ភ្ជាប់​ទៅ​គេហទំព័រ​ទាក់ទង

កម្ពុជា​ និង​​ថៃ​​ចាប់​ផ្ដើម​បញ្ជូន​​ឯក​អគ្គ​រាជ​ទូត​ជា​ថ្មី​ឡើងវិញ


ភ្នំពេញ៖ ប្រទេស​កម្ពុជា​ និង​ប្រទេស​ថៃចាប់​ផ្ដើម​ប្ដូរ​ឯក​អគ្គ​រាជ​ទូត​គ្នា​ទៅ​វិញ​ទៅ​មក​នៅ​ថ្ងៃ​នេះ​ ​បន្ទាប់​ពី​មាន​អរិយ​ភាព​នឹង​គ្នា​ជាច្រើន​ខែ​រួច​មក។​ ក្រុម​មន្ដ្រី​នៃ​ប្រទេស​ទាំងពីរ​រំពឹង​ថា​ ​នេះ​គឺជា​ជំហាន​សម្រាប់​ប្រក្រតី​ភាព​ផ្នែក​ការទូត​នៃ​ប្រទេស​ទាំង​ពីរ​ឡើង​វិញ។

ឯក​អគ្គ​រាជទូត​ប្រទេស​ថៃ ​លោក​ ប្រាសាត ​ប្រាសាត​វិនិតឆៃ​ (Prasart Prasartwinitchay) ​នឹងត្រូវមក​ដល់​ប្រទេស​កម្ពុជា​នៅ​យប់​នេះ​ ​ស្រប​ពេល​ដែល​ប្រទេស​កម្ពុជា​នឹង​បញ្ជូន​ឯកអគ្គរាជទូត​របស់​ខ្លួន​ទៅ​កាន់​ទីក្រុង​បាងកក​វិញ​នៅ​ថ្ងៃ​ពុធ​ស្អែក​នេះ​ ​នេះ​បើ​យោង​តាម​ការ​ឲ្យ​ដឹង​ពី​មន្រ្ដី​ផ្លូវការ​នៃ​ប្រទេស​ទាំង​ពីរ។

ការ​ផ្លាស់​មន្ដ្រី​ទូត​ទៅវិញ​ទៅមក​រវាង​ប្រទេស​គូ​ជម្លោះ​ភូមិ​ផង​របង​ជាមួយ​ទាំងពីរ​នេះ​ ​ធ្វើឡើង​មួយ​ថ្ងៃ​ប៉ុណ្ណោះ​ ​បន្ទាប់អតីត​នាយក​រដ្ឋ​មន្ដ្រី​ថៃ​ ​លោក​ថាក់ស៊ីន ​ស៊ីណាវ៉ាត់​ ​បាន​លាលែង​ពី​មុខងារ​ជា​ទី​ប្រឹក្សា​ផ្ទាល់​របស់​លោក​ហ៊ុន សែន​ ​នាយក​រដ្ឋមន្ដ្រី​កម្ពុជា ​និង​លាលែង​ពី​ទីប្រឹក្សា​រដ្ឋាភិបាល​កម្ពុជា​ ទទួល​បន្ទុក​ផ្នែក​សេដ្ឋ​កិច្ច។

លោក​ថានី ថងផាក់ឌី ​អគ្គ​នាយក​រង​នៃ​នាយក​ដ្ឋាន​ព័ត៌មាន​របស់​ក្រសួង​ការ​បរទេស​ថៃ​ ​បាន​ឲ្យ​ដឹងតាម​ទូរស័ព្ទ​ពី​ប្រទេស​ថៃ​ ​នៅ​ប៉ុន្មាន​ម៉ោង​មុន​នេះ​ថា​ ​ឯក​អគ្គ​រាជទូត​ថៃ​ ​បាន​ចាក​ចេញ​ពី​ប្រទេស​ថៃ​ឆ្ពោះ​មក​ក្រុង​ភ្នំពេញ​ហើយ។

«ឯក​អគ្គ​រាជទូត​ថៃ​នឹង​ចេញ​ដំណើរ​ពី​ទីក្រុង​បាងកក​ ​នៅ​ម៉ោង​ប្រមាណ៦​ល្ងាច​នេះ។ ​យើង​ជឿ​ថា​ ​វា​នឹង​ល្អ​សម្រាប់​ពេល​អនាគត​ ​ហើយ​យើង​ជឿថា​ ​មាន​ការ​សហការ​គ្នា​ទៅវិញ​ទៅមក​ល្អ​នូវ​ទំនាក់​ទំនង​នៃ​ភាគី​ទាំងពីរ»។

