ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សមាជិក​សភា​អាមេរិកស្នើ​ឱ្យ​​យក​ចិត្ត​ទុក​ដាក់​ដល់​សំឡេង​បក្ស​ប្រឆាំង


លោកស្រី ​នីគី ​សុងហ្គាស ​សមាជិក​សភា​ខាង​គណបក្ស​ប្រជាធិបតេយ្យ​ប្រចាំ​រដ្ឋម៉ាសាឈូសេត​
លោកស្រី ​នីគី ​សុងហ្គាស ​សមាជិក​សភា​ខាង​គណបក្ស​ប្រជាធិបតេយ្យ​ប្រចាំ​រដ្ឋម៉ាសាឈូសេត​

សមាជិក​សភា​សហរដ្ឋ​អាមេរិក​មួយ​រូប​បាន​ជំរុញ​ឲ្យ​ប្រទេស​កម្ពុជា​ពង្រឹង​បន្ថែម​នូវ​តួនាទី​របស់​គណបក្ស​ជំទាស់​ក្នុង​ប្រទេស​ស្របពេល​ដែល​មន្រ្ដី​គណបក្ស​បក្ស​ជំទាស់​អះអាង​ពី​ការ​គាបសង្កត់​ពី​សំណាក់​គណបក្ស​គ្រប់គ្រង​អំណាច។

លោកស្រី ​នីគី ​សុងហ្គាស ​សមាជិក​សភា​ខាង​គណបក្ស​ប្រជាធិបតេយ្យ​ប្រចាំ​រដ្ឋម៉ាសាឈូសេត​ មាន​ប្រសាសន៍​ក្នុង​សន្និសីទ​កាសែត​មួយ​ក្នុង​រាជធានី​ភ្នំពេញ ​នៅ​រសៀល​ថ្ងៃ​ព្រហស្បតិ៍​នេះ​ដោយ​ប្រៀបធៀប​គណបក្ស​ជំទាស់​នៅ​សហរដ្ឋ​អាមេរិក​និង​នៅ​ក្នុង​ប្រទេស​កម្ពុជា។

«វា​ជា​ការណ៍​សំខាន់​ណាស់​សម្រាប់​គណបក្ស​ជំទាស់​ក្នុង​ការ​ដែល​គណបក្ស​នេះ​មាន​ជីវភាព​នយោបាយ​រឹងមាំ​នៅ​ក្នុង​ប្រទេស​ណាមួយ​ក៏​ដោយ។​ ខ្ញុំ​ជា​សមាជិក​គណបក្ស​ប្រជាធិបតេយ្យ​ដែល​មាន​មតិ​ភាគ​តិច​នៅ​ក្នុង​សភា​ដែល​ដឹកនាំ​ដោយ​គណបក្ស​សាធារណរដ្ឋ។ ​ជា​រៀងរាល់​ថ្ងៃ​ យើង​ពិភាក្សា​គ្រប់​មធ្យោបាយ​អំពី​អនាគត​ប្រទេស​របស់​យើង។ ​ដូច្នេះ​ខ្ញុំ​គិត​ថា ​ជា​ទូទៅ ​និង​នៅ​ក្នុង​សង្គម​ប្រជាធិបតេយ្យ​ទាំងអស់​ វា​មាន​សារៈសំខាន់​ណាស់​ដែល​សំឡេង​របស់​គណបក្ស​ជំទាស់​ត្រូវ​គេ​ទទួល​យក​ដើម្បី​ឲ្យ​ប្រជាពលរដ្ឋ​អាច​ធ្វើការ​សម្រេច​ចិត្ត​របស់​ពួក​គេ​បាន»។

លោកស្រី​សមាជិក​សភា​អាមេរិក​បាន​ថ្លែង​យ៉ាង​ដូច្នេះ​បន្ទាប់​ពី​លោកស្រី​បាន​ជួប​ជាមួយ​មន្ដ្រី​រដ្ឋាភិបាល​កម្ពុជា ​ក្រុម​អ្នក​ជំនួញ​ ក្រុម​មន្ដ្រី​នៃ​អង្គការ​ក្រៅ​រដ្ឋាភិបាល ​និង​ក្រុម​មន្ដ្រី​គណបក្ស​ជំទាស់​ក្នុង​ក្របខណ្ឌ​នៃ​ដំណើរ​ទស្សនកិច្ច​ការងារ​របស់​លោកស្រី​ចំនួន​មួយ​សប្ដាហ៍​នៅ​ក្នុង​ប្រទេស​កម្ពុជា។ ​ហើយ​លោកស្រី​គ្រោង​នឹង​ចាកចេញ​ពី​ប្រទេស​កម្ពុជា​នៅ​យប់​ថ្ងៃ​សៅរ៍​នេះ។

លោក ​សុន ​ឆ័យ ​ប្រធាន​ក្រុម​តំណាងរាស្ដ្រ​គណបក្ស​ជំទាស់​សម ​រង្ស៊ី ​ដែល​សម្បូរ​វោហា​បាន​យល់ស្រប​ទៅ​នឹង​ការលើក​ឡើង​របស់​លោកស្រី​ នីគី ​សុងហ្គាស។ ​លោក​ សុន ​ឆ័យ ​ក៏​បាន​ត្អូញត្អែរ​ពី​ការ​ព្រងើយ​កន្ដើយ​និង​ការ​គាបសង្កត់​របស់​គណបក្ស​កាន់អំណាច​លើ​គណបក្ស​របស់​លោក។

