ភ្ជាប់​ទៅ​គេហទំព័រ​ទាក់ទង

នួន ជា៖ ខ្មែរក្រហម​មិនមែន​ជា​អាយ៉ង​របស់​វៀតណាម


អតីត​បង​ធំ​ទី​២​នៃ​របប​ខ្មែរក្រហម ​នួន ​ជា

អតីត​បង​ធំ​ទី​២​នៃ​របប​ខ្មែរក្រហម ​នួន ​ជា ​បាន​បញ្ជាក់​នៅ​ក្នុង​ការ​កាត់ទោស​នៅ​ថ្ងៃ​ពុធ​នេះ​ថា​ ក្រុម​មេដឹកនាំ​ជាន់ខ្ពស់ ​និង​គណបក្ស​កុម្មុយនីស្ដ​ខ្មែរក្រហម​មិនមែន​ជា​ «អា​យ៉ង» របស់​វៀតណាម​ទេ ​រហូត​ដល់​ពួកគេ​ឡើង​កាន់​កាប់​អំណាច​ដោយ​ចុង​កាំភ្លើង​ថ្ងៃ​ទី​១៧ ​ខែ​មេសា ​ឆ្នាំ ​១៩៧៥។

សេចក្ដី​អះអាង​នេះ​ធ្វើ​ឡើង​បន្ទាប់​ពី​អតីត​ប្រធាន​សភា​ខ្មែរក្រហម​អាយុ​៨៥ ​រូប​នេះ​ បាន​បន្ដ​ធ្វើការ​ចោទ​ប្រកាន់ប្រទេស​វៀតណាម​ជា​បន្ត​បន្ទាប់​ចាប់​តាំង​ពី​ការ​កាត់ទោស​នៅ​សប្ដាហ៍​មុន​ថា ​ប្រទេស​កុម្មុយនីស្ដ​មួយ​នេះ​បាន​ជាប់ពាក់​ព័ន្ធ​នឹង​ការ​សម្លាប់​ប្រជាពល​រដ្ឋ​កម្ពុជា​ចំនួន​យ៉ាង​តិច​១,៧​លាន​នាក់ ​ក្នុង​សម័យ​កម្ពុជា​ប្រជាធិបតេយ្យ​ដែល​បាន​កាន់កាប់​អំណាច​ជិត​បួន​ឆ្នាំ​រហូត​ដល់​ខែ​មករា​ឆ្នាំ​១៩៧៩។

ឆ្លើយ​នឹង​សំណួរ​របស់​សហព្រះរាជអាជ្ញា​រង​ជនជាតិ​អាមេរិកាំង ដេល លីសាក (Dale Lysak )​របស់​អង្គ​ជំនុំជម្រះ​សាលាដំបូង​ក្នុង​ការ​កាត់ទោស​នៅ​ថ្ងៃ​នេះ ​នួន ​ជា ​នៅ​ក្នុង​រង្វង់​ក្រចក​សេះ​បាន​បង្ហាញ​ថា គណបក្ស​កុម្មុយនីស្ដ​កម្ពុជា​ និង​មេដឹកនាំ​គណបក្ស​នេះ​ដែល​រួមមាន​រូប​លោក មិន​បាន​ស្ថិត​ក្រោម​អំណាច​របស់​វៀតណាម​ទេ។

«កាល​នោះ​មិន​ធ្វើ​ជា​អាយ៉ង​របស់​វៀតណាម​ទេ ​ក៏ប៉ុន្តែ​មាន​កិច្ចការ​អី​អាច​មាន​ការ​ពិភាក្សា​គ្នា​ខ្លះ។ ពី​ឆ្នាំ​១៩៦០ ​រៀង​រហូត​មក បក្ស​កម្ពុជា​មាន​មាគ៌ា​យុត្តវិធី​របស់​ឯង ​ដាច់​ពី​វៀតណាម។ យើង​ធ្វើ​សេចក្តីសម្រេច​ដោយ​ខ្លួន​យើង​ ប៉ុន្តែ​ថា ឲ្យ​គេ​ពេញ​ចិត្ត ​គេ​មិន​ពេញ​ចិត្ត​ទេ»។
គណបក្ស​កុម្មុយនីស្ដ​កម្ពុជា​បាន​កើត​ចេញ​ពី​គណបក្ស​កុម្មុយនីស្ដ​ឥណ្ឌូ​ចិន​សម្រាប់​បី​ប្រទេស​ គឺ​កម្ពុជា ​វៀតណាម ​និង​ឡាវ។

មន្ដ្រី​ផ្លូវការ​របស់​ស្ថានទូត​វៀតណាម​ក៏​ធ្លាប់​បាន​ច្រានចោល​ការ​ចោទ​ប្រកាន់​របស់​នួន ​ជា ​ដែល​បាន​ភ្ជាប់​ការ​ស្លាប់​របស់​ប្រជាពលរដ្ឋ​កម្ពុជា​ទៅ​នឹង​វៀតណាម​ផង​ដែរ។

