ភ្ជាប់​ទៅ​គេហទំព័រ​ទាក់ទង

ហ្វ៊ុនស៊ិនប៉ិច​យាង​សម្តេច​ព្រះ​អនុជ​គង់​ជា​ប្រធាន​បក្ស

  • ហេង រស្មី

សម្តេច​ព្រះ​អនុជ​នរោត្តម ​អរុណ​រស្មី ​
​ភ្នំពេញ៖ គណបក្ស​ហ៊្វុន ស៊ិនប៉ិច​គ្រោង​នឹង​ធ្វើ​សមាជ​ជាតិ​ដ៏​ធំមួយ​នៅ​ថ្ងៃ​សៅរ៍​ស្អែក​នេះ​ដែល​គេ​រំពឹង​ថា​នឹង​មាន​មនុស្ស​ប្រមាណ​ជាង​៣.០០០​នាក់​ចូល​រួម។​នេះ​បើ​តាម​ការ​បញ្ជាក់​របស់​មន្ត្រីជាន់​ខ្ពស់​គណបក្ស។​
សមាជ​ថ្នាក់​ជាតិ​ដែល​គ្រោង​ធ្វើ​នៅ​ថ្ងៃ​ស្អែក​នេះ​មាន​របៀប​វារៈ​មួយ​ចំនួន​ដែល​រួម​មាន​ការ​កែសម្រួល​បទបញ្ជា​ផ្ទៃក្នុង​របស់​គណបក្ស​ អនុម័ត​លើ​សមាសភាព​ក្រុម​ប្រឹក្សាជាតិ​គណបក្ស​និង​ជ្រើស​តាំង​សម្តេច​ព្រះ​អនុជ​នរោត្តម ​អរុណ​រស្មី ​បុត្រីពៅ​របស់​សម្តេច​ឪ​នរោត្តម​សីហនុ​ជាប្រធាន​គណបក្ស។​
លោក​ញឹក ប៊ុនឆៃ​ ប្រធាន​ប្រតិបត្តិ​គណបក្ស​ហ៊្វុន ស៊ិនប៉ិច​បាន​ប្រាប់​ក្នុង​អង្គសន្និសីទ​កាសែត​នៅ​គេហដ្ឋាន​របស់​លោក​ថា​គណបក្ស​នឹង​មាន​ការ​កែ​សម្រួល​សមាសភាព​ថ្នាក់ដឹក​នាំមួយ​ចំនួន​ហើយ​គណបក្ស​នេះ​មិន​មាន​អនុប្រធាន​ទេ​គឺ​មាន​តែ​ប្រធាន​និង​អគ្គលេខា​ធិការ​និង​អគ្គលេខាធិការ​រងតែ​ប៉ុណ្ណោះ។​

លោក​ញឹក​ប៊ុនឆៃ​បាន​និយាយ​ថា​សមាជ​គណបក្ស​គ្រោង​នឹង​តែង​តាំង​រូប​លោក​ជា​អគ្គលេខាធិការ​គណបក្ស​តែមិន​ទាន់​បាន​សម្រេច​១០០%​ទេ​ដោយ​រង់​ចាំ​ការ​ប្រជុំ​របស់​គណៈកម្មាធិការ​នាយក​របស់​គណបក្ស​ជាមុន​សិន។​

«យើង​មិន​ផ្លូវ​ការ​១០០%ទេ​ពីព្រោះ​ម៉ោង​២​នេះ​គណៈ​អចិន្ត្រៃយ៍​នឹង​ធ្វើ​ការ​ប្រជុំ​ហើយ​ម៉ោង​៤​គណៈ​កម្មាធិការ​នាយក​នឹង​ធ្វើ​ការ​ប្រជុំ​ជាពិសេស​ត្រូវ​សម្រេច​អំពី​បេក្ខភាព​សម្តេច​ព្រះបុត្រី​ក្នុង​អចិន្ត្រៃយ៍​ហើយ​បាន​ទៅ​ឈរ​ឆ្លង​គណៈនាយក​ហើយ​នឹង​ថ្នាក់​ដឹកនាំ​ដទៃ​ទៀត»។​

