ដោយវីអូអេខ្មែរ
ប្រទេសកម្ពុជានិងគណៈមេធាវីខ្មែរគួរបញ្ឈប់កិច្ចប្រឹងប្រែងរបស់ខ្លួនក្នុងការហាមប្រាមមេធាវីមិនឲ្យធ្វើសេចក្តីសម្ភាសន៍ជាមួយបណ្តាញព័ត៌មាន ដោយគ្មានសេចក្តីអនុញ្ញាតពីគណៈមេធាវីជាតិ នេះបើតាមសេចក្តីប្រកាសរបស់អង្គការសិទ្ធិមនុស្ស Human Rights Watch ។
លោក Brad Adams នាយកតំបន់អាស៊ីរបស់អង្គការ Human Rights Watch ដែលមានមូលដ្ឋាននៅក្រុង ឡុងដ៍បានថ្លែងថា៖
«ក្នុងខណៈដែលលោកអ្នកគិតថា រដ្ឋាភិបាលកម្ពុជាមិនអាចរិះរកអំពីមធ្យោបាយថ្មីទៀតទេ ដើម្បីព្យាយាមបិទមាត់ក្រុមអ្នករិះគន់នោះ ក្រុងភ្នំពេញទើបនឹងបានដាក់បម្រាមមួយថ្មីក្នុងឆ្នាំបោះឆ្នោតនេះ ដើម្បីរារាំងមិនឲ្យមេធាវីធ្វើសេចក្តីសម្ភាសន៍តាមវិទ្យុនិងទូរទស្សន៍បានទេ»។
កាលពីថ្ងៃទី ៨ ខែកុម្ភៈ លោករដ្ឋមន្រ្តីក្រសួងព័ត៌មានខៀវ កាញ៉ារីទ្ធបានប្រកាសជាសាធារណៈនូវសេចក្តីណែនាំថ្ងៃទី ៣១ ខែមករា ទៅឲ្យស្ថានីយវិទ្យុនិងទូរទស្សន៍ ប្រាប់មិនឲ្យអញ្ជើញមេធាវីមកបង្ហាញខ្លួនក្នុងកម្មវិធី ដោយគ្មានសេចក្តីយល់ព្រមពីគណៈមេធាវីកម្ពុជា។
លោក Adams បន្ថែមថា ក្រុមប្រទេសអ្នកផ្តល់អំណោយអន្តរជាតិ គួរតែគាបសង្កត់រដ្ឋាភិបាលកម្ពុជា ជាសាធារណៈនិងយ៉ាងឆាប់រហ័ស ឲ្យលប់ចោលបម្រាមប្រឆាំងនឹងសេរីភាពខាងការបញ្ចេញមតិនេះទៅវិញ៕
