នៅក្នុងដំណើរទស្សនកិច្ចទៅកាន់ប្រទេសកម្ពុជាចាប់ពីថ្ងៃទី ៣ ដល់ថ្ងៃទី ៥ ខែសីហា រដ្ឋមន្ត្រីការបរទេសសហរដ្ឋអាមេរិកលោក Antony Blinken បានលើកឡើងថា សហរដ្ឋអាមេរិក «ចង់បានទំនាក់ទំនងវិជ្ជមានជាមួយប្រទេសកម្ពុជា» ក្នុងគ្រប់វិស័យ បើទោះបីជាកំណត់ត្រានៃមិត្តភាពរវាងប្រទេសទាំងពីរនេះមានភាពរង្គោះរង្គើរជាបន្តបន្ទាប់ ជាពិសេសពាក់ព័ន្ធនឹងស្ថានភាពធ្លាក់ចុះនៃលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជាក្តី។
លោក Blinken បានថ្លែងថា៖ «យើងចង់ពង្រឹងទំនាក់ទំនងរបស់យើងដោយផ្អែកលើមូលដ្ឋានល្អដែលប្រទេសយើងទាំងពីរបានបង្កើតរួចហើយនោះ។ យើងមានមោទនភាព ក្នុងការដែលសហរដ្ឋអាមេរិក គឺជាទីផ្សារដ៏ធំបង្អស់ដល់កម្ពុជានាំចេញផលិតផលរបស់ខ្លួន។ ពិតណាស់ យើងបានឃើញផលិតកម្មដ៏ល្អមួយចំនួន ដូចជាគ្រាប់ចន្ទី និងស្វាយ ដែលយើងកំពុងធ្វើកិច្ចការជួយកសិករទាំងអស់នោះអាចនាំចេញទៅកាន់ទីផ្សារអន្តរជាតិផ្សេងៗទៀត»។
លោករដ្ឋមន្ត្រីការបរទេសអាមេរិកបានថ្លែងដូច្នេះ នៅក្នុងបទសម្ភាសន៍ផ្តាច់មុខជាមួយក្រុមអ្នកសារព័ត៌មានវីអូអេប្រចាំរាជធានីភ្នំពេញ កាលពីថ្ងៃសុក្រ។
កាលពីឆ្នាំ ២០២១ កម្ពុជាបាននាំចេញផលិតផលដែលមានតម្លៃជាទឹកប្រាក់ប្រមាណ ៨.៧ ពាន់លានដុល្លារ ទៅសហរដ្ឋអាមេរិក ដែលមានតម្លៃកើនឡើងជាង ៣៣ ភាគរយ បើធៀបនឹងឆ្នាំ ២០២០។ ផលិតផលក្នុងវិស័យកាត់ដេរ ស្បែកជើង និងការធ្វើដំណើរទេសចរណ៍ ជាផលិតផលភាគច្រើនដែលកម្ពុជាបាននាំចេញទៅសហរដ្ឋអាមេរិក។ វិស័យទាំងនេះបានផ្តល់ការងារដល់ប្រជាពលរដ្ឋកម្ពុជាជាង ១ លាននាក់ ក្នុងនោះភាគច្រើនជាស្ត្រី។ នេះបើយោងតាមទិន្នន័យរបស់ក្រសួងការបរទេសសហរដ្ឋអាមេរិក។
កាលពីថ្ងៃព្រហស្បតិ៍ លោក Blinken បានប្រកាសអំពីគម្រោង Harvest III ដែលមានទឹកប្រាក់ ២៥ លានដុល្លារ ដែលនឹងផ្តល់ទំនុកបម្រុងដល់ការអភិវឌ្ឍវិស័យកសិកម្មរយៈពេល ៥ ឆ្នាំ នៅក្នុងប្រទេសកម្ពុជា ដើម្បីលើកកម្ពស់សន្តិសុខស្បៀងអាហារ និងកំណើនសេដ្ឋកិច្ចរបស់កម្ពុជា តាមរយៈកិច្ចការដឹកនាំរបស់ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ (USAID) ប្រចាំកម្ពុជា។
ក្រៅពីវស័យសេដ្ឋកិច្ច លោក Blinken ក៏បានលើកឡើងថា សហរដ្ឋអាមេរិក«មានមោទនភាព» ដែលបានក្លាយជាដៃគូរបស់កម្ពុជា ក្នុងការផ្តល់ជំនួយជាវ៉ាក់សាំងបង្ការជំងឺរាតត្បាតកូវីដ ១៩ ដល់ប្រជាពលរដ្ឋកម្ពុជា ដែលកំពុងរងផលប៉ះពាល់ខាងសេដ្ឋកិច្ចនិងសុខភាពសាធារណៈដោយសារតែវិបត្តិរ៉ាំរ៉ៃនៃជំងឺមួយនេះ។ ចាប់តាំងពីវិបត្តិកូវីដបានរាតត្បាតកម្ពុជានិងពិភពលោក សហរដ្ឋអាមេរិកបានផ្តល់ជំនួយជាសម្ភារៈសុខាភិបាល ដែលមានតម្លៃជាទឹកប្រាក់សរុបប្រមាណ ១៥.៣ លានដុល្លារ និងវ៉ាក់សាំងចំនួន ៣ លានដូស តាមរយៈយន្តការ COVAX របស់អង្គការសុខភាពពិភពលោក។
