បន្ទាប់ពីក្រុមហ៊ុនស៊ូកាគូអ៊ីនវាយកម្ទេចផ្ទះប្រជាពលរដ្ឋនៅតំបន់បឹងកក់ ជនរងគ្រោះបានទៅបន់ស្រន់តាមព្រះពុទ្ធសាសនានៅព្រះអង្គដងកើ។ ការបន់ស្រន់នេះជាជំរើសចុងក្រោយ បន្ទាប់ពីអ្នកស្រុកបាត់បង់ជំនឿលើអន្តរាគមន៍ពីរដ្ឋាភិបាលក្នុងរឿងជម្លោះដីធ្លីដ៏រាំរ៉ៃកណ្តាលទីក្រុងភ្នំពេញ។
ក្រុមអ្នកស្រុករស់នៅតំបន់បឹងកក់ នៅថ្ងៃអង្គារនេះ បានសម្រេចជម្រើសចុងក្រោយមកបន់ស្រន់ទៅតាមជំនឿព្រះពុទ្ធសាសនា នៅព្រះអង្គដងកើ ជាទីកន្លែងដ៏ស័ក្តិសិទ្ធិមួយរបស់ប្រទេសកម្ពុជា ដើម្បីឲ្យពួកគេបានរស់នៅតំបន់បឹងកក់តទៅទៀត។
«សូមព្រះអង្គជួយ សូមឲ្យអ្នកពាក់ព័ន្ធ សូមឲ្យតែរលាយៗ តែសូមឲ្យកូនចៅមានសេចក្តីសុខ។ ប្រសិនជាព្រះអង្គមានវត្ថុស័ក្តិសិទ្ធិពិតមែន សូមឲ្យតែអ្នកមានពាក់ព័ន្ធទាំងប៉ុន្មានសូមឲ្យរលាយ»។
ការបន់ស្រន់នេះបានកើតមានឡើងក្រោយពីផ្ទះរបស់ប្រជាពលរដ្ឋនៅភូមិ១ សង្កាត់ ស្រះចក ខណ្ឌដូនពេញ ត្រូវបានក្រុមហ៊ុនស៊ូកាគូអ៊ីន របស់លោកឧកញ៉ាឡាវ ម៉េងឃីន សមាជិកព្រឹទ្ធសភាខាងគណបក្សប្រជាជនកម្ពុជាវាយកម្ទេច។
«ពេលនេះ ប្រជាជនអត់មានដឹងជម្រើសទៅណាទេ ហៅមេឃ មេឃក៏មិនឮ ហៅដី ដីក៏មិនឆ្លើយ។ ពេលនេះមានតែជម្រើសហ្នឹងហើយ មានតែព្រះអង្គទេ ដែលស័ក្តិសិទ្ធិ»។
ប្រជាពលរដ្ឋបាននិយាយថា មូលហេតុដែលពួកគេមកបន់ស្រន់នៅព្រះអង្គដងកើនេះ គឺដោយសារតែពួកគេគ្មានជំនឿថា រដ្ឋាភិបាលនឹងជួយអន្តរាគមន៍នៅក្នុងរឿងជម្លោះដីធ្លីដ៏រាំរៃ នៅតំបន់បឹងកក់នេះទេ។
អ្នកស្រីលី មុំ អាយុ៤៣ឆ្នាំ ប្រជាពលរដ្ឋរស់នៅភូមិ២៤ បាននិយាយថា មានតែព្រះអង្គដងកើទេ ដែលអាចជួយបន្ទន់ចិត្តដល់ក្រុមហ៊ុនឲ្យជួយដោះស្រាយរឿងជម្លោះដីធ្លីនេះ។
ក៏ប៉ុន្តែទោះជាយ៉ាងណាក៏ដោយ ក៏អ្នកស្រីលី មុំបានដាក់បណ្តាសារដល់ក្រុមហ៊ុន ដែលបានរំលោភបំពានមកលើប្រជាពលរដ្ឋតាមសំនៀងដើមយ៉ាងដូច្នេះថា៖
