ភ្ជាប់​ទៅ​គេហទំព័រ​ទាក់ទង

លោក​ហ៊ូ ជិនតាវ​មក​ទស្សនកិច្ច​ផ្លូវ​ការ​នៅ​កម្ពុជា


ប្រធានាធិបតី​ប្រទេស​ចិន​ លោក ​ហ៊ូ ​ជិនតាវ​

លោក ​ហ៊ូ ​ជិនតាវ​ប្រធានាធិបតី​ប្រទេស​ចិន​ទើបតែ​បាន​មក​ដល់​ប្រទេស​កម្ពុជា​នៅ​ប៉ុន្មាន​ម៉ោង​មុន​នេះ​ដើម្បី​បំពេញ​ទស្សនកិច្ច​ផ្លូវ​រដ្ឋ​រយៈពេល​បួន​ថ្ងៃ​ដែល​មន្ដ្រី​រដ្ឋាភិបាល​អះអាង​ថា​គឺ​ជា​ដំណើរ​ទស្សនកិច្ច​ដ៏​មាន​អត្ថន័យ​សម្រាប់​ពង្រឹង​កិច្ច​សហ​ប្រតិបត្តិការ​ទ្វេ​ភាគី។​ ក៏​ប៉ុន្ដែ​មន្ដ្រី​គណបក្ស​ជំទាស់​ និង​អ្នក​វិភាគ​នយោបាយ​កម្ពុជា​បាន​ផ្តោត​ការ​យក​ចិត្ត​ទុក​ដាក់​លើ​ឥទ្ធិពល​របស់​ប្រទេស​ចិន​មក​លើ​ប្រទេស​កម្ពុជា​ខណៈពេល​ដែល​កម្ពុជា​កំពុង​រៀបចំ​កិច្ចប្រជុំ​កំពូល​អាស៊ាន។

លោក ​កុយ ​គួង ​អនុរដ្ឋលេខាធិការ​ និង​ជា​អ្នក​នាំពាក្យ​ក្រសួង​ការបរទេស​កម្ពុជា​បាន​ប្រាប់​ក្រុម​អ្នករាយការណ៍​ព័ត៌មាន​កាល​ពី​ព្រឹកម៉ិញ​ក្រោយ​ពី​ជំនួប​រវាង​លោក ​ហោ ​ណាំហុង​ រដ្ឋមន្ដ្រី​ការបរទេស​និង​លោកស្រី ​ហ៊្វូ ​យីង ​អនុរដ្ឋមន្ដ្រី​ការបរទេស​ចិន​ថា​ប្រមុខ​ដឹកនាំ​ការទូត​នៃ​ប្រទេស​ទាំង​ពីរ​ចាត់ទុក​ដំណើរ​ទស្សនកិច្ច​របស់​លោក​ប្រធានាធិបតី​ចិន​នេះ​ថា​គឺ​ជា​គ្រឹះ​នៃ​ទំនាក់​ទំនង​ទ្វេ​ភាគី។

«ភាគី​ទាំង​ពីរ​បាន​សម្តែង​អំពី​សារៈ​សំខាន់​នៃ​ដំណើរ​ទស្សនកិច្ច​ផ្លូវ​រដ្ឋ​របស់​លោក​ប្រធានាធិបតី​ចិន​ មក​កម្ពុជា​ចាប់​ពី​ថ្ងៃ​នេះ​ទៅ​ហ្នឹង។​ ហើយ​ដែល​ទស្សនកិច្ច​នេះ​នឹង​ធ្វើ​ឲ្យ​ទំនាក់​ទំនង​មិត្តភាព​និង​កិច្ច​សហ​ប្រតិបត្តិការ​ប្រទេស​ទាំង​ពីរ​កាន់​តែ​មាន​ភាព​ស៊ីជម្រៅ​និង​រឹងមាំ​បន្ថែម​ទៀត»។

លោក ​ហ៊ូ ​ជិនតាវ ​នឹង​ត្រូវ​បញ្ចប់​ដំណើរ​ទស្សនកិច្ច​របស់​ខ្លួន​រហូត​ដល់​ថ្ងៃ​ទី២ ​ខែ​មេសា​ គឺ​មួយ​ថ្ងៃ​មុន​នឹង​កិច្ច​ប្រជុំកំពូល​អាស៊ាន​បើក​ជា​ផ្លូវការ​ក្នុង​ទីក្រុង​ភ្នំពេញ។

