ភ្ជាប់​ទៅ​គេហទំព័រ​ទាក់ទង

អ.ស.ប.​បាន​លើក​ទឹកចិត្ត​កម្ពុជា​ផ្ដល់​សច្ចាប័ន​លុបបំបាត់​ទម្រង់​រើសអើង​ចំពោះ​ស្ដ្រី


យុវនារី​ខ្មែរ​អង្គុយ​នៅ​ក្រៅ​ភោជនីយដ្ឋាន​មួយ។

អង្គការ​សហ​ប្រជាជាតិ​បាន​លើក​ទឹកចិត្ត​ដល់​ប្រទេស​កម្ពុជា​ ក្នុងការ​ដែល​ប្រទេស​នេះ​បាន​ផ្ដល់​សច្ចាប័ន​ដល់​ការ​ប្រឹងប្រែង​ក្នុង​ការ​លុបបំបាត់​ទម្រង់​រើសអើង​ចំពោះ​ស្ដ្រី។​ ការ​ផ្ដល់​សច្ចាប័ន​នេះ ​នឹង​ធ្វើឲ្យ​ប្រទេស​កម្ពុជា​ក្លាយជា​ប្រទេស​ដំបូង​គេ​នៅ​ក្នុង​ចំណោម​ប្រទេស​អាស៊ី​អាគ្នេយ៍​ដែល​បាន​ធ្វើ​សេចក្ដី​សម្រេច​ចិត្ត​នេះ។

អង្គការសហ​ប្រជាជាតិ​ ​នៅ​ថ្ងៃ​អង្គារនេះ​ ​បាន​កោត​សរសើរ​ប្រទេស​កម្ពុជា​ ​ដែល​បាន​ផ្ដល់​សច្ចាប័ន​លើ​ពិធីសារ​បន្ថែម​លើ​អនុសញ្ញា​ស្ដីពី​ការ​លុប​បំបាត់​ការរើសអើង​គ្រប់​ទម្រង់ប្រឆាំង​នឹងស្ដ្រី។​ ការផ្ដល់​សច្ចាប័ន​នេះ​នឹង​ជួយ​ស្ដី្រ​កម្ពុជា​ឲ្យ​ហ៊ាន​ប្ដឹង​ទៅ​កាន់​អង្គការ​សហ​ប្រជាជាតិដោយ​ផ្ទាល់​នៅ​ពេល​ដែលខ្លួន​ដឹង​ថា​ ​បាន​ទទួល​រង​ការ​រំលោភ​បំពាន​នោះ។

សេចក្ដី​ស្វាគមន៍​របស់​អង្គការ​សហ​ប្រជាជាតិ ​ធ្វើ​ឡើង​មួយ​ថ្ងៃ​ប៉ុណ្ណោះ​ ​មុន​នឹង​អនុ​សញ្ញា​ស្ដីពី​ការ​រើស​អើង​ចំពោះ​ស្ដ្រី​ត្រូវ​ចូល​ជា​ធរមាន។

លោកស្រី​ វីនី​ ស៊ូគូម៉ា​ (Winny Sukuma) ​តំណាង​របស់​អង្គការ​សហ​ប្រជាជាតិ​ទទួល​បន្ទុក​ផ្នែក​ស្ដ្រី​ (UN Women) ​មាន​ប្រសាសន៍​នៅ​ក្នុង​សេចក្ដី​ថ្លែងការណ៍​រួម​ថា​ ​ ឧត្ដម​ស្នងការ​អង្គការ​សហ​ប្រជាជាតិ​ ទទួល​បន្ទុក​សិទ្ធិមនុស្ស​ ​និង​អង្គការ​សហ​ប្រជាជាតិ​ទទួល​បន្ទុក​ផ្នែក​ស្ដ្រី​ ​សូម​អបអរ​សាទរ​ដល់​រដ្ឋាភិបាល​កម្ពុជា​ ចំពោះ​ការប្ដេជ្ញា​ចិត្ត​ការពារ​ និង​លើក​ស្ទួយ​សិទ្ធិ​មនុស្ស​ ជាពិសេស​សិទ្ធិ​ស្ដ្រី។

ប្រទេស​កម្ពុជា​ នឹង​ក្លាយ​ទៅ​ជាប្រទេស​ទីមួយ​នៅក្នុង​ចំណោម​បណ្ដា​ប្រទេស​អាស៊ី​អាគ្នេយ៍ ​និង​ក្លាយជា​ប្រទេស​ទី​១០០​ក្នុង​ពិភព​លោក​ដែល​បាន​ផ្ដល់​សច្ចា​ប័ន​លើ​ពិធី​សារ​បន្ថែម​នេះ។

