ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​បាន​រង្វាន់​កិត្តិយស​ពី​អ.ស.ប.​​សម្រាប់​ការ​កាត់​បន្ថយ​អត្រា​អេដស៍​


ប្រទេស​កម្ពុជា​បាន​ឈ្នះ​រង្វាន់​កិត្តិយស​មួយ​ពី​អង្គការ​សហ​ប្រជាជាតិ​ចំពោះ​កិច្ច​ខិតខំ​ប្រឹង​ប្រែងរបស់​ខ្លួន​ក្នុង​ការ​កាត់​បន្ថយ​អត្រា​ឆ្លង​មេរោគ​អេដស៍ ​ជំងឺ​អេដស៍​នៅ​ក្នុង​ប្រទេស។​ ការ​ប្រកាស​ជ័យ​លាភី​រង្វាន់​នេះ​នឹង​ត្រូវ​ធ្វើ​ឡើង​មួយ​ថ្ងៃ​មុន​ពេល​អង្គការ​សហ​ប្រជាជាតិ​បើក​កិច្ច​ប្រជុំ​កំពូល​របស់​ខ្លួន​ស្តីពី​គោល​ដៅ​អភិវឌ្ឍន៍​សហសវត្ស​នៅ​ទីក្រុង​ញូវយ៉ក​ នៅ​ថ្ងៃ​ចន្ទ​ដើម​សប្តាហ៍​នេះ។

គណៈ​កម្មាធិការ​ផ្តល់​រង្វាន់​គោល​ដៅ​អភិវឌ្ឍន៍​សហស​វត្សរ៍ ​រួម​ជា​មួយ​និង​ការិយាល័យ​សម្រាប់​ភាព​ជា​ដៃ​គូ​របស់​អង្គការ​សហ​ប្រជាជាតិ​ ​បាន​សម្រេច​ផ្តល់​រង្វាន់​គោល​ដៅ​អភិវឌ្ឍន៍​សហសវត្សរ៍​ ឬ​ (2010 ​MDG​ Award)​ ដល់​ប្រទេស​កម្ពុជា​ដើម្បី​ផ្តល់​កិត្តិយស​និង​អបអរ​សាទរ​ដល់​កិច្ច​ខិត​ខំ​ប្រឹង​ប្រែង​របស់ប្រទេស​កំពុង​អភិវឌ្ឍន៍នេះ​ ក្នុង​ការ​ព្យាយាម​ប្រយុទ្ធ​ប្រឆាំង​នឹង​ការ​រីករាល​ដាល​នៃ​មេរោគ​អេដស៍ ​ជំងឺ​អេដស៍។

នៅ​ក្នុង​លិខិត​មួយ​ច្បាប់​ផ្ញើ ជូន​ស្ថាន​បេសក​កម្ម​អចិន្ត្រៃយ៍​នៃ​ព្រះ​រាជាណាចក្រ​កម្ពុជាប្រចាំ​នៅ​អង្គការ​សហ ប្រជាជាតិ​ដែល ​VOA​ ទទួល​បាន​នៅ​ថ្ងៃ​អាទិត្យ​ទី​១៩​ ខែ​កញ្ញា​នេះ​ ​លោក Michael​ Jacobson​ នាយក​ប្រតិបត្តិ​នៃ​គណៈ​កម្មាធិការ​ផ្តល់​រង្វាន់​គោល​ដៅ​អភិវឌ្ឍន៍​សហសវត្សរ៍​ (MDG Award Committee) ​និង​លោក​ Amir A. Dossal ​នាយក​ប្រតិបត្តិ​នៃ​ការិយាល័យ​សម្រាប់​ភាព​ជា​ដៃ​គូ​របស់​អង្គការ​សហ​ប្រជាជាតិ ​(United Nations Office for Partnerships) ​បាន​រៀប​រាប់​ថា​ ​ព្រះ​រាជាណាចក្រ​កម្ពុជា​ត្រូវ​បាន​ជ្រើសរើសដើម្បី​ទទួល​រង្វាន់​គោលដៅ​អភិវឌ្ឍន៍​សហស​វត្សរ៍​នេះ​ ដោយ​សារតែ​ភាព​ជា​អ្នក​ដឹក​នាំ​ថ្នាក់​ជាតិ​ដ៏​ឆ្នើម​ និង​ការ​ប្តេជ្ញា​ចិត្ត​ ​ហើយ​និង​ការ​រីក​ចម្រើន​ឆ្ពោះ​ទៅ​រក​ការ​សម្រេច​បាន​នូវ​គោល​ដៅ​ទី​៦​នៃ​គោល​ដៅ​អភិវឌ្ឍន៍​សហស​វត្សរ៍​ទាំង​៨។​ គោល​ដៅ​ទី​៦​ ​កំណត់​អំពី​ការ​ប្រយុទ្ធ​ប្រឆាំង​នឹង​មេរោគ​អេដស៍ ​ជំងឺ​អេដស៍ ​ជំងឺ​គ្រុនចាញ់​ និង​ជំងឺ​ដទៃ​ទៀត។