ប្រទេស​កម្ពុជា​ និង​ប្រទេស​ថៃបាន​ដក​ឯក​អគ្គ​រាជទូត​រៀងៗ​ខ្លួន​កាលពី​ខែវិច្ឆិកា​ឆ្នាំ​កន្លង​ទៅ​ ​បន្ទាប់​ពីកម្ពុជា​បាន​តែងតាំង​លោក​អតីត​នាយក​រដ្ឋមន្ដ្រី​ថាក់ស៊ីន​ ស៊ីណាវ៉ាត់​ ដែល​ត្រូវ​ផ្ដន្ទា​ទោស​ដោយតុលាការ​ថៃ​ពី​បទ​រំលោភ​អំណាចឲ្យ​ធ្វើជា​ទីប្រឹក្សា​ផ្ទាល់​របស់​លោក​នាយក​រដ្ឋមន្ដ្រី​ខ្មែរ​ហ៊ុន សែន​ និង​ជា​ទីប្រឹក្សា​រដ្ឋាភិបាល​កម្ពុជា​ ​ទទួល​បន្ទុក​ផ្នែក​សេដ្ឋ​កិច្ច។

ការ​តែងតាំង​នោះ​បាន​ធ្វើ​ឲ្យ​ល្អក់​កករ​ផ្នែក​ការទូត​ ​ហើយ​ប្រទេស​ថៃ​បាន​ចោទ​ប្រទេស​កម្ពុជា​ថា​ ​បាន​ជ្រៀត​ជ្រែក​កិច្ចការ​តុលាការ​ខ្លួន។ ​រួច​បន្ទាប់​មក​ប្រទេស​គូជម្លោះ​ទាំងពីរ​បាន​បន្ទាប​ទំនាក់​ទំនង​ ការ​ទូត​មក​ត្រឹម​កម្រិតភារធារី​វិញ។

លោក​កុយ គួង ​អនុ​រដ្ឋ​លេខាធិការ​ និង​ជា​អ្នក​នាំពាក្យ​ក្រសួង​ការ​បរទេស​កម្ពុជា​ ​បាន​ធ្វើ​អត្ថាធិប្បាយប្រកប​ដោយ​ការ​ប្រយ័ត្ន​ប្រយែង​នៅឡើយ​ ហើយ​លោក​បញ្ជាក់​ថា​ ​លោកស្រីយូ អយ ឯក​អគ្គ​រាជទូតកម្ពុជា​នឹង​ធ្វើ​ដំណើរ​ទៅកាន់​តួនាទី​របស់​លោកស្រី​នៅ​ប្រទេស​ថៃ​វិញ​នៅ​ថ្ងៃ​ស្អែក​នេះ។

«បើ​សិន​ជា​ល្ងាចនេះ​ ​ឯក​អគ្គ​រាជទូត​ថៃ​ត្រឡប់​មក​ដល់​កម្ពុជា​ពិត​ប្រាកដ​មែន​ កម្ពុជា​នឹង​បញ្ជូន​ឯក​អគ្គ​រាជទូត​របស់​ខ្លួន​ត្រឡប់​ទៅ​ប្រទេស​ថៃ​វិញ​នៅ​ព្រឹក​ស្អែក​ ​ហើយ​រឿង​នេះ​ជា​សញ្ញា​មួយ​អំពី​ការ​រីក​ចម្រើនផ្នែក​ទំនាក់​ទំនង​ការទូត​រវាង​ប្រទេស​ទាំងពីរ​ ​ ​មានន័យថា​ ​ឲ្យ​ទំនាក់​ទំនង​ការទូត​ឲ្យ​វិល​ទៅ​រក​ភាព​ប្រក្រតីវិញ»។

ប្រទេស​កម្ពុជា ​និង​ប្រទេស​ថៃ​កំពុង​ជាប់​ផុង​ក្នុង​ជម្លោះ​ព្រំ​ប្រទល់​ដែនដែល​ដោះ​មិន​ចេញ​ ​ចាប់​តាំងពី​ខែកក្កដា​ ឆ្នាំ២០០៨​មក​ម៉្លេះ។​ ​ជម្លោះនេះ​បាន​ក្លាយ​ជា​ដុំភ្លើង​ដុត​កំដៅ​ទំនាក់​ទំនង​ការទូត​នៃ​ប្រទេសទាំងពីរ​មួយ​ផ្នែក​ផង​ដែរ។​ ក៏​ប៉ុន្ដែ​មេដឹកនាំ​នៃ​ប្រទេស​ទាំងពីរ​ហាក់​ដូច​ជា​បាន​បង្ហាញ​ពី​ការ​ប្ដេជ្ញា​ចិត្ត​សារ​ជាថ្មី​ក្នុង​រយៈ​ពេល​ចុង​ក្រោយ​នេះ​ក្នុង​ការ​ដោះ​ស្រាយ​ជម្លោះ​ទ្វេភាគី៕

XS
SM
MD
LG