ភ្នំពេញ៖ ប្រទេសកម្ពុជានៅថ្ងៃអង្គារនេះបានចូលរួមជាមួយនឹងបណ្តាប្រទេសមួយចំនួននៅលើពិភពលោកដោយបូករួមទាំងសហរដ្ឋអាមេរិកបានធ្វើការថ្កោលទោសភ្លាមៗចំពោះការបាញ់សាកល្បងអាវុធនុយក្លេអ៊ែររបស់ប្រទេសដែលប្រកាន់តឹងរបបកុម្មុយនីស្តឯកកោកូរ៉េខាងជើង។
យោងតាមបណ្តាញផ្សព្វផ្សាយរបស់សារព័ត៌មានពីបរទេសបានរាយការណ៍ថានៅថ្ងៃអង្គារនេះប្រទេស កូរ៉េខាងជើងបានបាញ់សាកល្បងអាវុធនុយក្លេអ៊ែរ ដ៏មហាប្រល័យចេញពីក្រោមដីបានសម្រេចជាលើកទីបី បន្ទាប់ពីការបាញ់លើកទីមួយឆ្នាំ២០០៦និងលើកទីពីរឆ្នាំ២០០៩។ ទោះបីជាមានការជំទាស់ដ៏ខ្លាំងក្លាពីសហគមន៍អន្តរជាតិជាពិសេសសហរដ្ឋអាមេរិកយ៉ាងណាក៏ដោយ។
លោកកុយ កួង អ្នកនាំពាក្យក្រសួងការបរទេសកម្ពុជាបានហៅការបាញ់សាកល្បងអាវុធនុយក្លេអ៊ែរនេះថាជាសកម្មភាពបង្កហេតុដល់សន្តិសុខនៅឧបទ្វីបកូរ៉េផងនិងនៅក្នុងតំបន់ផង។
«កម្ពុជាមានការសោកស្តាយយ៉ាងខ្លាំងដែលកូរ៉េខាងជើងមិនគោរពតាមសេចក្តីសម្រេចរបស់ក្រុមប្រឹក្សាសន្តិសុខរបស់អង្គការសហប្រជាជាតិ។ដោយកូរ៉េខាងជើងប្រកាន់យកវិធានការបង្កហេតុគំរាមកំហែងដល់សន្តិសុខនៅឧបទ្វីបកូរ៉េក៏ដូចជានៅក្នុងតំបន់»។
ប្រទេសកូរ៉េខាងជើងចេញសេចក្តីថ្លែងការណ៍របស់ខ្លួនថាការបាញ់សាកល្បងនេះគឺជាវិធានការជាក់ស្តែងដើម្បីការពារអធិបតេយ្យភាពនិងបូរណភាពទឹកដីរបស់ខ្លួននិង ប្រឆាំងនឹង នយោបាយចងអាឃាតរបស់សហរដ្ឋអាមេរិកជាអ្វីដែលកូរ៉េខាងជើងអះអាងថាជាការបំពានសិទ្ធិរបស់កូរ៉េខាងជើងក្នុងការបាញ់ផ្កាយរណបក្នុងគោលដៅសន្តិភាពនាពេលកន្លងមក។
សេចក្តីថ្លែងការណ៍ដដែលបាននិយាយថាការបាញ់សាកល្បងនេះ គឺប្រកបដោយសុវត្ថិភាពនិងល្អឥតខ្ចោះដោយបានបំពាក់ជាមួយគ្រាប់បែកតូចៗនិងគ្រាប់ប្រភេទA ដែលពន្លឺថែមទៀតមិនដូចពីការ បាញ់លើកមុននោះទេ ប៉ុន្តែថាវាមានកម្លាំងថាមពលខ្លាំងអស្ចារ្យ និងមិនធ្វើឱ្យខូចខាតដល់បរិស្ថានដែលនៅជុំវិញតំបន់នោះទេ។
អង្គការសហប្រជាជាតិ សហរដ្ឋអាមេរិក កូរ៉េខាងត្បូង ជប៉ុន ចិន រុស្ស៊ី និងប្រទេសអង់គ្លេសបានផ្តន្ទាទោសកូរ៉េខាងជើងភ្លាមៗចំពោះទង្វើនៃការបាញ់សាកល្បងអាវុធនុយក្លេអ៊ែដែលមានរយៈចម្ងាយឆ្ងាយរហូតទៅដល់ដែនដីសហរដ្ឋអាមេរិក។
លោកប្រធានាធិបតីសហរដ្ឋអាមេរិកបារ៉ាក់អូបាម៉ាបានធ្វើការថ្កោលទោសភ្លាមៗនៅក្នុងសេចក្តីថ្លែងការណ៍របស់ខ្លួនដែលបានចេញផ្សាយនៅថ្ងៃអង្គារនេះ។ដោយបានហៅការបាញ់សាកល្បងនេះជាសកម្មភាពបង្កហេតុដែលមានកម្រិតខ្ពស់ដល់សន្តិសុខ និងស្ថេរភាពក្នុងតំបន់ព្រមទាំងបានរំលោភទៅលើកិច្ចព្រមព្រៀងរបស់អង្គការសហប្រជាជាតិ។
ការបាញ់សាកល្បងអាវុធនុយក្លេអ៊ែររបស់ប្រទេសកូរ៉េខាងជើងបានបង្កឱ្យមានការរញ្ជួញដីកម្រិត៤,៩នៃរង្វាស់រ៉ិចទ័រ ដែលមានជម្រៅ "សូន្យ" គីឡូម៉ែត្រ បានកើតមាននៅប្រទេសកូរ៉េខាងជើង។
កាលពីពាក់កណ្តាលខែធ្នូឆ្នាំមុននេះប្រទេសកុម្មុយនីស្តឯកកោមួយនេះបានបាញ់បង្ហោះគ្រាប់រ៉ុក្កែតដោយបានភ្ជាប់ជាមួយផ្កាយរណបប្រកបដោយជោគជ័យចេញពីឆ្នេរសមុទ្រខាងលិចនៃប្រទេស
ហើយបានបង្កឲ្យមានការថ្កោល ទោសពីសហគមន៍អន្តរជាតិជាខ្លាំង៕
