ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​ប្រជាជន​ឈ្នះ​ដ៏​លើសលប់​ក្នុង​ការបោះឆ្នោត​ក្រុមប្រឹក្សា​ខណ្ឌ​ពោធិ៍សែនជ័យ


​គណបក្ស​ដែល​ចូលរួម​ការ​ប្រកួត​ប្រជែង​ការ​បោះឆ្នោត​ឡើងវិញ​ ដើម្បី​ជ្រើសរើស​ក្រុមប្រឹក្សា​ខណ្ឌ​ពោធិ៍សែនជ័យ គឺ​មាន​តែ​ពីរ​គណបក្ស​ប៉ុណ្ណោះ ​គឺ​គណបក្ស​ប្រជាជន​ និង​គណបក្ស​សម​ រង្សី។
​គណបក្ស​ដែល​ចូលរួម​ការ​ប្រកួត​ប្រជែង​ការ​បោះឆ្នោត​ឡើងវិញ​ ដើម្បី​ជ្រើសរើស​ក្រុមប្រឹក្សា​ខណ្ឌ​ពោធិ៍សែនជ័យ គឺ​មាន​តែ​ពីរ​គណបក្ស​ប៉ុណ្ណោះ ​គឺ​គណបក្ស​ប្រជាជន​ និង​គណបក្ស​សម​ រង្សី។

គណៈកម្មាធិការ​ជាតិ​រៀបចំ​ការ​បោះឆ្នោត(គ.ជ.ប) នៅ​ថ្ងៃ​អាទិត្យ​នេះ​ បាន​ប្រកាស​លទ្ធផល​ជា​បឋម​ថា គណបក្ស​គ្រប់គ្រង​អំណាច​របស់​លោក​នាយក​រដ្ឋមន្ត្រី​ហ៊ុន​ សែន​ បាន​យក​ជ័យជម្នះ​ដ៏​ច្រើន​លើស​លប់​លើ​គណបក្ស​ប្រឆាំង​លោក​សម​ រង្សី ​សម្រាប់​ការ​បោះឆ្នោត​ឡើងវិញ​ ដើម្បី​ជ្រើសរើស​ក្រុមប្រឹក្សា​ខណ្ឌ​ពោធិ៍សែនជ័យ។

ខណ្ឌ​ពោធិ៍សែនជ័យ ​ជា​ខណ្ឌ​មួយ​ដែល​ទើប​នឹង​បង្កើត​ថ្មី​ដែល​មាន​១៣​សង្កាត់​ នឹង​មាន​សមាជិក​ចំនួន​៨៩​នាក់ ​សម្រាប់​ការ​បោះឆ្នោត​ជ្រើសរើស​ក្រុម​ប្រឹក្សា​ខណ្ឌ ​ដែល​មាន​១៩​អាសនៈ។​ គណបក្ស​ដែល​ចូលរួម​ការ​ប្រកួត​ប្រជែង​គឺ​មាន​តែ​ពីរ​គណបក្ស​ប៉ុណ្ណោះ ​គឺ​គណបក្ស​ប្រជាជន​ និង​គណបក្ស​សម​ រង្សី។

លោក ​ឃ្លូត ​ប៊ុតឌី ​សមាជិក​នៃ​គណៈកម្មាធិការ​ជាតិ​រៀបចំ​ការ​បោះឆ្នោត​ បាន​ប្រាប់​ក្រុម​អ្នក​យក​ព័ត៌មាន​ថា លទ្ធផល​បណ្តោះ​អាសន្ន​បាន​បង្ហាញ​ថា​ គណបក្ស​ប្រជាជន​កម្ពុជា ​ទទួល​បាន​៦៧​សំឡេង គណបក្ស​សម ​រង្សី ​ទទួល​បាន​២២​សំឡេង​លើ​ចំនួន​អ្នក​បោះឆ្នោត​៨៩​ទល់​នឹង​៨៩ ​ដែល​មាន​វត្តមាន​នៅ​ក្នុង​ការ​បោះឆ្នោត​នៅ​ថ្ងៃ​អាទិត្យ​នេះ​ ហើយ​នៅ​ក្នុង​នោះ​មាន​សន្លឹក​ឆ្នោត​ដែល​មិន​បាន​ការ​ និង​សន្លឹក​ឆ្នោត​ដែល​ខូច​មាន​ចំនួន​តែ​មួយ​សន្លឹក​ប៉ុណ្ណោះ។

