ភ្ជាប់​ទៅ​គេហទំព័រ​ទាក់ទង

កម្ពុជា​ចាប់​ថៃ​៧នាក់​ចោទថា​ឆ្លងដែន​ខុស​ច្បាប់


លោក​ហ៊ុន​ សែន​ នាយក​រដ្ឋមន្ត្រីខ្មែរ​ ធ្វើ​អធិបតី​កិច្ចប្រជុំ។

ភ្នំពេញ៖ ក្រុម​សមត្ថកិច្ច​កម្ពុជា​បាន​ចាប់​ឃាត់​ខ្លួន​ជនជាតិ​ថៃ​ចំនួន​៧​នាក់​នៅ​ថ្ងៃ​ពុធ​នេះ​ នៅក្នុង​នោះ​មានតំណាង​រាស្ដ្រ​ថៃផង​ដែរ។ ការចាប់​ខ្លួន​ធ្វើឡើង​បន្ទាប់ពី​តំណាងរាស្ដ្រ​និង​មន្ដ្រី​ថៃ​ទាំង​នោះ​ត្រូវអាជ្ញាធរ​កម្ពុជា​ចោទ​ថា​បាន​ឆ្លង​ចូល​ប្រទេស​កម្ពុជា​ដោយ​ខុស​ច្បាប់។

ថ្លែងនៅ​ក្នុង​សុន្ទរកថា​បិទ​បញ្ចប់​សន្និបាត​ប្រចាំ​ឆ្នាំ​របស់​ក្រសួង​អភិវឌ្ឍន៍​ជនបទ​នៅ​ក្នុង​ក្រុង​ភ្នំពេញ​លោក នាយករដ្ឋ​មន្រ្តី ហ៊ុន សែន​បាន​ប្រកាសថា៖

«ថ្ងៃនេះ​យើង​ចាប់​ជនជាតិថៃ​ប្រំាពីរ​នាក់ ​ដែល​ជាក្រុម​អាវលឿង​ តំណាង​រាស្រ្ត​ពីរ​រូប​ បូក​ជាមួយ អ្នកកាសែត​មួយ​ចំនួនទៀត»។

សេចក្តី​ប្រកាស​នេះ​ធ្វើឡើង​តែ​ប៉ុន្មាន​ម៉ោងប៉ុណ្ណោះ​ បន្ទាប់ពីតំណាងរាស្រ្ត​និង​អ្នកកាសែត​ថៃ​ចំនួន​ប្រាំ​នាក់​បាន​ចូលមក​ថត​បង្គោល​ព្រំដែន​និង​បន្ទាត់​ព្រំដែន​នៅ​ក្នុង​ភូមិគោកជ័យ​ឃុំ​អូរបីជាន់​របស់ខេត្ត​បន្ទាយ​មាន​ជ័យ​ជាប់​ព្រំដែន​នៃ​ខេត្ត​ស្រះកែវ​ ប្រទេស​ថៃ។

មន្រ្តី​ផ្លូវការ​កម្ពុជា​អះអាង​ថា​ យោធាវរៈ​ការពារ​ព្រំដែន​លេខ​៥០៣​បាន​ចាប់ខ្លួន​ជនជាតិ​ថៃ​និង តំណាង​រាស្រ្ត​ថៃ​ទាំង​នោះ​នៅ​ពេល​ដែល​ពួកគេ​បាន​ចូលមក​ប្រទេស​កម្ពុជា​ដោយ​ខុសច្បាប់។

លោក​ហ៊ុន សែន ​បញ្ជាក់​ថា​តំណាងរាស្រ្ត​ថៃ​និង​ក្រុម​អ្នកកាសែត​ថៃ​ត្រូវ​បាន​បញ្ជូន​មកកាន់​ទីក្រុងភ្នំពេញ​ ហើយ​ត្រូវ​កាត់ទោស​ដោយគ្មាន​ការលើកលែង​ និង​គ្មាន​ការសម្របសម្រួល។

