ភ្ជាប់​ទៅ​គេហទំព័រ​ទាក់ទង

អ្នកភូមិ​បឹងកក់​ធ្វើបុណ្យ​សុំ​នៅ​បន្ត

  • ហេង​ រស្មី​

អ្នកភូមិ​បឹងកក់​ធ្វើពិធី បន់ស្រន់​ចង់​នៅ​​ក្នុង​តំបន់នេះ​ជាបន្ត។

ភ្នំពេញ៖ អ្នកភូមិ​បឹងកក់​បាន​បរាជ័យ​នៅ​ថ្ងៃ​ពុធ​នេះ​ក្នុង​ការធ្វើ​ពិធី​បុណ្យ​រាប់បាត្រ​ព្រះសង្ឃ​ចំនួន​៩៩អង្គ​ដែល​គ្រោង​ធ្វើ​នៅ​តំបន់​បឹងកក់​ជាទី​កន្លែង​ដែលមាន​ជម្លោះ​ដីធ្លី​ដ៏​រសើប​មួយ​ជាមួយ​ក្រុមហ៊ុន​ស៊ូកាគូ​ដោយសារ​តែ​អាជ្ញាធរ​បាន​រាំង​ខ្ទប់​ព្រះសង្ឃ​មិន​ឱ្យ​ចេញ​ពី​វត្ត។ ក៏ប៉ុន្តែ​ប្រជាពលរដ្ឋ​បាន​សម្រេច​មក​រាប់​បាត្រ​នៅ​វត្ត​ស្រះ​ចក​វិញ​ក្រោមការ​តាមឃ្លាំមើល​ពី​សមត្ថកិច្ច​ប្រដាប់​ដោយ​អាវុធ​ច្រើន​រាប់​សិប​នាក់។

ការបរាជ័យ​នេះ​ត្រូវ​បាន​អ្នកភូមិ​ចោទ​ប្រកាន់​ថា​ដោយ​សារ​តែ​អាជ្ញាធរ​សង្កាត់​ស្រះចក​បាន​អនុញ្ញាត​ឲ្យ​ច្បាប់​រួចហើយ​ក៏ប៉ុន្តែ​បែរជា​រាំងខ្ទប់​ព្រះសង្ឃ​មិនឲ្យ​ចេញ​ពីវត្ត​ទៅ​ចូលរួម​ពិធី​បុណ្យ​រាប់បាត្រ​នៅ​តំបន់​បឹងកក់​ជាទី​កន្លែង​ដែល​មាន​ជម្លោះ​ដីធ្លី​ដ៏រ៉ាំរ៉ៃ​មួយ​ជាមួយ​នឹង​ក្រុមហ៊ុន​ស៊ូកាគូ។

លោក​ឆាយ ធីរិទ្ធ ​ចៅសង្កាត់​ស្រះចក​ បាន​ពន្យល់​ប្រាប់​ប្រជាពលរដ្ឋ​ថា​លោក​បាន​អនុញ្ញាត​ច្បាប់​ឲ្យ​ធ្វើ​ពិធី​បុណ្យ​រាប់បាត្រ​នេះ​ក៏ប៉ុន្តែ​លោក​មិនបា​នរាំងខ្ទប់ព្រះសង្ឃ​មិនឲ្យ​និមន្ត​ចេញ​ពីវត្ត​ទៅ​ចូលរួម​រាប់បាត្រ​នោះ​ទេ។

ប្រជា​ពលរដ្ឋ​បាន​សម្រេចចិត្ត​ធ្វើដំណើរ​តាម​ផ្លូវ​ខ្លះ​ តាម​ម៉ូតូ​កង់បី​ខ្លះ​ ដើម្បី​មកធ្វើ​ពិធី​បុណ្យ​រាប់បាត្រ​នៅ​វត្ត​ស្រះចក​វិញ ​ក៏ប៉ុន្តែ​មាន​ព្រះសង្ឃ​ចូលរួម​ប្រមាណ​តែ​៥៥អង្គ​តែ​ប៉ុណ្ណោះ។

ព្រះតេជគុណ​ឈឹង ប៊ុនឈា ​នាយក​ខុទ្ទកាល័យ​សម្តេច​ព្រះសង្ឃរាជ​ទេព វង្ស ​និង​ជា​ព្រះចៅ​អធិការ​វត្ត​ស្រះចក​មាន​សង្ឃដីកា​ខ្លីប្រាប់​អ្នកកាសែត​ថា​ ព្រះអង្គ​អនុញ្ញាត​ឲ្យ​យក​ទីតាំង​វត្ត​ស្រះចក​នេះ​ធ្វើ​ពិធី​បុណ្យ​រាប់បាត្រ​តែ​ប៉ុណ្ណោះ។

«អា​នេះ​វាទាក់ទង​ទៅ​នឹង​បុណ្យទាន។ អញ្ចឹង​ទៅ​រៀបចំ​រាប់បាត្រ​ព្រះសង្ឃ ​ប្រគេន​ព្រះសង្ឃ​ បង្សុកូល​ទៅណ៎ា។​ ឆ្នាំថ្មី​បាន​សុខសប្បាយ»។

ប្រជាពលរដ្ឋ​ដែល​បាន​ចូលរួម​ពិធីបុណ្យ​រាប់បាត្រ​ភាគច្រើន​មកពី​តំបន់​បឹងកក់​បាន​ស្តី​បន្ទោស​អាជ្ញាធរ​ដែនដី​ដែល​បាន​រារាំង​ព្រះសង្ឃ​មិន​ឲ្យ​និមន្ត​រាប់បាត្រ​តាម​ការគ្រោងទុ​ក។

«អាពត​ វា​មិន​ឲ្យ​មាន​ព្រះពុទ្ធ​សាសនា​កើតឡើង​ទេ។ឥឡូវ​សម័យ​នេះ​ទៀត​ហើយ។ សម័យ​នេះ​កើត​ឡើង​ទៀត​ហើយ​ប្រជាជន​ធ្វើបុណ្យ​ធ្វើទាន​អត់បានទេ។ យុត្តិធម៌​នៅ​ឯណា​ ខ្ញុំសួរសិន?»

