ភ្ជាប់​ទៅ​គេហទំព័រ​ទាក់ទង

សមយុទ្ធ​យោធា​ពហុ​ជាតិ​បញ្ចប់​សមយុទ្ធ​យោធា​នៅ​ក្នុង​ខេត្ត​កំពង់ស្ពឺ


កំពង់​ស្ពឺ៖ ​កងទ័ព​ពហុ​ជាតិ​សាសន៍​ទើបតែ​បាន​បញ្ចប់​ការ​ធ្វើ​សមយុទ្ធ​យោធា​នៅក្នុង​ខេត្ត​កំពង់ស្ពឺ ​នៅ​ថ្ងៃនេះ។ ​សមយុទ្ធ​នេះបាន​ប្រព្រឹត្តទៅ​អស់​រយៈពេល​ពីរ​សប្ដាហ៍​ក្នុងគោល​ដៅ​ពង្រឹង​ការ​ថែរក្សាសន្តិភាព​ និងពង្រឹង​កិច្ច​សហ​ប្រតិបត្តិការ​ក្នុង​សហគមន៍​អន្ដរ​ជាតិ។

កងកម្លាំង​ប្រដាប់​អាវុធ​មក​ពី​ប្រទេស​ចំនួន​២៤​ រួមទាំង​ប្រទេស​កម្ពុជា​ផងដែរ​ ​ បាន​បញ្ចប់​ការ​ធ្វើ​សមយុទ្ធ​ទ្រង់ទ្រាយ​ធំ​រយៈ​ពេល​ពីរ​សប្ដាហ៍​ ​រួមគ្នា នៅ​ថ្ងៃសុក្រ​នេះ​ ​ដែល​មន្ដ្រី​ជាន់ខ្ពស់​យោធា​រំពឹង​ពី​លទ្ធផល​នៃ​ការ​ពង្រឹង​សមត្ថ​ភាព​កងទ័ព​ និង​កិច្ច​សហការ​យោធា​ចម្រុះ​ជាតិសាសន៍​នៅថ្ងៃ​អនាគត។

សមយុទ្ធ ​ដែល​មាន​ឈ្មោះ​ថា ​"ឆ្មាំ​អង្គរ ២០១០" ​បាន​ប្រព្រឹត្តទៅក្នុង​បន្ទាយ​កង​រថក្រោះ​ នៅ​ខេត្ត​កំពង់ស្ពឺ​ នៅ​ចម្ងាយ​ប្រមាណ​ជាង​៥០គម​ភាគ​ខាងលិច​ក្រុង​ភ្នំពេញ​ ចាប់ថ្ងៃ​ទី​ ១៧​ ​រហូត​ដល់​ថ្ងៃ​ទី៣០ ​ខែ​កក្កដានេះ​ ​ប្រយោជន៍​គឺដើម្បី​ពង្រឹង​សមត្ថ​ភាព​ការពារ​សន្ដិភាពក្នុង​ក្រប​ខណ្ឌ​របស់​អង្គការ​សហ​ប្រជាជាតិ។​ មេ​បញ្ជាការ​កងទ័ព​របស់​សហ​រដ្ឋ​អាមេរិក​ប្រចាំ​តំបន់​ប៉ាស៊ីហ្វិក ​បានសហការ​រៀបចំ​ លំហាត់​យោធា​នេះ។

លោក​ ទៀ បាញ់​ ឧបនាយក​រដ្ឋមន្ដ្រី​និង​ជា​រដ្ឋមន្រ្ដី​ក្រសួង​ការពារ​ជាតិ​ ​មាន​ប្រសាសន៍​នៅក្នុង​ពិធី​បិទ​សមយុទ្ធ​នោះ​ថា​ ​សមយុទ្ធ​នេះ​ នឹង​ជួយ​ដោះស្រាយ​នូវ​ឧបទ្ទវ​ហេតុ​ជាយថាហេតុ​ណាមួយ ​ដែល​អាច​កើត​ឡើង​ក្នុង​ពិភព​លោក។

លោក​មាន​ប្រសាសន៍ថា​ ​លំហាត់​យោធា​នេះ​មិន​ត្រឹមតែ​ជួយ​ពង្រឹង​សមត្ថភាព​យោធា​ចម្រុះ​ជាតិ​សាសន៍​ប៉ុណ្ណោះ​ទេ​ ​ក៏ប៉ុន្ដែ​វា​ក៏​ជា​ផ្នែក​មួយ​នៃ​ការ​ពង្រឹង​ទំនាក់​ទំនង​យោធា​កម្ពុជា​ និង​យោធា​សហ​រដ្ឋ​អាមេរិក​ផង​ដែរ។

“លទ្ធផល​ដែល​សម្រេច​បាន​ក្នុង​វគ្គ​លំហាត់​ហ្វឹកហ្វឺន​នេះ​ក៏​មិន​ត្រឹម​តែ​បញ្ជាក់​អំពី​ជោគជ័យ​នៃ​សហ​ប្រតិបត្តិ​ការ​ទ្វេភាគី​រវាង​កម្ពុជា ​និង​សហ​រដ្ឋ​អាមេរិក​លើ​វិស័យ​ការ​បង្កើន​សមត្ថ​ភាព​រក្សា​សន្ដិភាព​ប៉ុណ្ណោះ​ទេ​ ​តែ​ជា​ការ​ផ្ដល់​ឱកាស​ដល់​ការ​បង្ក​លក្ខណៈ​ចំពោះ​ការ​ពង្រីក​កិច្ច​សហ​ប្រតិបត្តិការ​រវាង​ កម្ពុជា​ និង​ប្រទេស​ដែល​ចូលរួម​ ​ព្រមទាំង​ពង្រឹង​ថែម​ទៀត​នូវ​ទំនាក់​ទំនង​យោធា​ និង​យោធា​រវាង​ កម្ពុជា​ និង​សហ​រដ្ឋ​អាមេរិក​ក្នុង​សកម្មភាព​មនុស្ស​ធម៌​ទៀត​ផង"។

