ភ្ជាប់​ទៅ​គេហទំព័រ​ទាក់ទង

ថៃ​និង​កម្ពុជា​ចុះ​ហត្ថលេខា​លើកលែង​ទិដ្ឋាការ


ដង​ទង់​ជាតិ​ខ្មែរ​និង​ថៃ​នៅ​ក្បែរ​គ្នា​ឯ​ឈូង​សមុទ្រ​ថៃ​​ត្រង់​ចំណុច​​ច្រក​ព្រំដែន​អន្តរជាតិ​​ចាំយាម​រវាង​ខេត្ត​កោះកុង​និង​ខេត្ត​ត្រាត​ប្រទេស​ថៃ។ កិច្ច​ព្រម​ព្រៀង​លើក​លែង​ទិដ្ឋាការ​ត្រូវ​គេ​រំពឹង​ថា​នឹង​នាំ​មក​នូវ​កំណើន​​សកម្មភាព​ពាណិជ្ជកម្ម​និង​ទេសចរណ៍​រវ

ភ្នំពេញៈ ការចុះ​ហត្ថលេខា​លើ​កិច្ច​ព្រមព្រៀង​លើកលែង​ទិដ្ឋាការ​សម្រាប់​លិខិត​ឆ្លងដែន​ធម្មតា​ រវាង​ប្រទេសកម្ពុជា​ និង​ប្រទេស​ថៃ ​នឹង​ជួយ​ជំរុញ​សកម្មភាព​ពាណិជ្ជកម្ម ​និង​លំហូរ​ភ្ញៀវ​ទេសចរណ៍​ ព្រមទាំងអនុញ្ញាត​ឱ្យ​ប្រជា​ពលរដ្ឋ​ខ្មែរ ​និងថៃអាច​ធ្វើ​ដំណើរ​ឆ្លងកាត់​ព្រំដែន​គ្នា​ទៅវិញទៅមក​ ដោយ​មិន​ចាំ​បាច់មាន​ទិដ្ឋាការ ​និង​គ្មាន​ការចំណាយ​ប្រាក់ទេ​ ប៉ុន្តែ​គ្រាន់តែ​មាន​លិខិត​ឆ្លងដែន​បាន​ហើយ។

នៅ​ថ្ងៃពុធនេះ​ ប្រទេស​កម្ពុជា ​បាន​ចុះហត្ថលេខា​លើ​កិច្ចព្រមព្រៀង​លើកលែង​ទិដ្ឋាការ​ជាមួយប្រទេស​ថៃ ​សម្រាប់​អ្នក​កាន់​លិខិតឆ្លងដែន​ធម្មតា​នៃ​ប្រទេស​ទាំងពីរ ​សំដៅ​ជំរុញ​សកម្មភាព​ពាណិជ្ជ​កម្ម ​និង​លំហូរ​ទេសចរណ៍។

កិច្ចព្រមព្រៀង​លើកលែង​ទិដ្ឋាការ​នេះ​ ត្រូវ​បាន​ចុះហត្ថលេខា​ដោយ​លោក​ហោ ណាំហុង ​រដ្ឋមន្ត្រី​ការ​បរទេស​កម្ពុជា​ និង​លោក​ កាស៊ីត​ ភីរម្យម៉ា​ (Kasit Piromya)​ រដ្ឋមន្ត្រី​ការបរទេស​ថៃ​នៅ​ចំពោះ​វត្តមាន​របស់​លោក​នាយក​រដ្ឋមន្ត្រី ​ហ៊ុន សែន ​និង​លោក​នាយក​រដ្ឋមន្ត្រី​ អាភីស៊ីត​ វិចាជីវ៉ា​ (Abhisit Vejjajiva)​។

ការចុះហត្ថលេខា​នេះ​ បាន​ធ្វើឡើង​ បន្ទាប់ពី​ជំនួប​រវាង​នាយករដ្ឋ​មន្ត្រីនៃ​ប្រទេស​ទាំងពីរ ​និង​បន្ទាប់​ពី​កិច្ចប្រជុំ​កំពូល ​ACMECS​ លើកទី​បួន​នៅក្នុង​ទីក្រុងភ្នំពេញ​ ដែល​ប្រទេស​ជិតខាង​ទាំង​ប្រាំ​រួមមាន​ ប្រទេស​កម្ពុជា ឡាវ​ ​ភូមា ថៃ​ និងវៀតណាម​ បាន​ពិភាក្សាគ្នា ​អំពី​កិច្ច​សហប្រតិបត្តិការ​សេដ្ឋកិច្ច​។

លោក​នាយករដ្ឋមន្ត្រី​ ហ៊ុន សែន ​បាន​ថ្លែង​ប្រាប់​ក្រុម​អ្នករាយការណ៍​ព័ត៌មាន​នៅ​ទី​ស្តីការ​គណៈរដ្ឋ​មន្ត្រី​យ៉ាង​ដូច្នេះថា៖

