តំណាងពលរដ្ឋខ្មែរអាមេរិក ក្នុងតំបន់ជុំវិញរដ្ឋធានីវ៉ាស៊ីនតោនបានជួបជុំគ្នាក្នុងស្ថានទូតខ្មែរកាលពីថ្ងៃពុធទី២៤ខែវិច្ឆិកាឆ្នាំ២០១០ ដើម្បីធ្វើពិធីគោរពវិញ្ញាណក្ខន្ធដល់ជនរងគ្រោះកម្ពុជាដែលបានស្លាប់ក្នុងព្រឹត្តិការណ៍រត់ជាន់គ្នាកាលពីថ្ងៃចុងបញ្ចប់នៃព្រះរាជពិធីអុំទូកឆ្នាំនេះ។
ក្នុងទឹកមុខស្រងូតស្រងាត់ ពួកគេបានសម្តែងការសោកស្តាយដែលកើតមានឧបទ្ទវហេតុដ៏សោកសៅយ៉ាងនេះដែលបានបណ្តាលឱ្យមនុស្សស្លាប់រហូត៣៤៧នាក់ និងរបួសរាប់រយនាក់ទៀត។
បើទោះបីជាពួកគេរស់នៅចម្ងាយរាប់ម៉ឺនគីឡូម៉ែត្រពីប្រទេសកំណើត និងមិនមានសមាជិកក្រុមគ្រួសារផ្ទាល់ណាម្នាក់បានស្លាប់បាត់បង់ជីវិត និងរបួសក្នុងព្រឹត្តិការណ៍ដ៏សោកសៅនេះក៏ដោយក៏ប្រតិកម្មដោយទឹកភ្នែក និងភាពអួលដើមកមាននៅក្នុងចំណោមអ្នកខ្លះដែលចូលរួមក្នុងពិធីគោរពវិញ្ញាណក្ខន្ធនេះដែរ។
លោក កែវ ថម ដែលជាអ្នករៀបចំការជួបជុំនេះបានប្រាប់វីអូអេសំឡេងសហរដ្ឋអាមេរិកថា៖
«ខ្ញុំមានអារម្មណ៍សោកសង្វេង អាណិតស្រណោះដែលជាមរណភាពមួយដែលគួរឱ្យតក់ស្លុត ដែលមិនសូវបានឃើញ និងឮជួបប្រទះ។ យើងខ្ញុំមានចិត្តអាណិតចិត្តខ្លោចផ្សា។ ដូច្នេះហើយបានជាយើងខ្ញុំនាំគ្នាមកថ្ងៃនេះដើម្បីគោរពដល់ព្រលឹងវិញ្ញណក្ខន្ធអ្នកទាំងអស់នោះ»។
លោក យ៉ាប់ គឹមទឹង ប្រធានសមាគមខ្មែរអាមេរិកដើម្បីសិទ្ធិមនុស្ស និងលទ្ធិប្រជាធិបតេយ្យក៏បានបញ្ជាក់ដែរថា៖
«ពួកខ្ញុំមានអារម្មណ៍សោកស្តាយជាខ្លាំង គឺមិនត្រឹមតែខ្ញុំទេ គឺបងប្អូនខ្មែរអាមេរិកាំងជាច្រើនមានសេចក្តីសោកស្តាយ ហើយនឹងអាណិតកើតទុក្ខ ពិបាកចិត្តពីរឿងដែលមានអាសន្ននៅស្រុកខ្មែរ»។
ពលរដ្ឋខ្មែរអាមេរិកខ្លះក៏គ្រោងនឹងរៀបចំពិធីខាងព្រះពុទ្ធសាសនានៅវត្តពុទ្ធិការ៉ាមក្នុងរដ្ឋម៉ារីលែនដ៍ (Maryland) នាថ្ងៃអាទិត្យនេះ ដើម្បីឧទ្ទិសមគ្គផលដល់វិញ្ញាណក្ខន្ធអ្នកដែលបានស្លាប់ទាំងនោះ និងរៀបចំកម្មវិធីរៃអង្គាសថវិកាដើម្បីយកទៅជួយក្រុមគ្រួសារជនរងគ្រោះ។ អ្នកខ្លះទៀតបានរៀបចំជាកម្មវិធីសម្រាប់ជួយក្រុមគ្រួសារជនរងគ្រោះក្នុងរយៈពេលវែងផងដែរ។
