ភ្នំពេញ៖ មេធាវីការពារក្តីជនជាតិរុស្ស៊ីបានដាក់ពាក្យធានាជនសង្ស័យនេះនៅក្រៅឃុំ ក្រោយពីជនរងគ្រោះ៦នាក់បានទទួលសំណង ហើយឈប់ប្តឹងពីបទបង្ខំឲ្យពួកគេលោតទឹកសមុទ្រ ហើយបោះបង់ពួកគេចោល។
មេធាវីការពារក្តីជនជាតិរុស្ស៊ីបានដាក់ពាក្យបណ្តឹងទៅតុលាការដើម្បីស្នើសុំឲ្យនៅក្រៅឃុំ បន្ទាប់ពីអាជ្ញាធរខេត្តព្រះសីហនុចាប់ខ្លួនជនជាតិរុស្ស៊ីចំនួន៣នាក់ កាលពីដើមខែមករាពីបទសង្ស័យថា បានចាប់បង្ខាំងពលរដ្ឋខ្មែរចំនួន៦នាក់ ដោយខុសច្បាប់ រួចហើយបានបង្ខំឲ្យពួកគេលោតទឹកសមុទ្រ។
លោកសេហ្គេ ផ្លាឌី (Sergei Vladi) មេធាវីការពារក្តីជនជាតិរុស្ស៊ី បានប្រាប់VOAសម្លេងសហរដ្ឋអាមេរិកតាមទូរស័ព្ទពីខេត្តព្រះសីហនុមកថា លោកបានដាក់ពាក្យស្នើសុំឲ្យកូនក្តីលោកនៅក្រៅឃុំហើយកាលពីថ្ងៃច័ន្ទម្សិលមិញនេះ។ ក៏ប៉ុន្តែលោកមិនបានអត្ថាធិប្បាយលម្អិតទេ។
«មេធាវីជនជាតិខ្មែរបានធ្វើកិច្ចការងារនេះរួចហើយ។ ខ្ញុំមិនអាចធ្វើសេចក្តីអត្ថាធិប្បាយបានទេ»។
វីអូអេបានព្យាយាមទាក់ទងលោកស្រីស៊ន លីនណា ចៅក្រមស៊ើបសួរនៃតុលាការខេត្តព្រះសីហនុ ដើម្បីសុំសេចក្តីបំភ្លឺ តែមិនអាចធ្វើទំនាក់ទំនងបានទេនៅថ្ងៃអង្គារនេះ។
លោកប៉ូឡុនស្គី សេហ្គេ (Po Lonsky Sergie) អាយុ៤១ឆ្នាំ ដែលជាម្ចាស់សណ្ឋាគារ និងភោជនីយដ្ឋានពស់ និងមានសណ្ឋាគារនៅកោះដែកគោលព្រមទាំងជនជាតិរុស្ស៊ីពីរនាក់ទៀត ដែលជានាយនាវានៃនាវាកម្សាន្តមួយនៅខេត្តព្រះសីហនុ ត្រូវចាប់ខ្លួនក្នុងកណ្តាលសមុទ្រកាលពីថ្ងៃទី៣០ខែធ្នូ បន្ទាប់ពីពួកគេបានចាប់បង្ខាំងបុគ្គលិកនាវារបស់ខ្លួនចំនួន៦នាក់នៅក្នុងបន្ទប់ទឹក ដោយប្រើកាំបិតចុងស្រួចភ្ជង់ក រួចបង្ខំឲ្យពួកគេលោតទឹកសមុទ្រ។
ហេតុការណ៍នេះបានកើតមានឡើងនៅចំណុចកោះដូង។ ហើយក្រោយពីកើតហេតុរួចមក ជនជាតិរុស្ស៊ីទាំងបីនាក់ក៏បើកនាវាចេញដំណើរចោលជនរងគ្រោះ។
