ដោយវីអូអេ
ប្រទេសកម្ពុជានិងប្រទេសភូមាមានចំណាត់ថ្នាក់ស្មើគ្នាក្នុងតារាងសេរីភាពសម្រាប់ឆ្នាំ២០១២កន្លងមកនេះ។ នេះបើតាមរបាយការណ៍ចេញផ្សាយដោយអង្គការ Freedom Houseកាលពីថ្ងៃពុធ។
អង្គការនេះបានចាត់ទុកថាកម្ពុជានិងភូមានៅតែស្ថិតក្នុងចំណោមប្រទេសដែលមិនមានសេរីភាពដោយមើលឃើញថាសិទ្ធិសេរីភាពខាងនយោបាយក្នុងប្រទេសទាំងពីរស្ទើរតែធ្លាក់ដល់បាតក្រោម ក្នុងខណៈពេលដែលសិទ្ធិសម្រាប់ពលរដ្ឋស៊ីវិលមានការប្រសើរជាងបន្តិច។
កម្ពុជានិងភូមាទទួលបានក្រិតទី៦សម្រាប់សិទ្ធិសេរីភាពខាងនយោបាយនិងក្រិតទី៥សម្រាប់សិទ្ធិសេរីភាពជនស៊ីវិល។ ក្រិតទី ១ជាពិន្ទុល្អជាងគេបំផុតហើយក្រិតទី៧គឺជាពិន្ទុអន់ជាងគេបំផុត។
ប្រទេសភូមាដែលធ្លាប់មានប្រវត្តិអាក្រក់បានឡើងមកទាន់ប្រទេសកម្ពុជាដោយសារតែប្រទេសនេះបានធ្វើការកែទម្រង់តាមលទ្ធិប្រជាធិបតេយ្យដែលបានចាប់ផ្តើមតាំងពីឆ្នាំ២០១០មក។ អង្គការ Freedom House មើលឃើញថាភូមាទទួលពិន្ទុបានល្អដោយសារតែបានអនុញ្ញាតឱ្យមានក្រុមបក្សប្រឆាំងចូលរួមការបោះឆ្នោត ក្នុងឆ្នាំ២០១២ កន្លងទៅនិងមានការប្រសើរឡើងខាងសិទ្ធិបញ្ចេញមតិនិងការបង្កើតសមាគម។
(Sources: Freedom House)
