ភ្ជាប់​ទៅ​គេហទំព័រ​ទាក់ទង

ដើម​បណ្ដឹង​ប្តឹង​មេខ្មែរក្រហម​​មួយ​ចំនួន​បាន​ស្លាប់ ​ឬ​ដកខ្លួន​ឈប់​ប្តឹង


ភ្នំពេញ៖ នៅ​ពេល​ដែល​សាលាក្ដី​ខ្មែរ​ក្រហម​បាន​កំពុង​រៀបចំ​ការ​កាត់ទោស​សំណុំ​រឿង​០០២នោះ ​មាន​ដើម​បណ្ដឹង​រដ្ឋប្បវេណី​មួយ​ចំនួន​បាន​ស្លាប់ ​និង​ដកខ្លួន​ចេញពី​ការ​ចូល​រួម​ដំណើរ​ការ​ក្ដី​ដ៏​មាន​សារៈ​សំខាន់​នេះ។

យ៉ាង​ហោច​ណាស់​មាន​អតីត​ជន​រងគ្រោះ​ដោយ​របប​ខ្មែរ​ក្រហម​ចំនួន​២២នាក់​ ដែល​បាន​ដាក់​ពាក្យ​សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​ក្នុង​សំណុំ​រឿង​០០២​ ​បាន​ស្លាប់​បាត់​បង់​ជីវិត ​និង​ជន​រងគ្រោះ​ជិត​១០​នាក់​ផ្សេងទៀត​ និង​បាន​បោះបង់​ចោល​ការ​តស៊ូ​ ​មុន​នឹង​សវនាការ​នៃ​សំណុំ​រឿង​ដ៏​មាន​សារៈ​សំខាន់​នេះ​ចាប់​ផ្ដើម។​ សវនាការ​នេះ​គេរំពឹង​ថា​ ​អាច​នឹង​ប្រព្រឹត្ត​ទៅ​ក្នុង​អំឡុង​ត្រីមាសទីមួយ​ដើម​ឆ្នាំ២០១១។

តួលេខ​នេះត្រូវអះអាង​ដោយ​អង្គការ​ចំនួន​ពីរ​ដែល​បាន​សម្រប​សម្រួល​ និង​ផ្ដល់​មេធាវី​ការពារ​ដល់ម្ចាស់​ដើម​បណ្ដឹង​សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​ ​សរុប​ចំនួន​ជាង​២០០០​បណ្ដឹង។

លោក​ឡាត់ គី ​អ្នក​សម្រប​សម្រួល​កម្មវិធី​សាលាក្ដី​ខ្មែរ​ក្រហម​របស់​អង្គការ​ការពារ​សិទ្ធិ​មនុស្ស​ អាដហុក​ បាន​បញ្ជាក់​ថា​ ​មាន​ជន​រងគ្រោះ​ដោយ​របប​ខ្មែ​ក្រហម​ចំនួន​១៨​នាក់ក្នុង​ចំណោម​អ្នក​សុំតាំង​ខ្លួន​ជា​ដើមបណ្ដឹង​រដ្ឋប្បវេណី​ចំនួន​ ១៨២៧នាក់ដែល​ឆ្លង​កាត់អង្គការ​របស់​លោក​ ​បាន​ស្លាប់​ចាប់​តាំង​ពី​ឆ្នាំ​កន្លង​ទៅ។

លោក​ឡាត់ គី​បន្ថែមថា​ ​មាន​ជន​រងគ្រោះ​មួយ​ចំនួន​ទៀត​បាន​បោះបង់​ចោល​ការ​តស៊ូ​ ដើម្បី​ក្លាយ​ខ្លួន​ជា​ដើម​បណ្ដឹង​រដ្ឋប្បវេណី ​ដោយសារ​ភាព​ចាស់ជរា​ និង​ដោយសារ​រង់ចាំ​ដំណើរ​កាត់​ទោស​ក្នុងសំណុំ​រឿង​០០២ស៊ី​ពេល​វេលា​យូរ​ពេក។

