ការជំនុំជម្រះលោកត្រាំសប្តាហ៍ដំបូងមានការខ្វែងគំនិតគ្នារឿងសាក្សី
ដំណើរការជំនុំជម្រះដើម្បីសម្រេចអំពីការដកប្រធានាធិបតីត្រាំពីតំណែង បានប្រព្រឹត្តទៅពេញលេញនៅក្នុងព្រឹទ្ធសភាសហរដ្ឋអាមេរិកកាលពីថ្ងៃអង្គារ ដោយគូភាគីបានតតាំងគ្នាដើម្បីសម្រេចអំពីបទបញ្ជាផ្ទៃក្នុងនានាដែលនឹងកំណត់អំពីនីតិវិធីបន្ត។ នេះគឺជាលើកទី៣ ប៉ុណ្ណោះនៅក្នុងប្រវត្តិសាស្ត្រសហរដ្ឋអាមេរិកដែលនីតិវិធីនេះត្រូវបានគេប្រើប្រាស់ ដើម្បីឲ្យសមាជិកព្រឹទ្ធសភាត្រូវបោះឆ្នោតសម្រេចថានឹងដកប្រធានាធិបតីពីតំណែងឬអត់។ ក្រុមអ្នកតំណាងរាស្ត្រមកពីគណបក្សប្រជាធិបតេយ្យបានអះអាងថា គេគួរអនុញ្ញាតឲ្យមានការកោះហៅសាក្សីមកផ្តល់សក្ខីកម្ម ដើម្បីជួយពួកគេឲ្យអាចមានមូលដ្ឋានគ្រប់គ្រាន់ដើម្បីចោទប្រកាន់លោកត្រាំអំពីករណីរំលោភអំណាច។ អ្នកឆ្លើយឆ្លងព័ត៌មាននៃ VOA ប្រចាំសភាជាតិសហរដ្ឋអាមេរិកគឺអ្នកស្រី Katherine Gypson រាយការណ៍អំពីរឿងនេះ ហើយលោក សឹង សុផាត ជូនសេចក្តីប្រែសម្រួល។