សាក្សីបានឲ្យដឹងនៅថ្ងៃពុធនេះថា នួន ជា បងធំទី២ នៃរបបខ្មែរក្រហមដែលកំពុងស្ថិតក្នុងការកាត់ទោសបានស្រង់រូបមន្តផ្នែកកសិកម្មពីប្រទេសចិនមកអប់រំប្រជាជនក្នុងពេលដែលជនជាប់ចោទរូបនេះស្ថិតក្នុងអំណាច។
លោក គឹម វុន អតីតបុគ្គលិកកុមារខ្មែរក្រហមក្នុងរោងពុម្ព និងបន្ទាប់មកបានក្លាយជាអ្នកយកព័ត៌មាននៅសម័យកម្ពុជាប្រជាធិបតេយ្យបានបញ្ជាក់ថា នួន ជា បានចេញចូលក្នុងក្រសួងឃោសនាការ ហើយទទួលខុសត្រូវផ្នែកអប់រំកសិកម្មតាមវិទ្យុជារៀងរាល់ថ្ងៃ។
«លោក នួន ជា មាននាទីមួយធ្វើកម្មវិធីអប់រំ គឺនៅពេលនោះអប់រំពីវិស័យកសិកម្ម។ គាត់យកសៀវភៅក្រាស់របស់ក្រុមអ្នកបច្ចេកទេសចិនមកផ្សព្វផ្សាយម្តងមួយទំព័រៗ»។
លោក គឹម វុន បញ្ជាក់យ៉ាងដូច្នេះតបទៅនឹងសំណួររបស់លោកចៅក្រម Jean-Marc Lavergne។
សាក្សីអាយុ៥៣ឆ្នាំរូបនេះ បានចូលក្នុងចលនាតស៊ូជាមួយពួកខ្មែរក្រហមតាំងតែពីអាយុ១២ឆ្នាំមកម្លេះ។ គាត់អះអាងថា តួនាទីជាប្រមុខរដ្ឋក្នុងសម័យខ្មែរក្រហមដូចជា អតីតព្រះមហាក្សត្រនរោត្តម សីហនុ និងខៀវ សំផន គ្មានអំណាចទេ។
កាលពីសប្តាហ៍កន្លងទៅ លោក សួង ស៊ីគឿន កម្មាភិបាលសំខាន់ម្នាក់ក្នុងក្រសួងការបរទេសខ្មែរក្រហមបានផ្តល់សក្ខីកម្មថា អំណាចទាំងអស់ត្រូវប្រមូលផ្តុំលើប៉ុល ពត ក្នុងសម័យខ្មែរក្រហម។
ជាអ្នកយកព័ត៌មាន លោក គឹម វុន បានធ្វើដំណើរទៅតំបន់ជាច្រើននៅក្នុងរបបខាងលើនេះហើយលោកអះអាងថា លោកបានឃើញភាពអត់ឃ្លានរបស់ប្រជាពលរដ្ឋខ្លះដែរ។ ក្រៅពីនោះក៏មានការលាក់ស្បៀងទុកដោយស្ងាត់កំបាំងហើយលោកគ្មានសិទ្ធិអន្តរាគមន៍ទេ។
លោក គឹម វុន បានឆ្លើយសំណួរតំណាងសហព្រះរាជអាជ្ញាដោយក្តុកក្តួលលាយឡំជាមួយនឹងទឹកភ្នែកថា ប្រពន្ធរបស់គាត់ត្រូវបាននាំខ្លួនយកទៅរៀនសូត្រហើយក្រោយមកទើបលោកដឹងថា ប្រពន្ធរបស់លោកត្រូវចោទប្រកាន់ថា ជាភ្នាក់ងារចារកម្ម ស៊ីអាអេ (C.I.A.) ម្នាក់របស់អាមេរិក។ ក៏ប៉ុន្តែលោកបានហៅការចោទប្រកាន់នេះថា ជាការចោទប្រកាន់មិនពិតទាល់តែសោះ។ លោក គឹម វុន បញ្ជាក់ថា ប្រពន្ធ និងកូនស្រីរបស់គាត់បានបាត់ខ្លួនហើយបុគ្គលិកមួយចំនួនទៀត នៅក្រសួងឃោសនាការក៏បានបាត់ខ្លួនជាបន្តបន្ទាប់ដែរ៕
