ភ្នំពេញ៖ ប្រទេសកម្ពុជានៅថ្ងៃអង្គារ៍នេះបានផ្ញើកំណត់ទូតជាផ្លូវការទៅកាន់ស្ថានទូតថៃប្រចាំទីក្រុងភ្នំពេញដើម្បីទាមទារឲ្យអាជ្ញាធរការពារព្រំដែនថៃឈប់បាញ់សម្លាប់មកលើប្រជាពលរដ្ឋខ្មែរដូចសត្វធាតុនិងទាមទារឲ្យរកជនដៃដល់ទៅផ្តន្ទាទោសតាមច្បាប់។
កំណត់ទូតរបស់ប្រទេសកម្ពុជានេះបានធ្វើឡើងក្រោយពីប្រជាពលដ្ឋខ្មែរចុងក្រោយគេចំនួនពីរនាក់ត្រូវបានទាហានការពារព្រំដែនថៃបាញ់សម្លាប់នៅក្នុងខែធ្នូ ឆ្នាំ២០១០នេះ។
កាលពីថ្ងៃទី២០កន្លងទៅនេះ លោកលុន ណុប អាយុ៣៧ឆ្នាំ និងលោកស៊ីម អ៊ាន អាយុ១៧ឆ្នាំ ត្រូវបានឆ្មាំការពារព្រំដែនថៃបាញ់សម្លាប់និងចាប់ខ្លួនប្រជាពលរដ្ឋចំនួនបួនរូបផ្សេងទៀតបន្ទាប់ពីពួកគេមួយក្រុមបានឆ្លងដែនទៅកាប់ឈើនៅក្នុងខេត្តស៊ីសាកេតប្រទេសថៃ ដែលជាប់ព្រំប្រទល់ស្រុកត្រពំាងប្រាសាទខេត្តឧត្តរមានជ័យ។
ការបាញ់សម្លាប់មកលើប្រជាពលរដ្ឋខ្មែរនេះបានធ្វើឡើងបន្ទាប់ពីប្រទេសកម្ពុជាបានដោះលែងប្រជាពលរដ្ឋថៃចំនួនបីរូបឲ្យមានសេរីភាពរួចវិលត្រឡប់ទៅកាន់ប្រទេសរបស់ខ្លួនវិញក្រោយពីបានឆ្លងដែនចូលមកប្រទេសកម្ពុជាដោយមានការប្រើប្រាស់អាវុធខុសច្បាប់មកជាមួយផង។
នៅក្នុងកំណត់ទូតរបស់ប្រទេសកម្ពុជាដែលបានផ្ញើជូនទៅស្ថានទូតថៃ ប្រទេសកម្ពុជាបានចាត់ទុកថាអំពើបាញ់ប្រហារមកលើប្រជាពលរដ្ឋខ្មែរទាំងពីររូបនេះគឺជាអំពើអមនុស្សធម៌ជាអន្តរជាតិដែលមិនគួរប្រព្រឹត្តនៅក្នុងប្រទេសដែលមានអរិយធម៌ត្រឹមត្រូវទេ។
លោកកុយ គួង អ្នកនាំពាក្យក្រសួងការបរទេសកម្ពុជាបានមានប្រសាសន៍ថាពលរដ្ឋខ្មែរបានដើរនៅក្នុងព្រៃមិនបានដឹងច្បាស់អំពីខ្សែបន្ទាត់ព្រំដែនទេដូច្នេះបានជាពួកគេបានឆ្លងចូលទឹកដីប្រទេសថៃ។
លោកកុយ គួង បានមានប្រសាសន៍ថាអាជ្ញាធរថៃគួរតែមានវិធានការទប់ស្កាត់កុំឲ្យអំពើឃោរឃៅនេះបានកើតឡើងមកលើប្រជាពលរដ្ឋខ្មែរ។
«រាជរដ្ឋាភិបាលកម្ពុជាបានស្នើឲ្យអាជ្ញាធរថៃពាក់ព័ន្ធ ទីមួយចាត់វិធានការសមស្របដើម្បីទប់ស្កាត់កុំឲ្យមានអំពើឃោរឃៅអមនុស្សធម៌នេះកើតឡើងជាថ្មីម្តងទៀត។ ហើយទីពីរស្នើឲ្យមានការស៊ើបអង្កេតលម្អិតទៅលើឧបទ្ទវហេតុដ៏អកុសលនេះ»។
មន្រ្តីស្ថានទូតថៃប្រចាំប្រទេសកម្ពុជា ពុំអាចស្នើសុំសេចក្តីអត្ថាធិប្បាយបំភ្លឺបានទេ។
ចំណែកលោកប៉ានីថាន វឌ្ឍនាយ៉ាកន (Panitan Watanayagorn) អ្នកនាំពាក្យរដ្ឋាភិបាលថៃបានឆ្លើយប្រាប់វីអូអេសំឡេងសហរដ្ឋអាមេរិកតាមរយៈទូរស័ព្ទថាកំពុងជាប់រវល់។
យោងតាមតួលេខរបស់សមាគមសិទ្ធិមនុស្ស ADHOC បានឲ្យដឹងថានៅក្នុងឆ្នាំ២០០៩យ៉ាងតិចមានប្រាំបួនករណីដែលបានកើតមានឡើងដោយសារតែអាជ្ញាធរថៃបានបាញ់មកលើប្រជាពលរដ្ឋខ្មែរដែលនៅក្នុងនោះបានធ្វើឲ្យប្រជាពលរដ្ឋចំនួន១១រូបបានស្លាប់បាត់បង់ជីវិតហើយឆ្នាំ២០១០នេះបានកើតមានឡើងចំនួន១១ករណីនិងបានសម្លាប់ប្រជាពលរដ្ឋចំនួន១៣នាក់។
លោកចាន់ សាវ៉េត មន្រ្តីផ្នែកស៊ើបអង្កេតរបស់សមាគមសិទ្ធិមនុស្ស ADHOC បាននិយាយថាការបាញ់សម្លាប់មកលើប្រជាពលរដ្ឋខ្មែរនេះបង្ហាញឲ្យឃើញថាប្រទេសថៃនៅមានកម្រិតទាបនៅឡើយក្នុង ការគោរពសិទ្ធិមនុស្ស។
«ជាអំពើរំលោភសិទ្ធិមនុស្សធ្ងន់ធ្ងរហើយសាហាវឃោរឃៅទៀតផងរវាងប្រទេសមួយនិងប្រទេស។ និយាយជារួម យើងប្រើប្រាស់យន្តការដូចប្រទេសខ្មែរយើងអញ្ចឹង ចាប់ប្រជាជនថៃយកមកដាក់ពន្ធនា គារនៅក្នុងស្រុកយើង ក៏យើងប្រើប្រាស់ប្រព័ន្ធច្បាប់ស្រុកយើងដើម្បីធ្វើការផ្តន្ទាទោស។ ហើយយើងមាន ការជជែកគ្នាតាមរបៀបទ្វេភាគី ដើម្បីធ្វើការចរចាគ្នា ប៉ុន្តែថៃដូចជាអត់មានគម្រោងហ្នឹងទេ»។
លោកចាន់ សាវ៉េត បានមានប្រសាសន៍ថារដ្ឋាភិបាលកម្ពុជាគួរតែដាក់ពាក្យបណ្តឹងទៅអង្គការ សហប្រជាជាតិដើម្បីកុំឲ្យអាជ្ញាធរថៃប្រព្រឹត្តអំពើឃោរឃៅមកលើប្រជាពលរដ្ឋខ្មែរម្តងហើយម្តងទៀត៕