“ទីមួយ​ គាត់​បាន​លើក​ឡើង​អំពី​បញ្ហា​ការ​មិន​យក​ចិត្ត​ទុក​ដាក់​ចំពោះ​រូប​គាត់ ​ធ្វើ​ឲ្យ​គាត់​អត់​មាន​សង្ឃឹម​ក្នុង​ការ​ស្វែង​រក​យុត្តិធម៌​ហ្នឹង​តទៅ​ទៀត​ទេ។ ​គាត់​អត់​ដែល​បាន​ជួប​សាលាក្ដី​ ​ហើយ​សាលាក្ដី​ អត់​ដែល​បាន​ចុះ​ទៅ​ជួប​គាត់។ ​អត់​ដែល​បាន​ទទួល​ព័ត៌មាន​អ្វី​ត្រឡប់​មក​វិញ​អំពី​ការវិវត្តន៍​សាលាក្ដី​ទេ។​ គាត់​ជិន​ណាយ​ចំពោះ​ការ​ស្វែង​រក​យុត្តិ​ធម៌ ​ ​ហើយ​គាត់​មិន​ឃើញ​ដំណើរ​ការសាលាក្ដី​នឹង​វា​ចេញ​លទ្ធផល​យ៉ាង​ម៉េច​ ​ក្រោយ​មក​គាត់បាន​ងាក​ទៅ​កាន់​សិល្បិ៍​ ​ហើយ​គាត់​មាន​ការ​ជឿ​ទៅ​លើ​ព្រះ​ពុទ្ធ​សាសនា​ ​ ហើយ​រម្ងាប់ការ​ស្វែងរក​យុត្តិធម៌​ហ្នឹង​ឲ្យ​មាន​លក្ខណៈ​ស្ងប់​ចិត្ត​ស្ងប់​អារម្មណ៍​ទៅ​វិញ"។

សូម​បញ្ជាក់ថា​ ការ​តាំង​ខ្លួន​ជា​ដើមបណ្ដឹង​រដ្ឋប្បវេណី​ គឺជា​ឆន្ទៈ​របស់​ប្រជា​ពលរដ្ឋ​ដែល​ជា​ជន​រង​គ្រោះ​ ដោយសារ​ការ​ឈឺចាប់​ដែល​ពួក​ខ្លួន​ទទួល​រង​នៅក្នុង​សម័យ​ខ្មែរ​ក្រហម ​និង​ដោយសារ​ចង់​ត​ទល់​ដោយផ្ទាល់​ជាមួយ​អតីត​មេ​ដឹកនាំ​ខ្មែរ​ក្រហម​ និង​អ្នក​ទទួល​ខុស​ត្រូវ​ខ្ពស់​បំផុត​ខ្មែរ​ក្រហម​នៅ​ក្នុង​សវនាការ។

រហូត​មក​ទល់​ពេល​នេះ មាន​ជន​រង​គ្រោះ​ចំនួន​ជាង​៤​០០០​នាក់​ ​បាន​ដាក់​ពាក្យ​សុំ​តាំង​ខ្លួន​ជា​ដើមបណ្ដឹង​រដ្ឋប្បវេណី​ក្នុង​សំណុំ​រឿង​០០២​ ​ ដែល​មាន​ជន​ជាប់ចោទ​ជា​អតីត​មេដឹកនាំ​កំពូល​ខ្មែរ​ក្រហម​ចំនួន​៤នាក់ ​និង​បូក​រួម​ទាំង​ឌុច ​អតីត​ប្រធាន​គុក​ទួលស្លែងផង​ដែរ។​ ឌុចទើប​នឹង​ត្រូវ​ផ្ដន្ទា​ទោស​ដោយ​អង្គ​ជំនុំជម្រះ​សាលាដំបូង​ ​ឲ្យ​ជាប់​ពន្ធនាគារ​ចំនួន​៣៥​ឆ្នាំ​ ​ហើយ​ដែល​នឹង​អាច​ត្រូវ​កាត់ទោស​ក្នុង​សំណុំ​រឿង​លេខ​០០២​ទៀត។ ​រហូត​មក​ទល់​ពេល​នេះ​ ​សាលាក្ដី​ខ្មែរ​ក្រហម​មិនទាន់បាន​ទទួល​ស្គាល់​ដើម​បណ្ដឹង​រដ្ឋប្បវេណី​ចំនួន​ប៉ុន្មាន​ពិតប្រាកដ​នៅ​ឡើយ​ទេ។

យោង​តាម​ក្រុម​អង្គការ​សង្គមស៊ីវិល​ ដែល​ជួយ​សម្រួល​ដល់​ការ​ដាក់​ពាក្យ​បណ្ដឹង​របស់​ជន​រងគ្រោះ​បាន​ឲ្យ​ដឹង​ថា​ ​អ្នក​ដែល​សុំ​តាំងខ្លួន​ជា​ដើម​បណ្ដឹង​រដ្ឋប្បវេណី​មាន​អាយុ​ចន្លោះ​ពី​ជាង​៥០​ឆ្នាំដល់​ ៨០​ឆ្នាំ។

