ភ្ជាប់​ទៅ​គេហទំព័រ​ទាក់ទង

អ្នក​ស្រាវជ្រាវ​អាមេរិកាំង​ស្នើ​សុំ​ឱ្យ​ប្រគល់​វត្ថុ​បុរាណ​ខ្មែរ​ទៅ​ប្រទេស​កម្ពុជា​វិញ


រាយការណ៍​ដោយ​ ម៉ែន គឹមសេង​ ពី​រដ្ឋធានី​វ៉ាស៊ីនតោន

ខណៈ​ពេល​ដែល​ពិព័រណ៍​ស្នាដៃ​សំរិទ្ធ​ខ្មែរ​នៅ​ចំ​កណ្តាលទី​ក្រុងវ៉ា​ស៊ីន​ តោនដែលមាន​ឈ្មោះថា​ “អាទិទេព​ក្រុង​អង្គរ”​ ទទួល​បាន​ការ​គាំទ្រ​ខ្លាំង​ និង​មាន​អ្នក​ចូល​ទស្សនា​ជា​ច្រើន​ អ្នក​ស្រាវជ្រាវ​ជាន់​ខ្ពស់​អាមេរិកាំង​ម្នាក់​ស្នើ​សុំឱ្យ​មាន​ការ​សង​ត្រឡប់​ទៅ​កម្ពុជា​វិញ​នូវ​វត្ថុ​បុរាណ​ខ្មែរ​ ដែល​ត្រូវ​បាន​គេ​ជួញ​ដូរ​ចេញ​ពី​ប្រទេស​កម្ពុជា​ដោយ​ខុសច្បាប់។

លោក Hiram Woodward អតីត​អ្នក​អភិរក្សស្នាដៃសិល្បៈ​អាស៊ី​នៃ​សារៈមន្ទីរ Walters នៅ​ទី​ក្រុង Baltimore រដ្ឋ Maryland បាន ​ប្រាប់វីអូអេសំឡេង​សហរដ្ឋ​អាមេរិក​កាល​ពី​ថ្ងៃ​សៅរ៍​ថា ​ខណៈ​ពេល​ដែល​គេ​អាច​ទទួល​បាន​ការ​យល់ដឹង​ច្រើន​ពី​វប្បធម៌​និង​វត្ថុ​បុរាណ​របស់​កម្ពុជា ​តាម​រយៈ​រូប​ចម្លាក់​ដែល​បាន​ត្រូវ​ឈ្មួញ​ជួញ​ដូរដោយខុស​ច្បាប់​ចេញ​ទៅក្រៅ​ប្រទេស​និង​មាន​អ្នក​ប្រមូល​ទុក​ជា​លក្ខណៈ​ឯកជន​នោះ​ ក៏​ប៉ុន្តែ​ការ​ល្អ ​គឺវត្ថុ​ទាំង​អស់​នោះ​គួរ​តែ​ស្ថិត​នៅ​ក្នុង​ប្រទេស​ដើម​កំណើត​របស់​ខ្លួនវិញ។

“មនុស្ស​ទាំងអស់​ដែល​សិក្សា​ពី​ប្រទេស​កម្ពុជា​ និង​ភ្ញៀវ​ទាំងអស់​ដែល​មក​បំពេញ​ទស្សនកិច្ច​ប្រទេស​កម្ពុជា​ដឹង​ថា ​តើ​វា​សំខាន់​យ៉ាង​ណា​ដែល​ត្រូវ​រក្សា​ប្រាសាទ​កម្ពុជា​ឱ្យ​នៅ​ល្អ​ដូច​ដើម​តាម​ដែល​យើង​អាច​ធ្វើ​បាន​ ហើយ​ឥឡូវ​នេះ​មាន​កិច្ច​ព្រម​ព្រៀង​ទាក់​ទង​នឹង​ការ​នាំ​យក​រូប​ចម្លាក់​ថ្ម​ទាំង​នោះ​ចូល​មក​សហរដ្ឋ​អាមេរិក​ក្នុង​ពេល​កន្លង​មក​ ហើយ​យើង​សង្ឃឹម​ថា​រូប​ចម្លាក់​ខ្លះ​ដែល​ត្រូវ​គេ​យក​ចេញពី​ប្រទេស​កម្ពុជា​កាល​ពី​ពេល​អតីតកាល ​នឹង​អាច​ត្រឡប់​ទៅ​ប្រទេស​កម្ពុជា​វិញ​បាន"។

