ភ្ជាប់​ទៅ​គេហទំព័រ​ទាក់ទង

កម្ពុជា​​បញ្ជូន​កំណត់​ទូត​ទៅ​ថៃ​ទាក់​ទិន​នឹង​ការ​បាញ់​សម្លាប់​នៅ​ព្រំដែន


ប្រទេសកម្ពុជា​បាន​បញ្ជូន​កំណត់​ការ​ទូត​មួយ​ទៅ​ឱ្យ​ប្រទេស​ថៃ ដើម្បី​សម្តែង​ការ​មិន​សប្បាយ​ចិត្ត​ចំពោះ​ការ​បាញ់​សម្លាប់​ប្រជា​ពលរដ្ឋខ្មែរ​ម្នាក់​កាល​ពី​សប្តាហ៍​មុន បន្ទាប់​ពី​អាជ្ញាធរ​ថៃ​បាន​ផ្តល់​ប្រាក់​ជាង​៩០០ដុល្លា​អាមេរិក​ដល់​ក្រុមគ្រួសារ​សព។ ប៉ុន្តែ​មន្ត្រី​ប៉ូលីស​ថៃ​បាន​និយាយ​ថា ការ​បាញ់​នេះ មាន​ហេតុ​ផល។

នៅថ្ងៃពុធ​នេះ ប្រទេស​កម្ពុជា​បាន​ទាមទារ​ឱ្យ​រដ្ឋា​ភិបាល​ទីក្រុង​បាងកក ចាប់​ខ្លួន​ទាហ៊ាន​ថៃ​ ដែលបាន​បាញ់​សម្លាប់​ជន​ជាតិ​ខ្មែរ​កាល​ពី​សប្តាហ៍​មុន​មក​កាត់​ទោស​នៅ​ចំពោះមុខ​តុលាការ​។

ប្រតិកម្មនេះ​បាន​ធ្វើ​ឡើង បន្ទាប់​ពី​អាជ្ញាធ​រថៃ​បាន​ផ្តល់​ប្រាក់​ចំនួន​បី​ម៉ឺនបាត​ស្មើនឹង​ជាង​៩០០ ដុល្លារ​អាមេរិក​ ដល់​គ្រួសារ​សព​កាល​ពី​ថ្ងៃ​សៅរ៍ នៅ​ពេល​ដែល​សព​ត្រូវ​បាន​ដឹក​មក​កាន់​ប្រទេសកម្ពុជា​វិញ​។

កាល​ពី​ថ្ងៃ​ទី២៣​ ខែ​មិថុនា ទាហាន​ថៃ​នៅ​ក្នុង​អង្គភាព​លេខ១៣ បាន​ធ្វើ​ការ​បាញ់​រះ​មក​លើ​អ្នក​ភូមិ​ខ្មែរ​មួយ​ក្រុម​ ដែល​មាន​គ្នា​បួន​នាក់ ដែល​បាន​ឆ្លង​កាត់​ព្រំ​ដែន​ពី​ប្រទេស​ថៃ​ចូល​មក​ក្នុង​ប្រទេស​កម្ពុជា​វិញ។ លោក​ឌិន ឌឿ អាយុ​៤៤​ឆ្នាំ ដែល​ជា​បុរស​ម្នាក់​ក្នុង​ចំណោម​មនុស្ស​បួន​នាក់​ ត្រូវ​បាន​បាញ់​សម្លាប់​ដោយ​ទាហាន​ថៃ​នៅ​ក្នុង​ខេត្ត​ស្រះ​កែវ ប្រទេស​ថៃ​ជាប់​ព្រំដែន​ជា​មួយ​ខេត្ត​បាត់​ដំបង។

កំណត់​ទូត​របស់​ក្រសួង​ការ​បរទេស​កម្ពុជា ផ្ញើ​ជូន​ស្ថានទូត​ថៃ​នៅ​ភ្នំពេញ​បាន​បញ្ជាក់​ថា រាជ​រដ្ឋា​ភិបាល​កម្ពុជា​ស្នើ​សុំ​ឱ្យ​អាជ្ញាធរ​ថៃ​ពាក់​ព័ន្ធ​មាន​វិធានការ​សម​ស្រប ដើម្បី​ទប់​ស្កាត់​អំពើ​ដ៏​អ​មនុស្ស​ធម៌​បែប​នេះ កុំ​ឱ្យ​កើត​ជា​ថ្មី​ម្តង​ទៀត និង​ស្នើ​ធ្វើ​ការ​ស៊ើប​អង្កេត​លើ​ឧបទ្ទវហេតុ​នេះ​ឱ្យ​បាន​ម៉ឹង​ម៉ាត់បំផុត ​ដើម្បី​នាំ​ខ្លួន​ក្រុម​ជន​ដែល​ប្រព្រឹត្ត​អំពើ​ឃោរឃៅ​ព្រៃផ្សៃ​នៃការ​បាញ់​សម្លាប់​នេះ មក​ផ្តន្ទា​ទោស​តាម​ច្បាប់។

