ភ្ជាប់​ទៅ​គេហទំព័រ​ទាក់ទង

កម្ពុជា ​និង​​វៀតណាម​ជំរុញការ​​វិនិយោគ


ភ្នំពេញ៖ ប្រទេស​កម្ពុជា ​និង​ប្រទេស​វៀតណាម​បាន​ឯកភាព​ជំរុញ​ឱ្យ​មាន​ការ​ធ្វើ​វិនិយោគ​ ​ការ​ធ្វើ​ពាណិជ្ជ​កម្ម​ និង​សេវា​កម្ម​នៅ​តាម​តំបន់​ព្រំដែន​ដើម្បី​លើក​កម្ពស់​ជីវភាព​រស់នៅ​របស់​ប្រជា​ពលរដ្ឋ​នៅ​តាម​តំបន់​ព្រំដែន​នៃ​ប្រទេស​ទាំង​ពីរ។

ភាគី​ទាំង​ពីរ​បាន​ឯកភាព​លើក​កម្ពស់​កិច្ច​សហ​ប្រតិបត្តិការ​នៅក្នុង​ការ​ទប់ស្កាត់​ ​ការ​បង្ក្រាប​អំពើរត់​ពន្ធ​និង​ការ​ជួញដូរ​ទំនិញ​ក្លែងក្លាយ​ឆ្លងកាត់​ព្រំដែន​នៃ​ប្រទេស​ទាំងពីរ​ ដើម្បី​ធានា​បាន​នូវគុណ​ភាព​ និង​សុវត្ថិភាព​ទំនិញ។

លោក​ឧប​នាយក​រដ្ឋមន្ត្រី​ ស ខេង ​បាន​ជួប​ពិភាក្សា​ជាមួយ​លោក​ឧប​នាយក​រដ្ឋមន្ត្រី​វៀតណាម ​ផាំ យ៉ាឃៀង​ នៅ​ថ្ងៃ​អង្គារនេះ ​សំដៅ​ធ្វើ​ឱ្យ​ល្អ​ប្រសើរ​ដល់​ការ​ធ្វើ​ពាណិជ្ជ​កម្ម ​និង​ទំនាក់​ទំនង​រវាង​បណ្តា​ខេត្ត​នៅ​តាម​បណ្តោយ​ព្រំដែន។

សេចក្តី​ប្រកាស​រួម​នេះបាន​បញ្ជាក់​ថា​ ​តួលេខ​នៃ​ការ​ផ្លាស់ប្តូរ​ពាណិជ្ជ​កម្ម​នៅ​ត្រីមាស​ទីមួយ​ ​ដើម​ឆ្នាំ​ ២០១០ ​មាន​កំណើន​ប្រមាណ ​១២៧​ភាគរយ​ ​បើ​ប្រៀបធៀប​នឹង​រយៈ​ពេល​ដូចគ្នា​ក្នុង​ឆ្នាំ​២០០៩។

សេចក្តី​ប្រកាស​រួម​នេះ​បាន​និយាយថា​ ​កំណើន​នេះនឹង​ជំរុញ​ឱ្យ​ទំហំ​ពាណិជ្ជ​កម្ម​រវាង​ប្រទេស​ទាំង​ពីរ​ អាច​នឹង​កើន​ឡើង​ដល់​២០០០​លាន​ដុល្លារ​អាមេរិក​នៅ​ក្នុង​ឆ្នាំ២០១០។​ ការ​ធ្វើ​ពាណិជ្ជ​កម្ម​ឆ្លងកាត់​ព្រំដែន​នេះ​បាន​ចូលរួម​ចំណែក​យ៉ាង​សំខាន់​ដល់​ការ​អភិវឌ្ឍន៍​សេដ្ឋ​កិច្ច​សង្គម​ និង​ការ​លើក​កម្ពស់​ជីវភាព​រស់នៅ​របស់​ប្រជា​ពលរដ្ឋ​នៅ​តាម​តំបន់​ព្រំដែន​នៃ​ប្រទេស​ទាំង​ពីរ។

