លោកប្រធានាធិបតី Joe Biden បានមានប្រសាសន៍កាលពីថ្ងៃព្រហស្បតិ៍ថា លោកមិនអាចផ្ទេរប្រាក់ដោយត្រឹមត្រូវតាមច្បាប់ពីផែនការសាងសង់របាំងថ្មីចម្ងាយជាច្រើន គីឡូម៉ែត្រ តាមបណ្តោយព្រំដែនខាងត្បូង ដែលផ្ទុយស្រឡះពីការសន្យានៅពេលលោកឃោសនាបោះឆ្នោតដែលថា៖ «មិនស្ថាបនាជញ្ជាំងមួយម៉ែត្រណាទៀតទេ»ហើយការសម្រេចចិត្តលើកនេះនាំឱ្យមានការរិះគន់ខ្លាំងពីប្រធានាធិបតីប្រទេសម៉ិកស៊ិក។
សេចក្តីប្រកាសមួយអនុញ្ញាតឱ្យមានការកសាងជញ្ជាំងនេះបានចេញផ្សាយកាលពីយប់ថ្ងៃពុធ នៅក្នុងបញ្ជីសហព័ន្ធ Federal Register ដែលជាឯកសារបោះពុម្ពផ្សាយសេចក្តីប្រកាសខាងផ្លូវច្បាប់របស់រដ្ឋាភិបាល។
រដ្ឋមន្ត្រីក្រសួងសន្តិសុខមាតុភូមិអាមេរិកលោក Alejandro Mayorkas បាននិយាយនៅក្នុងសេចក្តីប្រកាសនេះថា៖ «នៅពេលនេះ មានសេចក្តីត្រូវការខ្លាំងនិងជាបន្ទាន់ដើម្បីកសាងរបាំងនិងផ្លូវនៅជិតព្រំដែន»។
អាជ្ញាធរគយនិងការពារព្រំដែនសហរដ្ឋអាមេរិកបានរាប់ឃើញជនចំណាកស្រុក ២៣២.៩៧២នាក់ នៅតាមព្រំដែននិរតីកាលពីខែសីហា ដែលជាតួលេខមាននៅពេលនោះ។ ជនចំណាកស្រុកភាគច្រើនឆ្លងកាត់ព្រំដែនតាមដីពីប្រទេសម៉ិកស៊ិក អែលសាវ៉ាឌ័រ ហ្គាតេម៉ាឡា និងហុងឌុយរ៉ាស់។
ប្រធានាធិបតីប្រទេសម៉ិកស៊ិកបានសម្តែងការមិនយល់ព្រមភ្លាមៗដល់ចំណាត់ការនេះ។
ដើម្បីអនុញ្ញាតការស្ថាបនានេះ រដ្ឋបាលលោកBiden ត្រូវតែលើកលែងបទបញ្ញត្តិសហព័ន្ធមួយចំនួន ទាក់ទិននឹងបញ្ហាបរិដ្ឋាន បញ្ហាប្រវត្តិសាស្ត្រនិងបញ្ហាជនជាតិដើមម្ចាស់ស្រុក។ លោក Biden បានជជែកបង្ហាញហេតុផលដែរថា ថវិកាសម្រាប់ការកសាងជញ្ជាំងនេះត្រូវបានរៀបចំឡើងក្នុងឆ្នាំ ២០១៩ ដោយរដ្ឋបាលមុន៕
