ភ្ជាប់​ទៅ​គេហទំព័រ​ទាក់ទង

ប្រធាន​សហជីព​កម្មករ​គ្រោង​ដក​បណ្តឹង​អំពី​ឃាតម្ម​លើ​បង​ប្រុស​របស់​លោក​

  • ហេង រស្មី

សហជីព​សេរីកម្មករ​បាន​ដើរហែ​ក្បួន​ចេញពី​ទីស្នាក់​ការ​របស់​ខ្លួន​មក​ដាក់​កម្រង​ផ្កា​ដើម្បី​រំឭក​ខួប​៩ឆ្នាំ​នៃ​ការ​បាញ់​សម្លាប់​លោក​ជា​ វិជ្ជា។​
ភ្នំពេញ​៖ រយៈ​ពេល​៩ឆ្នាំ​បន្ទាប់​ពី​ឃាតករ​ពិត​ប្រាកដ​ដែល​បាន​បាញ់​សម្លាប់​លោក​ជា វិជ្ជា​មិនទាន់​ត្រូវបាន​រក​ឃើញ​និង​យក​មក​ជំនុំ​ជម្រះទោស។​ លោកជា មុន្នី​បាន​បន្ត​ធ្វើ​ការ​បរិហារ​រិះគន់​ធ្ងន់ៗ​លើ​ប្រព័ន្ធតុលាការ​ថា​ មិន​មានភាព​ឯក​រាជ្យ ​ពុក​រលួយ​និង​ឋិត​នៅ​ក្រោម​ឥទ្ធិពល​អ្នក​មាន​អំណាច។​

«បុគ្គលដែល​តំណាង​ឲ្យតុលាការ​ស្រុក​ខ្មែរ​គឺ​ក្រុម​ថោក​ ក្រុម​ថោក​ទាប​ ដែល​គេ​រង​ទុក​ដោយ​សារ​តុលាការ​នោះ​ឯង»។​

ប្រសាសន៍​ជា​សារធារណៈ​របស់​លោក​ជា​ មុន្នី​ ប្រធាន​សហជីព​សេរីកម្មករ​នៃ​ព្រះរាជាណាចក្រ​កម្ពុជា​រិះគន់​ប្រព័ន្ធតុលាការ​នេះ​ត្រូវ​គេ​បាន​មើល​ឃើញ​ថា​ លោក​បាន​ធ្វើឡើង​លើក​ដំបូង​ហើយ​ ក្រោយ​ពីលោក​បន្ថយ​ការ​រិះគន់​អស់​រយៈ​ពេល​ដ៏យូរ។​

លោក​ជា​ មុន្នី​បាន​លើក​ឡើងដោយ​ប្រើ​សំដី​ធ្ងន់ៗ​ថា ​អ្នក​ដែល​រងគ្រោះ​ដោយ​សារ​អំពើ​អយុត្តិធម៌​ដោយ​សារ​តែ​បុគ្គល​តុលាការ​មួយ​ចំនួន ​រួម​មាន​លោក​សម​ រង្ស៊ី​ មេដឹកនាំ​គណបក្ស​ប្រឆាំង​ លោក​ម៉ម សូណង់ដូ ​នាយក​ស្ថានីយ​វិទ្យុ​សម្បុកឃ្មុំ ​អ្នក​ស្រី​យ៉ោម បុប្ជា​ សកម្មជន​ទាមទារ​ដីធ្លីនៅ​តំបន់​បឹងកក់​ ការ​បាញ់​សម្លាប់​លោក​ជួរ ជេតដ្ឋារិទ្ឋ​ ព្រះតេជគុណ​សំ ប៊ុនធឿន​ និង​ការ​បាញ់​សម្លាប់​លោក​ជា វិជ្ជា។​

លោក​បាន​និយាយ​ថា​ រយៈពេល​៩​ឆ្នាំហើយ​ក្រោយពី​បាន​បាញ់​សម្លាប់​លោក​ជា វិជ្ជា​ ឃាតករ​ពិត​ប្រាដ​មិនទាន់ត្រូវ​បាន​រកឃើញ​និង​នាំយក​មក​ជំនុំ​ជម្រះ​នៅឡើយ​ទេ។ ​លោក​និយាយ​ថា​ នៅ​ពេលខាង​មុខ​នេះ​ លោក​នឹង​ដក​ពាក្យ​បណ្តឹង​ពាក់ព័ន្ធ​នឹង​ករណី​សម្លាប់​បង​ប្រុស​របស់​លោក​ដោយ​សារ​តែ​អស់​ជំនឿ​លើ​ប្រព័ន្ធយុត្តិធម៌​នៅ​កម្ពុជា។​

«អញ្ចឹង​សម្រាប់​យើង​ថ្ងៃនេះ​ យើង​សូម​ឧទ្ទិស​កុសល​ដល់លោក​ជា វិជ្ជា​ថា យើង​ដក​បណ្តឹង​ហើយ។ ​យើង​ឲ្យមេធាវី​ដកពាក្យ​បណ្តឹង​ហើយ។ ​យើង​គ្មាន​ជឿ​បន្តិច​សោះ​ទៅ​លើ​ប្រព័ន្ធតុលាការ​នេះ។​ រងចាំ​ពេល​ណា​ដែល​តុលាការ​ឯករាជ្យ​បាន​យើង​ដាក់ពាក្យ​ប្តឹង​បន្ត​ទៅ​ទៀត»។​