យោង​តាម​កម្មវិធី​ប្រធានាធិបតី​ចិន​នឹង​ត្រូវ​ចូល​ក្រាប​បង្គំ​គាល់​ព្រះមហាក្សត្រ​ខ្មែរ​សម្ដេច​ព្រះបរមនាថ​ នរោត្តម ​សីហមុនី ​ជួប​ពិភាក្សា​ជាមួយ​លោក​នាយក​រដ្ឋមន្ដ្រី​ ហ៊ុន ​សែន ​លោក ​ជា ​ស៊ីម ​ប្រធាន​ព្រឹទ្ធសភា ​និង​លោក ​ហេង ​សំរិន ​ប្រធាន​រដ្ឋសភា។

លោក​ កុយ ​គួង ​អ្នក​នាំពាក្យ​ក្រសួងការ​បរទេស​បាន​ឲ្យ​ដឹង​ថា ​កិច្ច​ព្រមព្រៀង​ចំនួន​ដប់ ​នឹង​ត្រូវ​ចុះ​ហត្ថលេខា​ ក្នុង​អំឡុង​ដំណើរ​ទស្សនកិច្ច​នេះ។​ ក៏ប៉ុន្ដែ​លោក​មិន​អាច​បញ្ជាក់​អំពី​សណ្ឋាន​នៃ​កិច្ច​ព្រមព្រៀង​ទាំង​នោះ​ទេ។
យ៉ាងណា​ក៏ដោយ​ ​យោង​តាម​គេហទំព័រ​របស់​វិទ្យុ​ចិន​អន្ដរជាតិ ​កិច្ច​ព្រមព្រៀង​ទាំង​នោះ​ នឹង​ផ្តោត​លើ​វិស័យ​សេដ្ឋកិច្ច ​និង​ សហ​ប្រតិបត្តិការ​ផ្នែក​បច្ចេកវិទ្យា។
ប្រទេស​ចិន ​គឺ​ជា​ប្រទេស​នាំមុខ​គេ​ នៅ​ក្នុង​ការ​វិនិយោគ​នៅ​កម្ពុជា ​ជាពិសេស​ក្នុង​វិស័យ​ថាមពល ​រ៉ែ ​កសិ​ឧស្សាហកម្ម ​និង​ វិស័យ​កាត់ដេរ​សម្លៀក​បំពាក់។

ទំហំ​វិនិយោគ​របស់​ប្រទេស​ចិន ​កាល​ពី​ឆ្នាំ ​២០១១ ​បាន​កើន​ដល់​ជាង​ ១.១០០ ​លាន​ដុល្លារ​អាមេរិក។​ ក៏ប៉ុន្ដែ​កម្ពុជា​ មិន​មាន​តុល្យភាព​នៃ​បណ្ដូរ​ពាណិជ្ជកម្ម​ជាមួយ​ប្រទេស​ចិន​ទេ។

កាល​ពី​ឆ្នាំ​កន្លង​ទៅ​នេះ​ ប្រទេស​កម្ពុជា​នាំចូល​ផលិតផល​នានា​ពី​ប្រទេស​ចិន​សរុប​ជា​ទឹកប្រាក់​ជាង​ ២.៣០០ ​លាន​ដុល្លារ។ ​រីឯ​ការ​នាំចេញ​របស់​កម្ពុជា​ទៅ​កាន់​ប្រទេស​ចិន​វិញ​ មាន​ទំហំ​ត្រឹមតែ​ ១៨៤ ​លាន​ដុល្លារ​ តែ​ប៉ុណ្ណោះ។ ​នេះ​បើ​យោង​ទៅ​តាម​ការ​បញ្ជាក់​របស់​លោក ​កុយ ​គួង។

លោក ​ហ៊ូ ​ជិនតាវ ​គឺ​ជា​គឺ​ប្រមុខរដ្ឋ​ទីមួយ​របស់​ប្រទេស​ចិន​ ដែល​បំពេញ​ទស្សនកិច្ច​នៅ​កម្ពុជា​ក្នុង​រយៈ​ពេល ​១២ ​ឆ្នាំ​ចុង​ក្រោយ។

