ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពលរដ្ឋ​ត្រូវ​ចាប់ខ្លួន​ទាក់ទង​ទំនាស់​ដីធ្លី​មាន​ចំនួន​ច្រើន​បំផុត​ក្នុង​ឆ្នាំ​២០១២​


មន្ដ្រី​សិទ្ធិ​មនុស្ស​ដដែល​បញ្ជាក់​ថា​ មូលហេតុ​នៃ​កំណើន​នេះគឺ​ដោយសារតែ​ទំនាស់​ដីធ្លី​ចាស់ៗ​មិន​ត្រូវ​បាន​ដោះស្រាយ​នោះ​ទេ។​
មន្ដ្រី​សិទ្ធិ​មនុស្ស​ដដែល​បញ្ជាក់​ថា​ មូលហេតុ​នៃ​កំណើន​នេះគឺ​ដោយសារតែ​ទំនាស់​ដីធ្លី​ចាស់ៗ​មិន​ត្រូវ​បាន​ដោះស្រាយ​នោះ​ទេ។​

ចំនួន​ពលរដ្ឋ​ដែល​ត្រូវ​ចាប់ខ្លួន​និង​ចោទប្រកាន់​តាម​ផ្លូវ​តុលាការ​ក្នុង​ឆ្នាំ​២០១២​បាន​កើន​ឡើង​ខ្ពស់​ជាង​ឆ្នាំ​ណាៗ​ទាំងអស់​ក្នុង​រយៈ​ពេល​ប្រាំ​ឆ្នាំ​ចុង​ក្រោយ។​

គង់ សុ​ឋាន​រិទ្ធ ​រាជធានី​ភ្នំពេញ
ប្រជាពលរដ្ឋ​ដែល​ត្រូវ​ចាប់ខ្លួន​និង​ចោទប្រកាន់​ដោយសារ​ទំនាស់​ដីធ្លី​នៅ​ក្នុង​កម្ពុជា​បាន​កើនឡើង​រហូត​ដល់​២០១​នាក់​នៅ​ឆ្នាំ​២០១២។​

តួលេខ​នេះ​បង្ហាញ​ថា​ ចំនួន​ពលរដ្ឋ​ដែល​ត្រូវ​ចាប់ខ្លួន​និង​ចោទប្រកាន់​តាម​ផ្លូវ​តុលាការ​ក្នុង​ឆ្នាំ​២០១២​បាន​កើន​ឡើង​ខ្ពស់​ជាង​ឆ្នាំ​ណាៗ​ទាំងអស់​ក្នុង​រយៈ​ពេល​ប្រាំ​ឆ្នាំ​ចុង​ក្រោយ។​

ក្នុង​សន្និសីទ​សារព័ត៌មាន​ស្តីពី​ស្ថានភាព​ដីធ្លី​នៅ​ក្នុង​ប្រទេស​កម្ពុជា​កាល​ពី​ថ្ងៃ​ពុធ​ក្នុង​ទីក្រុង​ភ្នំពេញ លោក​ចាន់ សា​វ៉េ​ត ​អនុប្រធាន​ផ្នែក​ស៊ើបអង្កេត​នៃ​អង្គការ​ការពារ​សិទ្ធិ​មនុស្ស​អាដហុក​ បាន​និយាយ​ថា​ ការ​ចាប់ខ្លួន​និង​ចោទ​ប្រកាន់​ដោយ​តុលាការ​លើ​ប្រជា​ពលរដ្ឋ​ទាក់ទង​នឹង​ទំនាស់​ដីធ្លី​កាលពី​ឆ្នាំ​២០០៧​មាន​ត្រឹមតែ​១៤៩​នាក់​តែ​ប៉ុណ្ណោះ ​ហើយ​ចំនួន​នេះ​បាន​ធ្លាក់ចុះ​មក​វិញ​នៅ​ឆ្នាំ​២០១១​នៅត្រឹម​៩៨​នាក់។​

«គិត​ចាប់ពី​ឆ្នាំ​២០០៧​រហូត​ដល់​ថ្ងៃនេះ​មាន​មនុស្ស​ជាង​១០០០​នាក់​ដែល​ត្រូវ​បាន​ចោទប្រកាន់​និង​ចាប់ខ្លួន»។​

