ភ្ជាប់​ទៅ​គេហទំព័រ​ទាក់ទង

កម្ពុជា​បន្ត​សាងសង់​ទំនប់​វារីអគ្គិសនី​ បើ​ទោះបី​មាន​ការ​រិះគន់


ផែនទី​​ប្រទេស​​កម្ពុជា។​ ​ខេត្ត​កោះកុង​នៅ​ភាគ​នីរតី​ជាប់សមុទ្រ ដែល​គ្រោង​​ធ្វើ​ទំនប់​វារី​អគ្គិសនី។​​

ភ្នំពេញ៖ កម្ពុជា​បាន​ចាប់ផ្ដើម​សាងសង់​ទំនប់​វារី​អគ្គិសនី​ថ្មី​មួយ​នៅ​ថ្ងៃ​អង្គារ៍នេះ​ដោយ​រំពឹងថា​នឹង​ជួយ​កាត់​បន្ថយ​ការពឹងពាក់​អគ្គិសនី​ដែល​បង្កើតឡើង​ដោយ​ការប្រើប្រាស់​ប្រេងឥន្ធនៈ។ ក៏ប៉ុន្ដែ​ក្រុមអ្នក​បរិស្ថាន​បាន​បន្ដ​រិះគន់​ការសម្រេច​ចិត្ត​នេះ។

ទំនប់​វារីអគ្គិសនី​ឫស្សី​ជ្រុំ​ក្រោម​នេះ​ស្ថិត​នៅ​ចំងាយ​ជាង ៥០គីឡូម៉ែត្រ ​ពី​ទីរួមខេត្ត​កោះកុង។ ទំនប់​នេះ​ មាន​លទ្ធភាព​ផ្ដល់​ថាមពល​ចំនួន​ ៣៣៨ មេហ្កាវ៉ាត់​ ក្រោម​ការវិនិយោគ​របស់​ក្រុមហ៊ុន​ចិន China Huadian Corporation​ នូវ​ទឹកប្រាក់​ចំនួន ​៤៩៥ ​លាន​ដុល្លារអាមេរិក។

យោងតាម​គម្រោង​ការ​សាងសង់​ទំនប់​វារីអគ្គិសនី​នេះនឹង​អាចចាប់​ផ្ដើម​ផ្ដល់​ថាមពល​ជាលើក​ដំបូង​នៅ​ក្នុង​ខែ​កក្កដា ​ឆ្នាំ ២០១៥។

កាលពី​ចុងឆាំ្ន ២០០៩​ វេទិការ​អង្គការ​មិនមែន​រដ្ឋាភិបាល​ (Ngo Forum) ​បាន​ចេញ​របាយការណ៍​មួយ​ ដោយ​សិក្សា​លម្អិត​លើការ​វិនិយោគ​ផ្នែក​វារី​អគ្គិសនី​នៅ​កម្ពុជា។ របាយការណ៍​បាន​សន្និដ្ឋាន​ថា​ ការ វិនិយោគ​ដូច​នេះ ​គឺជា​ការហួស​សម័យ​ ត្រូវ​ចំណាយ​ដើមទុន​ខ្ពស់​ និង​បង្ក​ឲ្យ​មាន​ហានិភ័យ​ជាច្រើន​ ជាពិសេស​ផល​ប៉ះពាល់​ដល់​បរិស្ថាន ​និង​ជីវភាព​របស់​ប្រជាពលរដ្ឋ​នៅតាម​តំបន់​ជុំវិញ។

ថ្លែង​ក្នុង​ពិធី​បើក​ការដ្ឋាន​សាងសង់​ទំនប់​វារីអគ្គិសនី​ឬស្សី​ជ្រុំ​ក្រោម​នៅថ្ងៃ​នេះ ​លោក ​នាយករដ្ឋមន្ដ្រី ហ៊ុន សែន​ បាន​ហៅ​ក្រុម​អ្នកបរិស្ថាន​ ដែល​បាន​ធ្វើការ​រិះគន់​លើ​ការវិនិយោគ​វិស័យ​វារីអគ្គិសនី​នៅ​ កម្ពុជា​ថា​ ជាក្រុម​អ្នកនិយមជ្រុល ​ហើយ​លោក​អះអាង​ថា ​ការវិនិយោគ​ប្រភេទ​នេះ​ គឺជា​ការធានា​និរន្ដរភាព​នៃ​ថាមពល។

«តើមាន​ការអភិវឌ្ឍ​ណាមួយ​ដែល​មិនប៉ះពាល់​ដល់​បរិស្ថាន​នោះ? ដល់​ធនធាន​ធម្មជាតិ​នោះ? សូម​ឲ្យ​គេ​ផ្ដល់​ចម្លើយ​សមរម្យដ​ល់យើង។ បើយើង​កាត់បន្ថយ​បាន​ទៅលើ​ការពឹងពាក់​លើ​ប្រេងកាត​ ប្រេងសាំង​ ប្រេងម៉ាស្ស៊ូត​ នោះ​សន្ដិសុខ​ថាមពល​នឹង​ត្រូវ​បានធានា»។

