នៅថ្ងៃសុក្រនេះ លោកសូរិយា ប្រាសាតស៊ូបេឌី តំណាងពិសេសអង្គការសហប្រជាជាតិផ្នែកសិទ្ធិមនុស្សប្រចាំកម្ពុជា បានអំពាវនាវគណបក្សគ្រប់គ្រងអំណាច និងគណបក្សប្រឆាំងធ្វើឲ្យការរួមគ្នាឆ្ពោះទៅរកការបោះឆ្នោតដោយសេរី និងត្រឹមត្រូវ។
លោកសូរិយា ប្រាសាតស៊ូបេឌីបានថ្លែងបែបនេះក្នុងសន្និសីទកាសែត នៅចុងបញ្ចប់បេសកកម្មរបស់លោកមកកាន់ប្រទេសកម្ពុជា ខណៈដែលលោកសម រង្ស៊ីមេដឹកនាំគណបក្សប្រឆាំងកំពុងនិរទេសខ្លួននៅប្រទេសបារាំងដើម្បីកុំឲ្យជាប់ពន្ធនាគារ ហើយតំណាងរាស្ត្រគណបក្សសម រង្ស៊ី បានធ្វើពហិការប្រជុំសភា។
លោកសូរិយា ប្រាសាតស៊ូបេឌីបានបញ្ជាក់ថា លោកមានការខ្វល់ខ្វាយក្នុងការធ្វើឲ្យប្រសើរឡើងដល់ការផ្សះផ្សាគ្នារវាងគណបក្សប្រជាជនកម្ពុជា និងគណបក្សសម រង្ស៊ី។
«កិច្ចខំប្រឹងប្រែងរួមគ្នានេះគឺជាផលប្រយោជន៍របស់គណបក្សកាន់អំណាច និងគណបក្សប្រឆាំងសម្រាប់ការផ្សះផ្សា និងលទ្ធិប្រជាធិបតេយ្យ។ខ្ញុំដឹងអំពីស្ថានភាពរបស់លោកប្រធានគណបក្សនយោបាយសម រង្ស៊ី។ ខ្ញុំយល់ឃើញថា កិច្ចខិតខំប្រឹងប្រែងរួមគ្នាមួយដោយគណបក្សកាន់អំណាច និងគណបក្សប្រឆាំងឈានទៅកាន់ការផ្សះផ្សាគ្នាមួយគឺជាអត្ថប្រយោជន៍នៃលទ្ធិប្រជាធិបតេយ្យនីយកម្មមួយដែលកាន់តែខ្លាំង និងស៊ីជម្រៅជាងនេះថែមទៀតនៅក្នុងប្រទេស»។
លោកសូរិយា ប្រាសាតស៊ូបេឌីបានលើកឡើងថា បើគណបក្សទាំងពីរមានការផ្សះផ្សាគ្នា លទ្ធិប្រជាធិបតេយ្យនឹងមានភាពរឹងមាំ ហើយបើគណបក្សទាំងពីរធ្វើរួមគ្នា វានឹងផ្តល់ផលប្រយោជន៍យ៉ាងសម្បើមដល់ប្រទេសកម្ពុជា។
ប្រទេសកម្ពុជាគ្រោងនឹងធ្វើការបោះឆ្នោតជ្រើសតាំងព្រឹទ្ធសភា និងក្រុមប្រឹក្សាឃុំ សង្កាត់នៅក្នុងឆ្នាំ២០១២ ហើយនិងការបោះឆ្នោតជ្រើសតាំងតំណាងរាស្ត្រនៅឆ្នាំ២០១៣។
លោកយឹម សុវណ្ណ អ្នកនាំពាក្យគណបក្សសម រង្ស៊ី បានហៅការកត់សម្គាល់របស់លោកសូរិយា ប្រាសាតស៊ូបេឌីអំពីការផ្សះផ្សាគ្នារវាងគណបក្សសម រង្ស៊ី និងគណបក្សកាន់អំណាចនេះថា ជាការចាប់អារម្មណ៍យ៉ាងខ្លាំងពីសហគមន៍អន្តរជាតិអំពីករណីលោកសម រង្ស៊ី៕
«បើសិនជាការបោះឆ្នោតនេះមិនមានវត្តមានរបស់លោកសម រង្ស៊ីទេ យើងនឹងមិនចាត់ទុកថា ការបោះឆ្នោតនេះមានភាពសេរី និងយុត្តិធម៌ទេ។ យើងនឹងធ្វើការពិចារណាដើម្បីរកដំណោះស្រាយសមស្របមួយ ធានាឲ្យលោកប្រធានសម រង្ស៊ី បានវិលត្រឡប់ចូលមកក្នុងប្រទេសវិញដោយសុវត្ថិភាព»។
លោកឯក ថា អ្នកនាំពាក្យនៃអង្គភាពព័ត៌មាន និងប្រតិកម្មរហ័សប្រចាំទីស្តីការគណៈរដ្ឋមន្ត្រី បានថ្លែងយ៉ាងដូច្នេះថា៖
«យើងប្រកាន់គោលការណ៍លទ្ធិប្រជាធិបតេយ្យ ហើយអ្វីដែលលោកសូរិយា ប្រាសាតស៊ូបេឌី តំណាងពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សមកកាន់ប្រទេសកម្ពុជានិយាយនោះ គឺជាយោបល់របស់គាត់ ហើយខ្ញុំគ្មានយោបល់តបទៅនឹងគាត់ទេ»។
ក្រោយពីបានជួបជាមួយមន្ត្រីរដ្ឋាភិបាលនៅក្នុងបេសកកម្មនេះ លោកសូរិយា ប្រាសាតស៊ូបេឌីបានលើកឡើងអំពីការព្រួយបារម្ភអំពីបញ្ហាជម្លោះដីធ្លី សេរីភាពនៃការបញ្ចេញមតិ សេចក្តីព្រាងច្បាប់សមាគមន៍ និងអង្គការមិនមែនរដ្ឋាភិបាល ភាពមិនស្មើគ្នានៃការផ្សព្វផ្សាយព័ត៌មានរបស់គណបក្សនយោបាយ ការប្រើប្រាស់ធនធានរដ្ឋសម្រាប់បម្រើការឃោសនាបោះឆ្នោត ភាពមិនប្រក្រតីនៃការចុះឈ្មោះអ្នកបោះឆ្នោត ការគំរាមកំហែង ការបំភិតបំភ័យ និងការយារយីប្រឆាំងសមាជិក និងបេក្ខជនរបស់គណបក្សនយោបាយនៅក្នុងការបោះឆ្នោតខាងមុខនេះ៕