មន្ដ្រី​សិទ្ធិ​មនុស្ស​ដដែល​បញ្ជាក់​ថា​ មូលហេតុ​នៃ​កំណើន​នេះគឺ​ដោយសារតែ​ទំនាស់​ដីធ្លី​ចាស់ៗ​មិន​ត្រូវ​បាន​ដោះស្រាយ​នោះ​ទេ។​

«ការ​ចាប់ខ្លួន​ក្នុង​ឆ្នាំ​២០១២​នេះ​គឺ​កើត​ចេញ​ពី​ករណី​ទំនាស់​ដីធ្លី​ចាស់​ដែល​មិន​ទាន់​បាន​ដោះស្រាយ​ភាគ​ច្រើន»។​

ប្រទេស​កម្ពុជា​មាន​ទំនាស់​ដីធ្លី​យ៉ាង​រ៉ាំរ៉ៃ​ជាច្រើន​ឆ្នាំ​មកហើយ​ ដែល​ធ្វើឲ្យ​មាន​ការ​ស្តីបន្ទោ​សលើ​ប្រសិទ្ធិភាព​នៃ​យន្តការ​ដោះស្រាយ​របស់​រដ្ឋាភិបាល​និង​ធ្វើឲ្យ​មាន​កង្វល់​ដល់​វិបត្តិ​សង្គម។​

ប្រជា​ពលរដ្ឋ​ជាច្រើន​ម៉ឺន​នាក់​បាន​ទទួល​រង​ការ​បណ្តេញ​ចេញពី​លំនៅ​ដ្ឋាន​ដោយ​បង្ខំ​ ដោយ​ខ្វះ​ការផ្តល់​សំណង​បាន​ត្រឹមត្រូវ​ ដែល​ក្រុមមន្ដ្រី​អង្គការ​ក្រៅ​រដ្ឋាភិបាល​លើក​ពី​ការ​បំពាន​ដល់​សិទ្ធិ​លំនៅដ្ឋាន​និង​សិទ្ធិ​មនុស្ស​ផ្សេងៗ។​

លោក​ឈិត សំអាត ​នាយក​ប្រតិបត្តិ​នៃ​វេទិកា​អង្គការ​មិនមែន​រដ្ឋាភិបាល​កត់​សម្គាល់​ថា​ ប្រជាជន​ទន់ខ្សោយ​និង​អ្នកក្រីក្រ​នៅ​តែ​មាន​ចំនួន​ច្រើន​ដែល​មិន​ទាន់​ទទួល​បាន​សិទ្ធិ​កាន់កាប់​ដីធ្លី​សម​រម​រហូតមកទល់​នឹង​ឆ្នាំ​២០១២​នេះ។ ​បន្ថែម​ពី​នេះ​ទៀត​ការ​បណ្តេញ​ពី​លំនៅដ្ឋាន​នៅតែ​បន្ត។​

«ចំនួន​ប្រជាជន​ដែល​ខ្វះ​ដីធ្លី​គឺ​មាន​ពី​២០​ទៅ​២៥​ភាគរយ​នៃ​ចំនួន​ប្រជាជន​សរុប។ ​ទិន្នន័យ​ដែល​កត់ត្រា​ដោយ​វេទិកា​អង្គការ​មិនមែន​រដ្ឋាភិបាល​ឲ្យដឹង​ថា​ ជម្លោះ​មួយចំនួន​នៅ​ពន្យារ​ពេល​ជា​ច្រើន​ឆ្នាំ​ មិន​ទាន់​បាន​ដោះស្រាយ​បាន ដែល​ជា​ហេតុ​ធ្វើឲ្យ​ប៉ះពាល់​ដល់​ជីវភាព​រស់នៅរ​បស់​ប្រជាជន​និង​អ្នក​ក្រីក្រ»។​

លោក​ឈិត សំអាត​បង្ហាញ​ថា​ កត្តា​ដែល​នាំឲ្យ​មាន​ជម្លោះ​ដីធ្លី​នៅ​ប្រទេស​កម្ពុជា​បង្ក​ឡើង​ ជា​ពិសេស​ដោយ​គម្រោង​អភិវឌ្ឍន៍​ធំៗ​ជាច្រើន​ដូចជា​ផ្នែក​អភិវឌ្ឍន៍​ឧស្សាហ​កម្ម ទាំង​នៅ​តំបន់​ជនបទ​និង​ទាំង​នៅក្នុង​ទីក្រុង ​និង​បង្ក​ឡើង​ដោយ​ការផ្តល់​ដី​សម្បទាន​សេដ្ឋកិច្ច​ដល់​ក្រុមហ៊ុន​ជាតិ​និង​ក្រុមហ៊ុន​អន្តរជាតិ។​