អ្នក​វិនិយោគ​ទុន​វៀតណាម​បាន​ធ្វើ​ការ​វិនិយោគ​នៅ​កម្ពុជា​លើ​វិស័យ​ជា​ច្រើន​ ​ដូចជា​អគ្គិសនី ​ការ​ផលិត​ចំណី​អាហារ​ ​ការ​ផលិត​ជីរ​កសិកម្ម ​ដំណាំ​កៅស៊ូ​ និង​ការ​ថែទាំ​សុខភាព។

សេចក្តី​ប្រកាសរួម​នេះបាន​បញ្ជាក់ថា ប្រទេស​កម្ពុជា​និង​ប្រទេស​វៀតណាម​ឯកភាព​បន្ត​ការ​បង្ក​លក្ខណៈ​ងាយស្រួល​ និង​ជំរុញ​ឱ្យ​មាន​ការ​ធ្វើ​វិនិយោគ​ ​ការធ្វើ​ពាណិជ្ជ​កម្ម ​និង​សេវា​កម្មនៅតាម​តំបន់​ព្រំដែន​ តាមរយៈ​ការ​បន្ត​ផ្តល់​ឱ្យ​គ្នាទៅវិញ​ទៅមក​នូវ​ភាព​អនុគ្រោះ​ផ្នែក​ពាណិជ្ជ​កម្ម ​ជំរុញ​ល្បឿន​ការធ្វើ​ឱ្យ​មាន​ភាព​សាមញ្ញ​និង​ការ​ធ្វើ​សុខដុម​នីយ​កម្ម​បែប​បទ​នាំចេញ ​នាំចូល​ និង​លើក កម្ពស់​កិច្ច​សហ​ប្រតិបត្តិ​ការ​នៅ​ក្នុង​ការ​ទប់ស្កាត់​ការ​បង្ក្រាប​អំពើ​រត់ពន្ធ ​និង​ការ​ជួញ​ដូរ​ទំនិញ​ក្លែងក្លាយឆ្លងកាត់​ព្រំដែន​នៃ​ប្រទេស​ទាំងពីរ ​ដើម្បី​ធានា​បាន​នូវ​គុណភាព ​និង​សុវត្ថិ​ភាព​ទំនិញ។

សេចក្តី​ប្រកាស​រួម​បាន​បញ្ជាក់​ថា​ ​ភាគី​ទាំង​ពីរ​បាន​ឯកភាព​ក្នុង​ការ​ពិនិត្យ​លទ្ធភាព​តម្លើង​កម្រិត​ច្រក​ទ្វារ​ព្រំដែន​ ឬ​បង្កើត​ច្រក​ទ្វារ​ព្រំដែន​ថ្មី​បន្ថែម​ទៀត​តាម​ការ​ស្នើសុំ​របស់​ភាគី​ណាមួយ ​ដើម្បី​ជួយ​សម្រួល​ដល់​ការ​ធ្វើ​ដំណើរ​របស់​ប្រជា​ពលរដ្ឋ​ ​ភ្ញៀវ​ទេសចរណ៍​ ​ចេញ​ចូល​ឆ្លង​កាត់​ព្រំដែន​ ​ការ​ធ្វើ​ពាណិជ្ជ​កម្ម​ឆ្លង​កាត់​ព្រំដែន​ ​និង​ជំរុញ​ការអភិវឌ្ឍ​នៅ​តំបន់​ច្រក​ទ្វារ​ព្រំដែន។

ក្រុម​មន្ត្រី​នៅ​តាម​បណ្តា​ខេត្ត​ព្រំដែន​បាន​ថ្លែងថា​ ​ខេត្ត​ទាំង​នេះ​ត្រូវធ្វើការ​ងារ​បន្ថែម​ទៀត​ ដើម្បី​ប្រមូល​ប្រាក់ទុន​លើ​ការ​ធ្វើ​ពាណិជ្ជ​កម្ម​ ​ប៉ុន្តែ​ការ​ធ្វើ​វិនិយោគ​ទុន​វៀតណាម ​បាន​ចាប់​ផ្តើម​នាំយក​ការងារ​មក​ឱ្យ​ប្រជា​ពលរដ្ឋ​ខ្មែរ។