លោក​កួយ គង់ អនុ​រដ្ឋ​លេខាធិការ និង​ជា​អ្នក​នាំ​ពាក្យ​ក្រសួង​ការ​បរទេស​កម្ពុជា បាន​ថ្លែង​យ៉ាងដូច្នេះ​ថា៖

«រឿង​បញ្ហា​បាញ់​សម្លាប់​មនុស្ស​បែប​នេះ។ យើង​មិន​អាច​ទូទាត់​ជា​មួយ​នឹង​ទឹក​ប្រាក់ ​ដែល​បានផ្តល់​ឱ្យ​ជន​រងគ្រោះ​នោះ​ទេ។ រឿង​បញ្ហា​ទឹក​ប្រាក់​ដែល​គេ​ឱ្យ​មក​ជន​រងគ្រោះ​ចំនួន​បី​ម៉ឺន​បាត ​ឥឡូវ​ក្រុម​គ្រួសារ​ជន​រងគ្រោះ​ទទួល​បាន​ហើយ ប៉ុន្តែ​អ្វី​ដែល​សំខាន់​រឿង​នេះ ជា​រឿង​ព្រហ្មទណ្ឌ​មិន​អាច​យក​ប្រាក់​មក​ទូទាត់​ឱ្យ​រួច​ផុត​ពី​ទោស​ ដែលត្រូវ​ទទួល​នោះ​ទេ ពី​ព្រោះ​រឿង​នេះ គឺ​ជា​បញ្ហា​សម្លាប់​មនុស្ស។»

លោក​កួយ គង់ បាន​បញ្ជាក់​ថា ការ​បាញ់​សម្លាប់​នេះ ​បាន​រំលោភ​បំពាន​យ៉ាង​ធ្ងន់ធ្ងរ​លើ​គោល​ការណ៍​មនុស្សធម៌​អន្តរជាតិ និង​ចំណុច​ទី៧៧​នៃ​កំណត់​ហេតុ​កិច្ច​ប្រជុំ​លើក​ទី៦​របស់​គណៈ​កម្មការចម្រុះ​ ដើម្បី​ធ្វើ​សហ​ប្រតិបត្តិការ​ទ្វេ​ភាគី​កម្ពុជា​ថៃ​កាល​ពី​ថ្ងៃទី៤-៥ ខែសីហា ឆ្នាំ២០០៩ នៅ​ទី​ក្រុង​បាង​កក។ ចំណុច​ទី៧៧ បាន​កំណត់​ថា ​ភាគី​ទាំង​ពីរ​មិន​ប្រើ​អំពើ​ឃោរឃៅ ​អំពើ​ហិង្សា​ ឬ​ការ​ធ្វើ​ទារុណ​កម្ម​ណា​មួយ​ទៅ​លើ​ប្រជា​ពលរដ្ឋ​ផង​ខ្លួន ទោះបី​ជា​គាត់​ឆ្លង​ព្រំដែន​ដោយ​ខុស​ច្បាប់ និង​ការ​ប្រព្រឹត្ត​អំពើ​ខុស​ច្បាប់​នៅ​ក្នុង​ប្រទេស​ផង​គ្នា​ត្រូវ​អនុវត្ត​តាម​ច្បាប់។ លោក​បន្ត​ថា៖

