ភ្ជាប់​ទៅ​គេហទំព័រ​ទាក់ទង

ចៅក្រម​សម្រេច​ថា​នួន ជា​មាន​សុខភាព​ល្អ​អាច​ចូលរួម​ការកាត់​ទោស​បាន

  • គង់ សុឋានរិទ្ធ

នួន ជា ​អតីត​ប្រធានសភា​ខ្មែរក្រហម​និង​ជា​មេដឹកនាំ​ខ្មែរក្រហម​មានអំណាច​លំដាប់​ទី២​បន្ទាប់ពី​ប៉ុល ពត
ភ្នំពេញ៖ ជនជាប់ចោទ​នួន ជា ​មាន​សម្បទា​គ្រប់គ្រាន់​សម្រាប់​ចូលរួម​ការកាត់ទោស​លើ​រូប​គាត់។ លោក​ចៅក្រម​និល ណុន ​ប្រធាន​អង្គជំនុំ​ជម្រះ​សាលាដំបូង​របស់​សាលាក្តី​ខ្មែរក្រហម​បានប្រកាស​ក្នុង​សវនាការ​នៅ​ព្រឹក​ថ្ងៃ​សុក្រ​នេះ​ដោយ​សំអាង​លើ​របាយការណ៍​ថ្មីៗ​របស់​ក្រុមគ្រូពេទ្យ​ជំនាញ​ផ្នែក​ជំងឺ​មនុស្ស​ចាស់​ដែលថា​បើទោះជា​ជនជាប់ចោទ​មាន​សុខភាព​ផ្លូវកាយ​ទន់ខ្សោយ​ក៏ដោយ​ក៏​ជនជាប់ចោទ​វ័យ៨៦ឆ្នាំ​រូប​នេះ​«នៅតែ​មាន​សម្បទា​ចូលរួម​សវនាការ​ប្រកប​ដោយ​អត្ថន័យ»។ លោក​ចៅក្រម​និល ណុន​បាន​បន្ថែម​ថា៖ «ផ្នែក​លើ​កា​រស​ន្និ​ដា្ឋន​របស់​អ្នកជំនាញ​អង្គជំនុំ​ជម្រះ​សាលាដំបូង​តម្កល់​នូវ​សេចក្តី​សម្រេច​របស់​ខ្លួន​ពី​ពេល​កន្លងទៅ​ដែលថា​ជនជាប់ចោទ​នួន ជា​មាន​កាយសម្បទា​និង​សតិបញ្ញា​ស្មារតី​គ្រប់គ្រាន់​ក្នុងការ​ចូលរួម​សវនាការ»។ សេចក្តី​សម្រេច​នេះ​ធ្វើឡើង​បន្ទាប់ពី​សវនាការ​កាល​ពីថ្ងៃ​ច័ន្ទ​ដើម្បី​ស្តាប់​របាយការណ៍​វេជ្ជសាស្ត្រ​ស្តីពី​កាយសម្បទា​របស់​នួន ជា ​សម្រាប់​ចូលរួម​សវនាការ។ នៅក្នុង​សវនាការ​នោះ​លោក​សាស្ដ្រាចារ្យ​ច​ន ខាំ​បែ​ល (John Campbell) ជំនាញ​ផ្នែក​ជំងឺ​មនុស្ស​ចាស់​និង​លោក​វេជ្ជ​បណ្ឌិត​ ស៊ីណា ហ្វា​ហ្ស៊ែល​ (Seena Fazel) ​បាន​ប្រាប់​អង្គជំនុំជម្រះ​សាលាដំបូង​របស់​សាលាក្តី​ខ្មែរក្រហម​ក្នុង​សវនាការ​នៅ​ថ្ងៃ​ច័ន្ទ​នេះ​ថា​ថ្វីត្បិតតែ​នួន ជា ​មាន​វ័យ​ចំណាស់​និង​មានការ​ចុះខ្សោយ​ផ្នែក​សុខភាព​ប៉ុន្តែ​គាត់​មាន​លទ្ធភាព​ចូល​រួម​ដំណើរការ​កាត់ទោស​បាន។ តាម​វិធាន​ផ្ទៃក្នុង​នៃ​សាលាក្តី​ខ្មែរក្រហម​ជនជាប់ចោទ​ដែល​មិនមាន​ស្មារតី​និង​សម្បទា​ទទួល​ការកាត់ទោស​លើ​ខ្លួន​មិន​ត្រូវបាន​នាំយកមក​កាត់ទោស​នោះទេ។ លោក​សុន អារុណ ​សហ​មេធាវី​កម្ពុជា​របស់​នួន ជា ​និយាយ​ក្នុង​សវនាការ​នៅ​ដើម​សប្តាហ៍​នេះ​ថា​កូនក្តី​របស់​ខ្លួន​នៅមាន​ជំងឺ​ធ្ងន់ធ្ងរ​ជាច្រើន​ដូចជា​ជំងឺ​លើសឈាម​ម្តងម្កាល ​រលាក​ផ្លូវដង្ហើម ​រលាក​សាច់​បេះដូង ​វិលមុខ ​ឈឺ​ឆ្អឹងខ្នង​ធ្ងន់ធ្ងរ​ដែល​នឹងធ្វើ​ឲ្យ​ប៉ះពាល់​ដល់​ការ​ផ្ចង់​អារម្មណ៍​និង​ធ្វើ​ឱ្យ​កម្លាំង​ចុះខ្សោយ។ លោក​មេធាវី​ទាមទារ​ឲ្យ​តុលាការ​ព្យាបាល​កូនក្តី​របស់ខ្លួន​ឲ្យ​ជា​សះស្បើយ​ជាមុន​សិន​មុននឹង​នាំ​ខ្លួន​ចូល​កាត់ទោស។ ការសម្រេច​លើ​ស្ថានភាព​សុខភាព​របស់​នួន ជា ​អតីត​ប្រធានសភា​ខ្មែរក្រហម​និង​ជា​មេដឹកនាំ​ខ្មែរក្រហម​មានអំណាច​លំដាប់​ទី២​បន្ទាប់ពី​ប៉ុល ពត ​នេះ​បន្ទាប់ពី​ការស្លាប់​របស់​អៀង សារី​ ឧបនាយក​រដ្ឋមន្ត្រី​និង​ជា​រដ្ឋមន្ត្រី​ការបរទេស​ខ្មែរក្រហម។ អៀង សារី ​បានស្លាប់​ក្នុង​អាយុ៨៧ឆ្នាំ​ក្នុង​មន្ទីរពេទ្យ​នៅ​ក្រុងភ្នំពេញ​កាលពី​ថ្ងៃទី១៤ខែ​មិនា។ ជនជាប់ចោទ​ដែល​នៅ​សេសសល់​ក្នុង​សំណុំរឿង​០០២​គឺ​នួន ជា ​និង​ខៀវ សំផន ​អតីត​ប្រមុខរដ្ឋ​ខ្មែរ​ក្រហម​កំពុង​មាន​វ័យចាស់​ជរា​និង​បាន​ឈឺ​ជា​បន្តបន្ទាប់​ហើយ​បានធ្វើ​ឲ្យ​ការកាត់ទោស​ផ្អាក​ជាច្រើន​ដង​ក្នុងពេល​កន្លងមក។ នៅ​ព្រឹក​នេះ​ដែរ​អង្គជំនុំ​ជម្រះ​សាលាដំបូង​ក៏បាន​សម្រេច​ដម្កល់​ការ​បំបែក​នីតិ​វិធី​ជា​ផ្នែក​តូចៗ​នៃ​ដំណើរការ​ក្តី​ក្នុង​សំណុំរឿង​ទី២​នេះ​ដែរ៕
XS
SM
MD
LG