លោក Blinken បានថ្លែងថា៖ «យើងពិតជាមានមោទនភាពខ្លាំងណាស់ ដែលបានផ្តល់វ៉ាក់សាំង ក្នុងអំឡុងវិបត្តិកូវីដ ហើយយើងបរិច្ចាគ ដោយមិនយកប្រយោជន៍មកវិញនោះទេ ដើម្បីជួយកម្ពុជាទប់ទល់នឹងវិបត្តិជំងឺរាតត្បាតកូវីដនេះ»។
នៅក្នុងសន្និសីទសារព័ត៌មានមួយ ក្រោយពីកិច្ចប្រជុំកំពូលស្តីពីអាស៊ីខាងកើតដែលជាផ្នែកមួយកិច្ចប្រជុំកំពូលរបស់រដ្ឋមន្ត្រីការបរទេសអាស៊ានលើកទី ៥៥ លោករដ្ឋមន្ត្រីការបរទេស Blinken បានថ្លែងប្រាប់អ្នកសារព័ត៌មានជាតិនិងអន្តរជាតិថា លោកពិតជាជាប់ចិត្តនឹងភាពរួសរាយរាក់ទាក់និងភាពកក់ក្តៅរបស់ប្រជាជនកម្ពុជា ដែលបានស្វាគមរូបលោក ក្នុងដំណើរទស្សនកិច្ចលើកដំបូងរបស់លោកមកកាន់កម្ពុជា។
ដោយឡែកវិស័យមួយនៅកម្ពុជា ត្រូវបានយកចិត្តទុកដាក់ខ្ពស់ពីសំណាក់ប្រមុខការទូតអាមេរិកជាន់ខ្ពស់រូបនេះ នោះគឺវិស័យវប្បធម៌ និងការការពារបេតិកភណ្ឌកម្ពុជា ដូចជារូបបដិមា និងវត្ថុបុរាណខ្មែរ ដែលត្រូវបានបាត់បង់ដោយសារសង្គ្រាមក្នុងប្រទេសមួយនេះ។
លោក Blinken បានថ្លែងនៅក្នុងបទសម្ភាសន៍ផ្តាច់មុខជាមួយ VOA ថា៖ «កិច្ចការមួយដែលខ្ញុំមានមោទនភាពខ្លាំងផងដែរនោះ គឺថា យើងបាននិងកំពុងប្រគល់រូបបដិមាបេតិកភណ្ឌវប្បធម៌ ដែលត្រូវបានលួចចេញពីប្រទេសកម្ពុជា ហើយធានាថាវត្ថុបុរាណទាំងអស់នេះត្រូវបានប្រគល់ឲ្យកម្ពុជាវិញ។ ខ្ញុំយកចិត្តទុកដាក់ខ្លាំងណាស់ ចំពោះកិច្ចការការពារវប្បធម៌នេះ»។
កាលពីពាក់កណ្តាលខែកក្កដាកន្លងទៅនេះ សហរដ្ឋអាមេរិកបានប្រគល់វត្ថុបុរាណចំនួន ២៧ ដុំ ដែលត្រូវបានលួចចេញពីកម្ពុជាឲ្យកម្ពុជាវិញ។ ចាប់តាំងពីមានការចុះអនុស្សារណយោគយល់គ្នា រវាងដ្ឋាភិបាលកម្ពុជានិងសហរដ្ឋអាមេរិកស្តីពីកិច្ចសហប្រតិបត្តិការផ្នែកវប្បធម៌មក សហរដ្ឋអាមេរិកបានប្រគល់រូបបដិមា និងវត្ថុបុរាណប្រមាណ ១០០ ដុំដល់កម្ពុជាវិញ។
លោក Antony Blinken បានក្លាយជាប្រមុខការទូតជាន់ខ្ពស់របស់សហរដ្ឋអាមេរិក ដែលបានមកធ្វើដំណើរទស្សនកិច្ចនៅកម្ពុជា ក្នុងឆ្នាំ ២០២២ ក្រោមរដ្ឋបាលថ្មីរបស់ប្រធានាធិបតីលោក Joe Biden បន្ទាប់ពីរដ្ឋមន្ត្រីការបរទេសអាមេរិកលោក John Kerry ក្រោមរដ្ឋបាលរបស់ប្រធានាធិបតីលោក Barack Obama កាលពីឆ្នាំ ២០១៦ និងលោកស្រី Hillary Clinton កាលពីឆ្នាំ ២០១២៕