ប្រទេសកម្ពុជា​និង​សហរដ្ឋ​អាមេរិក​បាន​ចុះ​ហត្ថលេខា​លើ​កិច្ច​ព្រម​ព្រៀង​មួយ​កាល ​ពី​ខែ​កញ្ញា​ ឆ្នាំ​២០០៣​ ហាម​ឃាត់​ការ​នាំ​ចូល​វត្ថុ​សិល្បៈ​បុរាណ​ខ្មែរ​ចូល​ក្នុង​សហរដ្ឋ​អាមេរិក​ដោយ​ខុស​ច្បាប់​ បន្ទាប់​ពី​មាន​ការ​ស្នើសុំ​ពី​ភាគី​រដ្ឋាភិបាល​កម្ពុជា​ឱ្យ​ជួយ​ការពារ​ បេតិកភណ្ឌ​វប្បធម៌​ខ្មែរ។

ក្រសួងវប្បធម៌​នៃ​ប្រទេស​កម្ពុជា​បាន​ឱ្យ​ដឹង​ថា​ រហូត​មក​ដល់​ពេល​នេះ​ការ​ជួញ​ដូរ​វត្ថុ​សិល្បៈ​បុរាណ​ខ្មែរ​ដោយ​ខុស​ច្បាប់​ មាន​ការ​ថយ​ចុះ​ច្រើន​ ហើយ​សហរដ្ឋ​អាមេរិក​បាន​ផ្តល់​សហការ​ល្អ​ជា​មួយ​ប្រទេស​កម្ពុជា​ ដោយ​ចាប់​បាន​និង​បញ្ជូន​វត្ថុ​បុរាណ​ខ្មែរ​មក​វិញ​ជាបន្ត​បន្ទាប់។

លោក​ ឱក សុផុន​ អគ្គ​នាយក​ទទួល​បន្ទុក​បេតិកភណ្ឌ​ខ្មែរ​នៃ​ក្រសួង​វប្បធម៌​ខ្មែរ​បាន​ប្រាប់ ​វីអូអេ​សំឡេង​សហរដ្ឋ​អាមេរិក​កាល​ពី​ថ្ងៃ​ច័ន្ទ​ថា​ ក្រសួង​ក៏​កំពុង​តែ​ធ្វើទំនាក់​ទំនង​ជា​មួយ​អ្នកទិញ​វត្ថុ​បុរាណ​ខ្មែរ​មុន​ពេល​កិច្ច​ព្រមព្រៀង​ នេះ​បាន​ចូល​ជា​ធរមាន​ឱ្យ​ពួក​គាត់​បរិច្ចាគ​ដោយ​សប្បុរស​ប្រគល់​វត្ថុ​ទាំងនោះ​មក​ប្រទេស​កម្ពុជា​វិញ។

“ឥឡូវយើង​កំពុង​តែ​ធ្វើ​ទំនាក់ទំនង​ជាមួយ​សប្បុរសជន​នៅ​អាមេរិក​ ព្រោះ​បង​ប្អូន​នៅ​អាមេរិក​ភាគ​ច្រើន​គាត់​បាន​វត្ថុបុរាណ​ ហើយ​ភាគ​ច្រើន​គាត់​ចាស់​ ហើយ​កូន​ៗ​នៅ​បែក​ ឥឡូវ​គាត់ស្តាយ​ថា​ពេល​ដែល​អត់​ពីគាត់​ទៅ​វត្ថុ​បុរាណ​ មិន​ដឹង​យក​ទៅ​ណា។​ អញ្ចឹង​ទេ​ឥឡូវ​យើង​កំពុង​តែ​បំផុស​ចលនា​ដល់​អ្នក​មាន​វត្ថុ​បុរាណ​របៀបហ្នឹង​ យើង​សុំ​គាត់​ត្រង់ៗ​តែ​ម្តង​ សុំ​ផ្ទេរ​មក​ឱ្យ​យើង​វិញ”។

អាជ្ញាធរកម្ពុជា​ជឿ​ជាក់​ថា​ពិព័រណ៍​ដែល​រៀបចំ​នៅ​សហរដ្ឋ​អាមេរិក​ ដូច​ជា​ពិព័រណ៍​ “អាទិទេព​ក្រុងអង្គរ”​ នឹង​ជួយ​ឱ្យ​មាន​ការ​យល់​ដឹង​បន្ថែម​ទៀត​ពី​តម្លៃ​វប្បធម៌​ខ្មែរ​ក្នុង​ឆាក​អន្តរជាតិ​ និង​មាន​ការ​ជួយ​ចូលរួម​ទប់​ស្កាត់​ការ​ជួញដូរ​ដោយ​ខុសច្បាប់​ចេញ​ពី​ប្រទេស​កម្ពុជា ៕

XS
SM
MD
LG