«សមាជិក​សភា​គណបក្ស​ប្រឆាំង​ តែង​ត្រូវ​គេ​ដក​អភ័យ​ឯកសិទ្ធិ​យ៉ាង​ងាយ​មិនសូវ​មាន​មូលហេតុ​អី​ត្រឹមត្រូវ។ ​ហើយ​លិខិត​ជា​សំណួរ​ដែល​តំណាងរាស្ត្រ​គណបក្ស​សម ​រង្ស៊ី ​ផ្ញើ​ទៅ​ឲ្យ​រាជរដ្ឋាភិបាល​ភាគច្រើន​មិន​ឆ្លើយតប។ ​ការឆ្លើយ​តប​ខ្លះ​នោះ ​ពេល​ខ្លះ​នោះ​មិន​សមស្រប​ទៅ​តាម​គោលការណ៍ ​រដ្ឋធម្មនុញ្ញ​ទៀត»។

ផ្ទុយ​ទៅ​វិញ ​លោក​ជាម ​យៀប ​តំណាងរាស្ដ្រ​ចំណាស់​បី​ទសវត្សរ៍​របស់​គណបក្ស​ប្រជាជន​កម្ពុជា​កំពុង​កាន់​អំណាច​បាន​ពន្យល់​ផ្សេង​ពីនេះ។

«រដ្ឋសភា ​ក៏​ដូច​ជា​គណបក្ស​ដែល​កំពុង​តែ​កាន់​អំណាច ​គឺ​គណបក្ស​ប្រជាជន​កម្ពុជា​ យើង​ឥត​មាន​ចង្អៀត​ចង្អល់ ​ឬ​ក៏​រើសអើង​អី​ទេ។ ​កន្លង​ទៅ​យើង​ឃើញ​ថា ​គណបក្ស​ដែល​ជាប់​ឆ្នោត​ក្នុង​រដ្ឋសភា​ តែងតែ​យក​ចិត្ត​ទុក​ដាក់​ដើម្បី​អំពាវនាវ​ចូល​រួម»។
កាល​ពី​ក្នុង​ជំនួប​ជាមួយ​លោកស្រី​ នីគី ​សុងហ្គាស ​គណបក្ស​ជំទាស់​សម​ រង្ស៊ី ​បាន​ស្នើសុំ​ឲ្យ​លោកស្រី​ជួយ​ជជែក​ពិភាក្សា​ជាមួយ​មន្ដ្រី​រដ្ឋាភិបាល​ដើម្បី​ស្វែងរក​លទ្ធភាព​ឲ្យ​លោក​សម ​រង្ស៊ី ​ធ្វើ​មាតុភូមិ​និវត្តន៍​មក​ចូលរួម​ការ​បោះឆ្នោត​ក្នុង​ពេល​ខាង​មុខ​នេះ​បាន។

នៅ​ក្នុង​សន្និសីទ​សារព័ត៌មាន​រយៈពេល​ជាង ​២០​នាទី ​លោកស្រី​ នីគី ​សុងហ្គាស ​បាន​ថ្លែង​គាំទ្រ​វត្តមាន​របស់​លោក​សម ​រង្ស៊ី ​នៅ​ក្នុង​ប្រទេស។ ​ក៏ប៉ុន្ដែ​លោកស្រី​បញ្ជាក់​ថា ​លោកស្រី ​មិន​បាន​លើក​បញ្ហា​នេះ​ទៅ​ពិភាក្សា​ជាមួយ​រដ្ឋាភិបាល​ខ្មែរ​ទេ។ ​មេដឹកនាំ​គណបក្ស​ជំទាស់​បាន​និរទេស​ខ្លួន​ដោយ​ស្ម័គ្រចិត្ត​ទៅ​ក្រៅ​ប្រទេស​អស់​ពេល​ជា​ច្រើន​ឆ្នាំ​ បន្ទាប់​ពី​មាន​ការ​ចោទ​ប្រកាន់​ និង​ផ្ដន្ទាទោស​ដោយ​តុលាការ​ខ្មែរ។

ជាមួយ​គ្នា​នេះ​លោកស្រី ​នីគី ​សុងហ្គាស ​ក៏​បាន​លើក​ពី​កង្វល់​ពី​អំពើ​ពុករលួយ​និង​តម្លាភាព​របស់​ក្រុម​អ្នក​ជំនួញ​ ដែល​លោកស្រី​បាន​ជួប​ក្នុង​ដំណើរ​ទស្សនកិច្ច​នេះ។ ​យ៉ាងណា​ក៏​ដោយ​ លោកស្រី​បាន​ថ្លែង​ជា​សរុប​ថា ​ប្រទេស​កម្ពុជា​ជា «ប្រទេស​វ័យក្មេង» ប៉ុន្ដែ​ពោរពេញ​ទៅ​ដោយ «សុទិដ្ឋិនិយម»៕

XS
SM
MD
LG