លោក ខ្ចៅ សារ៉ង ប្រធានមូលនិធិខ្មែរសម្រាប់ការសិក្សាបាននិយាយដោយទឹកមុខស្រងូតស្រងាត់ថា លោកប្តេជ្ញាថា នឹងជួយដល់កុមារដែលឪពុកម្តាយបានស្លាប់បាត់បង់ជីវិត ដោយលោកយល់ថា បើមិនមានការជួយដល់កូនក្មេងទាំងនោះ ទេពួកគេអាចនឹងបាត់បង់ឱកាសសម្រាប់សិក្សាក្នុងពេលខាងមុខហើយលោកទើបតែទទួលបានការអនុម័តយល់ព្រមពីក្រុមគណៈនាយករបស់លោកក្នុងការបង្កើតជាអាហារូករណ៍ត្រៀមសម្រាប់ពួកគេ។ លោកបន្តថា៖
«ខ្ញុំបានជជែកជាមួយនឹងមិត្តភក្តិ។ ខ្ញុំទើបតែបញ្ចប់ Conference Calls ជាមួយមិត្តភក្តិនៅ ហ្វ៊ីឡាដែលហ្វៀ នៅ អ៊ីលីណយ (Illinois) ។ ខ្ញុំជាប្រធានរបស់អង្គការមូលនិធិខ្មែរសម្រាប់ការសិក្សាបានសុំគណៈនាយកឱ្យគេអនុម័តដើម្បីបង្កើតជាអាហារូករណ៍សម្រាប់កូនសិស្ស កូនដែលកំព្រាដើម្បីរកថវិកាទៅផ្គត់ផ្គង់គ្នាឱ្យបានទៅរៀនទៅមុខ»។
លោក ហែម ហេង ឯកអគ្គរាជទូតខ្មែរប្រចាំនៅសហរដ្ឋអាមេរិកក៏បានបំផុសយ៉ាងសកម្មឱ្យមានការបរិច្ចាគពីសហគមន៍ខ្មែរអាមេរិក ដើម្បីជួយប្រទេសកម្ពុជា។ លោកថ្លែងថា៖
«គ្រាន់តែបានដំណឹងដ៏សោកសៅពីភ្នំពេញភ្លាម ខ្ញុំបានផ្ញើអ៊ីម៉េលទៅតាមបងប្អូននៅតាមរដ្ឋនានាដែលខ្ញុំស្គាល់ហ្នឹង ហើយនៅរដ្ឋមួយចំនួនគឺគេបានរៃបច្ច័យ ហើយគេបានផ្ញើទៅភ្នំពេញខ្លះហើយ ហើយនៅវីជីញៀ (Virginia) នេះគឺនៅក្នុងសប្តាហ៍នេះ និងសប្តាហ៍ក្រោយគេនឹងរៀបចំ ធ្វើពិធីរៃអង្គាសមួយដើម្បីនឹងប្រមូលបច្ច័យដើម្បី យកទៅជួយឧបត្ថម្ភឬទៅជួយវិភាគទានទៅដល់គ្រួសារនៃសព និងអ្នករងរបួស»។
លោកក៏បានអំពាវនាវឱ្យមានការចូលរួមកាន់តែច្រើនថែមទៀត ហើយស្ថានទូតក៏នឹងជួយសម្រួលផងដែរ។ លោកបន្តថា៖
«ខ្ញុំជឿថា ឥឡូវនេះមិនទាន់ហួសពេលទេ គឺបងប្អូនអាចធ្វើជាបន្តបន្ទាប់ទៀត ហើយប្រសិនជាបងប្អូនពិបាកក្នុងការផ្ញើថវិកាសូមបងប្អូនយកមកស្ថានទូត ស្ថានទូតនឹងផ្ញើជូនដើម្បីឱ្យដល់ដៃរបស់គណៈកម្មការតែម្តង»។
នៅប្រទេសកម្ពុជារដ្ឋាភិបាលបានប្រកាន់យកថ្ងៃទី ២៥ ខែវិច្ឆិកា ជាថ្ងៃកាន់ទុក្ខនៅទូទាំងប្រទេស និងគ្រោងសាងសង់ស្តូបមួយដើម្បីរំលឹកដល់អ្នកដែលបានស្លាប់បាត់បង់ជីវិតទាំងនោះដែលគេចាត់ទុកថា ជាសោកនាដកម្មទីពីរបន្ទាប់ពីរបបខ្មែរក្រហម៕