William Ide
សរសេរសម្រួលដោយជឹង ប៉ូជីន
ប៉េកាំង៖ ប្រទេសនានាទូទាំងទ្វីបអាស៊ីកំពុងអបអរសាទរលោកបារ៉ាក់ អូបាម៉ា ដែលបានជាប់ឆ្នោតជាប្រធានាធិបតីម្តងទៀត ហើយបានឆ្លើយតបដល់លទ្ធផលនៃការបោះឆ្នោតដោយបង្ហាញការប្រាថ្នារបស់ខ្លួនក្នុងការធ្វើឲ្យមានចំណងទាក់ទងឲ្យបានប្រសើរឡើងជាមួយរដ្ឋាភិបាលទីក្រុងវ៉ាស៊ីនតោន។ ប៉ុន្តែ លោក William Ide អ្នកឆ្លើយឆ្លងព័ត៌មានរបស់វីអូអេរាយការណ៍ពីទីក្រុងប៉េកាំងថា មានទំនាក់ទំនងមួយក្នុងតំបន់ដែលប្រទេសជាច្រើនមានអារម្មណ៍ថាជាគន្លឹះសម្រាប់លោកអូបាម៉ាធ្វើឲ្យបានត្រឹមត្រូវនៅក្នុងការកាន់ណាចរបស់លោកក្នុងអាណត្តិទី២ហើយនេះជាចំណងទាក់ទងរបស់រដ្ឋាភិបាលទីក្រុងវ៉ាស៊ីនតោនជាមួយចិន។
វាជាការឆ្លើយតបជាផ្លូវការយ៉ាងច្បាស់និងជាលើកដំបូងរបស់ចិនដល់លទ្ធផលដែលខ្លួនចង់ឲ្យចំណងទាក់ទងរវាងប្រទេសទាំង២កាន់តែប្រសើរឡើងហើយខ្លួនដឹងអំពីវិសាលភាពនៃផលប៉ះពាល់ដែលកើតចេញពីទំនាក់ទំនងនេះ។
លោក ហុង ឡេ (Hong Lei) អ្នកនាំពាក្យក្រសួងការបរទេសចិន។
លោក ហុង និយាយថាចិន មានច្ឆន្ទៈធ្វើការជាមួយសហរដ្ឋអាមេរិក មើលអនាគតហើយនឹងបន្តជំរុញឲ្យជឿនលឿនដល់កិច្ចសហប្រតិបត្តិការដើម្បីបម្រើប្រជាពលរដ្ឋប្រទេសទាំងពីរនិងពិភពលោកឲ្យប្រសើរឡើង។
នៅពេលដែលឥទ្ធិពលចិនក្នុងទ្វីបអាស៊ីកំពុងកើនឡើង ប្រទេសនេះកាន់តែពង្រឹងការទាមទារទឹកដីរបស់ខ្លួន។ ការណ៍នេះបានធ្វើឲ្យមានជម្លោះជាមួយប្រទេសជិតខាងរបស់ខ្លួននិងសហរដ្ឋអាមេរិក។
នៅពេលជាមួយគ្នានោះដែរ សហរដ្ឋអាមេរិកបានចាប់ផ្តើមនយោបាយថ្មីមួយនៅក្នុងទ្វីបអាស៊ីនៅដើមឆ្នាំនេះដែលផ្តោតការយកចិត្តទុកដាក់ឡើងវិញលើទ្វីបអាស៊ីដែលហៅថាការសំខាន់ផ្តោតលើអាស៊ី។ ការផ្លាស់ប្តូរនេះត្រូវបានស្វាគមន៍ដោយប្រទេសជាច្រើននៅក្នុងតំបន់។
លោក ធិទីណាន ពង់សុធីរ៉ាក់ (Thitinan Pongsudhirak) ជានាយកនៃវិទ្យាស្ថានការសិក្សាសន្តិសុខនិងអន្តរជាតិនៃសាកលវិទ្យាល័យ ជូឡាឡុងកន (Chulalongkorn) ប្រទេសថៃ។
«រដ្ឋបាលរបស់ប្រធានាធិបតីអូបាម៉ាបានចាត់ទុកអាស៊ីអាគ្នេយ៍ជាតំបន់មួយមិនគ្រាន់តែជាប្រព័ន្ធសុំចតដែលមាននៅក្នុងនយោបាយការបរទេសរបស់សហរដ្ឋអាមេរិកប៉ុណ្ណោះទេ។ ប៉ុន្តែ វាជាតំបន់មួយជឿនលឿន។ លើសពីនេះតំបន់នេះក៏ធ្វើឲ្យមានតុល្យភាពជាមួយចិនដែរ»។
ជប៉ុនដែលបានឃើញថាខ្លួនកំពុងតែមានការច្របូកច្របល់ក្នុងជម្លោះជាមួយចិនប៉ុន្មានខែថ្មីៗនេះលើប្រជុំកោះក្នុងសមុទ្រចិនខាងកើត ក៏បានស្វាគមន៍ការជាប់ឆ្នោតម្តងទៀតរបស់លោកប្រធានាធិបតី និងកិច្ចខិតខំប្រឹងប្រែងរបស់លោកដែលផ្តោតកាន់តែខ្លាំងឡើងលើទ្វីបអាស៊ី។
