ភ្ជាប់​ទៅ​គេហទំព័រ​ទាក់ទង

រដ្ឋ​សភា​​យល់​ព្រម​ឱ្យ​កម្ពុជា​ខ្ចីបំណុល​បរទេស​បន្ថែម


រដ្ឋសភា​កម្ពុជា​បាន​អនុម័ត​ឱ្យ​រាជរដ្ឋាភិ​បាល​ខ្ចី​ប្រាក់​បន្ថែម​ជាង​៣០០​លាន​ដុល្លារ អាមេរិក​ដែល​បាន​ចំណាយ​លើស​ថវិកា​ជាតិ​ឆ្នាំ២០០៩​និង​ឆ្នាំ២០១០​ដើម្បី​យក​មក​ធ្វើការ​អភិវឌ្ឍ​ហេដ្ឋា​រចនា​សម្ព័ន្ធ​ប្រព័ន្ធ​ធារា​សាស្ត្រ​កសិកម្ម ​និង​ការ​តភ្ជាប់​បណ្តាញ​ចរន្ត

ភ្នំពេញ៖ រដ្ឋសភា​កម្ពុជា​យល់ព្រម​ឱ្យ​រាជរដ្ឋាភិបាល ​ខ្ចី​ប្រាក់​បំណុល​បន្ថែម​ពី​បរទេស​សម្រាប់​យក​មក​ធ្វើការ​អភិវឌ្ឍនៅក្នុង​វិស័យ​ហេដ្ឋា​រចនា​សម្ព័ន្ធ​ ប្រព័ន្ធ​ធារាសាស្ត្រ​កសិកម្ម ​និង​ប្រព័ន្ធ​បញ្ជូន​ចរន្ត​អគ្គិសនី។ រីឯ​តំណាងរាស្ត្រ​គណបក្ស​ប្រឆាំង​វិញ ​បាន​ព្រមានថា ការខ្ចី​បំណុល​នេះ​អាច​ធ្វើ​ឱ្យ​គ្រោះ​ថ្នាក់​ដល់​អនាគត​របស់​ប្រទេស​កម្ពុជា។

នៅ​ថ្ងៃ​ច័ន្ទ​នេះ​ រដ្ឋសភា​កម្ពុជា​បាន​អនុម័ត​ឱ្យ​រាជរដ្ឋាភិ​បាល​ខ្ចី​ប្រាក់​បន្ថែម​ជាង ​៣០០​លាន​ដុល្លារ​អាមេរិក​ដែល​បាន​ចំណាយ​លើស​ថវិកា​ជាតិ​ឆ្នាំ២០០៩​ និង​ឆ្នាំ២០១០​ ដើម្បី​យក​មក​ធ្វើការ​អភិវឌ្ឍ​ហេដ្ឋា​រចនា​សម្ព័ន្ធ​ប្រព័ន្ធ​ធារា​សាស្ត្រ​កសិកម្ម ​និង​ការ​តភ្ជាប់បណ្តាញ​ចរន្ត​អគ្គិសនី។

សមាជិក​សភា​ចំនួន​៨០រូប​នៃ​សមាជិក​សភា​វត្តមាន​ចំនួន​១០២រូប​នៅក្នុង​សម័យ​ប្រជុំ​សភា​នេះ​បាន អនុម័ត​ច្បាប់​កែតម្រូវ​ស្តីពី​ហិរញ្ញ​វត្ថុ​សម្រាប់​ការគ្រប់គ្រង​ឆ្នាំ២០០៩​ និង​ឆ្នាំ២០១០។

រាជរដ្ឋាភិបាល​បាន​ស្នើ​រដ្ឋសភា​ឱ្យ​អនុម័ត​បន្ថែម​កម្រិត​នៃ​ការខ្ចី​ប្រាក់​ពី​បរទេស​សម្រាប់​ការគ្រប់គ្រង​ឆ្នាំ​២០០៩​ ចំនួន​៣០លាន ​SDR​ ស្មើនឹង៤៦,៨​លាន​ដុល្លារ​សហរដ្ឋ​អាមេរិក​ និង​សម្រាប់​ការគ្រប់គ្រង​ឆ្នាំ២០១០ ​ចំនួន​១៧០​លាន​SDR​ ស្មើ​នឹង​២៦៥​លាន​ដុល្លារ​សហរដ្ឋអាមេរិក។

ថវិកាជាតិ​ឆ្នាំ​២០០៩​មាន​ចំនួន១.​៨០០​លាន​ដុល្លារ​អាមេរិក​ និង​ថវិកា​ជាតិ​ឆ្នាំ២០១០​មាន​ចំនួន​១.៩០០ លាន​ដុល្លារ​អាមេរិក។ ប៉ុន្តែ​រាជរដ្ឋាភិបាល​បាន​ចំណាយ​លើស​ថវិកា​ជាតិ​ឆ្នាំ​២០០៩​ដល់​ទៅ​៤៦,៨ លាន​ដុល្លារ​អាមេរិក ​និង​លើស​ថវិកា​ជាតិឆ្នាំ​២០១០​ដល់​ទៅ​ជាង ​២៦៥លាន​ដុល្លារ​អាមេរិក។

