នៅថ្ងៃសុក្រនេះចាប់តាំងពីម៉ោង៦ល្ងាចទៅ នៅមជ្ឈមណ្ឌល Meta House នឹងមានការតាំងពិព័រណ៍គំនូររបស់វិចិត្រករខ្មែរ រូបថតរបស់អ្នកឯកទេសខាងថតរូប និងអ្នករចនាក្រាហ្វិក ព្រមទាំងជាងចម្លាក់ខ្មែរជាច្រើនរួមគ្នា ដើម្បីធ្វើការផ្សព្វផ្សាយអំពីការប្រយុទ្ធប្រឆាំងការលក់ដូរនិង ការប្រើប្រាស់ឱសថក្លែងក្លាយនៅក្នុងប្រទេសកម្ពុជា។
រូបផ្ទាំងគំនូរនិមួយៗសុទ្ធតែបញ្ជាក់អំពីគ្រោះថ្នាក់ ដែលបណ្តាលមកពីការប្រើប្រាស់ឱសថក្លែងក្លាយនៅក្នុងប្រទេសកម្ពុជា។ គំរោងពិព័រណ៍នេះបានទទួលការឧបត្ថម្ភពីអង្គការ USP PQM USAID និងអង្គការសប្បុរសធម៌នៅប្រទេសអង់គ្លេសដែលមានឈ្មោះថា Cathy Wills, The Cecil and Hilda Lewis Charitable Trust។ លោក ពេជ្រ សុភាព វិចិត្រករខាងចម្លាក់ បានថ្លែងប្រាប់វីអូអេថា ការតាំងពិព័រណ៍នេះ ក៏ដើម្បីជាការសម្ពោធកន្លែងថ្មីរបស់ Meta House ដែលជាមជ្ឈមណ្ឌលមួយសំរាប់ដាក់បញ្ចូលកម្មវិធីជាច្រើន មានជាអាទិសាលដ៏ធំសំរាប់ការតាំងពិព័រណ៍សិល្បៈ សាលាភាសាអាល្លីម៉ង់ សាលាភាពយន្ត Meta ការបញ្ចាំងភាពយន្តឯកសារ និងមានភោជនីយដ្ឋាន អាតកាហ្វេ (Art Café) ផងដែរ។
“សិល្បករដែលចូលរួមមានទាំងអស់ជាង១០នាក់ មានខ្ញុំជាអ្នកចម្លាក់ និងអ្នកផ្សេងៗទៀតជាអ្នកគូររូប។ កិច្ចការជាច្រើនពោរពេញទៅដោយការយកចិត្តទុកដាក់ មានកម្រិតខ្ពស់ ព្រោះសិល្បករក្រោយពីបានទទួលប្រធានបទអំពីការប្រើប្រាស់ឱសថក្លែង ក្លាយនៅក្នុងប្រទេសកម្ពុជានោះមក ម្នាក់ៗខំប្រឹងប្រែងបញ្ចេញស្នាដៃរៀងខ្លួន ដើម្បីបង្ហាញអំពីការចាប់អារម្មណ៍ និងការខ្វល់ខ្វាយអំពីបញ្ហានេះ” ។
ក្រុមសិល្បករបានរួមគ្នាធ្វើការផ្សព្វផ្សាយអំពីការប្រយុទ្ធប្រឆាំងទល់នឹងការលក់ដូរនិងការប្រើប្រាស់ឱសថក្លែងក្លាយ និងបង្កើនការយល់ដឹងទូលំទូលាយតាមរយៈស្នាដៃសិល្បៈដែលបង្កប់នូវអត្ថន័យអប់រំរបស់ពួកគេ។
“ចំពោះខ្ញុំនិងសិល្បករដទៃទៀតបានដឹងថានៅស្រុកខ្មែរយើងនេះ មានបញ្ហាថ្នាំក្លែងក្លាយច្រើន ហើយដឹងថាមានប៉ះពាល់ដល់សុខភាពពលរដ្ឋ។ បញ្ហានេះជាការខ្វល់ខ្វាយរបស់យើងទាំងអស់គ្នា ហើយក៏មានទាក់ទងដល់កិច្ចការរបស់សិល្បករផងដែរ ព្រោះសិល្បៈអាចជាសារមួយ ប្រាប់សង្គមឲ្យប្រុងប្រយ័ត្ននឹងគ្រោះថ្នាក់” ។
អង្គការសុខភាពពិភពលោកក៏កំពុងយកចិត្តទុកដាក់ជាខ្លាំងទៅលើការប៉ះពាល់ដល់សុខភាពមនុស្ស ដោយសារឱសថក្លែងក្លាយផងដែរ និងដាស់តឿនក្រុមអ្នកប្រើប្រាស់ឱសថឲ្យប្រយ័ត្នប្រយែងពេលទិញថ្នាំយកទៅប្រើ ព្រោះមានថ្នាំជាច្រើនដែលមិនស្របច្បាប់។
ពិព័រណ៍នេះ នឹងមានចូលរួមដោយផលិតករភាពយន្តដ៏ល្បីល្បាញពីសហរដ្ឋអាមេរិក លោក Mark Hammond ដែលជាប្រធាននិងជាអ្នកផ្តួចផ្តើមគំនិតគំរោងតាំងពិព័រណ៍ PHARMACIDE។ លោក Mark Hammond នឹងបញ្ចាំងភាពយន្តឯកសារនិងរូបភាពខ្លីៗរបស់លោក ដែលទាក់ទងនឹងគម្រោងពិព័រណ៍នេះផងដែរ៕