លោក អូសាមុ ហ៊្វុជិមូរ៉ា (Osamu Fujimura) នាយខុទ្ទកាល័យជប៉ុន។
លោក ហ៊្វុជិមូរ៉ា មានប្រសាសន៍ថាដោយសាតែបរិយាកាសសន្តិសុខក្នុងតំបន់អាស៊ីខាងកើតកាន់តែធ្ងន់ធ្ងរទៅៗ សារៈសំខាន់នៃសម្ព័ន្ធភាពរវាងជប៉ុននិងសហរដ្ឋអាមេរិកកំពុងកើនឡើង។ លោក មានប្រសាសន៍បន្តទៀតថា ជប៉ុនសង្ឃឹមថា ប្រធានាធិបតី អូបាម៉ានឹងបន្តអភិវឌ្ឍសម្ព័ន្ធភាពនេះ។
កូរ៉េខាងត្បូងក៏បានស្វាគមន៍ការជាប់ឆ្នោតម្តងទៀតរបស់លោកអូបាម៉ាដែរ។ អ្នកនាំពាក្យនិយាយថាប្រធានាធិបតី លី ម្យុងបាក (Lee Myung-bak) បានផ្ញើលិខិតអបអរសាទរដែលបានសរសើរទំនាក់ទំនងជាមួយរដ្ឋាភិបាលទីក្រុងវ៉ាស៊ីនតោនថាមានភាពកាន់តែជិតស្និទ្ធឡើងនៅក្រោមការដឹកនាំរបស់លោកអូបាម៉ា។
នៅប្រទេសភូមា ជាទីកន្លែងដែលសហរដ្ឋអាមេរិកបានធ្វើឲ្យប្រសើរឡើងនូវចំណងទាក់ទងខាងពាណិជ្ជកម្ម និងនយោបាយបន្ទាប់ពីកំណែទម្រង់ខាងនយោបាយរបស់ប្រទេសនោះ អាជ្ញាធរនិយាយថា ជ័យជម្នះរបស់លោកអូបាម៉ា នាំឲ្យគេមានលទ្ធភាពបង្កើតទំនាក់ទំនងដែលមានស្រាប់ជាជាងចាប់ផ្តើមថ្មីជាមួយរដ្ឋបាលថ្មីនៅក្រោមការដឹកនាំរបស់លោក មីត្ត រ៉មនី។
លោក សាវ តាយ (Zaw Htay) ជានាយការិយាល័យប្រធានាធិបតី ថេន សេន (Thein Shein) នៃប្រទេសភូមា។
លោកនិយាយថាលោកជឿជាក់ថាទំនាក់ទំនងរបស់ប្រទេសទាំងពីរអាចរឹងមាំជាងមុន។ លោកនិយាយទៀតថា គោលនយោបាយការបរទេសរបស់លោកអូបាម៉ាស្តីពីប្រទេសភូមាត្រូវបានគាំទ្រដោយសភាតំណាងរាស្រ្តនិងព្រឹទ្ធសភា។
នៅតាមផ្លូវក្នុងទីក្រុងប៉េកាំង មនុស្សភាគច្រើនសប្បាយរីករាយដោយបានឮថាប្រធានាធិបតីអូបាម៉ាបានជាប់ឆ្នោតម្តងទៀត ប៉ុន្តែ វាក៏ច្បាស់ណាស់ថាអ្នកខ្លះ គិតថា ប្រទេសទាំងពីរ ចាំបាច់ត្រូវធ្វើទំនាក់ទំនងដែលមានឲ្យកាន់តែប្រសើរឡើង។
លោក ហ្គ័ន (Guan) អាយុ២៨ឆ្នាំជាពាណិជ្ជករ។
លោក ហ្គ័ន និយាយថាទោះបីលោកគិតថាគ្មានបញ្ហាធំរវាងចិននិងសហរដ្ឋអាមេរិកក៏ដោយ ក៏មានបញ្ហាស្មុគ្រស្មាញខ្លះដូចជាប្រជុំកោះ ដៅយូ (Diaoyu) ដែលមានការខ្វែងគំនិតគ្នាខ្លះ។ លោកបន្ថែមទៀតថា ជាឧទាហរណ៍ប្រហែលមានបញ្ហាខ្លះពាក់ព័ន្ធនឹងពាណិជ្ជកម្មដែលក្នុងនោះសហរដ្ឋអាមេរិក ប្រហែលជ្រៀតចូលកិច្ចការផ្ទៃក្នុងច្រើនពេក។
អ្នកទីក្រុងប៉េកាំងផ្សេងទៀតគិតថាប្រទេសទាំងពីរកំពុងរងគ្រោះដោយគ្មានទំនាក់ទំនងវប្បធម៌ដែលនាំឲ្យពួកគេមិនអាចយល់គ្នាទៅវិញទៅមក។ ប៉ុន្តែ ពួកគេនិយាយថា ការដែលលោកអូបាម៉ាបានជាប់ឆ្នោតម្តងទៀតនឹងផ្តល់ពេលវេលាកាន់តែច្រើនឡើងដល់ប្រទេសទាំងពីរដើម្បីធ្វើឲ្យទំនាក់ទំនងកាន់តែប្រសើរឡើង៕