លោក​ស្រី ​ស៊ាល ​ស្ឌូហ្សេនស្គីជា​មេធាវី​របស់​កម្មវិធី​ពិសេស​សម្រាប់​សេវា​កម្ម​ជន​ស៊ីវិលរបស់​ភ្នាក់ងារអភិវឌ្ឈន៍​អាល្លឺម៉ង់ ​ដែល​បាន​ជួយ​ជ្រោមជ្រែង​ជន​រងគ្រោះ​ចំនួន ៥៣២​នាក់​ក្នុង​ការ​ដាក់​ពាក្យ​បណ្ដឹង​ សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​សំណុំ​រឿង០០២។ ​លោកស្រី​មាន​ប្រសាសន៍​ថា​ ​មាន​ម្ចាស់​ដើមបណ្ដឹង​ចំនួន​តិចតួច​ប៉ុណ្ណោះ​ដែល​បាន​ស្លាប់​បាត់បង់​ជីវិត។

“ខ្ញុំ​អាច​ប្រាប់​លោក​យ៉ាង​ជាក់លាក់​ថា​ ​ក្នុង​ចំណោម​ដើម​បណ្ដឹង​ចំនួន​ ៥៣២​នាក់ ​មាន​៤នាក់​បាន​ស្លាប់​កាលពី​ឆ្នាំមុន​ ​បន្ទាប់​ពី​ពួក​គេ​បាន​ដាក់​ពាក្យ​បណ្ដឹង​រួច។​ ២នាក់​ទៀត​ដែល​មិន​ចង់​បន្ដ​ការ​ដំណើរ​ការ​ក្ដី​ ​បាន​ដក​ពាក្យ​បណ្ដឹង​របស់​ខ្លួន​ និង​២នាក់​ទៀត ​ដែល​បាន​ប្ដូរ​ទី​កន្លែង​រស់​នៅ ​បាន​បាត់​ដំណឹង​សូន្យ​ ​មិន​ដឹង​ថា​ ​ពួក​គេ​កំពុង​រស់នៅ​ទីណា​ទេ"។

ទោះ​ជាយ៉ាង​នេះក្ដី​ ​ពុំ​មាន​ការ​បញ្ជាក់​អំពី​មូលហេតុ​ដែលអតីត​ជន​រងគ្រោះ​ដោយ​របប​ខ្មែរ​ក្រហម​ បាន​ស្លាប់នៅ​ក្នុង​ពេល​ដែល​ពួក​គេ​កំពុង​ដាក់​ពាក្យ​បណ្ដឹង ​ដើម្បី​ចូលរួម​ចំណែក​នៅក្នុង​ដំណើរ​ការ​កាត់​ក្ដី​ពួក​អតីត​មេដឹកនាំ​ខ្មែរ​ក្រហម​នោះ​ទេ។​ ក៏ប៉ុន្ដែ​មន្ដ្រី​អង្គការ​សង្គម​ស៊ីវិល​បាន​លើក​ឡើង​ថា ​ភាព​ចាស់​ជរា​និង​កង្វះ​សេវាកម្ម​ធានា​សុខភាព​អាច​ជា​មូលហេតុ​នៃ​មរណ​ភាព​ទាំង​នេះ។

លោក​ស្រីស៊ាល ស្ឌូហ្សេនស្គី ​មាន​ប្រសាសន៍​ថា​ ​ប្រជា​ពល​រដ្ឋ​កម្ពុជា​ដែល​ជា​ជន​រងគ្រោះ​ ​ត្រូវ​ការ​ការ​គាំទ្រ​ដើម្បី​បន្ដ​បណ្ដឹង​របស់​ពួក​គេ។

“ជាទូទៅ​យើង​អាច​និយាយ​បាន​ថា ​ដើម​បណ្ដឹង​រដ្ឋប្បវេណី​របស់​យើង​ជា​ច្រើន​ ត្រូវ​ការ​ជំនួយ​ផ្នែកសុខាភិបាល ​និង​ផ្នែក​ចិត្តសាស្ដ្រ​ ​ហើយ​ពួក​គេ​មាន​ជីវភាព​ក្រីក្រ​ខ្លាំង​ណាស់។ ​ហើយ​នេះ​គឺជា​ទិដ្ឋភាព​ទូទៅ​នៅក្នុង​ប្រទេស​កម្ពុជា។ ​មាន​ប្រជា​ពលរដ្ឋ​កម្ពុជា​ជាច្រើន​មិន​អាច​ទទួល​បាន​ជំនួយសុខា​ភិបាល​ និង​ផ្នែក​ចិត្តសាស្ដ្រ​ទេ"។