លោកតិល សាមុត អ្នកបកប្រែជនជាតិរុស្ស៊ី បានដកស្រង់សម្តីលោកប៉ូឡុនស្គី សេហ្កេ ប្រាប់ព្រះរាជអាជ្ញារងខេត្តថា ជនជាតិរុស្ស៊ីមិនមានបំណងចាប់បង្ខាំងមនុស្សទេ។ លោកបាននិយាយថា ដំបូងឡើយ មុនពេលកើតហេតុ ជនជាតិរស្ស៊ី ដែលជាម្ចាស់នាវាកម្សាន្ត បានបើកនាវារបស់ខ្លួនចេញទៅដើម្បីកម្សាន្តកណ្តាលសមុទ្រ ក៏ប៉ុន្តែនៅពេលដែលលោកប៉ូឡុនស្គី សេហ្កេបញ្ជាឲ្យបុគ្គលិកខ្មែរនៅលើនាវាឲ្យធ្វើការ តែពួកគេមិនស្តាប់បង្គាប់ ទើបបានជាលោកចាប់ពលរដ្ឋខ្មែរម្តងម្នាក់ៗដាក់ក្នុងបន្ទប់ទឹក តែក្នុងបំណងធ្វើលេងសើចតែប៉ុណ្ណោះ។
លោកសា មុតបាននិយាយថា ជនជាតិខ្មែរនិងជនជាតិរុស្ស៊ីបានប្រាស្រ័យទាក់ទងគ្នាជាភាសាអង់គ្លេស តែមិនយល់គ្នា។ លោកបានមានប្រសាសន៍ថា នៅពេលដែលលោកសេហ្កេប្រាប់ជនជាតិខ្មែរថា ចង់ហែលទឹកលេងទេ? ពួកគេស្តាប់មិនបានក៏លោតទឹកតែម្តងទៅ។
«បើចង់ហែលទឹកលេង អ្នកឯងដកឥវ៉ាន់ពីកប៉ាល់រួចហែលទឹកទៅ។ ដល់ខ្មែរយើងស្តាប់មិនបាន ដកតែឥវ៉ាន់ ក៏លោតប្រូងៗទៅបន្តកន្ទុយគ្នាម្នាក់ម្តងៗ បួននាក់ហ្នឹងទៅ។ ហើយដល់ពេលពាក្យខាងក្រៅចេញមកថា គាត់ហ្នឹងបង្ខំឲ្យគេលោតទឹក។ អាហ្នឹងតាមសម្តីដែលគាត់និយាយនៅតុលាការ។ ខ្ញុំជាអ្នកបកប្រែ។ ខ្ញុំប្រែទៅតាមអ្វីដែលគាត់និយាយ។ ខ្ញុំអត់បានឃើញនឹងភ្នែក ឮនិងត្រចៀកទេ»។
ជនជាតិរស្ស៊ីបានផ្តល់សំណងចំនួន២ម៉ឺនដុល្លារសហរដ្ឋអាមេរិក ហើយក្រោយមកជនរងគ្រោះខ្មែរទាំង៦នាក់បានដកពាក្យបណ្តឹងប្រឆាំងជំទាស់និងជនជាតិរុស្ស៊ីក្នុងគោលបំណងដើម្បីបញ្ចប់រឿងក្តីនេះ។
តុលាការខេត្តព្រះសីហនុ នៅថ្ងៃកាលពីច័ន្ទ បានចាប់ផ្តើមកោះហៅជនរងគ្រោះចំនួន៦នាក់មកសាកសួរ បន្ទាប់ពីពួកគេបានសម្រេចដកពាក្យបណ្តឹងកាលពីសប្តាហ៍មុន។ ក៏ប៉ុន្តែទោះជាយ៉ាងណាក៏ដោយ ក៏ជនជាតិរុស្ស៊ីកំពុងជាប់ឃុំឃាំងនៅពន្ធនាគារខេត្តព្រះសីហនុនៅឡើយដើម្បីរង់ចាំការជំនុំជម្រះទោស៕
