បីថ្ងៃបន្ទាប់ពីស្នូរកាំភ្លើងនៃការប្រយុទ្ធគ្នារវាងកងទ័ពកម្ពុជា និងកងទ័ពថៃនៅព្រំដែនខេត្តឧត្តរមានជ័យ និងខេត្តសុរិន្ទរបស់ថៃបានបញ្ចប់ អាជ្ញាធរកម្ពុជាបានចាប់ផ្ដើមបោសសម្អាតគ្រាប់កាំភ្លើង ដែលបាញ់ផ្លោងដោយភាគីជម្លោះរបស់ខ្លួន។ គ្រាប់ ដែលបានធ្លាក់នៅរាយប៉ាយ យ៉ាងហោចណាស់នៅក្នុងឃុំចំនួន៤ក្នុងខេត្តឧត្តរមានជ័យ និងមាននៅជុំវិញប្រាសាទព្រះវិហារ ហើយដែលគេជឿថា គ្រាប់មួយចំនួនមិនទាន់ផ្ទុះនៅឡើយ ហើយដែលអាចបង្កគ្រោះថ្នាក់យ៉ាងធ្ងន់ធ្ងរដល់ប្រជាពលរដ្ឋ និងដល់កិច្ចការកសិកម្មរបស់ពួកគាត់ក្នុងរដូវវស្សានេះ។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ (CMAC) មានប្រសាសន៍នៅថ្ងៃសុក្រនេះថា មជ្ឈមណ្ឌលបានបញ្ជូនកម្លាំងមួយចំនួនទៅសំអាតគ្រាប់ មិនទាន់ផ្ទុះ និងអំបែងគ្រាប់ដែលបានផ្ទុះនៅក្នុងតំបន់ជម្លោះទាំងនោះ។
«ចែកចេញជាយុទ្ធសាស្រ្តពង្រាយកម្លាំងជាពីរដំណាក់កាលធំៗគឺទី១ ផ្តល់ការអប់រំ និងកសាងបណ្តាញស្ម័គ្រចិត្តតាមភូមិ ដើម្បីពេលណាដែលគាត់ជួបប្រទះគ្រាប់យុទ្ឋភណ្ឌមិនទាន់ផ្ទុះ ងាយស្រួលទាក់ទងគ្នា និងធ្វើអន្តរាគមន៍។ ចំណុចទី២ យើងចាប់ផ្តើមពង្រាយកម្លាំងបោសសម្អាត អញ្ចឹងត្រឹមតែពីរបីថ្ងៃ។ កម្លាំងយើងចល័តតូចៗអន្តរាគមន៍។ យើងកំពុងធ្វើការ ហើយកម្លាំងធំនឹង ចាប់ផ្តើមបោសសម្អាតតំបន់លំនៅដ្ឋាន សាលារៀន វត្តអារាមជាដើម។ល។»
ទោះជាយ៉ាងណា លោក ហេង រតនា មិនទាន់អាចបញ្ជាក់អំពីទំហំដីដែលត្រូវបោសសម្អាត គ្រាប់ និងគ្រាប់មិនទាន់ផ្ទុះនោះទេ ដោយលោកបានឲ្យដឹងថា ស៊ីម៉ាក់ កំពុងតែធ្វើការសិក្សា។
លោកវ៉ាត់ ប៉ារ៉ានីន ប្រធានរដ្ឋបាលសាលាខេត្តឧត្តរមានជ័យបានប៉ាន់ប្រមាណថា យ៉ាងតិចបំផុតផ្ទៃដីប្រមាណជា១ម៉ឺនហិកតា ត្រូវធ្វើការសម្អាតគ្រាប់ផ្សេងៗ ដែលបានធ្លាក់នៅពេលប្រយុទ្ធគ្នាក្នុងនោះផ្ទៃដីប្រហែលជា៤ពាន់ហិកតាជាផ្ទៃដីកសិកម្មរបស់ប្រជាពលរដ្ឋ។ លោកបានប្រាប់វីអូអេខ្មែរថា៖
«យើងមានការអប់រំណែនាំ ហើយវិធីល្អគេហៅថា យើងទំាងអស់គ្នារួមគ្នាពិនិត្យអំបែងគ្រាប់ និងយុទ្ឋភណ្ឌមិនទាន់ផ្ទុះ។ ស្រែចម្ការរបស់គាត់ ពេលដែលគាត់ទៅ គាត់មិនអាចទៅភ្ជួរភ្លាមទេ។ គាត់អាចដើរពិនិត្យមើល បើមាន គឺគាត់រាយការណ៍ បើអត់ទេ គាត់អាចធ្វើធម្មតា»។