ពិធី​ប្រគល់​រង្វាន់​គោល​ដៅ​អភិវឌ្ឍន៍​សហស​វត្សរ៍​ឆ្នាំ​២០១០​នេះ​នឹង​ត្រូវ​ធ្វើ​ឡើងនៅ​ល្ងាច​ថ្ងៃ​ទី​១៩​ ខែ​កញ្ញា​នេះ​ គឺ​មួយ​ថ្ងៃ​មុន​ពេល​ដែល​កិច្ច​ប្រជុំ​កំពូល​របស់​អង្គការ​សហ​ប្រជាជាតិ​ស្តី​ពី​គោល​ដៅ​អភិវឌ្ឍន៍​សហស​វត្សរ៍​ចាប់​ផ្តើម​នៅ​ក្នុង​ទីក្រុង​ញូយ៉ក​ ​សហ​រដ្ឋ​អាមេរិក។

សូម​បញ្ជាក់​ថា​ ​គោល​ដៅ​អភិវឌ្ឍន៍​សហស​វត្សរ៍​ទាំង​៨​ដែល​អនុម័ត​ដោយ​បណ្តា​ប្រទេស​ជា​សមាជិក​នៃ​អង្គការ​សហ​ប្រជាជាតិ​ចំនួន​១៨៩​ប្រទេស​ ​កាល​ពី​ខែ​កញ្ញា​ឆ្នាំ​២០០០​ ​ហើយ​គ្រោង​នឹង​សម្រេច​ឲ្យ​បាន​នៅ​ត្រឹម​ឆ្នាំ​២០១៥​នោះ​ ​រួមមាន​គោល​ដៅ​ទី​១​ លុប​បំបាត់​ភាព​ក្រីក្រ​ និង​ភាព​អត់ឃ្លាន​ធ្ងន់ធ្ងរ​ ទី​២​ ​សម្រេច​ឲ្យ​បាន​ជា​ទូទៅ​ការ​អប់រំ​មូលដ្ឋានរយៈ​ពេល​៩​ឆ្នាំ​ និង​គោល​ដៅ​ទី​៣ ​គឺ​លើក​កម្ពស់​សមភាព​យែនឌ័រ​ និង​ផ្តល់​សិទ្ធិ​អំណាច​ដល់​ស្រ្តី។​ ចំណែក​គោល​ដៅ​ទី​៤​ ​កំណត់​អំពី​ការ​កាត់​បន្ថយ​អត្រា​ស្លាប់​របស់​កុមារ​ ទី​៥​លើក​កម្ពស់​សុខភាព​ម្តាយ ​និង​គោល​ដៅ​ទី​៦ ​ដែលកម្ពុជា​ហាក់​លេច​ធ្លោ​ជាង​គេ​នោះ​ គឺ​ប្រយុទ្ធ​ប្រឆាំង​នឹង​មេរោគ​អេដស៍ ​ជំងឺ​អេដស៍​នេះ​តែ​ម្តង។​ ចុង​ក្រោយ​គេ​គឺ​គោល​ដៅ​ទី​៧​និង​ទី​៨​ កំណត់​អំពី​ការ​ធានា​ចីរភាព​បរិស្ថាន​ និង​បង្កើត​ភាព​ជា​ដៃគូ​ជា​សាកល​សម្រាប់​កិច្ច​អភិវឌ្ឍន៍។