យោងតាម​សេចក្ដី​ប្រកាស​រួម​របស់​អង្គការ​សហ​ប្រជាជាតិ​បង្ហាញ​ថា​ ​ពិធី​សារ​បន្ថែម​នឹង​អនុញ្ញាតឲ្យស្ដ្រី​កម្ពុជា​ ​ជា​លក្ខណៈ​បុគ្គល​ ​ឬ​ជា​ក្រុម​ដែល​ជឿ​ថា​ ​សិទ្ធិ​របស់​ខ្លួន​ត្រូវ​បាន​រំលោភ​បំពាន​នោះ​ ​ពួក​គាត់​អាច​ដាក់​បណ្ដឹង​ទៅ​កាន់​គណៈកម្មការ​នៃ​អង្គការ​សហ​ប្រជាជាតិ​បាន។

លោក​ជេម​ ហ៊ីណាន់​(James Heenan​) ​នាយករង​ការិយាល័យ​អង្គការ​សហ​ប្រជាជាតិ​ទទួល​បន្ទុកផ្នែក​សិទ្ធិ​មនុស្ស​នៅ​កម្ពុជា​ ​មាន​ប្រសាសន៍​តាម​សារអេឡិចត្រូនិច​ (email)​ ប្រាប់​ VOA ​ថា​ ​ស្ដ្រី​កម្ពុជា​ អាច​ដាក់​បណ្ដឹង​ជា​ប្រាំមួយ​ភាសា​ទៅ​កាន់​អង្គការ​សហ​ប្រជាជាតិ​ ​ដូចជា​ភាសា​បារាំង​ ​អង់គ្លេស ​រុស្ស៊ី ភាសា​ចិន​ ភាសា​អារ៉ាប់​ និង​ភាសា​អេស្ប៉ាញ។ ​ហើយ​ពួក​គេ​អាច​ស្នើ​សុំ​ភាព​ជា​អនាមិក​បាន។

លោក ​គ្រិស្ដូប​ ប៉េស៊ូ ​(Christophe Peschoux)​ នាយក​ការិយាល័យ​អង្គការ​សហ​ប្រជាជាតិ​ទទួល​បន្ទុកសិទ្ធិមនុស្ស​នៅ​កម្ពុជា ​មាន​ប្រសាសន៍​ថា​ ​ការផ្ដល់​សច្ចាប័ន​ទៅ​លើ​ពិធី​សារ​បន្ថែម​របស់​ប្រទេសកម្ពុជា ​គឺ​ជា​ជំហាន​រីកចម្រើន​មួយ។

អ្នក​នាំ​ពាក្យ​រដ្ឋាភិបាល​ ​លោក ​ខៀវ​ កាញារិទ្ធ​ ​លោក​ផៃ ​ស៊ីផាន​ រួម​ទាំង​លោកឱម ​យ៉ិនទៀង ​ប្រធានគណៈ​កម្មាធិការ​សិទ្ធិ​មនុស្ស​របស់​រដ្ឋាភិបាល​ ​មិន​អាច​ធ្វើ​ទំនាក់​ទំនង​បាន​ទេ។

ទោះ​ជា​យ៉ាងណា​ ​លោក​ជាម ​យៀប​ ​តំណាង​រាស្ដ្រ​គណបក្ស​កាន់​អំណាច​មាន​ប្រសាសន៍​ថា​ ​ការកោត​សរសើរ​របស់​អង្គការ​សហ​ប្រជាជាតិ​ចំពោះ​រដ្ឋាភិបាល​ គឺ​ជា​ប្រការ​ត្រឹមត្រូវ។

“កម្មវិធី​របស់​រដ្ឋាភិបាល​បាន​ជំរុញ​នារី​ហ្នឹង​ហើយ​បាន​ជាការវាយ​តម្លៃ​របស់​អង្គការ​សហ​ប្រជាជាតិកោត​សរសើរ​ចំពោះ​រាជ​រដ្ឋាភិបាល​ដែល​បាន​យក​ចិត្ត​ទុក​ដាក់​ចំពោះ​នារី​កម្ពុជា"។

ក៏ប៉ុន្ដែលោក​ យឹម​ សុវណ្ណ​ តំណាង​រាស្ដ្រ ​និង​ជា​អ្នក​នាំ​ពាក្យ​គណបក្ស ​សម​ រង្ស៊ី ​បានលើក​ឡើង​ថា​ ស្ដ្រី​កម្ពុជា​កំពុង​ទទួល​រងគ្រោះ​ជាច្រើន​ ដោយសារ​តែខ្វះ​ការយក​ចិត្តទុក​ដាក់​ពី​រដ្ឋាភិបាល។​ ជា​ពិសេស​ស្ដី្រ​ដែល​រងគ្រោះ​ភាគច្រើន​ គឺ​ជាស្ដ្រី​ដែល​កំពុង​តែ​រស់​នៅ​ក្នុង​ភាព​ក្រីក្រ ​នៅ​តាម​ទី​ជនបទ៕

XS
SM
MD
LG