​មួយ​ថ្ងៃ​ពី​មុខរបរ​នេះ។

លោក​ងឿន ជា​ បាន​បញ្ជាក់​ថា​ឥឡូវនេះ​ច្រក​ព្រំដែន​អូរបីជាន់​ត្រូវបាន​បិទ​ លោក​បាន​បាត់បង់​ប្រាក់ ចំណេញ​ប្រចាំ​ថ្ងៃ​១០០. ០០០រៀល​របស់​លោក។

លោក​យ៉ន សុខា​ ប្រធាន​ភូមិ​អូរ​បី​ជាន់ ​បាន​ថ្លែង​ប្រាប់វីអូអេ សំឡេង​សហរដ្ឋ​អាមេរិក​ថា លោក​បាន​ដើរ​ប្រាប់​ប្រជា​ពលរដ្ឋ​ខ្មែរ​កុំ​ឱ្យ​ឆ្លង​កាត់​ព្រំដែន​ចូល​ទៅ​ក្នុង​ប្រទេស​ថៃ​ពីព្រោះ​ខ្លាច​មាន​គ្រោះថ្នាក់​និង​ការសង​សឹក​ពី​ភាគី​ថៃ​ចំពោះ​ការចាប់​ជន​ជាតិ​ថៃ​ប្រាំពីរ​នាក់​នោះ។

«ទាហាន​ថៃ​បាន​បិទ​ច្រក​ព្រំដែន​មិន​ឱ្យ​ចេញ​ចូល​ពីព្រោះ​កម្ពុជា​បាន​ចាប់​ប្រជា​ពលរដ្ឋ​ថៃ​បញ្ជូន​ទៅ​ទី ក្រុង​ភ្នំពេញ។ ភាគី​ថៃ​បាន​ខឹង​ការចាប់​ប្រជា​ពលរដ្ឋ​ថៃ​ប្រាំពីរ​នាក់​ដោយ​និយាយ​ថា​ទាល់​តែ​ភាគី​កម្ពុជា​ ដោះលែង​ជនជាតិ​ថៃ​ប្រាំពីរ​នាក់​ទើប​ភាគីថៃ​បើក​ច្រក​ព្រំដែន​ឱ្យ​ប្រជា​ពលរដ្ឋ​ខ្មែរ​ចេញ​ចូល​ទៅ​ប្រកប របរ​អាជីវកម្ម។ ប្រជា​ពលរដ្ឋ​នៅ​ឃុំ​អូរបីជាន់​នេះ​តែងតែ​ចេញចូល​ទៅរក​របរ​ទទួល​ទាន​នៅស្រុកថៃ។ ខ្ញុំ បាន​ដើរ​ប្រាប់​ប្រជា​ពលរដ្ឋ​យើង​មិន​ឱ្យ​ដើរឆ្លង​កាត់​ព្រំដែន​ដោយ​ខុស​ច្បាប់​ទេ។​ យើង​ខ្លាច​មាន​គ្រោះ ថ្នាក់។ ​ យើង​ខ្លាច​ថៃ​ចាប់​ចង​ឬ​បាញ់​សម្លាប់។ ភាគី​ថៃ​កំពុង​តែ​ខឹង​ការចាប់​ជន​ជាតិ​ថៃ​ប្រាំពីរ​នាក់។ យើង​ខ្លាច​ថៃ​បាញ់​ដោយ​ចោទ​ប្រកាន់​ថា​ការឆ្លង​ចូល​ទឹកដី​ថៃ​ខុស​ច្បាប់​និង​ជួញដូរ​គ្រឿង​ញៀន»។

លោក​សួង មឿន​ ប្រធាន​ឃុំ​អូរបីជាន់​បាន​ថ្លែងថា​លោក​បាន​ប្រកាស​ប្រាប់​ប្រជា​ពលរដ្ឋ​ឱ្យ​ផ្អាក​ការ​ធ្វើ ដំណើរ​ឆ្លងកាត់​ព្រំដែន​មួយរយៈ​និង​រង់ចាំ​រហូត​ដល់​ការចរចា​ចប់​សព្វគ្រប់​សិន។ ​ប៉ុន្តែ​លោក​ទទួល ស្គាល់​ថា​ការបិទ​ច្រក​ព្រំដែន​នេះ​ពិតជា​បាន​ធ្វើឱ្យ​ប៉ះពាល់​ដល់​មុខរបរ​ចិញ្ចឹម​ជីវិត​ប្រចាំ​ថ្ងៃ​របស់​ប្រជា ពលរដ្ឋ​នៅ​ក្នុង​តំបន់​នេះ។

«ភាគី​ថៃ​បាន​បញ្ជា​ឱ្យ​ភាគី​កម្ពុជា​បិទ​ច្រក​ព្រំដែន​អូរបីជាន់ ​និង​ប្រកាស​ផ្សព្វផ្សាយ​ប្រាប់​ប្រជា​ពលរដ្ឋ​ឱ្យ ផ្អាក​ការធ្វើដំណើរ​ឆ្លងកាត់ ​ទោះបី​ជា​ផ្លូវត្រង់ឬ​ផ្លូវ​កាត់​កន្លែងណា​ក៏អត់​បាន​ដែរ។ សូម្បី​តែ​សិស្ស​សាលា​កម្ពុជា​ទៅ​រៀន​សូត្រ​នៅ​ថៃ​ក៏បិទ​ទាំង​អស់»។

លោក​កែវ សែន ​អភិបាល​ស្រុក​អូរជ្រៅ​បាន​បញ្ជាក់​ថា​យើ​ងត្រូវតែ​ការពារ​សុវត្ថិភាព​ប្រជា​ពលរដ្ឋ​របស់ យើង។ បើ​មាន​ករណី​គ្រោះថ្នាក់​ ការឆ្លងដែន​របស់​ពួកគាត់​ត្រូវបាន​ហាមឃាត់៕

XS
SM
MD
LG