ភ្ជាប់​ទៅ​គេហទំព័រ​ទាក់ទង

កម្ពុជា​នាំចូល​រថក្រោះជាង​១០០​គ្រឿង​ពី​អឺរ៉ុប​

  • សុខ ខេមរា

ប្រទេស​កម្ពុជា​ធ្លាប់​នាំ​ចូលរថក្រោះ​៩៦​គ្រឿង​ម្តង​កាលពី​ឆ្នាំ​២០១០​ នៅ​ពេល​កម្ពុជា​​មាន​ជម្លោះ​ប្រដាប់​អាវុធ​ជាមួយ​ប្រទេស​ថៃ​ ទាក់ទង​នឹង​បញ្ហា​បូរណភាព​ទឹកដី​ឬ​ដី​ក្បែរ​ប្រាសាទ​ព្រះវិហារ។
វ៉ាស៊ីនតោន
រថក្រោះ​ជាង​១០០​គ្រឿង​ត្រូវគេ​ដឹក​តាម​កប៉ាល់​មក​ដល់​កំពង់ផែ​ក្រុង​ព្រះ​សីហនុ ​ហើយ​នៅថ្ងៃ​នេះ​ដែល​មន្ត្រី​យោធា​កម្ពុជា​អះអាង​ថា ​ជា​តម្រូវការ​ផ្នែក​ការពារជាតិ​ និង​ការ​ហ្វឹកហ្វឺន​ផ្នែក​កងទ័ព។​

នៅពេល​សួរ​បញ្ជាក់​ពីការ​នាំចូល​រថក្រោះ​ លោក​ឧបនាយក​រដ្ឋមន្ត្រី​ ទៀ បាញ់ ​រដ្ឋមន្ត្រី​ក្រសួង​ការពារជាតិ​ បានអះអាង​ប្រាប់វីអូអេ​តាម​ទូរស័ព្ទ​ថា​កម្ពុជា​នាំយក​ឧករណ៍​យោធា​ជា​រថក្រោះ​និង​សម្ភារៈ​យោធា​មក​មែន​ដើម្បី​ប្រើប្រាស់​ក្នុង​ការ​ពង្រឹង​សមត្ថភាព​កងទ័ព​ជា​ធម្មតា។

«ដើម្បី​បង្កើន​សមត្ថភាព​ សម្រាប់​ហ្វឹកហ្វឺន​ សម្រាប់​ពេល​ដែល​មាន​តម្រូវ​ការ​ប្រើប្រាស់វា​ នោះ​គឺ​នាំយក​មក​មែន»។​

លោក​ឧបនាយក​រដ្ឋមន្ត្រី​ ទៀ បាញ់​ពុំបាន​បញ្ជាក់​ពិស្តារ​ទេ​នៅពេល​សួរ​អំពី ឈ្មោះ​ប្រទេស​និង​អំពី​ចំនួន​ប្រភេទ​សម្ភារៈ​យោធា​ទាំង​អស់​នោះ​ តែ​លោក​អះអាង​ថា ​រថក្រោះ​ចំនួន​ពី​១០០​ទៅ​២០០​គ្រឿង​ប៉ុណ្ណឹង​ ដែល​ត្រូវ​នាំចូល​មក​ពី​អឺរ៉ុប​ ដែលលោក​មិន​បាន​បញ្ជាក់​ពី​ឈ្មោះ​ប្រទេស​នោះ​ទេ។​

ទោះជា​យ៉ាងណា​ក៏​ដោយ​ ក្រុម​មន្ត្រី​យោធា​ផ្សេង​ទៀត​ បាន​អះអាង​ថា​រថ​ក្រោះ​ទាំងអស់នោះ​គឺមាន​រថក្រោះ​និង​រថពាសដែក​ដែល​កម្ពុជា​ទិញ​ពី​ប្រទេស​អឺរ៉ុប​ ហើយ​ត្រូវ​ដឹក​តាម​កប៉ាល់​កុង​តេនន័រ​មក​កាន់​កំពង់ផែ​ក្រុង​ព្រះ​សីហនុ។​

ប្រទេស​កម្ពុជា​ធ្លាប់​នាំ​ចូលរថក្រោះ​៩៦​គ្រឿង​ម្តង​កាលពី​ឆ្នាំ​២០១០​ នៅ​ពេល​កម្ពុជាមាន​ជម្លោះ​ប្រដាប់​អាវុធ​ជាមួយ​ប្រទេស​ថៃ​ ទាក់ទង​នឹង​បញ្ហា​បូរណភាព​ទឹកដី​ឬ​ដី​ក្បែរ​ប្រាសាទ​ព្រះវិហារ។
ប្រទេស​កម្ពុជា​ដែលមាន​ខ្ទង់​ចំណាយ​ខ្ពស់លើ​វិស័យ​ការពារជាតិ​និង​សន្តិសុខ​នោះ​ ត្រូវ​គេ​រាយ​ការណ៍​មក​ថា​ បាន​ចំណាយ​ថវិកា​៣៥០​លាន​ដុល្លារ​ក្នុង​ចំណោម​ថវិកា​ជាតិ​ សរុបជាង​២​ពាន់លាន​ដុល្លារ​ កាលពី​ឆ្នាំ​២០១២​ លើស​ការ​ចំណាយ​លើវិស័យ​សង្គម​ជាច្រើន​ទៀត៕​
XS
SM
MD
LG