លោក​វេជ្ជ​បណ្ឌិត​ទា ផល្លា​ អនុ​ប្រធាន​អាជ្ញាធរ​ជាតិ​ប្រយុទ្ធ​នឹង​ជំងឺ​អេដស៍​ ​មាន​ប្រសាសន៍​ថា​ ​ការ​ផ្តល់​រង្វាន់​គោល​ដៅ​អភិវឌ្ឍន៍​សហស​វត្សរ៍​ឆ្នាំ​២០១០ដល់​កម្ពុជា​ពី​សំណាក់​ស្ថាប័ន​អង្គការ​សហ​ប្រជាជាតិ​នេះ​ គឺ​ជា​កិត្តិយស​ដ៏​ធំធេង​សម្រាប់​កម្ពុជា។

«ចំពោះ​រង្វាន់​នេះ​ ​តាម​ខ្ញុំ​ដឹង​គឺមាន​តែ​ប្រទេស​យើង​ទេ​ដែល​បាន​សម្រេច​គោល​ដៅ​នេះ​ខ្ពស់​ជាង​គេ​នៅ​លើ​ពិភព​លោក​ ​ហើយ​ជា​មហា​កិត្តិយស​មួយ​សម្រាប់​កម្ពុជា​យើង​ដែល​យើង​អាច​សម្រេច​បាន​គោល​ដៅ​នេះ។​ វា​ជា​សក្ខី​ភាពក្នុង​ការ​លើក​ទឹក​ចិត្ត​ដល់​អ្នក​ដែល​ធ្វើ​ការ​ចំពោះ​ការងារជំងឺ​អេដស៍​នេះ»។

តួ​លេខ​របស់អាជ្ញាធរ​ជាតិ​ប្រយុទ្ធ​នឹង​ជំងឺ​អេដស៍​បាន​បង្ហាញ​ថា​ ​អត្រា​ឆ្លង​មេរោគ​អេដស៍​ក្នុង​ចំណោម​ប្រជា​ជន​កម្ពុជា​ទូទៅ​ដែល​មាន​អាយុ​ចាប់​ពី​១៥​ឆ្នាំ​ដល់​៤៩​ឆ្នាំ​ បាន​ធ្លាក់​ចុះ​គួរ​ឲ្យ​កត់​សម្គាល់​នៅ​ក្នុង​រយៈ​ពេល​ជាង​១​ទសវត្សរ៍​ចុង​ក្រោយ​នេះ​ ​ពោល​គឺ​ធ្លាក់​ចុះ​ពី​២%​ក្នុង​ឆ្នាំ​១៩៩៨​មក​នៅ​ត្រឹម​០,៩%​ នៅ​ថ្ងៃ​២០០៦។​ ហើយ​អត្រា​នេះ​ត្រូវ​គេ​ព្យាករណ៍​ថា​ ​នឹង​បន្ត​ធ្លាក់​រហូត​ដល់​០,៧%​ ឬ​០,៦%​ នៅ​ឆ្នាំ​២០០៩​ និង​២០១០​នេះ។

បច្ចុប្បន្ន​ប្រទេស​កម្ពុជា​មាន​អ្នក​ផ្ទុក​មេរោគ​អេដស៍​ចំនួន​ជាង​៦​ម៉ឺន​នាក់។​ ជាង​៣​ម៉ឺន​នាក់​ក្នុង​ចំណោម​អ្នក​ទាំង​នេះ​គឺ​ជា​មនុស្ស​ពេញ​វ័យ​ដែល​ត្រូវ​ការ​ថ្នាំ​ព្យាបាល​ប្រឆាំង​នឹង​មេរោគ​អេដស៍​ឬ​ដែល​គេ​ហៅ​ថា​ ​ថ្នាំ​ពន្យាររ​ជីវិត​ ​នេះ​បើ​យោង​តាម​អង្គការ​សហ​ប្រជាជាតិ។

លោក​ទា ផល្លា​ ​នៃ​អាជ្ញាធរ​ជាតិ​ប្រយុទ្ធ​នឹង​ជំងឺ​អេដស៍​ ​មាន​ប្រសាសន៍​ថា​ ​កម្ពុជា​ធ្វើ​បាន​លើស​ពី​ផែន​ការ​កំណត់​ទៅទៀត​ ​ដោយអ្នក​ជម្ងឺ​អេដស៍​ជាង​៩០%​បាន​ទទួល​ថ្នាំ​ពន្យារ​ជីវិត​នេះ។