«ជា​លទ្ធផល​ព្រាង​ជា​បណ្តោះ​អាសន្ន​ទេ​ គឺ​គណបក្ស​ប្រជាជន​ លោក​បាន​សំឡេង ៦៧​សំឡេង។ គណបក្ស​សម ​រង្សី ​បានសំឡេង​២២​សំឡេង។ ​ទាំង​អស់​ហ្នឹង​មាន​៨៩​សំឡេង​ ហើយ​អ្នក​បោះឆ្នោត​នោះ​មាន​៨៩​នាក់»។

លោក ​ទេព​ នីថា ​អគ្គលេខាធិការ​នៃ​គណៈកម្មាធិការ​ជាតិ​រៀបចំ​ការ​បោះឆ្នោត​ បាន​ថ្លែង​នៅ​ក្នុង​សន្និសីទព័ត៌មាន​ថា​ គ.ជ.ប ​បាន​ទុក​រយៈពល​ចំនួន​បី​ថ្ងៃ​ដើម្បី​ឲ្យ​គណបក្ស​នយោបាយ ​ប្តឹង​ជំទាស់​តវ៉ា​ទៅ​នឹង​លទ្ធផល​នេះ ​ហើយ​ប្រសិន​ណា​បើ​មិន​មាន​ពាក្យ​បណ្តឹង​តវ៉ា​ទេ​ យើង​នឹង​ប្រកាស​លទ្ធផល​ជា​ផ្លូវការ​ នៅ​ថ្ងៃ​ទី​១៨​ខែ​ឆ្នូ​ខាង​មុខ​នេះ។

«ការ​រៀបចំ​លទ្ធផល ​ការ​បូក​សរុប​លទ្ធផល ​ការ​សរុប​ចំនួន​អាសនៈ​ហ្នឹង​ និង​ការ​កំណត់​បេក្ខជន​ជាប់​ឆ្នោត​សម្រាប់​ការ​បោះឆ្នោត​ក្រុមប្រឹក្សា​នេះ​គឺ​គណៈកម្មាធិការ​រាជធានី​រៀបចំការ​បោះឆ្នោត។ គាត់​ជា​អ្នក​រៀបចំ​មិនមែន​នៅ​លើ​គណៈកម្មាធិការ​ជាតិ​រៀបចំ​ការ​បោះឆ្នោត ​ដូច​មុនៗ​ នោះ​ទេ»។

លោក ព្រំ គុន ​អាយុ​៦៩​ឆ្នាំ ​សមាជិក​ក្រុង​ខាង​គណបក្ស​ប្រជាជន​កម្ពុជា​ បាន​មាន​ប្រសាសន៍​ថា​ លទ្ធផល​បណ្តោះ​អាសន្ន​នេះ ​លោក​អាច​ទទួល​យក​បាន។

«ខ្ញុំ​យល់​ថា​នេះ​ជា​សារជាតិ​របស់​គណបក្ស​ប្រជាជន ​ដែល​ជា​អ្នក​ធ្វើ​តែងតែ​ទទួល​លទ្ធផល​អីញ្ចឹង។ ខ្ញុំ​ពេញ​ចិត្ត​នឹង​លទ្ធផល​នេះ​ ព្រោះ​ថា​យើង​អ្នក​ធ្វើ យើង​បាន​ចេះ​តែ​កើន​អីញ្ចឹង​ បាន​សេចក្តី​ថា​ រឿង​ហ្នឹង​ប្រជាជន​គេ​វាយ​តម្លៃ​ត្រូវ»។