មាន​កងយោធា​ចម្រុះ​ជាតិសាសន៍​សរុប​ទាំងអស់​ចំនួន​៧០៣​នាក់​ ​ក្នុងនោះ​រួមមាន​យោធា​មកពី​សហ​រដ្ឋ​អាមេរិក​១២១​នាក់ ​មកពីប្រទេសចិន ​ប្រទេសឥណ្ឌា ​មកពី​ប្រទេសអាល្លឺម៉ង់ ​ ​ប្រទេសបារាំង ប្រទេសអូស្ត្រាលី​ ​ប្រទេសថៃ​ ​ប្រទេសម៉ាឡេស៊ី​ ​ប្រទេស​ហ្វីលីពីន ប្រទេស​ប៊្រុយណេ និង​យោធា​មក​ពីប្រទេសតុងហ្គោ​ជាដើម។

កង​យោធា​ទាំងនេះ​បាន​រៀន​ទ្រឹស្ដី​ពី​ការ​រក្សា​សន្ដិភាព​របស់​អង្គការ​សហ​ប្រជាជាតិ​អំពី​ជំនួយ​មនុស្ស​ធម៌ ​ការ​ដើរ​ល្បាត​ ការ​ការពារ​ក្បួន​ទ័ព​ ការ​ឡោមព័ទ្ធ ​និង​ការ​រំសាយ​កងទ័ព​ជាដើម។

លោក​ឧត្តមសេនីយ៍ត្រី​ ចន ស៊ីវ៉ត​ (John Seward)​ ​មេបញ្ជាការ​រង​កងទ័ព​សហ​រដ្ឋ​អាមេរិក​ប្រចាំ​តំបន់​ ប៉ាស៊ីភិច​ ​មាន​ប្រសាសន៍​តាមរយៈ​អ្នក​បកប្រែ​ថា​ ​សមយុទ្ធ​នេះ​បាន​ជួយ​ពង្រឹង​ប្រសិទ្ធិ​ភាព​និង​សមត្ថ ភាព​របស់​កងទ័ព​ក្នុង​ប្រតិបត្តិ​ការ​ការពារ​សន្តិភាព។

“ឥឡូវនេះ​យើង​មាន​ការ​ត្រៀម​ប្រសើរ​ឡើង​ក្នុងការ​ធ្វើ​ប្រតិបត្តិ​ការ​រក្សា​សន្ដិភាព​អន្ដរ​ជាតិ។​ ហើយ​យើង​មាន​សមត្ថ​ភាព​ ​លទ្ធភាព​ និង​ប្រសិទ្ធិ​ភាព​ក្នុង​ការ​បង្កើត​ និង​ធ្វើ​ឲ្យ​មាន​និរន្ដរ​ភាព​ប្រតិបត្តិ​ការ សន្ដិសុខ។​ ទាំងអស់​គ្នា ​យើង​បាន​ធ្វើ​ឲ្យ​មាន​ការវិវត្ដន៍​យ៉ាង​ច្រើន​ក្នុង​ការ​ជួយ​ធានា​សន្ដិភាព​នៅ​អាស៊ី​ ​ហើយ​និង​តំបន់​ផ្សេងៗ​ទៀត។​ យើង​នឹង​កសាង​នូវ​មូលដ្ឋាន​ដ៏​មាន​ស្ថិរភាព​និង​សន្ដិសុខ​នៅថ្ងៃអនាគត។

គួររំឭក​ថា​ ​នៅ​មុន​បន្ដិច​នៃ​ការរៀបចំ​សមយុទ្ធ​យោធា​នេះ​ ​អង្គការ​ឃ្លាំមើល​សិទ្ធិ​មនុស្ស​សហ​រដ្ឋ​អាមេរិក​ Human Rights Watch​ បាន​រិះគន់ការជ្រើស​រើស​យក​ទីតាំង​បន្ទាយ​កង​រថក្រោះ​ ACO​ក្នុង​ខេត្ត​កំពង់ស្ពឺ​ ​សម្រាប់​ការ​ធ្វើ​សមយុទ្ធ​នេះ​ ដោយសារ​យោធា​នៃ​តំបន់​នេះ​ ​ត្រូវ​ចោទ​ប្រកាន់​ពី​បទ​ប្រឡាក់​ប្រឡូស​ទៅដោយ​រឿង​អាស្រូវ​នៃ​ការ​ទន្រ្ទានដីខុសច្បាប់​លើ​ក្រុម​អ្នកភូមិ។

ទោះ​ជា​យ៉ាងនេះក្ដី​ ​លោក​ប្រាក់ សុខុន ​រដ្ឋ​លេខាធិការ​ទីស្ដី​ការ​គណៈ​រដ្ឋមន្ដ្រី​ ​បាន​អះអាង​ថា​ ​កម្ពុជា​ គ្រោង​នឹង​រៀបចំ​សមយុទ្ធ​យោធា​មួយទៀត​នៅ​ទីតាំង​ដដែល​នេះ​ នៅ​ឆ្នាំក្រោយ​ ​ដោយ​មាន​ជំនួយ​ពី​យោធា​សហ​រដ្ឋ​អាមេរិក៕

XS
SM
MD
LG