ប្រទេសកម្ពុជាបានបោះជំហានឆ្ពោះទៅរកការពង្រីកការទូតជាផ្លូវការ នៅក្នុងប្រទេសចិន នៅថ្ងៃសុក្រនេះ ខណៈដែលរដ្ឋសភាបានអនុម័តយល់ព្រមជាឯកច្ឆ័នលើអនុសញ្ញាមួយ ដើម្បីអនុញ្ញាតឱ្យបង្កើតស្ថានកុងស៊ុលយ៉ាងតិច៦នៅទូទាំងប្រទេសចិន។
សមាជិកសភាចំនួន៨៩រូបនៃសមាជិកសភាសរុប១២៣រូប ដែលមានវត្តមាននៅក្នុងសម័យ ប្រជុំពេញអង្គនៃរដ្ឋសភា បានបោះឆ្នោតអនុម័តអនុសញ្ញារវាងប្រទេសកម្ពុជា និងប្រទេសចិន ក្នុងគោលបំណងជំរុញការអភិវឌ្ឍន៍ទំនាក់ទំនងការទូតពាណិជ្ជកម្ម សេដ្ឋកិច្ច វិនិយោគ វប្បធម៌ ទេសចរណ៍ វិទ្យាសាស្ត្រ និងវិស័យដទៃជាច្រើនទៀត ហើយក៏អនុញ្ញាត ឱ្យប្រទេសចិន បើកស្ថានកុងស៊ុលបន្ថែមទៀត នៅតាមបណ្តាខេត្តមួយចំនួននៅទូទាំង ប្រទេសកម្ពុជា។
ការអនុម័តលើអនុសញ្ញាកុងស៊ុលនេះធ្វើតាមទំនាក់ទំនងល្អប្រសើរជាមួយប្រទេសចិននៅ ក្នុងរយៈពេលជាច្រើនឆ្នាំថ្មីៗនេះ ដែលរួមមានជំនួយទឹកប្រាក់១២០០លានដុល្លារអាមេរិក នៅក្នុងឆ្នាំ២០០៩និងការប្រកាសជំនួយយោធា១៤លានដុល្លារអាមេរិក កាលពីថ្ងៃអាទិត្យ។
អនុសញ្ញានេះសំដៅការពារសិទ្ធិ និងផលប្រយោជន៍បុគ្គលស្របច្បាប់របស់ប្រជាពលរដ្ឋ នៃប្រទេសទាំង២ ស្របតាមច្បាប់ និងទម្លាប់អន្តរជាតិ។ ប្រទេសកម្ពុជាមានការិយាល័យ ទំនាក់ទំនងចំនួន៦នៅក្នុងទីក្រុងធំៗនៃប្រទេសចិន ដូចជាហុងកុង ម៉ាកាវ សៀងហៃ ក្វាងចូវ ឆុងឈ៉ីង គុនម៉ិន និងណាន់និញ ជាដើមដែលនឹងក្លាយទៅស្ថានកុងស៊ុល។
លោក ហោ ណាំហុង រដ្ឋមន្ត្រីក្រសួងការបរទេស បានថ្លែងនៅក្នុងសម័យប្រជុំសភាថា ពាណិជ្ជកម្ម និងការវិនិយោគរវាងកម្ពុជា និងចិនមានការរីកចម្រើនខ្លាំងណាស់ ដែលតម្រូវ ឱ្យមានអនុសញ្ញាកុងស៊ុលនេះ។ អនុសញ្ញានេះនឹងជំរុញប្រជាពលរដ្ឋចិនកាន់តែច្រើនឡើង មកធ្វើទេសចរណ៍ ធ្វើពាណិជ្ជកម្ម ធ្វើការផ្លាស់ប្តូរសេដ្ឋកិច្ច និងការវិនិយោគ។
"ខ្ញុំសូមអរគុណអង្គសភាទាំងមូល ដែលបានអនុម័តយល់ព្រមជាឯកច្ឆ័ន៨៩សំឡេងលើ៨៩ សំឡេងនិងអនុញ្ញាតឱ្យរដ្ឋាភិបាលបានដំណើរការជាមួយប្រទេសចិនក្នុងការទំនាក់ទំនង សេដ្ឋកិច្ចឱ្យកាន់តែមានការរីកចច្រើនកាន់តែខ្លាំងឡើងរវាងប្រទេសរបស់យើងទាំង២ឱ្យ បានរលូនល្អទៅមុខក្នុងផលប្រយោជន៍ការពារការពង្រឹងពង្រីកការអភិវឌ្ឍសេដ្ឋកិច្ចសង្គម របស់ប្រទេសយើង"។
លោកសុន ឆ័យ តំណាងរាស្ត្រគណបក្សប្រឆាំង បានថ្លែងថា សកម្មភាពការងារផ្នែកជួយ រកទីផ្សារពាណិជ្ជកម្ម និងទាក់ទាញវិនិយោគពីប្រទេសទាំងនោះ មកប្រទេសកម្ពុជារបស់ មន្ត្រីស្ថានទូត និងស្ថានកុងស៊ូលរបស់យើងនៅបរទេស មិនទាន់អាចទទួលយកបានទេ។
លោក សុន ឆ័យ បានបន្តថា យើងមិនទាន់បានប្រើប្រាស់ស្ថានទូត និងស្ថានកុងស៊ូលរបស់ យើង ដើម្បីជាប្រយោជន៍សេដ្ឋកិច្ចទេ។
"ព្រះរាជាណាចក្រម្ពុជាយើងដែលបានចំណាយប្រាក់មួយចំនួន ដើម្បីបង្កើតឱ្យមានជាស្ថាន ទូតនិងស្ថានកុងស៊ុលនេះ គួរប្រើប្រាស់ទីតាំងនិងធនធានមនុស្សរបស់យើងជាប្រយោជន៍ ផ្នែកសេដ្ឋកិច្ច"។
លោកជាម យៀប ប្រធានគណៈកម្មការសេដ្ឋកិច្ច និងហិរញ្ញវត្ថុនៃរដ្ឋសភាខាងគណបក្ស ប្រជាជនកម្ពុជាបានថ្លែងថា កិច្ចព្រមព្រៀងនេះសំដៅការពារផលប្រយោជន៍នៃទំនាក់ទំនង ការទូត សេដ្ឋកិច្ច វប្បធម៌ សង្គមកិច្ច ទេសចរណ៍ បច្ចេកវិទ្យាសម័យទំនើបផ្សេងៗទៀត ដែលកម្ពុជាត្រូវការចាំបាច់។
ប្រទេសកម្ពុជាបានទទួលភ្ញៀវទេសចរណ៍ជាង២,១៦លាននាក់នៅក្នុងឆ្នាំ២០០៩ បើប្រៀប ធៀបនឹងឆ្នាំ២០០៨មានចំនួន២,១៣លាននាក់ បានកើនឡើង២ភាគរយ ខណៈដែលមាន អ្នកទេសចរណ៍ពីប្រទេសចិនជិត១១៥០០០នាក់។
យោងតាមតួលេខរបស់រដ្ឋាភិបាលកម្ពុជា ប្រទេសចិនបានវិនិយោគទឹកប្រាក់ជាង៦៥០០ លានដុល្លារអាមេរិកនៅកម្ពុជា រវាងពីឆ្នាំ១៩៩៤ដល់ឆ្នាំ២០០៩។ ការវិនិយោគទឹកប្រាក់៤៣០០លានដុល្លារអាមេរិករបស់ប្រទេសចិនមាន៤០ភាគរយនៃការវិនិយោគបរទេស។