«ពេលនេះ​ បណ្តាញ​អ្នកស្នេហាជាតិ​គេ​មក​វាស់ដី​ថៃ ​ក្នុង​ដីខ្មែរ។ អញ្ចឹង​ខ្មែរ​មាន​សិទ្ធិ​ចាប់។ ​ហើយ​ម្តងនេះ​ គឺ​កាត់ទោស​ ហើយ​មិនមែន​លើកលែង​ដូចកាល​នោះ។ ដូច្នេះ​សូមឲ្យ​ស្គាល់​រសជាតិ​ ធ្វើ​អ្នកតំណាងរាស្រ្ត​ បើ​មិន​ដឹង​រឿង​ បើមិន​ដឹងទេ​ វាគួរតែ​ជាប់គុក»។

លោក​ថានី ថងផាក់ឌី ​អ្នកនាំពាក្យ​ម្នាក់​របស់​ក្រសួង​ការបរទេស​ថៃ​មិនអាច​ទាក់ទង​ដើម្បី​ស្នើ​សុំ​សេចក្តី​បំភ្លឺ​បានទេ​ដោយសារតែ​ជំនួយការ​របស់​លោក​ម្នាក់​បាន​ឆ្លើយថា​លោក​កំពុងតែ​ជាប់​ប្រជុំ​ជាមួយ​រដ្ឋមន្រ្តី​ក្រសួង​ការបរទេស​ថៃ។

ទោះ​ជាយ៉ាងណា​លោក​ថានី ថងផាក់ឌី​ ត្រូវ​កាសែតបាងកកប៉ុស្តិ៍ (Bangkok Post)​ ស្រង់​សម្តីថា​លោក​មិន​រំពឹងថា​ការចាប់​ខ្លួន​នេះ​នឹង​ទៅជា​បញ្ហា​រីករាលដាល​ធ្ងន់ធ្ងរ​នោះទេ។

អ្នក​នាំ​ពាក្យ​ក្រសួង​ការបរទេស​កម្ពុជា​លោក​គួយ កួង ​មាន​ប្រសាសន៍​ថា​លោក​មិនទាន់​ដឹងថា​តើ ការចរចា​ផ្នែក​ការទូត​ណាមួយ​បាន​ចាប់ផ្តើម​ហើយ​ឬ​យ៉ាងណា​នោះទេ។

យោងតាម​កាសែត​បាងកកប៉ុស្តិ៍​នៅក្នុង​ចំណោម​ជន​ដែល​ត្រូវ​ចាប់ខ្លួន​មាន​តំណាងរាស្រ្ត​ថៃ​តែ​ម្នាក់​ទេ​គឺ​លោក ប៉ានីច វីគិតស្រេត​(Panich Vikitsreth) ​រីឯ​លោក​វីរ៉ា ស៊ុមក្វាមគីត (Veeera Somkwamkid) ​សហ​មេដឹកនាំ​បណ្តាញអ្នក​ស្នេហាជាតិ​ថៃ​ គឺ​ក្រុម​អាវលឿង​ក៏ត្រូវ​បាន​ចាប់ខ្លួន​ដែរ។

ក្រុម​អាវលឿង​គឺជា​ក្រុម​គាំទ្រ​ដោយ​គណបក្ស​ប្រជាធិបតេយ្យ​ដែល​កំពុង​កាន់កាប់​អំណាច​របស់​ប្រទេស​ថៃ​សព្វថ្ងៃ។

ប្រទេស​កម្ពុជា​និង​ប្រទេស​ថៃ​មាន​អរិភាព​នឹង​គ្នា​នៅ​ជុំវិញ​សំណុំរឿង​ប្រាសាទ​ព្រះវិហារ​ដ៏​ចំណាស់​របស់​ខ្មែរ​អស់រយៈ​ពេលជាង​ពីរឆ្នាំ​មកហើយ។

ក្រុម​អ្នក​តាមដាន​សភាពការណ៍​បាន​ឱ្យ​ដឹង​ថា​ការចាប់ខ្លួន​និង​ការកាត់ទោស​តំណាងរាស្រ្ត​របស់ថៃ​នៅ​ពេល​នេះ​អាច​នាំឲ្យ​មាន​កង្វល់​ផ្នែក​ការ​ទូតឡើង​វិញ៕

XS
SM
MD
LG