លោក​ញឹក ប៊ុនឆៃ​បាននិយាយ​ថា​មូលហេតុ​នៃ​ការ​តែងតាំង​ព្រះអង្គម្ខាស់​អរុណ​ រស្មី​ ធ្វើជា​ប្រធាន​គណបក្ស​ហ៊្វុន ស៊ិនប៉ិចដោយ​សារ​តែ​ព្រះអង្គជា​ព្រះ​បុត្រីពៅ​របស់​ សម្តេច​ឪ​នរោត្តម​សីហនុ។​
គណបក្ស​ហ៊្វុនស៊ិនប៉ិច​បាន​បង្កើត​ឡើង​ដោយ​សម្តេច​ឪ​នរោត្តម​សីហនុ​កាល​ពី​ថ្ងៃ​ទី​២១​ខែមិនា​ឆ្នាំ​១៩៨១​ដោយ​ធ្វើ​ការ​ប្រមែប្រមូល​អ្នក​រាជានិយម​និង​អ្នក​ស្នេហាជាតិ​មក​រួម​រួម​គ្នា​ក្នុង​ដំបូល​របស់​គណបក្ស​ហ៊្វុន ស៊ិនប៉ិច។​

លោក​បាន​និយាយ​ថា​ម៉្យាង​វិញ​ទៀត​គណបក្ស​នេះ​បាន​លើក​ដម្កើង​ស្ត្រី​ជាថ្នាក់​ដឹក​នាំ​ដោយ​សារ​តែ​ប្រទេស​ជិត​ខាង​កម្ពុជា​គឺ​ប្រទេស​ថៃ​មាន​នាយក​រដ្ឋមន្ត្រី​ជា​ស្ត្រី។​

ប្រភព​ពី​មន្ត្រី​ជាន់​ខ្ពស់​គណបក្ស​ហ៊្វុន ស៊ិន​ប៉ិច​មួយ​រូប​ដែល​ស្នើ​សុំ​មិន​បញ្ចេញ​ឈ្មោះ​បាន​ឱ្យ​ដឹង​ថា​នៅ​ក្នុង​សមាជ​ថ្ងៃ​សៅរ៍​នេះ​គណបក្ស​គ្រោង​នឹង​តែង​តាំង​លោក​សៅ រ៉ានី​ជាអគ្គលេខាធិការ​រង​របស់​គណបក្ស​ ចំណែក​ឯលោក​កែវ ពុទ្ធរស្មី​ ស្វាមី​របស់​ព្រះអង្គម្ខាស់​អរុណ​រស្មី​គ្រោង​នឹង​តែងតាំង​ជា​ឧត្តមប្រឹក្សា​គណបក្ស។​

លោក​កែវ ពុទ្ធ​រស្មី ​បច្ចុប្បន្ន​មានតួនាទី​ជា​មគ្គុទេសក៏​របស់​គណបក្ស​ លោកញឹក ប៊ុនឆៃ​ជា​ប្រធាន​ប្រតិបត្តិ​ ចំណែក​លោក​លឺ ឡាយស្រេង​ជា​ប្រធាន​កិត្តិយស។ គណបក្ស​នេះ​មាន​សមាជិក​គណៈកម្មា​ធិការ​នាយក​ចំនួន​ប្រមាណ​២៦០នាក់។​

គណបក្ស​ហ៊្វុន ស៊ិនប៉ិច​បាន​ធ្លាក់ចុះ​សំឡេង​ឆ្នោត​ពី​៥៨​អសនៈ​ក្នុង​អណត្តិ​ទី​១​កាល​ពីឆ្នាំ​១៩៩៣​មកនៅ​ត្រឹម​៤៨​អសនៈ​ក្នុងឆ្នាំ១៩៩៨។​នៅក្នុង​ឆ្នាំ​២០០៣​ទទួល​បាន​ចំនួន​២៦អសនៈ​ ហើយនៅ​ឆ្នាំ​២០០៨​បាន​ធ្លាក់ចុះ​មកនៅ​ត្រឹម​ពីរ​អសនៈ​តែប៉ុណ្ណោះ​ក្រោយ​ពីគណបក្ស​នេះ​បាន​ពុះបំបែក​ផ្ទៃក្នុង​ដ៏​ធ្ងន់ធ្ងរ។​
លោក​ ញ៉ឹក ប៊ុនឆៃ​បានមាន​សុទិដ្ឋិនិយម​ថា​នៅ​ក្នុង​ឆ្នាំ​២០១៣​នេះ​គណបក្ស​ហ៊្វុន ស៊ិន​ប៉ិន​នឹង​ទទួល​បាន​សំឡេង​កើន​ឡើង​ដោយសារ​តែ​គណបក្ស​រាជានិយម​ចំនួន​ពីរ​ គឺ​គណបក្ស​ហ្វ៊ុនស៊ិនប៉ិច​និង​គណបក្ស​ជាតិ​និយម​បាន​រួប​រួមគ្នា​តែមួយ​ឡើង​វិញ​បន្ទាប់​ពីបាន​បែក​អស់​រយៈពេល​ដ៏​យូរ៕​
XS
SM
MD
LG