លោក​សូ នាក់ ​អភិបាល​រង​ខេត្ត​រតនៈ​គីរី ​បាន​បញ្ជាក់ថា ​ ​ភ្ញៀវ​ទេស​ចរណ៍​វៀតណាម​មិន​បាន​ចូល ​មក​ក្នុង​ខេត្ត​របស់​លោក​តាម​ច្រក​ព្រំដែន​ទេ​ ​ពីព្រោះ​ផ្លូវ​ឆ្លងកាត់​ព្រំដែន​មិន​ទាន់​ត្រូវ​បាន​អភិវឌ្ឍ។

លោក​សូ នាក់បាន​បន្ត​ថា​ ​ ទោះបី​ជា​យ៉ាងនេះ​ក៏ដោយ​ ​ក៏​មាន​សកម្មភាព​ពាណិជ្ជ​កម្ម​បន្ទាប់​បន្សំ​ជាពិសេស​ ការ​នាំ​ចូល​របស់​របរ​ប្រើប្រាស់ ​ផ្លែឈើ ​គ្រឿង​សំណង់​ និង​ជីរ​កសិកម្ម​ ព្រម​ទាំង​ការ​នាំ​ចេញ​ស្រូវ​អង្ករ ​កៅស៊ូ ​ដំឡូង​មី ​និង​សណ្តែក។​ ក្រុម​ហ៊ុន​ដាំ​កៅស៊ូ​ចំនួន​បី​ត្រូវ​បាន​បង្កើត​ឡើង ​ដោយ​មាន​កម្មករ​ជាង​៤០០០​នាក់។

«យើង​ឃើញ្ញ​ថា​ ​រាល់ថ្ងៃ​ ​វា​អត់​ទាន់​មាន​ទេ​ ​ខាង​ទេសចរណ៍។​ មាន​តិចតូច​ ​ទេសចរណ៍​ចូល​តាម ​ខាង​ច្រក​វៀត​ណាម​មក។ ​ប៉ុន្តែ​និយាយ​រួមទៅ​ ​ការ​ចរាចរ​ទំនិញ​អី ​ទៅ​មក​ ​វា​ឃើញ​ថា​ ​យើង​មាន​ តែ​កៅស៊ូ ​ដំឡូង​ សណ្តែកនាំចេញតាមច្រក​ទ្វារ»។

លោក​ខាំ ភឿន ​អភិបាល​ខេត្ត​ក្រចេះ​បាន​ថ្លែង​ថា​ ​ក្រុមហ៊ុន​ដាំ​កៅស៊ូ​វៀតណាម​ប្រហាក់​ប្រហែលគ្នា​នេះ​បាន​យកប្រជា​ពលរដ្ឋ​ខ្មែរ​ជាង​៣០០០​នាក់​ធ្វើការ។

«មាន​តែ​ឯកជន​ទេ​ ដែល​ជួយ​ការ​អភិវឌ្ឍ​ ជា​ដៃគូ​អភិវឌ្ឍន៍ ​ក្នុងការ​អភិវឌ្ឍ​ ​គឺ​ដៃគូ​ឯកជន​ហ្នឹង​ហើយ។​ ក្រុមហ៊ុន ​សហគ្រាស រដ្ឋ​វៀតណាម​ ​គេ​ជួយ​ឲ្យ​គោរព​ផែនការ​ ​គោរព​កិច្ច​សន្យា ​មួយឆ្នាំ​ដាំ​ប៉ុន្មាន​ ​គេ​ធ្វើ​ឲ្យ​បាន​គ្រប់​ផែនការ»។

លោក​ខាំ ភឿនបាន​បញ្ជាក់​ថា​ ​ការ​ធ្វើ​វិនិយោគ​វៀតណាម​ និង​ការ​ផ្លាស់ប្តូរ​ពាណិជ្ជ​កម្ម​នៅតាមតំបន់​ព្រំដែន​ជួយ​លើក​កម្ពស់​ជីវភាព​រស់នៅ​របស់​ប្រជា​ពលរដ្ឋ​ ​ការ​ប្រមូល​ពន្ធ​ និង​ការងារ​ធ្វើ សម្រាប់​ប្រជា​ពលរដ្ឋ​ខ្មែរ៕

XS
SM
MD
LG