ការ​លើក​ឡើង​របស់​លោក​ជា មុន្នី​បាន​ធ្វើឡើង​នៅ​កន្លែង​ក្បែរ​របង​វត្ត​ល័ង្កា​ជា​ទីកន្លែង​នៃ​ការ​បាញ់​សម្លាប់​លោក​ជា វិជ្ជា។​

សហជីព​សេរីកម្មករ​បាន​ដើរហែ​ក្បួន​ចេញពី​ទីស្នាក់​ការ​របស់​ខ្លួន​មក​ដាក់​កម្រង​ផ្កា​ដើម្បី​រំឭក​ខួប​៩ឆ្នាំ​នៃ​ការ​បាញ់​សម្លាប់​លោក​ជា​ វិជ្ជា។​

លោក​អំ សំអាត​ មន្ត្រីឃ្លាំ​មើល​ការ​រំលោភ​សិទ្ធិមនុស្ស​របស់​អង្គការ​លីកាដូ ​បាន​និយាយ​ថា​ លោក​នៅតែ​មាន​ការ​សោកស្តាយ​ដោយ​សារ​ឃាតករ​ពិត​ប្រាកដ​នៅ​រក​មិនទាន់​ឃើញ​ ដែល​ជាការ​ជះ​ឥទ្ធិពលអយុត្តិធម៌​ដល់​ក្រុម​គ្រួសារ ​និង​ជន​រងគ្រោះ។​

លោក​បាន​បញ្ជាក់​ថា​ រដ្ឋាភិបាល​គួរ​តែស្វែង​រក​ឃាតករ​ពិត​ប្រាកដ​យកមក​ផ្តន្ទាទោស​ដើម្បី​បញ្ចប់​និទណ្ឌភាព​នៅ​កម្ពុជា។​

«បញ្ហា​នៃ​ការ​បាញ់សម្លាប់​លោក​ជា វិជ្ជា​គឺ​ជាបញ្ហាដែល​ស្មុគស្មាញ​បំផុត។ ​យើង​សុំឲ្យអាជ្ញាធរ​ក៏ដូច​ជាតុលាការ​ហ្នឹង​កោះហៅ​អ្នក​ដែល​ពាក់ព័ន្ធ​ទាំង​អស់​ ដូចជា​លោក​ហេង​ពៅ ​និង​មន្ត្រី​ប៉ូលិស​មួយ​ចំនួន​ទៀត​យក​មកធ្វើ​ការ​សាកសួរ​ឡើង​វិញ​ថា​ តើ​នរណា​ជាឃាតករ​ពិតប្រាកដ​នៅ​ក្នុង​ការ​បាញ់​សម្លាប់​លោក​ជា វិជ្ជា​នេះ»។​

លោកជា វិជ្ជា​ អតីត​ប្រធាន​សហជីព​សេរីកម្មករ​នៃ​ព្រះ​រាជាណាចក្រ​កម្ពុជា ​ត្រូវ​បាន​ឃាតករ​បាញ់​សម្លាប់​កាល​ពីថ្ងៃទី​២២​ខែ​មករា​ឆ្នាំ​២០០៤​នៅ​ជិត​តូប​លក់​កាសែតមួយ​ក្បែរ​វត្តល័ង្កា។​

កាលពី​ចុង​ខែធ្នូ​ លោកប៊ន ​សំណាង​និង​លោក​សុខ សំអឿន​ ដែល​ត្រូវ​បាន​ក្រុម​អង្គការ​សង្គម​ស៊ីវិល​ចាត់​ទុក​ថា​ ជាឃាតករ​សិប្បនិមិ្មត​ ត្រូវបាន​សាលា​ឧទ្ធរណ៍​ប្រកាស​ផ្តន្ទាទោស​ពួក​គេ​ម្នាក់ៗ​ឲ្យ​ជាប់​ពន្ធនាគារ​ចំនួន​២០​ឆ្នាំ​ក្រោម​ការ​ចោទ​ប្រកាន់​ថា ​ពួក​គេ​បាន​ធ្វើឃាត​មេដឹក​នាំ​សហជីព​សេរី​កម្មករ​ដ៏​ល្បីល្បាញ​គឺ​លោក​ជា វិជ្ជា។​

សាលក្រម​នេះ​ធ្វើ​ឡើង​បន្ទាប់ពី​សាលា​ឧទ្ធរណ៍​បើក​សវនាការ​កាលពី​ខែ​មុន​លើ​សំណុំរឿង​ប៊​ន សំណាង​និង​សុខ សំអឿន​តាម​ដីការ​បង្គាប់​របស់​តុលាការ​កំពូល។​

មេធាវីការពារ​ក្តី​ជនជាប់​ចោទទាំង​ពីរ​បាន​ប្តឹងទាស់​ទៅ​កាន់​តុលាការ​កំពូល​ចំពោះ​ការ​សម្រេចរបស់​សាលា​ឧទ្ធរណ៍ ​ហើយ​គេ​រំពឹង​ថា​ តុលាការ​កំពូល​នឹង​ពិនិត្យ​សំណុំ​រឿង​នេះ​ឡើង​វិញ​នៅ​ក្នុង​ពេល​ឆាប់ៗ​ខាង​មុខនេះ៕​
XS
SM
MD
LG