ភ្នំពេញ៖ ប្រទេសបង់ក្លាដេសត្រូវការទិញអង្ករចំនួនពីរសែនតោនពីប្រទេសកម្ពុជា និងសន្យាថា នឹងបង្កើនទំនាក់ទំនងផ្នែកពាណិជ្ជកម្មរវាងប្រទេសទាំងពីរបន្ថែមទៀត ស្របពេលការនាំចេញទំនិញនៅមានកម្រិតទាបនៅឡើយ។ ការអះអាងនេះបានធ្វើឡើងក្នុងជំនួបគ្នាមួយកាលពីថ្ងៃច័ន្ទនេះ រវាងលោកស្រី ឌីពូ ម៉ូនី រដ្ឋមន្រ្តីក្រសួងការបរទេសបង់ក្លាដេស ជាមួយលោកឧបនាយករដ្ឋមន្រ្តី ហោ ណាំហុងនៅក្នុងដំណើរទស្សនកិច្ចចំនួនពីរថ្ងៃក្នុងប្រទេសកម្ពុជា។
លោក កុយ គួង អ្នកនាំពាក្យក្រសួងការបរទេស បានថ្លែងប្រាប់វីអូអេសំឡេងសហរដ្ឋអាមេរិកថា ប្រទេសបង់ក្លាដេសក៏មានគម្រោងចុះកិច្ចព្រមព្រៀងរយៈពេលយូរជាមួយនឹងប្រទេសកម្ពុជាលើផលិតផលកសិកម្មផងដែរ។
លោក កុយ គួងបានមានប្រសាសន៍ថា៖
«ដោយសារតែប្រទេសយើងទាំងពីរមានទំនាក់ទំនងការទូតឡើងវិញឆ្នាំ១៩៩៣ហើយមានកិច្ចព្រមព្រៀងផ្នែកពាណិជ្ជកម្មនៅឆ្នាំ២០០៦ដូច្នេះភាគីទាំងពីរនឹងជំរុញឲ្យមានការផ្លាស់ប្តូរពាណិជ្ជកម្មឲ្យបានកាន់តែទូលំទូលាយថែមទៀតជាពិសេសគឺថា ខាងបង់ក្លាដេសនឹងផ្តើមឲ្យមានគណប្រតិភូផ្នែកសេដ្ឋកិច្ចពាណិជ្ជកម្ម និងឲ្យមានការផ្លាស់ប្តូរទស្សនកិច្ចគ្នាទៅវិញទៅមកដើម្បីផ្លាស់ប្តូរបទពិសោធ»។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជាបានឲ្យដឹងថា លោកស្រីរដ្ឋមន្រ្តីក្រសួងការបរទេសបង់ក្លាដេសបានមកបំពេញទស្សនកិច្ចជាផ្លូវការនៅក្នុងប្រទេសកម្ពុជាចំនួនពីរថ្ងៃ ដោយចាប់ផ្តើមពីថ្ងៃច័ន្ទរហូតដល់ថ្ងៃអង្គារ៍។
នៅក្នុងដំណើរទស្សនកិច្ចនេះលោកស្រី ឌីពូ ម៉ូនីនឹងក្រាបបង្គំគាល់ព្រះមហាក្សត្រចូលជួបលោកនាយករដ្ឋមន្រ្តីហ៊ុន សែន លោកឧបនាយករដ្ឋមន្រ្តី ហោ ណាំហុង និងជួបជាមួយលោកចាន់ សារុន រដ្ឋមន្រ្តីក្រសួងកសិកម្ម។
លោកកុយ គួង បានមានប្រសាសន៍ថា ប្រទេសបង់ក្លាដេស បានសន្យាថា នឹងជំរុញអ្នកវិនិយោគទុនមកធ្វើកិច្ចសហប្រតិបត្តិការជាមួយប្រទេសកម្ពុជាឲ្យកាន់តែច្រើនថែមទៀត។
ប្រទេសកម្ពុជាបានភ្ជាប់ទំនាក់ទំនងផ្នែកពាណិជ្ជកម្មជាមួយនឹងប្រទេសបង់ក្លាដេសតាំងពីឆ្នាំ២០០៦ ក៏ប៉ុន្តែការនាំទំនិញចេញទៅប្រទេសទាំងពីរនៅមានកម្រិតទាបនៅឡើយ។
នៅក្នុងឆ្នាំ២០០៩ កម្ពុជាបាននាំទំនិញទៅប្រទេសបង់ក្លាដេសចំនួនតែជាង ៤០០.០០០ដុល្លារតែប៉ុណ្ណោះ ហើយប្រទេសបង់ក្លាដេស បាននាំទំនិញចូលមកកម្ពុជាវិញចំនួនជាង ១,៣លានដុល្លារសហរដ្ឋអាមេរិក។
លោកកុយ គួង បានមានប្រសាសន៍ថា ប្រទេសទាំងពីរនឹងបង្កើនចុះកិច្ចព្រមព្រៀងបន្ថែមទៀតដូចជា វិស័យវប្បធម៌ ការការពារវិនិយោគទុន ហើយជាពិសេសផ្តោតទៅលើវិស័យកសិកម្ម។
យោងតាមតួលេខរបស់ក្រសួងកសិកម្មបានឲ្យដឹងថា នៅក្នុងឆ្នាំ២០១០នេះ កម្ពុជាសល់ស្រូវចំនួន៣,៧ លានតោននិងអង្ករចំនួន ២,៤ លានតោន។
នៅក្នុងឆ្នាំ២០១០ កសិករនៅទូទាំងប្រទេសកម្ពុជាផលិតស្រូវបានចំនួន៧,៩លានតោននិងអង្ករចំនួន៤,៤លានតោន។
យោងតាមតួលេខនេះ លោកកុយ គួង បានមានប្រសាសន៍ថា កម្ពុជាអាចមានលទ្ធភាពនាំអង្ករចេញទៅក្រៅប្រទេសបាន។
នៅក្នុងឆ្នាំ២០០៨ នៅពេលដែលពិភពលោកជួបនូវវិបត្តិហិរញ្ញវត្ថុជាសកលប្រទេសកម្ពុជាសល់ស្រូវប្រមាណ ២,៥លានតោន ហើយនៅក្នុងឆ្នាំ២០០៩ កម្ពុជាសល់ស្រូវប្រមាណ៣,៥លានតោន៕