នាយករដ្ឋមន្ដ្រីកម្ពុជា លោកហ៊ុន សែន នៅថ្ងៃអង្គារនេះបានព្រមានជាចំហពីគ្រោះថ្នាក់របស់ប្រទេសប្រសិនបើគេធ្វើការផ្លាស់ប្តូរមេដឹកនាំនោះ។
លោកហ៊ុន សែន ដែលកាន់កាប់អំណាចជិត៣០ឆ្នាំមកហើយ បានធ្វើការព្រមានចំពេលដែលកម្ពុជាកំពុងរំកិលទៅរកការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលជាការបោះឆ្នោតមួយដ៏មានសារៈសំខាន់សម្រាប់ការគ្រប់គ្រងប្រព័ន្ធវិមជ្ឈការក្នុងប្រទេស។
«អារឿងដូរៗនេះ ដូរចុះដូរឡើងហិនហោចខេ្ទចខ្ទី។ ទំនៀមទម្លាប់បាត់បង់អស់រលីង។ ដោយសារអារឿងដូរហ្នឹងហើយ»។
ថ្លែងក្នុ្ងងពិធីបិទវគ្គបណ្ដុះបណ្ដាលអាចារ្យក្នុងទីក្រុងភ្នំពេញ លោក ហ៊ុន សែន បានវាយប្រហារដោយមិនចំឈ្មោះចំពោះមេដឹកនាំគណបក្សនយោបាយដែលយកព្រះនាមអតីតព្រះមហាក្សត្រ និងសេចក្ដីអះអាងពីភក្ដីភាពចំពោះរបបរាជានិយមយកមកប្រើសម្រាប់ឃោសនាស្វែងរកសំឡេងឆ្នោត។
លោក ហ៊ុន សែន បានឆ្លៀតទាញយកគុណសម្បតិ្តគណបក្សប្រជាជនកម្ពុជាកំពុងកាន់អំណាចរបស់លោក។
«ទោះបីជាយើងនៅក្រ នៅលំបាក តែអ្វីដែលច្បាស់សេចក្ដីសុខ អត់សង្រ្គាម អត់ចលាចល។ កុំមានគណបក្សប្រជាជនស្មានតែមានលោកសង្ឃ មានអាចារ្យ មានយាយជី មានវត្តអារាមទាំងអស់ហ្នឹង។ បើគ្មានគណបក្សប្រជាជនទេ អត់មានរាជានិយមនៅស្រុកខ្មែរទេ កុំភន្ដច្រឡំ»។
នេះមិនមែនជាលើកទី១ទេដែលលោកនាយករដ្ឋមន្ដ្រីកាន់អំណាចយូរ បានធ្វើសំអាងបែបនេះមុនពេលការបោះឆ្នោតមកដល់។ ប្រជាពលរដ្ឋកម្ពុជាភាគច្រើនត្រូវគេសង្កេតឃើញថា មានការបាក់ស្បាតនឹងភាពហិង្សា បន្ទាប់ពីពួកគេបានឆ្លងកាត់យុគសម័យសង្រ្គាមស៊ីវិលជាងបីទសវត្សរ៍មក។
លោក យឹម សុវណ្ណ តំណាងរាស្ដ្រ និងជាអ្នកនាំពាក្យគណបក្សជំទាស់សម រង្ស៊ី បានហៅសេចក្តីថ្លែងការណ៍របស់លោក ហ៊ុន សែន ថាជាការគំរាមដល់ស្មារតីរបស់អ្នកបោះឆ្នោត។ លោក យឹម សុវណ្ណ មានប្រសាសន៍ថា ប្រទេសដែលមានអ្នកដឹកនាំតែម្នាក់ពុំមានការផ្លាស់ប្តូរ ប្រឈមនឹងការវិវត្តទៅកាន់អំណាចផ្តាច់ការ។
«ប្រទេសនិមួយៗ មិនមែនមានតែអ្នកដឹកនាំម្នាក់ខ្លាំងនោះទេ។ ប្រទេសដែលមានការគោរពសិទ្ធិ មានលទ្ធិប្រជាធិបតេយ្យពិតប្រាកដ គេមានមេដឹកនាំច្រើនណាស់។ បើសិនជាមានតែម្នាក់ថ្ងៃណាមួយនឹងនាំទៅរករបបផ្តាច់ការជាមិនខានទេ»។
កម្ពុជានឹងធ្វើការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី៣ ខែមិថុនា ខាងមុខ។ការឃោសនាបោះឆ្នោតសម្រាប់រយៈពេលពីរសប្ដាហ៍នឹងចាប់ផ្តើមនៅថ្ងៃទី១៨ ខែឧសភានេះ។
ជាទូទៅគេសង្កេតឃើញគណបក្សប្រជាជនកម្ពុជាបានយកកត្តារំដោះប្រទេសពីរបបខ្មែរក្រហម និងការការពារប្រទេសមិនឲ្យធ្លាក់ក្នុងសង្រ្គាមសារជាថ្មី ជាចំណុចគោលសម្រាប់ឃោសនា។ រីឯគណបក្សប្រជែងច្រើនតែជ្រើសរើសយកបញ្ហាអន្ដោប្រវេសន៍ខុសច្បាប់ ការបាត់បង់ដីធ្លីក្នុងប្រទេសនិងដោយសារប្រទេសជិតខាងទន្រ្ទានយក និងបញ្ហាពុករលួយមកធ្វើជាមូលដ្ឋានឃោសនា។
លោក គល់ បញ្ញា នាយកគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា Comfrelមានប្រសាសន៍ថា ប្រទេសដែលមានលទ្ធិប្រជាធិបតេយ្យប្រជាពលរដ្ឋមានសិទ្ធិអំណាចគ្រប់គ្រាន់ក្នុងការជ្រើសរើសមេដឹកនាំណាមួយដែលខ្លួនពេញចិត្ត៕