«បញ្ហា​បាញ់​បោះ​ដូច​សត្វ​ធាតុ​នៅ​តាម​ព្រំដែន​នេះ គឺ​ជា​ការ​ធ្វើ​ឡើង​ក្រៅ​ប្រព័ន្ធ​ច្បាប់ និង​ក្រៅ​ប្រព័ន្ធ​តុលាការ។ ខ្ញុំ​គ្រាន់​តែ​បញ្ជាក់​ថា បើ​ទោះ​ជា​គាត់​បាន​ប្រព្រឹត្ត​អ្វី​ដែល​ត្រូវ​តែ​ទទួល​ទោស​ប្រហារ​ជីវិត ដែល​ប្រទេស​ថៃ​មាន​ទោស​ប្រហារ​ជីវិត​នោះ ក៏​គួរ​ធ្វើ​ឡើង​តាម​រយៈ​ប្រព័ន្ធ​យុត្តិធម៌​ដែរ មិន​មែន​កាត់​ទោស​ក្រៅ​ប្រព័ន្ធ​តុលាការ​នេះ​ទេ»។

លោក​ស៊ុផាឆៃ ចៃសាមុត (Supachai Jaisamut) អ្នក​នាំ​ពាក្យ​ក្រសួង​មហា​ផ្ទៃ​ថៃ បាន​អះ​អាង​នៅ​ក្នុង​កា​សែត The Cambodia Daily ថា ការ​បាញ់​នេះ មាន​ហេតុ​ផល​ ហើយ​បា​នថ្លែង​ថា សំណង​ច្រើន «មិន​អាច​ទៅ​រួច​ទេ»។

លោក​ចាន់ សាវ៉េត ប្រធាន​ក្រុម​ស្រាវជ្រាវ​នៃ​សមាគម​សិទ្ធិ​មនុស្ស​អាដហុក (ADHOC) បាន​ថ្លែង​ថា ប្រជា​ពលរដ្ឋ​ខ្មែរ​យ៉ាង​តិច​១២​នាក់ ត្រូវ​បាន​បាញ់​សម្លាប់​ដោយ​ទាហ៊ាន​ថៃ នៅ​តាម​ព្រំដែន​រវាង​ពី​ខែសីហា ​ឆ្នាំ២០០៩ ដល់​ខែ​មិនា ​ឆ្នាំ២០១០ ​ដោយ​គ្មាន​ដំណោះ​ស្រាយ។ លោក​ថ្លែង​ថា៖

«ការ​បាញ់​សម្លាប់​នេះ គឺ​ជា​អំពើ​រំលោភ​សិទ្ធិមនុស្ស​ និង​និទ្ទណ្ឌភាព។ ចាប់​តាំង​ពី​មាន​ជម្លោះ​រវាង​ប្រទេស​កម្ពុជា និង​ប្រទេស​ថៃ នៅ​ក្នុង​ខែកក្កដា ឆ្នាំ២០០៨ ​ប្រជា​ពលរដ្ឋ​ខ្មែរ​បាន​ទទួល​រង​ការ​បាញ់​សម្លាប់​នេះ​ ជា​បន្ត​បន្ទាប់»។

កងទ័ព​កម្ពុជា និង​ថៃ​បាន​ប្រមូល​ផ្តុំ​គ្នា​នៅ​តំបន់​ជម្លោះ​ព្រំដែន​ក្បែរ​ប្រាសាទព្រះវិហារ និង​បាន​វាយ​ប្រយុទ្ធ​គ្នា​ជា​ច្រើន​លើក​ ដែល​បាន​បណ្តាល​ឱ្យ​កង​ទ័ព​យ៉ាង​តិច​៨​នាក់​ស្លាប់ បន្ទាប់​ពី​ប្រាសាទ​ព្រះវិហារ​ ត្រូវ​បាន​ចុះ​នៅ​ក្នុង​បញ្ជី​បេតិក​ភ័ណ្ឌ​ពិភព​លោក​របស់​អង្គការយូណេស្កូនៅ​ក្នុង​ខែកក្កដា​ឆ្នាំ២០០៨។ ទំនាក់​ទំនង​ការទូត​រវាង​ប្រទេស​កម្ពុជា និង​ថៃ​បាន​ធ្លាក់​ចុះ​ដល់​កម្រិត​ធ្ងន់​ធ្ងរ​បំផុត បន្ទាប់​ពី​លោកនាយក​រដ្ឋ​មន្ត្រី​ហ៊ុន សែន បាន​តែង​តាំង​លោកថាក់ស៊ីន ស៊ីណាវ៉ាត្រ (Thaksin Shinawatra) អតីត​នាយក​រដ្ឋ​មន្ត្រី​ថៃ ឱ្យ​ធ្វើជា​ទីប្រឹក្សា​សេដ្ឋកិច្ច​របស់​ប្រទេស​កម្ពុជា។

XS
SM
MD
LG