អ្នកស្រី​ទេព វ​ន្នី​គឺជា​អ្នកដឹកនាំ​ក្រុម​អ្នក​តវ៉ា​ផង​និង​ជា​អ្នក​រងគ្រោះ​ដោយ​ការ​បណ្តេញ​ចេញ​ដោយ​បង្ខំ​ក្នុង​សហគមន៍​បឹងកក់។​

អ្នកស្រី​ក៏​ត្រូវបាន​ចាប់​ខ្លួន​ដាក់​ពន្ធនាគារ​ដោយសារ​ការ​តវ៉ា​ដើម្បី​សហគមន៍​របស់​ខ្លួន​ដែល​ត្រូវ​ដេញ​ចេញ​សម្រាប់​ការ​អភិវឌ្ឍ​សំណង់​ទំនើប ​ដោយ​មិន​មាន​សំណង​សមរម្យ។​

«ការ​អភិវឌ្ឍ​មានតែ​ការ​បំផ្លាញ​ចោល​នូវ​សុភមង្គល​ និង​អនាគត​គ្រួសារ​របស់​ប្រជា​ពលរដ្ឋ​នៅ​តំបន់​បឹង​កក់​ទាំងមូល​ ជាពិសេស​គឺ​ការ​រំលោភ​សិទ្ធិ​មនុស្ស​និង​សិទ្ធិ​រស់រាន​មានជីវិត​និង​សិទ្ធិ​លំនៅ​ដ្ឋាន​របស់​ពួក​ខ្ញុំ»។​

លោក​ផៃ ស៊ីផា​ន​ រដ្ឋលេខាធិការ​និង​ជា​អ្នក​នាំពាក្យ​ទីស្តីការ​គណៈ​រដ្ឋមន្ដ្រី​បាន​ឆ្លើយតប​នឹង​បញ្ហា​ទាំងនេះ​ថា​ រាជរដ្ឋាភិបាល​កំពុង​ដោះស្រាយ​បញ្ហា​ដីធ្លី​លើ​គោល​ដៅ​ចំនួន​បី។​ ​ទី​មួយ​ដោះស្រាយ​ចំពោះ​ក្រុម​ប្រជា​ពលរដ្ឋ​ដែល​កំពុង​ជាប់​ពាក់​ព័ន្ធ​ជា​មួយ​ដី​សម្បទាន​សេដ្ឋកិច្ច ​ទី​ពីរ​គឺ​ពលរដ្ឋ​ដែល​រស់​នៅ​លើ​ដី​សាធារណៈ ​និង​ទី​បី​គឺ​ពលរដ្ឋ​ដែល​ទៅ​កាន់កាប់​ដីធ្លី​ដោយ​គ្មាន​កម្ម​សិទ្ធិ​ស្រប​ច្បាប់​ត្រឹមត្រូវ​ដែល​ពាក់​ព័ន្ធ​នឹង​អង្គភាព​រដ្ឋ។​

«នៅ​ក្នុង​ទិដ្ឋភាព​ទាំងបី​នេះ​ យើង​បាន​ដោះស្រាយ​យ៉ាង​គគុក​ដែល​មាន​មនុស្ស​រាប់លាន​នាក់​ទទួលបាន​ផល​ពី​នេះ​ និង​ដែល​ជា​ការងារ​ប្រវត្តិ​សាស្ដ្រ​មួយ​ដែល​យើង​បាន​ផ្តល់​នូវ​អ្វី​ជា​លិខិត​កម្ម​សិទ្ធិ​អចលន​វត្ថុ​ ឬ​កម្ម​សិទ្ធី​ដីធ្លី​នេះ»។​
បន្ថែម​ពី​នេះ​ លោក​ផៃ ស៊ីផា​ន​លើកឡើង​ថា ​ការ​ដោះស្រាយ​ទំនាស់​ដីធ្លី​ត្រូវ​ការ​ពេល​វេលា ​ហើយ​គេ​ត្រូវការ​ភាព​អត់ធ្មត់៕​
XS
SM
MD
LG