ជា​ទស្សនកិច្ច​ដែល​នាំ​ឲ្យ​មាន​ការ​ផ្តោត​ខ្សែ​ភ្នែក​យ៉ាង​ខ្លាំង​ពី​ក្រុម​អ្នក​ឃ្លាំមើល​នយោបាយ​អន្ដរជាតិ​ ដោយសារ​តែ​ដំណើរ​ទស្សនកិច្ច​នេះ​ ធ្លាក់​មក​ចំពេល​ដែល​កម្ពុជា​ កំពុង​ក្នុង​ការ​រៀបចំ​ យ៉ាងមមា​ញឹកនូវ​កិច្ច​ប្រជុំ​កំពូល​អាស៊ាន។

ប្រទេស​កម្ពុជា ​បាន​ប្រកាស​ទុក​ជា​មុន​ថា ​នឹង​មាន​ការ​ជជែក​ពិក្សា​លើ​បញ្ហា​ជម្លោះ​ដែនដី ​នៅ​សមុទ្រ​ចិន​ខាង​ត្បូង ​ក្នុង​កិច្ច​ប្រជុំ​កំពូល​អាស៊ាន​លើក​នេះ។ ​ក៏ប៉ុន្ដែ​ក្រោយ​មក​គម្រោងការ​នេះ​ត្រូវ​បាន​លុប​ចោល​វិញ​គឺ​នៅ​មុន​ពេល​ ដែល​លោក​ ហ៊ូ ​ជិនតាវ ​ចាប់​ផ្តើម​ទស្សនកិច្ច​របស់​ខ្លួន។

ជម្លោះ​នេះ​មាន​ជាប់​ពាក់ព័ន្ធ​ជាមួយ​ប្រទេស​វៀតណាម ​និង​ ប្រទេស​ហ្វីលីពីន ​ដែល​សុទ្ធសឹង​ជា​សមាជិក​អាស៊ាន។ ​អាស៊ាន​ ដែល​មាន​សមាជិក​សរុប​ចំនួន ​១០​ប្រទេស។

លោក​បណ្ឌិត​ ឡៅ ​ម៉ុងហៃ ​អ្នក​វិភាគ​ឯករាជ្យ​ បាន​ភ្ជាប់​បរិបទ​នៃ​ដំណើរ​ទស្សនកិច្ច​របស់​លោក​ ហ៊ូ ​ជិនតាវ ​ជាមួយ​នឹង​កិច្ចប្រជុំ​កំពូល​អាស៊ាន​ដែល​រៀបចំ​ដោយ​ប្រទេស​កម្ពុជា។

«បញ្ជាក់​បន្ថែម​ទៀត​ផង ​នូវ​ជំហរ​របស់​ចិន ​ដូច​ជា​រឿង​អាស៊ាន​ និង​ការ​ដោះស្រាយ​ជម្លោះ​នៅ​សមុទ្រ​ចិន ​ខាង​ត្បូង ​ជា​អាទិ៍។ ​យើង​ហ្នឹង ​ដែល​ជា​ប្រធាន​អាស៊ាន​ហ្នឹង ​នៅ​ស្ថិត​ក្រោយ​ឥទ្ធិពល​ចិន។​ ត្រង់​ហ្នឹង​មួយ ​វា​អវិជ្ជមាន​ចំពោះ​អាស៊ាន​ទាំង​មូល»។

ស្របគ្នា​នឹង​ដំណើរ​ទស្សនកិច្ច​នេះ​ ប្រជា​ពលរដ្ឋ​កម្ពុជា​ប្រមាណ​ជា​៤០​ នាក់​ តំណាង​ឲ្យ​អ្នក​ភូមិ​ចំនួន​១.៤០០​គ្រួសារ ​មក​ពី​ស្រុក​គីរីសាគរ ​និង ​ស្រុក​បុទុមសាគរ​ នៃ​ខេត្ត​កោះកុង​ ដែល​អះអាង​ថា ​បាន​ទទួល​រងគ្រោះ​ ដោយ​សំណង​ មិន​សមរម្យ​កើត​ចេញ​ពី​ផលប៉ះពាល់ ​របស់​ក្រុមហ៊ុន​វិនិយោគ​ចិន​មួយ​ឈ្មោះ Union Development Group. Co.Ltd. បាន​ឡើង​មក​ទីក្រុង​ភ្នំពេញ​ ក្នុង​គោល​បំណង​ដាក់​ញ្ញតិ​មួយ​ទៅ​កាន់​លោក ​ហ៊ូ ​ជិនតាវ ​តាម​រយៈ​ស្ថានទូតចិន​ក្នុង​ក្រុង​ភ្នំពេញ។ ​ក្រុម​ប្រជាជន​ចង់​ឲ្យ​លោក​ប្រធានាធិបតី​ ចិន​ជួយ​អន្ដរាគម​ក្នុង​ការ​ដោះស្រាយ​បញ្ហា​របស់​ពួក​គេ។​ ក៏ប៉ុន្ដែ​ក្រុម​អាជ្ញាធរ​កម្ពុជា ​បាន​ចាប់​បញ្ជូន​ពួក​គាត់​ទៅ​កាន់​ខេត្ត​កោះកុង​វិញ​ នៅ​រសៀល​នេះ។ ​នេះ​បើ​យោង​តាម​លោក​ ចាន់ ​សាវ៉េត ​អ្នក​ស៊ើបអង្កេត​ជាន់​ខ្ពស់​របស់​អង្គការ​ការពារ​សិទ្ធិ​មនុស្ស​អាដហុក។

