មូលនិធិរូបិយវត្ថុអន្តរជាតិ (IMF) បានព្យាករណ៍នៅថ្ងៃព្រហស្បតិ៍នេះថា កំណើនសេដ្ឋកិច្ចកម្ពុជានឹងកើនឡើងដល់៧,៥ភាគរយ នៅក្នុងឆ្នាំ២០១១នេះ។ កំណើននេះបានបណ្តាលមកពីការកើនឡើងនៃការនាំចេញសម្លៀកបំពាក់ កំណើនភ្ញៀវទេសចរណ៍ ការងើបឡើងវិញនៃសំណង់អាគារ និងការកើនឡើងនៃការនាំអង្ករចេញ។ នេះបើតាមសេចក្តីថ្លែងការណ៍។
លោក អូឡាហ្វ អ៊ុនថឺរ៉ូប៊ើឌូអឺស្ទើរ (Olaf Unteroberdoerster) អនុប្រធានផ្នែកទទួលបន្ទុកកិច្ចការអាស៊ី ប៉ាស៊ីហ្វិកនៃមូលនិធិរូបិយវត្ថុអន្តរជាតិ បានថ្លែងប្រាប់សន្និសីទកាសែត នៅទីស្នាក់ការមូលនិធិរូបិយវត្ថុអន្តរជាតិក្នុងទីក្រុងភ្នំពេញថា កម្ពុជានឹងមានកំណើនសេដ្ឋកិច្ចកើនឡើងរហូតដល់៧,៥ភាគរយ នៅឆ្នាំ២០១១នេះ ដោយសារកំណើននាំចេញសម្លៀកបំពាក់ និងអង្ករ ព្រមទាំងការកើនឡើងនៃសំណង់អគារ និងចំនួនភ្ញៀវទេសចរណ៍។
ការព្យាករណ៍នេះបានធ្វើឡើងបន្ទាប់ពីបានបញ្ចប់បេសកកម្មរយៈពេល១១ថ្ងៃ ដើម្បីជួបពិភាក្សាការងារជាមួយលោកគាត ឈន់ រដ្ឋមន្ត្រីក្រសួងសេដ្ឋកិច្ច លោកសុខ អាន រដ្ឋមន្ត្រីប្រចាំទីស្តីការគណៈរដ្ឋមន្ត្រី និងមន្ត្រីរដ្ឋាភិបាលជាន់ខ្ពស់ដទៃទៀត។
បេសកកម្មនេះបានផ្តល់អនុសាសន៍ដល់ការបញ្ជាក់របស់រដ្ឋាភិបាលស្តីពីការគ្រប់គ្រងបំណុលឱ្យបានប្រសើរ និងអភិវឌ្ឍន៍យុទ្ធសាស្ត្រ បំណុលដែលយកចិត្តទុកដាក់ និងជំរុញការគ្រប់គ្រងបំណុលហិរញ្ញវត្ថុ ដែលអាចមានឱ្យកាន់តែមានតម្លាភាព។
លោក ឯក ថា អ្នកនាំពាក្យនៅអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បានថ្លែងថាកំណើនសេដ្ឋកិច្ចកម្ពុជានឹងបន្តកើនឡើង។
«នេះជាសញ្ញាណល្អសម្រាប់ព្រះរាជាណាចក្រកម្ពុជា ដោយយើងឃើញថា កំណើនសេដ្ឋកិច្ចរបស់យើងចាប់ផ្តើមងើបឡើងជាគំហុក ជួយទាក់ទាញអ្នកវិនិយោគទុនជាតិ និងអន្តរជាតិ ដើម្បីមកបោះទុនវិនិយោគនៅកម្ពុជា»។
លោក យឹម សុវណ្ណ អ្នកនាំពាក្យគណបក្សសម រង្សី បានបញ្ជាក់ថា កំណើនសេដ្ឋកិច្ចនេះ មិនទាន់គ្រប់គ្រាន់ទេ ហើយកំណើននេះមិនបានជួយដល់ប្រជាពលរដ្ឋក្រីក្រនៅឡើយទេ។
«គម្លាតរវាងអ្នកមាន និងអ្នកក្រកាន់តែរីកធំឡើងៗ ហើយកំណើនសេដ្ឋកិច្ចនេះ បានទទួលផលប្រយោជន៍ទៅលើតែបុគ្គលមួយក្តាប់តូចតែប៉ុណ្ណោះ»។
លោក អូឡាហ្វ បានបញ្ជាក់ថា កម្ពុជាត្រូវមានកត្តាជំរុញ និងអូសទាញក្នុងការទាក់ទាញអ្នកវិនិយោគទុនបរទេសដើម្បីបង្កើនផលប្រយោជន៍របស់អ្នកវិនិយោគបរទេសឱ្យកាន់តែទូលំទូលាយ។
«បេសកកម្មនេះបានផ្តល់អនុសាសន៍ដល់ការផ្តោតការយកចិត្តទុកដាក់ឱ្យទាន់ពេលវេលារបស់រដ្ឋាភិបាលលើវិស័យកសិកម្ម និងហេដ្ឋារចនាសម្ព័ន្ធជនបទ និងបានបញ្ជាក់នូវតម្រូវការធ្វើឱ្យប្រសើរឡើងដល់អភិបាលកិច្ចឱ្យបានខ្ជាប់ខ្ជួនការផ្សព្វផ្សាយសេវាកម្មផ្នែកសង្គមជាអាទិភាព ដូចជាវិស័យអប់រំ និងសុខាភិបាល ព្រមទាំងបរិយាកាសវិនិយោគ និងហេដ្ឋារចនាសម្ព័ន្ធ»។
ធនាគារពិភពលោក បានព្យាករណ៍ថា កំណើនសេដ្ឋកិច្ចកម្ពុជា នឹងកើនឡើង៦ភាគរយ នៅក្នុងឆ្នាំ២០១១នេះ៕