លោក​ឡាស អលសិន ​មន្ដ្រី​ផ្នែក​ទំនាក់​ទំនង​កិច្ចការ​ច្បាប់​របស់​សាលាក្ដី​ខ្មែរ​ក្រហម​ មិន​អធិប្បាយ​ច្រើន​ទៅ​លើ​បញ្ហា​នេះ​ទេ​ ដោយ​លោក​មាន​ប្រសាសន៍​ថា ​លោក​មិន​បាន​តាមដាន​ឲ្យ​បាន​ដិត​ដល់។

នៅ​ពេល​ដែល​ចោទ​សួរ​ថា ​ ​ប្រជា​ពលរដ្ឋ​មួយ​ចំនួន​បាន​បោះបង់​ចោល​បណ្ដឹង​របស់​ពួក​គេ​ដោយ​សារ​តែ​ពួក​គេ​យល់​ថា ​នីតិវិធី​របស់​សាលាក្ដី​យូរ​ពេក​ទំរាំ​ដល់​ពេល​កាត់ទោស ​ហើយ​មួយ​វិញ​ទៀត​ ពួក​គេ​បាន​ងាក​ទៅ​រក​ជំនឿ​ព្រះពុទ្ធ​សាសនា​វិញ ​ដើម្បី​រម្ងាប់​នូវ​ការ​តស៊ូ​របស់​ខ្លួន។​ លោក​ឡាស​ អលសិន​មាន​ប្រសាសន៍​ថា​ ​កត្តា​នេះ​អាស្រ័យ​ទៅ​នឹង​បុគ្គល​ម្នាក់ៗ​ជា​អ្នក​សម្រេច​ចិត្ត។

“ខ្ញុំ​គិតថា ​វា​អាស្រ័យ​ទៅ​តាម​ការ​សម្រេច​ចិត្ត​របស់​បុគ្គល​ម្នាក់ ​ដើម្បី​ក្លាយ​ខ្លួន​ជា​ដើម​បណ្ដឹង​រដ្ឋប្បវេណី​ ឬ​ក៏​អត់នោះ"។

ចំពោះការ​លើក​ឡើង​អំពី​កង្វះ​ការ​ធានា​ផ្នែក​សុខភាព​ដល់​ជន​រងគ្រោះ​ដែល​បាន​ដាក់​ពាក្យ​បណ្ដឹង​ ឬថា តើ​អាច​មាន​លទ្ធភាព​គាំទ្រ​ណា​មួយ​ដល់​អតីត​ជន​រងគ្រោះ​ឲ្យ​ដូច​ជន​ជាប់​ចោទ​ដែល​ទទួល​បាន​ការ​យក​ចិត្ត​ទុក​ដាក់​នោះ​ទេ​ ​លោក​ឡាស ​អលសិន​បាន​លើក​ឡើង​ថា​ ​គេ​នៅ​មិន​ទាន់​ដឹង​នៅឡើយ​ ​ហើយ​ជា​គោលការណ៍សំណងនឹង​ត្រូវ​ជាបន្ទុក​របស់ពិរុទ្ធ​ជន។

មាន​ប្រជា​ពល​រដ្ឋ​កម្ពុជា​ជិត​២​លាន​នាក់​បាន​ស្លាប់ ​និង​ត្រូវ​បាន​សម្លាប់​ចោល​ក្នុង​របប​កម្ពុជា​ប្រជាធិប​តេយ្យ​របស់​ពួក​ខ្មែរ​ក្រហម​។​ ​ហើយ​ប្រជា​ពលរដ្ឋ​ខ្មែរ​បាន​រង់ចាំ​យុត្តិធម៌​សម្រាប់​អំពើ​ឃោរឃៅ​នេះ​ អស់​រយៈ​ពេល​ជាង​៣០ឆ្នាំ​មក​ហើយ។​ ការ​កាត់​ទោស​ជន​ជាប់ចោទ​ទាំង​៥នាក់​ ​មាន​ នួន ​ជា​ ​អៀង សារី ​ ​ខៀវ សំផន​ ​អៀង ធីរិទ្ធ​ និង​ឌុច​នៅក្នុង​សំណុំរឿង​០០២​ ​នឹង​ក្លាយ​ទៅជា​ទំព័រ​ប្រវត្តិ​សាស្រ្ដ​មួយ​សម្រាប់​យុត្តិធម៌​នៅ​ពេល​អនាគត៕

XS
SM
MD
LG