ក្រុមហ៊ុន​Union Development Group. Co. Ltd. ​ទទួល​សិទ្ធិ​ពី​រដ្ឋាភិបាល​ខ្មែរ​សម្រាប់​អភិវឌ្ឈន៍​អេកូ​ទេសចរណ៍​នៅក្នុង​ស្រុក​ទាំង​ពីរ​ខាង​លើ។

លោក ​យឹម ​សុវណ្ណ ​តំណាងរាស្រ្ត​និង​ជា​អ្នក​នាំពាក្យ​គណបក្ស​ជំទាស់ ​សម ​រង្ស៊ី ​បាន​សម្ដែង​ការ​ស្វាគមន៍​ដល់​ដំណើរ​ទស្សកិច្ច​នេះ​ដោយ​គិត​ថា​ វា​ជា​ផ្នែក​មួយ​នៃ​ការ​ពង្រឹង​មិត្តភាព​និង​កិច្ច​សហ​ប្រតិបត្តិការ​ទ្វេ​ភាគី។​ ក៏​ប៉ុន្ដែ​តំណាងរាស្ដ្រ​គណបក្ស​ជំទាស់​បាន​ស្នើ​ឲ្យ​ប្រធានាធិបតីចិន​ជួយ​ជំរុញ​ការ​ពិនិត្យ​ឡើង​វិញ​នូវ​ផល​ប៉ះពាល់​ពី​គម្រោង​វិនិយោគ​នានា​ ពី​ប្រទេស​ចិន។

«គណបក្ស​ជំទាស់​ស្នើសុំ​ឲ្យ​លោក ​ហ៊ូ ​ជិនតាវ​ ពិនិត្យ​មើល​ទៅ​លើ​គម្រោង​វិនិយោគ​របស់​ចិន​ទាំង​ឡាយ​ណា ​ដែល​ប៉ះពាល់​ទៅ​ដល់​សិទ្ធិ​កាន់កាប់​ដីធ្លី​របស់​ប្រជា​ពលរដ្ឋ​ ដើម្បី​ឲ្យ​ទទួល​បាន​នូវ​ផល​ប្រយោជន៍​ទាំង​អស់​គ្នា។ ​ទី​២ ​គម្រោង​វិនិយោគ​ទាំងឡាយណា​ក៏ដោយ​ ត្រូវ​តែ​ការពារ​បរិស្ថាន​ ការពារ​ព្រៃឈើ​ជិវិត​សត្វ​ក៏​ដូច​ជា​ជីវភាព​ប្រជា​ពលរដ្ឋ​ផង​ដែរ។​ ពីព្រោះ​មាន​គម្រោង​វិនិយោគ​ទុន​មួយ​ចំនួន​ក៏​កំពុង​តែ​បំផ្លាញ​ព្រៃឈើ​ប្រទេស​កម្ពុជា​ផង​ដែរ»។
លោក ​យឹម ​សុវណ្ណ ​ក៏​ស្នើ​ឲ្យ​ប្រទេស​ចិន​ ត្រួតពិ​និត្យ​ទៅ​ដល់​ការ​ផ្តល់​ប្រាក់​កម្ចី ​ដល់​ប្រទេស​កម្ពុជា​ប្រកប​ដោយ​តម្លាភាព​ផង​ដែរ៕

XS
SM
MD
LG