លោក​គាត ឈន់ ​រដ្ឋមន្ត្រី​ក្រសួង​សេដ្ឋកិច្ច​និង​ហិរញ្ញវត្ថុ​បាន​ថ្លែង​នៅក្នុង​សម័យ​ប្រជុំ​សភា​ថា​ រាជ​រដ្ឋាភិបាល​មាន​គោល​នយោបាយ​ច្បាស់លាស់​ដោយ​ខ្ចី​តែ​ប្រាក់​កម្ចី​សម្បទាន​សម្រាប់​យក​មក​វិនិយោគ​នៅក្នុង​វិស័យ​ហេដ្ឋារចនាសម្ព័ន្ធ​រូបវ័ន្ត​ដែល​មាន​ដូច​ជា ​ផ្លូវ ​ស្ពាន​ កំពង់ផែ​ ប្រព័ន្ធធារាសាស្ត្រ​កសិកម្ម ​និង​បណ្តាញ​ប្រព័ន្ធ​បញ្ជូន​ចរន្តអគ្គីសនី​ដើម្បី​ជំរុញ​កំណើន​សេដ្ឋកិច្ច។

«យើង​ខ្ចី​ប្រាក់​មក​សម្រាប់​ផ្លូវ​ ទឹក ​ភ្លើង​ ដើម្បី​ជំរុញ​កំណើន​សេដ្ឋកិច្ច ​ហើយ​ខ្ចី​ដោយ​មាន​ការប្រាក់​ទាប និង​មាន​លក្ខណៈ​សម្បទាន»។

លោក​ ជាម យៀប​ ប្រធាន​គណៈកម្មការ​សេដ្ឋកិច្ច​ និង​ហិរញ្ញវត្ថុ​នៃ​រដ្ឋសភា​បាន​ថ្លែង​ថា ​រាជ​រដ្ឋាភិបាល​ចាំបាច់​ត្រូវតែ​ខ្ចី​ប្រាក់ពី​បរទេស​ ដើម្បី​បំពេញ​តម្រូវការ​ចាំបាច់​របស់​សង្គម​កម្ពុជា។

«(រដ្ឋសភា)​យល់ព្រម​ឱ្យ​រាជរដ្ឋាភិបាល​ខ្ចី​ប្រាក់​ពី​គេ​បន្ថែម​មាន​កម្រិត​៣០លាន​ SDR​ នៅ​ឆ្នាំ​២០០៩ និង​១៧០​លាន​ SDR ​នៅ​ឆ្នាំ​២០១០ ​ដោយ​សេដ្ឋកិច្ច​កម្ពុជា​បាន​ទទួល​រង​ផលប៉ះពាល់​នៃ​វិបត្តិ​សេដ្ឋកិច្ចពិភព​លោក​ចាប់តាំង​ពីចុងឆ្នាំ​២០០៨មក។ ការគ្រប់គ្រង​ប្រភព​ចំណូល​បំពេញ​ការចំណាយ​ថវិកា​ជាតិ ​មាន​ការលំបាក​លំបិន​និង​ដោយសារ​ការឈ្លានពាន​របស់​កងទ័ព​ថៃ​ចូលមក​ក្នុង​ទឹកដី​កម្ពុជា​នៅតំបន់ប្រាសាទ​ព្រះវិហារ។​ រាជរដ្ឋា​ភិបាល​កម្ពុជា ​បាន​ប្តេជ្ញា​ចិត្ត​ខ្ពស់​ ដើម្បី​ការពា​រអធិបតេយ្យ​ភាព​និង​បូរណភាព​ទឹកដី​របស់ខ្លួន​ដោយ​មិន​អនុញ្ញាត​ប្រទេស​ណា​ប្រើ​កម្លាំង​ទ័ព​ដើម្បី​ឈាន​ជើង​មួយមីលីម៉ែត្រ​ចូល​ដល់​កម្ពុជា​តទៀតឡើយ»។

លោក​យឹម សុវណ្ណ ​តំណាងរាស្ត្រ​គណបក្ស​សម រង្ស៊ី​ បាន​ថ្លែង​ថា ​ប្រទេស​កម្ពុជា​ត្រូវការ​ប្រាក់​សម្រាប់​យកមក​អភិវឌ្ឍ​ប្រទេស​ប៉ុន្តែ​ប្រទេស​កម្ពុជា​ត្រូវតែ​ប្រុងប្រយ័ត្ន​ពីការ​ខ្ចី​បំណុល ​ដែល​អាច​មាន​គ្រោះថ្នាក់​ដល់​អនាគត​របស់​ប្រទេស​កម្ពុជា។

«បើ​យើង​ផ្អែក​ទៅ​លើ​ម្ចាស់​បំណុល​ដែល​មើល​ឃើញ​ពី​ធនធាន​ធម្មជាតិ ​ដីធ្លី ​ប្រេងកាត ​និង​ធនធាន​ រ៉ែ​របស់​យើង​មក​រំលោភ​សិទ្ធិ​ប្រជា​ពលរដ្ឋ​របស់​យើង​និង​ខូច​បរិស្ថាន​របស់​យើង​យើង​គួរតែ​ជៀស​វាងដាច់​ខាត។ យើង​គាំទ្រ​ការខ្ចី​បុល ​ប៉ុន្តែ​យើង​មិន​លើកដៃ​គាំទ្រ​ទេ​ដោយសារ​ការបែងចែក​ប្រាក់​កម្ចី»។

លោក​នាយករដ្ឋមន្ត្រី​ ហ៊ុន សែន បាន​ថ្លែង​នៅក្នុង​សេចក្តី​ថ្លែងហេតុ​ជូន​រដ្ឋសភា​ថា ​ទំហំ​ទឹក​ប្រាក់​នៃ​ការខ្ចី​ក្នុង​កម្រិត​ដែល​រាជរដ្ឋាភិបាល​ស្នើសុំ​ការអនុម័ត​បន្ថែម​នេះ​ នឹង​មិន​ធ្វើឱ្យ​បំណុល​កម្ពុជា​ស្ថិត​នៅ​ក្នុង​ស្ថានភាព​គួរឱ្យ​ព្រួយបារម្ភ​នោះ​ទេ៕

XS
SM
MD
LG