អ្នកស្រី​ហេង មុំ ​អាយុ​៤០​ឆ្នាំ​មក​ពី​ភូមិ​២២​ សង្កាត់​ស្រះចក ​ខណ្ឌ​ដូនពេញ ​បាន​និយាយ​ថា​ពិធីបុណ្យ​រាប់​បាត្រ​នៅ​ថ្ងៃ​នេះ​គឺ​ដើម្បី​ឲ្យ​ប្រជាពលដ្ឋ​ដែល​រស់នៅ​ក្នុង​តំបន់​បឹងកក់​បាន​បន្ត​រស់នៅ​លើដី​របស់​ពួកគេ​តទៅ​ទៀត​បន្ទាប់ពី​ពួកគេ​ចំនួន​ប្រាំពីរភូមិ​បាន​ប្រឈម​នឹង​ការ​បណ្តេញចេញ​ដោយ​បំពារ​បំពាន។

«ខ្ញុំមាន​ការសោកស្តាយ​និង​ឈឺចាប់​ជាទី​បំផុត​ហើយ។​ ខ្ញុំ​ឈឺ​ចិត្ត​ខ្លួនខ្ញុំ​ជាខ្មែរ​ ហេតុអ្វី​រស់នៅ​លើ​ដីខ្មែរ​មិន​បាន?​ ខ្ញុំ​ធ្វើបុណ្យ​ទៅតាម​ព្រះពុទ្ធសាសនា​ខ្មែរ​ក៏មិន​បាន។ ​តើហេតុអ្វី? ខ្ញុំ​ឆ្ងល់​ខ្លួនខ្ញុំ។ ​ខ្ញុំឆ្ងល់​ទៅ រដ្ឋាភិបាល​ទាំងអស់។ ​ចុះ​ហេតុអ្វី​បាន​ជាគាត់​ធ្វើអញ្ចឹង​ចំពោះ​ប្រជាពលរដ្ឋ​ដែល​ពួកខ្ញុំ​ដែល​ជាអ្នកក្រ​ទន់ ខ្សោយ​បំផុត»។

អ្នកស្រី​ហេង មុំ ​បាន​និយាយ​ទៀត​ថា​ ពិធីបុណ្យ​រាប់បាត្រ​ព្រះសង្ឃ​ចំនួន​៩៩​អង្គ​នេះ​គឺ​តំណាងឲ្យ​ក្រុមហ៊ុន​ស៊ូកាគូ​ដែល​បាន​ចុះ​កិច្ចព្រមព្រៀង​ជាមួយ​សាលាក្រុង​ភ្នំពេញ​ក្នុង​ការជួលដី​បឹងកក់​ ទំហំ​ជាង​១៣០​ហិកតា​រយៈពេល​៩៩ឆ្នាំ។

ក្រុមហ៊ុន​ស៊ូកាគូ ​របស់​លោក​ឧកញ៉ា​ឡៅ ម៉េងឃីន ​សមាជិក​ព្រឹទ្ធសភា​ខាង​គណបក្ស​ប្រជាជន​កម្ពុជា​ដ៏​មាន​ឥទ្ធិពល​មួយ​នោះ​បាន​បន្ត​បូមដី​ដើម្បី​ចាក់បំពេញ​បឹងកក់​និង​បាន​លុប​ផ្ទះ​ប្រជាពលរដ្ឋ​ជាច្រើន​គ្រួសារ។

ប្រជា​ពលរដ្ឋ​ដែល​រស់​នៅ​ក្នុង​តំបន់​បឹងកក់​បាន​តវ៉ា​ជាច្រើន​លើក​ច្រើនសារ​ក៏ប៉ុន្តែ​ពុំមាន​ដំណោះស្រាយ​ជាក់លាក់​ណាមួយ​ពីរដ្ឋាភិបា​ល​ទេ។

ក្រុមហ៊ុន​ស៊ូកាគូ ​បាន​ផ្តល់​សំណង​ដល់​ប្រជាពលរដ្ឋ​ក្នុង​មួយគ្រួសារ​ទឹក​ប្រាក់​ប្រមាណ ៨.០០០ ដុល្លារ​សហរដ្ឋ​អាមេរិក។ ក៏​ប៉ុន្តែ​ប្រជា​ពលរដ្ឋ​ដែល​រស់នៅ​លើ​គោក​ភាគច្រើន​បាន​ជំទាស់​ដោយសារតែ​ពួកគេ​ទាមទារ​សំណង​សមរម្យ​ទៅតាម​តម្លៃ​ទី​ផ្សារ។

ក្រុម​ហ៊ុនស៊ូកាគូ​នេះ​មាន​គម្រោង​អភិវឌ្ឍ​បឹងកក់​ទៅជា​មជ្ឈមណ្ឌល​ពាណិជ្ជកម្ម​ទំនើបៗ​សណ្ឋាគារ​ និង​ផ្ទះល្វែង​ក៏ប៉ុន្តែ​ប្រជា​ពលរដ្ឋ​ដែល​រស់នៅ​ក្នុង​តំបន់​បឹងកក់​បាន​ចាត់ទុក​ថា​ការអភិវឌ្ឍ​នេះ​បាន​ធ្វើឲ្យ​ពួកគេ​រស់នៅ​លើ​គំនរ​ទឹកភ្នែក៕

XS
SM
MD
LG