«ល្អ​ជាង​នេះ​ទៅ​ទៀត​គឺ​៩០%​នៃ​អ្នក​ជំងឺ​ដែល​ទទួល​បាន​ថ្នាំ​នេះ​ នៅ​មាន​អាយុ​ជីវិត​ ​នៅ​រស់ដែល​នេះ​ជា​អត្រា​មួយ​ខ្ពស់​ជាង​គេ​បង្អស់​នៅ​ក្នុង​តំបន់។ ​ហើយ​ចំពោះ​សេវា​ធ្វើ​តេស្ត​រក​មេរោគ​អេដស៍​វិញ​ ​យើង​មាន​តែ​១២​កន្លែង​ទេ ​នៅ​ក្នុង​ឆ្នាំ​២០០០​ ​ឥឡូវ​មាន​២៣៣​កន្លែង​នៅ​ទូទាំង​ប្រទេស»។

លោក​ទឹម វរ៉ា​ នាយក​ប្រតិបត្តិ​នៃ​គណៈ​កម្មាធិការ​សម្រប​សម្រួល​ប្រយុទ្ធ​នឹង​ជំងឺ​អេដស៍​ដែល​ជា​បណ្តាញ​អង្គការ​មិន​មែន​រដ្ឋា​ភិបាល​ចំនួន​ជាង​១០០​នៅ​ក្នុង​ប្រទេស​កម្ពុជា​ ​មាន​ប្រសាសន៍អបអរ​សាទរ​ចំពោះ​រង្វាន់​ដែល​កម្ពុជា​ទទួល​បាន។

ក៏​ប៉ុន្តែ​លោក​ទឹម វរ៉ា​មាន​ប្រសាសន៍​ថា​ ​បណ្តាញ​អង្គការ​សង្គម​ស៊ី​វិល​ដែល​ធ្វើ​ការ​ងារ​ប្រយុទ្ធ​ប្រឆាំង​នឹង​មេរោគ​អេស៍​ ​ជំងឺ​អេដសន៍​របស់​លោក​នៅ​តែ​មាន​ការ​ព្រួយ​បារម្ភចំពោះ​ការ​ផ្ទុះ​ឡើង​នូវ​រលក​ថ្មី​នៃ​ការ​ឆ្លង​មេរោគ​អេដស៍​ ​ជាពិសេស​ក្នុង​ចំណោម​ក្រុម​ប្រឈម​មុខ​ខ្ពស់​ ​ដូចជា​ក្រុម​បុរស​ស្រឡាញ់​បុរស​ ​ក្រុម​ប្រើ​ប្រាស់​គ្រឿង​ញៀន ​ជា​ពិសេស​ដោយ​ចាក់​នឹងម្ជុល​ ​សឺរាំង​រួមគ្នា​ ​និង​ក្រុម​ស្រ្តី​បម្រើ​សេវា​កម្សាន្ត​ជា​ដើម។

«គឺ​ថា​បី​ក្រុម​ហ្នឹង​ ​យើង​ត្រូវ​តែ​ធ្វើ​ការ​យ៉ាង​សកម្ម​បន្ត​ទៀត​ជាមួយ​នឹង​ក្រុម​គាត់។ ​ប្រសិន​ជា​យើង​មិន​មាន​អន្តរាគមន៍​ ​ចលនា​ប្រភព​ធនធាន​ដើម្បី​ឆ្លើយ​តប​ទៅ​នឹង​ក្រុម​ទាំង​បី​នេះ​ទេ​គឺ​ថា​ ​យើង​បារម្ភ​ថា​ ​អត្រា​ឆ្លង​អាច​នឹង​កើន​ឡើង​វិញ»។

យោង​តាម​អង្គការ​ UNAIDS ​បាន​ឲ្យ​ដឹង​ថា​ ​អត្រា​នៃ​ការ​ឆ្លង​មេរោគ​អេដស៍​ក្នុង​ចំណោម​អ្នក​ចាក់​គ្រឿង​ញៀន​នៅ​កម្ពុជា​ ​គឺ​រហូត​ដល់​២៤%។​ ​ចំណែក​ក្នុង​ចំណោម​ស្រ្តី​បម្រើ​សេវា​កម្សាន្ត​វិញ​គឺ​១៤%​ ​ហើយ​សម្រាប់​បុរស​ស្រឡាញ់​បុរស​ដូច​គ្នា​ក្នុង​ទីក្រុង​ភ្នំពេញ​ អត្រា​នៃ​ការ​ឆ្លង​គឺ​ជាង​៨%៕

XS
SM
MD
LG