ភ្នំពេញ៖ ភាគីអន្តរជាតិនៅក្នុងសាលាក្តីខ្មែរក្រហម នៅថ្ងៃសុក្រនេះ បានបង្វែរលុយចំនួនពីរលានដុល្លារអាមេរិកទៅកាន់ភាគីជាតិដើម្បីជួយស្រោចស្រង់វិបតិ្តថវិកាដែលនាំឲ្យជំពាក់ប្រាក់ខែបុគ្គលិករយៈពេលបីខែមកហើយ។
យោងតាមសេចក្តីប្រកាសព័ត៌មានពីរដ្ឋបាលសាលាក្តីខ្មែរក្រហមឲ្យដឹងថា លុយទាំងនោះត្រូវដាក់បញ្ចូលក្នុងគណនីរបស់បុគ្គលិកកម្ពុជានៅល្ងាចថ្ងៃសុក្រនេះនិងនៅថ្ងៃសៅរ៍ស្អែក។ លុយទាំងនេះគឺសម្រាប់បើកប្រាក់ខែពួកគេនៅខែមករា ខែកុម្ភៈនិងខែមិនា។
លោកឡាស អលសិន មន្ត្រីអ្នកនាំពាក្យសាលាក្តីខ្មែរក្រហមខាងភាគីអន្តរជាតិឲ្យដឹងថា ថវិកានេះត្រូវបានសន្យាផ្តល់ទៅឲ្យភាគីអន្តរជាតិក្នុងសាលាក្តី ប៉ុន្តែភាគីកម្ពុជាត្រូវសងលុយនេះមកវិញពេលខ្លួនទទួលបានជំនួយថ្មី។
«ថវិកាចំនួនមួយលានដុល្លារបានមកពីប្រទេសស៊ុយអែដ និងមួយលានដុល្លារទៀតបានមកពីប្រទេសន័រវ៉េ ដែលត្រូវបានគ្រោងប្រគល់ឲ្យទៅភាគីអន្តរជាតិ។ គោលបំណងនៃការផ្ទេរលុយនេះគឺថា ភាគីជាតិត្រូវសងលុយនេះមកភាគីអន្តរជាតិវិញ»។
លោកឡាស អលសិនពន្យល់ថា ថវិកាទាំងនេះមិនទាន់ត្រូវបានបញ្ចូលក្នុងគណនីរបស់ភាគីអន្តរជាតិនៅឡើយទេ។ ហើយវាជាការចាំបាច់ នៅពេលនេះ ដែលត្រូវរកដំណោះស្រាយបណ្តោះអាសន្ននិងឆាប់រហ័សដើម្បីធានាថា បុគ្គលិកកម្ពុជាទទួលប្រាក់ខែ ហើយពួកគេនឹងមិនធ្វើពហិការការងារទៀតនៅថ្ងៃទី១ខែមេសា។
ដោយសារតែបញ្ហាថវិកាភាគីជាតិក្នុងសាលាក្តីពិសេសមិនមានលទ្ធភាពបើកប្រាក់ខែដល់បុគ្គលិកជិត៣០០នាក់ចាប់តាំងពីខែធ្នូមកម្ល៉េះ។ ហើយក្រុមបុគ្គលិកបកប្រែភាសាបានធ្វើកូដកម្មកាលពីថ្ងៃទី៤ខែមិនាដែលធ្វើឲ្យសវនាការត្រូវផ្អាកជាបន្ទាន់រហូតដល់មានការសម្របសម្រួលដោះស្រាយប្រាក់ខែដល់ពួកគេ។
ក្រុមបុគ្គលិកជាតិបានគំរាមថា ពួកគេនឹងបន្តកូដកម្មថ្មីមួយទៀត ប្រសិនបើពួកគេមិនបានប្រាក់ខែបន្ថែមនិងទទួលកុងត្រាការងារថ្មីនោះទេ។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមខាងភាគីជាតិនិយាយថា ថវិកានេះបានមកសង្គ្រោះវិបតិ្តនៅក្នុងភាគីជាតិ។
«ពេលនេះគឺជាពេលដែលភាគីជាតិជួបប្រឈមបញ្ហាខ្វះថវិកាធ្ងន់ធ្ងរ ដែលមិនអាចដំណើរការបាន ហើយប្រសិនបើភាគីជាតិមិនមានថវិកាដើម្បីដំណើរការទេ នោះនឹងធ្វើឲ្យតុលាការនេះជាប់គាំង ហើយនេះគ្រាន់តែជាដំណោះស្រាយបណ្តោះអាសន្នមួយ»។
កាលពីសប្តាហ៍មុន លោកស្រីចៅក្រមស៊ីលវា ខាតរ៉ាយនៃអង្គជំនុំជម្រះសាលាដំបូងបានប្រកាសនៅក្នុងសវនាការថា ភាគីអន្តរជាតិនឹងជួយធានាប្រាក់ខែដល់បុគ្គលិកកម្ពុជារហូតដល់ដំណាច់ខែមេសានេះ៕