«ខ្ញុំសូមដាក់បណ្តាសារថា បើសិនជាអស់អ្នកឯងទូលដីហើយឲ្យវិនាស ហើយអ្នកឯងយកទៅក៏មិនបានសេចក្តីសុខដែរ។ បើអ្នកឯងចង់បាន សូមឲ្យយកទៅដល់ទីកន្លែងណា អ្នកឯងជួបតែវិនាស ព្រាត់ប្រាស់ប្តី ប្រពន្ធ ក្រុមគ្រួសារអ្នកឯងរហូត»។
តំណាងក្រុមហ៊ុនស៊ូកាគូអ៊ីនពុំអាចស្នើសុំសេចក្តីអត្ថាធិប្បាយបំភ្លឺបានទេនៅថ្ងៃអង្គារនេះ។
ក្រុមហ៊ុនស៊ូកាគូអ៊ីនបានចុះកិច្ចព្រមព្រៀងជាមួយសាលាក្រុងភ្នំពេញ ដើម្បីជួលដីបឹងកក់ ទំហំជាង១២៥ហិកតារយៈពេល៩៩ឆ្នាំ។ ក្រុមហ៊ុននេះមានគម្រោងសាងសង់មជ្ឈមណ្ឌលពាណិជ្ជកម្មទំនើបៗ សណ្ឋាគារ និងផ្ទះល្វែង។
ក៏ប៉ុន្តែការអភិវឌ្ឍនេះបានធ្វើឲ្យប្រជាពលរដ្ឋរស់នៅតំបន់បឹងកក់រាប់ពាន់គ្រួសារ បានទទួលរងផលប៉ះពាល់។
កាលពីថ្ងៃច័ន្ទ ក្រុមហ៊ុនស៊ូកាគូអ៊ីនបានវាយកម្ទេចផ្ទះអ្នកស្រុកប្រមាណប្រាំបីខ្នងយ៉ាងតិច និងជាច្រើនគ្រួសារផ្សេងទៀត កំពុងតែប្រឈមមុខនឹងផលប៉ះពាល់ ដោយសារតែការបូមខ្សាច់កប់ផ្ទះរបស់ពួកគេ។
ក្រុមហ៊ុនស៊ូកាគូអ៊ីនបានផ្តល់សំណងចំនួន៨.០០០ដុល្លារសហរដ្ឋអាមេរិក និងទឹកប្រាក់ចំនួន២.០០០.០០០ រៀល សម្រាប់ប្រជាពលរដ្ឋ ដែលរស់នៅលើផ្ទៃបឹងកក់។ ក៏ប៉ុន្តែអ្នកស្រីលី មុំបាននិយាយថា ឥឡូវនេះក្រុមហ៊ុនបានបង្ខំឲ្យប្រជាពលរដ្ឋរស់នៅលើគោកទទួលយកគោលការណ៍ទាំងនេះ។
«ក្រុមហ៊ុនបានបង្ខំប្រជាជន បានយកលេខកូដទៅចុចហៅប្រជាជននៅភូមិ១ថា ត្រូវតែទៅយកជម្រើសគោលការណ៍៨.០០០ដុល្លារ និងលុយ២.០០០.០០០រៀល ប្រសិនជាមិនទៅយកទេ ក្នុងវេលាថ្ងៃស្អែកហ្នឹង គឺឱសានវាទចូលមកដល់គឺគេលុប គេបូមទឹកពន្លិចហើយ។ គេមិនដោះស្រាយឲ្យលុយទៀតទេ»។
អ្នកស្រីលី មុំបានមានប្រសាសន៍ទៀតថា នៅពេលខាងមុខនេះ ប្រជាពលរដ្ឋចំនួនប្រាំពីរភូមិ និងជួនដំណឹងទៅសាលាក្រុងភ្នំពេញ ដើម្បីធ្វើមហាបាតុកម្មដ៏ធំមួយនៅទីលានសេរីភាពដើម្បីប្រឆាំងជំទាស់នឹងក្រុមហ៊ុនស៊ូកាគូអ៊ីន៕