ប្រទេស​ចិន​បាន​និង​កំពុង​វិនិយោគ​លើវិស័យ​វារីអគ្គិសនី​ចំនួន​ប្រាំ​យ៉ាងតិច​នៅ​កម្ពុជា ​គឺ​នៅក្នុង​ខេត្ត ពោធិ៍សាត់ ​កោះកុង ​កំពង់ស្ពឺ ​និង​កំពត​ជាដើម។ ក៏ប៉ុន្ដែ​កម្ពុជា​នៅមាន​គម្រោង​វិនិយោគ​មួយ​ចំនួន​ទៀត​លើ​វារីអគ្គិសនី​នៅតាម​បណ្ដោយ​ដងទន្លេ​មេគង្គ។

លោក​នាយក​រដ្ឋមន្ដ្រី​ហ៊ុន សែន ​មាន​ប្រសាសន៍​ថា ​ក្រៅពី​ទំនប់​វារី​អគ្គិសនី​គិរីរម្យ​មួយ​របស់​ចិន ដែល​បាន​ដំណើរការ​ផលិត​អគ្គិសនី​ទៅហើយ​នោះ​ ទំនប់​វារី​អគ្គិសនី​ផ្សេងទៀត​នឹងត្រូវ​ចាប់ផ្ដើម​ផលិត​អគ្គិសនី​ជា​បន្ដបន្ទាប់​ចាប់ពី​ចុងឆ្នាំ ២០១១​ ឆ្នាំ ២០១២​ ឆ្នាំ ២០១៣​ រហូត​ដល់ឆ្នាំ ២០១៥។

លោក​ ឈិត សំអាត ​នាយកប្រតិបត្តិ​របស់​អង្គការ ​NGO Forum ​មាន​ប្រសាសន៍​ថា​បទពិសោធ​របស់​ប្រទេស​ជាច្រើន​នៅលើ​ពិភពលោក​បាន​បង្ហាញថា​ការវិនិយោគ​លើវារីអគ្គិសនី​បាន​ធ្វើឲ្យ​មាន​ផល​ប៉ះ​ពាល់​ជាច្រើន​ដល់​បរិស្ថាន។

លោក​ ទេព ប៊ុនណារិទ្ធ​ ប្រធាន​សមាគម​ការពារ​បរិស្ថាន​និង​វប្បធម៌​ មាន​ប្រសាសន៍ថា​ការវាយតម្លៃ​លើ​ផល​ចំណេញ​ឬការ​ប៉ះពាល់​បណ្ដាល​មកពី​ទំនប់​វារីអគ្គិសនី​អាស្រ័យ​តាម​ការវាយតម្លៃ​ផ្សេងៗ​គ្នា​ក៏​ប៉ុន្ដែ​ការសិក្សា​កន្លង​មក​បាន​បង្ហាញ​ពីគុណវិបត្តិ​ជាច្រើន​ដោយសារ​ការបង្កើត​ទំនប់​វារីអគ្គិសនី។

«កន្លែងណា​ដែល​មាន​អាងទឹក​តូច ​ធ្វើឲ្យ​ផលប៉ះពាល់​បរិស្ថាន ​និង​សង្គម​តូចដែរ ​ តែ​ដោយឡែក​បើ​សិន​ជា​អាងទឹក​ហ្នឹងធំ​ដូចជា​នៅតាម​ដងទន្លេ ​វាអាច​ខូច​ប្រព័ន្ធបរិស្ថាន​ទន្លេ ​ខាង​កសិកម្ម​ ឬ​ជីវចម្រុះ​ក្នុង​ទន្លេ។ ធនធាន​ទាំងអស់​នោះ​គឺជា​ប្រភព​នៃ​ការចិញ្ចឹម​ជីវិត​របស់​ប្រជាពលរដ្ឋ»។

យោងតាម​របាយការណ៍​ឆ្នាំ ២០០៩ ​របស់​ក្រសួង​ឧស្សាហកម្ម​ រ៉ែ​ និង​ថា​មពល​បាន​ឲ្យដឹងថា​ប្រជា​ពលរដ្ឋ​ប្រមាណ​ជា ២៦​ ភាគរយ​នៃ​ប្រជាជន​សរុប​ចំនួន​ ១៤​ លាននាក់​ បាន​ទទួល​ភ្លើង​អគ្គិសនី​ប្រើ​ជាប្រចាំ។ ក្នុង​ពេល​នេះ ​កម្ពុជា​កំពុង​ទិញ​ភ្លើង​អគ្គិសនី​ពី​ប្រទេស​ថៃ ឡាវ​ និង​វៀតណាម។

លោក​ហ៊ុន សែន​ ជឿថា​ រហូត​ដល់​ឆ្នាំ​ ២០៣០ ​ប្រជាពលរដ្ឋ​កម្ពុជា​ស្ទើរ​តែ​ទូទាំង​ប្រទេស​នឹង​ទទួល​បាន​អគ្គិសនី​សម្រាប់​ប្រើប្រាស់៕

XS
SM
MD
LG