នៅ​ក្នុង​ការ​ផ្ដល់​សក្ខីកម្ម​នៅ​រសៀល​នេះ ​លោក​ ឡុង ​នរិន្ទ ​អតីត​កម្មាភិបាល​ខ្មែរក្រហម​ក្នុង​ក្រសួង​ការបរទេស​ក្រោម​ការ​ត្រួតត្រា​របស់​អៀង ​សារី ​បាន​លើក​ឡើង​ថា ​លោក​មិន​ដឹង​ពីឥទ្ធិពល​បរទេស​លើ​ការ​សម្លាប់​ប្រជាពលរដ្ឋ​កម្ពុជា​នោះ​ទេ។

នៅ​ក្នុង​សវនាការ​នោះ​ នួន​ ជា ​ក៏​បាន​ប្រកែក​ដោយ​អស់​សំណើច​ចំពោះ​ការ​ចោទ​សួរ​របស់​ចៅក្រម​សាលាដំបូង​ (ហ្សង់ម៉ាក ឡាវែង (Jean-Marc Laveng) ថា ​ខ្លួន​មិនមែន​ជា​បង​ធំ​ទី​២​នោះ​ទេ​ត្បិត​ពាក្យ​នេះ​គឺ​កា្លយ​មក​ពី​អ្នក​និយម​មនោគមវិជ្ជា​វៀតណាម។

«ខ្ញុំ​សូម​គោរព​លោក។ ក្នុង​បក្ស​កុម្មុយនីស្ត​កម្ពុជា ​គ្មាន​បង​ទី​១ ​គ្មាន​បង​ទី​២ ​គ្មាន​បង​ទី​៣​ទេ។​ ក៏ប៉ុន្តែ​ដែល​ហៅ​បង​ទី​២​នេះ ​វា​ជាប់​ពី​វប្បធម៌​យួន»។

កាល​ពី​ថ្ងៃ​អង្គារ​ នួន​ ជា ​បាន​សារភាព​ថា ​គណបក្ស​កុម្មុយនីស្ដ​កម្ពុជា​របស់​ខ្មែរក្រហម​មាន​ផែនការ​ទុក​ជា​មុន​ក្នុង​ការ​បណ្ដេញ​ប្រជាជន​ចេញ​ពី​ក្រុង​ភ្នំពេញ។ ​នៅ​ថ្ងៃ​នេះ ​នួន ​ជា​ បាន​អះអាង​ថា ​អៀង សារី ​អតីត​រដ្ឋមន្ដ្រី​ការបរទេស​ និង ​ខៀវ​ សំផន​ អតីត​ប្រមុខរដ្ឋ​ខ្មែរក្រហម​មិន​ត្រូវ​បាន​ជូន​ដំណឹង​ពី​ការ​សម្រេច​នេះ​ទេ។

ទាំង​នួន ​ជា ​ទាំង​លោក​ ឡុង ​នរិន្ទ ​សុទ្ធ​តែ​បាន​បង្ហាញ​ពី​ព្រះរាជ​សកម្មភាព​របស់​អតីត​ព្រះមហាក្សត្រ​ខ្លះ​ក្នុង​ចលនា​ និង​មុខងារ​របស់​ព្រះអង្គ​ជា​ប្រមុខរដ្ឋ​នៅ​ជាមួយ​ពួក​ខ្មែរក្រហម។ ក៏ប៉ុន្ដែ​លោក​ឡុង ​នរិន្ទ ​បញ្ជាក់​ថា ​អតីត​ព្រះមហាក្សត្រ​ក្នុង​ពេល​នោះ​ពុំ​មាន​អំណាច​នោះ​ទេ។ សូម​បញ្ជាក់​ថា ​ក្នុង​សវនាការ​នៅ​ថ្ងៃ​នេះ​ នួន​ ជា ​ដែល​ពាក់​អាវ​រងារ​ពណ៌ខ្មៅ​ បាន​ចោទ​សួរ​ទៅ​លោក​ឡុង ​នរិន្ទ​ ដែល​ផ្ដល់​សក្ខីកម្ម​តាម​ការ​ភា្ជប់​ខ្សែ​វីដេអូ ​អំពី​ការ​ជាប់​ទាក់ទង​នឹង​ឥទ្ធិពល​កម្មាភិបាល​ខ្មែរក្រហម​មួយ​ចំនួន។ ក្រៅ​ពីនោះ​ សាក្សី​ក៏បាន​បង្ហាញ​ថា ​លោក ​គាត ​ឈន់ ​បច្ចុប្បន្ន​ជា​ឧបនាយករដ្ឋ​មន្ដ្រី​និង​ជា​រដ្ឋមន្ដ្រី​ក្រសួង​សេដ្ឋកិច្ច​ និង​ហិរញ្ញវត្ថុ​គឺ​ជា​មន្ដ្រី​ម្នាក់​ក្នុង​ក្រសួង​ការបរទេស​ខ្មែរក្រហម​ដែរ៕

XS
SM
MD
LG