លោកនាយករដ្ឋមន្រ្តីហ៊ុន សែន បានប្រកាសនៅក្នុងសប្ដាហ៍នេះថា នៅក្នុងការប្រយុទ្ធគ្នានាពេលថ្មីៗនេះ កងទព័ថៃបានបាញ់ និងផ្លោងចូលមកទឹកដីកម្ពុជាចំនួនជាង៥ម៉ឺនគ្រាប់។ ក៏ប៉ុន្ដែ ការវាយតម្លៃនេះត្រូវបានច្រានចោលដោយមន្ដ្រីយោធាថៃ។
ក្រសួងការពារជាតិកម្ពុជាបានធ្វើរបាយការណ៍ជាប្រចាំក្នុងអំឡុងពេលនៃការប្រយុទ្ធគ្នាជាមួយកងទព័ថៃថា កងទព័ថៃបានបាញ់កាំភ្លើងធុនធ្ងន់១៥៥មីលីម៉ែត្រ ១០៥មីលីម៉ែត្រ និងកាំភ្លើងផ្លោងជាច្រើនប្រភេទទៀត។
លោក រឿង វុទ្ធិន ជាប្រជាពលរដ្ឋនៅភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ បានឲ្យដឹងថា នៅក្នុងភូមិរបស់គាត់មានស្នាមរណ្តៅគ្រាប់ជាច្រើនកន្លែងចំណែក។ ឯផ្ទះមានស្នាមគ្រាប់កាំភ្លើងសុះផ្ទះ ហើយដើមឈើបានបាក់រលំជាច្រើន។ ដូច្នេះ លោកមានការព្រួយបារម្ភជាខ្លាំងចំពោះសុវតិ្ថភាព ដោយខ្លាចទទួលរងគ្រោះថ្នាក់ដោយសារគ្រាប់ដែលមិនទាន់ផ្ទុះ។
លោកបានបញ្ជាក់ថា នៅពេលនេះ មានការប្រយ័ត្នមែនទែនស្ទើរតែមិនហ៊ានដើរទៅណាទេ ពីព្រោះខ្លាចមានគ្រាប់មិនទាន់ផ្ទុះបង្កគ្រោះថ្នាក់។ ប្រការនេះធ្វើឲ្យមានការប៉ះពាល់យ៉ាងខ្លាំងដល់ជីវភាពរស់នៅពីព្រោះមិនហ៊ានទៅធ្វើស្រែចំការឡើយ។ លោកបន្តថា៖
«បារម្ភទី១ គឺកូនក្មេងដែលវាអត់ដឹង។ អញ្ចឹងខ្លាចវាដើរទៅឃើញ វារើស។ អញ្ចឹងវាអាចផ្ទុះ។ ទី២ មនុស្សចាស់ដើររកប្រកបមុខរបរ ដូចជាច្រូតស្បូវ ដូចជាបេះផ្កា។ ខ្លាចដើរទៅប៉ះផ្ទុះដែរ។ ទី៣ ដីខ្លះដែលយើងសម្រាប់ធ្វើកសិកម្ម ផលវិបាកគឺមិនដឹងជាមាន ឬមិនមាន។ អញ្ចឹងវាពិបាក។ ត្រង់នេះមួយទៀត ដល់ពេលអញ្ចឹងវាប៉ះពាល់ជីវភាព អ្នកស្រុកមិនអាចប្រកបមុខរបរបានទេពីព្រោះគាត់ខ្លាច»។
កម្ពុជានិងថៃមានជម្លោះព្រំដែនជុំវិញប្រាសាទព្រះវិហារខ្មែរអស់រយៈពេលជិត៣ឆ្នាំហើយ។ នៅដើមឆ្នាំ២០១១នេះ មានការវាយប្រហារដោយកម្លាំងយោធានៃប្រទេសទាំងពីរចំនួនពីរលើក គឺលើកទី១នៅថ្ងៃទី៤រហូតដល់ថ្ងៃទី៧ខែកុម្ភៈនៅតំបន់ប្រាសាទព្រះវិហារ ហើយលើកទី២នេះបានចាប់ផ្ដើមពីថ្ងៃទី២២ដល់ថ្ងៃទី០៣ឧសភានេះនៅតំបន់ប្រាសាទតាមាន់និងប្រាសាទតាក្របីខ្មែរ មុននឹងរាលដាលទៅដល់ភូមិថ្មដូន និងឃុំអូរស្មាច់៕