«យើង​មាន​ការចុះហត្ថលេខា​ដោយ​រដ្ឋមន្ត្រី​ការបរទេស​នៃ​ប្រទេស​ទាំងពីរ ​លើ​ការលើកលែង​ទិដ្ឋាការ​លើ​លិខិត​ឆ្លងដែន​ធម្មតា​។ ឥឡូវនេះ ​វាជា​ពេល​វេលា​ដែល​ត្រូវ​ពង្រឹង​ និង​ជំរុញទំនាក់​ទំនង​រវាង​ប្រទេស​ទាំងពីរ​ឱ្យ​កាន់តែ​ល្អប្រសើរ​ដោយ​បង្រួម​ទំនាស់​ និង​ពង្រីក​ការដោះស្រាយ​ និង​ពង្រីក​សហប្រតិបត្តិការ​ឱ្យ​កាន់​តែ​ទូលំទូលាយ​»។

លោក​ កុយ គង់ ​អនុរដ្ឋលេខាធិការ​ និង​ជា​អ្នក​នាំពាក្យ​ក្រសួង​ការបរទេស​កម្ពុជា ​បាន​ថ្លែងប្រាប់​ VOA ​ថា ​ប្រជាពលរដ្ឋ​ខ្មែរ ​និង​ថៃ ​អាច​ធ្វើ​ដំណើរ​ឆ្លងកាត់​ព្រំដែន​គ្នា​ទៅវិញទៅមក​ដោយ​មិន​ចាំបាច់មាន​ទិដ្ឋាការ​ និង​គ្មាន​ការចំណាយ​ប្រាក់ទេ​ ប៉ុន្តែ​គ្រាន់តែ​មាន​លិខិត​ឆ្លងដែន​បាន​ហើយ។

«កិច្ចព្រមព្រៀង​នេះ​នឹង​ចូល​ជាធរមាន​ក្នុង​រយៈពេល​៣០ថ្ងៃ ​បន្ទាប់ពី​ថ្ងៃ​ចុះ​ហត្ថលេខា​នេះ ​ហើយ​ពេល​ដែល​ចូល​ជាធរមាន​ ប្រជាពលរដ្ឋ​ទាំងពីរ​ប្រទេស​អាច​ឆ្លងដែន​ទៅ​ប្រទេស​ផង​គ្នា​ និង​អាច​ស្នាក់នៅ​រយៈពេល​១៤ថ្ងៃ»។

លោក​ កុយ គង់ ​បាន​បញ្ជាក់​ថា ការលើកលែង​ទិដ្ឋាការ​នេះ​ នឹង​ផ្តល់​ផលប្រយោជន៍​ខាង​វិស័យ​ទេសចរណ៍​ ពាណិជ្ជកម្ម ​និង​វិនិយោគ ​ព្រមទាំង​សម្រួល​ដល់​ការទំនាក់ទំនង​គ្នា​ទៅវិញទៅមក​ រវាង​ប្រជាពលរដ្ឋ​ និង​ប្រជាពលរដ្ឋ​។

«វា​ជួយ​ជំរុញ​កំណើន​ទេសចរណ៍​ សកម្មភាព​ពាណិជ្ជកម្ម​ ទំនាក់ទំនង​រវាង​ប្រជាពលរដ្ឋ ​និង​ប្រទេស ពលរដ្ឋ ​និង​អ្នកវិនិយោគទុន​មួយចំនួន​ងាយស្រួល​ចេញចូល​ប្រទេស​ ដើម្បី​ពិនិត្យ​មើល​សក្តានុពលផ្នែក​វិនិយោគ​»។

លោក​ គង់ សុធារៈ​ ប្រធាន​នាយកដ្ឋាន​ស្ថិតិ​នៃ​ក្រសួង​ទេសចរណ៍ ​បាន​បញ្ជាក់ថា​ ក្នុង​រយៈពេល​ ៩ខែដើម​ឆ្នាំ២០១០​នេះ ភ្ញៀវ​ទេសចរណ៍​ថៃដែល​បាន​មក​ទស្សនា​ប្រទេស​កម្ពុជា​ មាន​ចំនួនជាង​៦០.០០០ នាក់ ​បាន​ធ្លាក់​ចុះ​៩ភាគរយ ​បើ​ប្រៀបធៀបទៅ​នឹង​ឆ្នាំ២០០៩​។

ក្នុង​រយៈពេល​បួនខែ​ដើម​ឆ្នាំ២០១០​ ពាណិជ្ជកម្ម​ទ្វេភាគី​រវាង​ប្រទេស​កម្ពុជា ​និង​ប្រទេស​ថៃ ​មាន​តម្លៃ​ ៣៨៦ ​លានដុល្លារ​អាមេរិក​ ហើយ​ការផ្លាស់ប្តូរ​ទំនិញ​រវាង​ប្រទេស​ទាំងពីរ​មាន​តម្លៃ​ ៩១៤ លាន​ដុល្លារ​អាមេរិក​ ដែល​បាន​កើនឡើង​ ៨៤ ភាគរយ​ ពី ​៤៩៧​លានដុល្លារ​អាមេរិក នៅក្នុង​រយៈពេល​បួន​ខែដើម​ឆ្នាំ២០០៩​៕

XS
SM
MD
LG