លោក ​យឹម ​សុវណ្ណ តំណាងរាស្រ្ត ​និង​ជា​អ្នក​នាំពាក្យ​គណបក្ស​សម​ រង្សី​ បាន​សម្តែង​ការ​មិន​ពេញចិត្ត​ចំពោះ​លទ្ធផល​នេះ​ទេ។ លោក​បាន​មាន​ប្រសាសន៍​ថា ​មាន​សមាជិក​គណបក្ស​សម​ រង្សី ​មួយ​ចំនួន​បាន​ទទួល​រង​នូវ​ការ​បំភិត​បំភ័យ ​និង​ការ​ទិញ​សន្លឹក​ឆ្នោត។ លោក​ យឹម ​សុវណ្ណ​ បាន​មាន​ប្រសាសន៍​ទៀត​ថា​ គណបក្ស​សម ​រង្សី​ មិន​មាន​គម្រោង​ណា​មួយ​ ដើម្បី​ប្តឹង​ជំទាស់​ចំពោះ​លទ្ធផល​នេះ​ទេ​ ដោយសារ​តែ​លោក​គ្មាន​ជំនឿ​ថា ​នឹង​ទទួល​បាន​យុត្តិធម៌​លើ​ពាក្យ​បណ្តឹង​គណបក្ស​សម​ រង្សី។

«ការ​បោះឆ្នោត​នេះ​មិន​ឆ្លុះ​បញ្ចាំង​នូវ​ឆន្ទៈ​ប្រជាពលរដ្ឋ​ពិត​ប្រាកដ​ទេ។ ទោះ​ជា​យ៉ាង​ណា​ក៏ដោយ ​យើង​កត់​សម្គាល់​ឃើញ​ថា ​បរិយាកាស​បោះឆ្នោត​នេះ​មិន​អំណោយ​ផល​ទេ​គឺ​នូវ​តែ​មាន​ការ​ទិញ​សន្លឹក​ឆ្នោត ​ការ​គំរាម​គំហែង​ បំភិត​បំភ័យ​សកម្មជន​គណបក្ស​សម​ រង្សី»។

លោកស្រី ​នូ ​សំបូរ ​នាយិកា​ប្រតិបត្តិ​របស់​សមាគម​ព្រហ្មវិហារធម៌​នៃ​មាតា​ ដែល​បាន​តាម​ឃ្លាំមើល​ការ​បោះឆ្នោត​នេះ​បាន​បញ្ជាក់​ថា ​លោកស្រី​ពុំ​បាន​រក​ឃើញ​ថា មាន​ភាព​មិន​ប្រក្រតី​នៅ​ក្នុង​ការ​បោះឆ្នោត​នេះ​ទេ។

«វា​រលូន​ហើយ​ប៉ុន្តែ​វា​មាន​ការ​ដូច​ពី​គណបក្ស​សម ​រង្សី ​គាត់​តវ៉ា​ដែរ។ ​គាត់​តវ៉ា។ ​គាត់​រក​រឿង​ដែរ​ ប៉ុន្តែ​ដល់​ខាង​បោះឆ្នោត​ហ្នឹង​វា​រលូន ​វា​ឥត​មាន​ជំទាស់​អី ​ឥត​មាន​ទើស​អី​ទេ​ ក៏​រូច​ទៅ»។

ការ​បែងចែក​អាសនៈ​ក្រៅ​ផ្លូវការ​បាន​បង្ហាញ​ឲ្យ​ឃើញ​ថា ក្នុង​ចំណោម​១៩​អាសនៈ ​នៃ​ក្រុម​ប្រឹក្សា​ខណ្ឌ​ពោធិ៍សែនជ័យ ​គណបក្ស​ប្រជាជន​កម្ពុជា ​ទទួល​បាន​១៥​អាសនៈ​ ចំណែក​ឯ​គណបក្ស​សម ​រង្សី ​ទទួល​បាន​៤​អាសនៈ៕

XS
SM
MD
LG